An Pinakadakulang Tawo na Nabuhay Kasuarin Pa Man

Kapitulo 74: Sadol ki Marta, Asin Instruksion Dapit sa Pamibi

DURANTE kan ministeryo ni Jesus sa Judea, luminaog sia sa baryo nin Betania. Digdi nag-iistar sinda Marta, Maria, asin an saindang tugang na si Lazaro. Puwedeng nakabisto na ni Jesus an tolong ini kaidto pa sa saiyang ministeryo asin sa siring sia dayupot nang katood ninda. Sabihon pa, si Jesus paduman ngonyan sa harong ni Marta asin inistimar sia kaini.

Si Marta galagang itao ki Jesus an pinakamarahay na yaon sa saiya. Iyo nanggad, dakulang onra na an ipinanugang Mesiyas dumalaw sa harong nin saro! Kaya si Marta nagin sibot-sibot sa pag-andam nin magarbong pagkakan asin sa pag-asikaso sa dakol na iba pang bagay tanganing gibohon na mas nakaoogma asin komportable an pagdalaw ni Jesus.

Sa ibong na kampi, an tugang ni Marta na si Maria nakatukaw sa may pamitisan ni Jesus asin naghihinanyog sa saiya. Dai nahaloy, nagdolok si Marta asin nagsabi ki Jesus: “Kagurangnan, dai ka nakikilabot na pinababayaan ako kan tugang ko na ako sana an mag-asikaso? Kaya, sabihi sia na tabangan ako.”

Pero si Jesus nagsayumang magtaram nin ano man ki Maria. Imbes, saiyang sinadol si Marta huli sa labi-labing paghadit sa materyal na mga bagay: “Marta, Marta,” an maboot niang pagsagwe, “nahahadit ka asin napupurisaw manongod sa dakol na bagay. Minsan siring, nagkapira sanang bagay an kaipuhan, o saro sana.” Si Jesus nagsasabi na dai kaipuhan na gumamit nin dakol na oras sa pag-andam nin dakol na putahe sa pagkakan. An nagkapira sana o maski saro sanang putahe supisyente na.

Marahay an mga intension ni Marta; gusto niang magin mapagpasakat na kagharong. Minsan siring, paagi sa saiyang may paghadit na pag-asikaso sa materyal na mga andam, nalilihisan nia an oportunidad na mag-ako nin personal na pagtotokdo gikan sa mismong Aki nin Dios! Kaya nagkonklusyon si Jesus: “Para sa saiya, pinili ni Maria an marahay na kabtang, asin iyan dai hahaleon sa saiya.”

Kan huri, sa saro pang okasyon, sarong disipulo an naghapot ki Jesus: “Kagurangnan, tokdoi kaming mamibi, kun paanong tinokdoan man ni Juan an saiyang mga disipulo.” Posible na an disipulong ini mayo duman mga saro may kabangang taon na an nakaagi kan itao ni Jesus an modelong pamibi sa saiyang Sermon sa Bukid. Kaya inotro ni Jesus an saiyang mga instruksion pero kan panahon na iyan nagtao sia nin sarong ilustrasyon tanganing idoon an pangangaipong magmaigot sa pagpamibi.

“Siisay saindo an magkakaigwa nin katood,” an pagpoon ni Jesus, “asin maduman sa saiya sa matangang banggi asin masabi sa saiya, ‘Katood, pautanga man ako nin tolong tinapay, huli ta sarong katood ko an kaaabot pa sana sa sako sa pagbaklay asin mayo akong ikapuwesto sa saiya’? An sarong idto na nasa laog magsasabi bilang simbag, ‘Ontok na sa pamumurisaw sa sako. Barat na an pinto, asin an saradit kong aki kadorog ko sa higdaan; dai ako puwedeng bumangon asin magtao saimo nin ano man.’ Ako nagsasabi saindo, Minsan ngani sia dai mabangon asin matao sa saiya nin ano man huli sa pagigin katood nia, tunay na huli sa saiyang mapusong pamimirit sia mabangon asin itatao sa saiya an ano man na kaipuhan nia.”

Paagi sa pagkokomparar na ini dai boot iparisa ni Jesus na si Jehova Dios nagsasayumang sumimbag sa mga kahagadan, arog kan katood sa saiyang estorya. Bako, kundi iiniilustrar nia na kun an sarong nagsasayumang katood mahinanyog sa mapamirit na mga pakiolay, gurano pa daw an satong mamomoton na langitnon na Ama! Kaya nagpadagos si Jesus: “Kaya isinasabi ko sa saindo, Padagos kamong maghagad, asin iyan itatao sa saindo; padagos kamong maghanap, asin iyan makukua nindo; padagos kamong magtoktok, asin iyan bubukasan para sa saindo. Huli ta an gabos na naghahagad nag-aako, asin an gabos na naghahanap nakakakua, asin sa gabos na nagtotoktok iyan bubukasan.”

Dangan nasambitan ni Jesus an bakong sangkap, makasalan na tawong mga ama, na an sabi: “An totoo, siisay na ama dian sa saindo an, kun an saiyang aki humagad nin sira, tibaad tawan sia nin halas imbes na sira? O kun sia humagad man nin sogok, matao sa saiya nin amamatak? Kaya, kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” Iyo nanggad, kanigoan kanakapahihirong pampakosog an itinatao ni Jesus na magin mapamirit sa pagpamibi. Lucas 10:38–11:13.

▪ Taano si Marta ta naggibo nin siring na magarbong mga andam para ki Jesus?

▪ Ano an ginibo ni Maria, asin taano ta tinawan sia ni Jesus nin komendasyon imbes na si Marta?

▪ Ano an nagpahiro ki Jesus na otrohon an saiyang mga instruksion dapit sa pamibi?

▪ Paano iinilustrar ni Jesus an pangangaipong magin mapamirit sa pagpamibi?