An Pinakadakulang Tawo na Nabuhay Kasuarin Pa Man

Kapitulo 75: An Gikanan nin Kaogmahan

DURANTE kan saiyang ministeryo sa Galilea, si Jesus naggibo nin mga milagro, asin inootro nia ini ngonyan sa Judea. Halimbawa, pinaluwas nia sa sarong lalaki an sarong demonyo na nagpogol sa saiyang pagtaram. Napangalas an mga kadaklan, pero an mga kritiko nagpalataw nin kaparehong pagkontra siring kan pinalataw sa Galilea. “Pinaluluwas nia an mga demonyo paagi ki Beelzebub na poon nin mga demonyo,” an sabi ninda. An iba gusto nin mas makosog na ebidensia gikan ki Jesus manongod sa kun siisay sia, asin hinihingoa nindang sugotan sia paagi sa paghagad sa saiya nin sarong tanda hale sa langit.

Naaaraman an saindang iniisip, itinao ni Jesus sa mga kritiko saiya sa Judea an iyo man sanang simbag na itinao nia sa mga taga-Galilea. Sinambit nia na an kada kahadean na nababanga tumang sa saiya man sana magagaba. “Kaya,” an hapot nia, “kun si Satanas nababanga man tumang sa saiya man sana, paano matindog an saiyang kahadean?” Ipinaheling nia an peligrosong kamugtakan kan saiyang mga kritiko paagi sa pagsabing: “Kun paagi sa moro nin Dios na pinapaluwas ko an mga demonyo, tunay na inabotan na kamo kan kahadean nin Dios.”

An mga nakakaheling sa mga milagro ni Jesus maninigong maghimate kaiyan sa paaging arog kan ginibo kan talagang mga nakaheling ki Moises na naggibo nin milagro mga siglo na an nakaagi. Sinda nagkagsing: “Moro iyan nin Dios!” An “moro [man] nin Dios” an nag-ukit kan Sampulong Togon sa mga tablang gapo. Asin an “moro nin Dios”​—an saiyang banal na espiritu, o puwersa aktiba—​an nagpangyari ki Jesus na makapaluwas nin mga demonyo asin magpaomay nin mga naghehelang. Kaya inabotan na nanggad kan Kahadean nin Dios an mga kritikong ini, huling si Jesus, an designadong Hade kan Kahadean, nasa tahaw ninda mismo.

Dangan iinilustrar ni Jesus na an saiyang kakayahan na magpaluwas nin mga demonyo ebidensia kan saiyang kapangyarihan tumang ki Satanas, kun paanong an sarong makosog na tawo minadatong asin dinadaog an armadong marhay na tawo na nagbabantay sa saiyang palasyo. Saiya man na inotro an ilustrasyon na saiyang isinaysay sa Galilea manongod sa sarong marompot na espiritu. An espiritu huminale sa sarong tawo, pero kan an bakante dai panoan kan tawo nin marahay na mga bagay, an espiritu buminalik na may kaibang pito pa, asin an kamugtakan kan tawo mas naggrabe kisa kan dati.

Mantang naghihinanyog sa mga katokdoan na ini, an sarong babae hale sa kadaklan napahiro na kumagsing nin makosog: “Maogma an matris na nagdara sa saimo asin an mga suso na pinagsusuhan mo!” Mantang mawot nin lambang Judia na magin ina nin sarong propeta asin partikular na an Mesiyas, masasabotan na an babaeng ini masabi kaini. Malinaw na naghohona sia na si Maria puwedeng nangorognang magin maogma huli sa pagigin ina ni Jesus.

Alagad, tolos-tolos na itinanos ni Jesus an babae manongod sa tunay na gikanan nin kaogmahan. “Bako,” an simbag nia, “imbes, Maogma an mga nagdadangog kan tataramon nin Dios asin nag-ootob kaiyan!” Nungkang ipinarisa ni Jesus na an saiyang ina, si Maria, maninigong tawan nin espesyal na onra. Imbes, saiyang ipinaheling na an tunay na kaogmahan manonompongan sa pagigin maimbod na lingkod nin Dios, bakong sa ano man na pisikal na relasyon o sa mga naginibo.

Siring kan ginibo nia sa Galilea, tinuyaw man ni Jesus an mga tawo sa Judea huli sa paghagad nin sarong tanda hale sa langit. Sinabi nia sainda na mayo nin tanda na itatao kundi an tanda ni Jonas. Si Jonas nagin tanda kapwa paagi sa tolong aldaw nia sa laog kan sira asin paagi sa saiyang mapusong paghuhulit, na nagbunga kan pagkapahiro sa mga taga-Ninive na magsolsol. “Alagad, uya!” an sabi ni Jesus, “sarong orog pa kisa ki Jonas an yaon digdi.” Kaagid kaiyan, an reyna nin Seba naghanga sa kadonongan ni Salomon. “Alagad, uya!” an sabi man ni Jesus, “sarong orog pa kisa ki Salomon an yaon digdi.”

Ipinaliwanag ni Jesus na kun an saro minapalaad nin lampara, dai nia iyan ibinubugtak sa lugar na tago o sa irarom nin basket kundi sa sarong kandelero tanganing maheling kan mga tawo an liwanag. Puwedeng ipinaparisa nia na an pagtotokdo asin paggibo nin mga milagro sa atubangan kaining matatagas an payong mga tawo sa mga nagdadangog sa saiya ikakokomparar sa pagtago kan liwanag nin lampara. An mga mata kan mga nagmamasid na idto bakong simple, o dai nakatorohok, kaya an katuyohan kan saiyang mga milagro dai naootob.

Kapapaluwas pa sana ni Jesus nin demonyo asin pinangyari niang makataram an sarong pula. Ini maninigong magmotibar sa mga tawong igwa nin simple, o nakatorohok, na mga mata na omawon an mamuraway na kapangganahan na ini asin ibalangibog an maogmang bareta! Minsan siring, manongod sa mga kritikong ini, bako ini an nangyari. Kaya nagkonklusyon si Jesus: “Kun siring, magin alisto ka. Tibaad an liwanag na nasa saimo iyo an kadikloman. Kun siring, kun an saimong bilog na hawak maliwanag na mayo nin ano man na kabtang na madiklom, iyan gabos magigin siring kaliwanag nin sarong lampara na nagtatao saimo nin liwanag paagi sa mga sinag kaiyan.” Lucas 11:​14-36; Exodo 8:​18, 19; 31:18; Mateo 12:​22, 28.

▪ Ano an reaksion sa pagkapaomay ni Jesus sa lalaki?

▪ Ano an “moro nin Dios,” asin paano inabotan kan Kahadean nin Dios an mga naghihinanyog ki Jesus?

▪ Ano an gikanan nin tunay na kaogmahan?

▪ Paano an saro puwedeng magkaigwa nin simpleng mata?