“Dai Pa Ako Nakaheling nin Ano Man na Arog Kaini!”

KAN 1993 an opisina kan Watch Tower Society sa Argentina inimbitaran na magpadara nin sarong ribong delegado sa Santiago, Chile, para sa apat na aldaw na “Banal na Pagtotokdo” na Pandistritong Kombension kan mga Saksi ni Jehova. Ini an enot na bes na an mga tugang na taga-Argentina naimbitaran na magbiyahe bilang sarong dakulang grupo pasiring sa sarong kombension sa ibang nasyon.a An simbag? Labing 8,500 na aplikasyon an nag-arabot, na dian 1,039 delegado an napili.

Katorse gabos na awto an inarkila na magbiyahe nin 1,400 kilometros hale sa Buenos Aires sagkod sa Santiago. An 26-oras na biyahe nagin maogma huli sa magagayon na tanawon. Sa pagbalyo sa Kabukidan nin Andes, an mga delegado nag-agi harani sa Aconcagua, an pinakahalangkaw na alitoktok sa Solnopan na Hemisperyo sa langkaw na 6,960 metros. Nangorognang dai malilingawan an bugsok, pasikosikong paglugsot pa-Chile. An mga drayber nag-ako nin halawig na urupakan huli sa saindang abilidad sa pagmaneho sa siring kadepisil na lugar!

Minsan siring, an pinakamagayon na tanawon manonompongan sa kombension mismo. Sa sarong kinaban na nagkakariribok an mga nasyon asin nag-iiriwal an mga rasa, nakagiginhawa na maheling an nagkakasararong kaburonyogan nin 80,000 hale sa 24 nasyon na nag-atender​—tunay nanggad na sarong internasyonal na asosasyon nin magturugang! Naheheling mismo an pagkasararo sa tahaw kan mga kombensionista, an ibang drayber kan mga awto nagpahayag nin interes na makanood nin orog pa manongod sa mga Saksi ni Jehova. “Dai pa ako nakaheling nin ano man na arog kaini!” an pagkagsing kan saro sa sainda.

[Nota sa Ibaba]