An Pinakadakulang Tawo na Nabuhay Kasuarin Pa Man

Kapitulo 100: An Ilustrasyon Dapit sa mga Mina

Si Jesus posibleng yaon pa sa harong ni Zaqueo, kun saen sia nag-ontok mantang pasiring sa Jerusalem. An saiyang mga disipulo nagtutubod na pag-abot ninda sa Jerusalem, ipapahayag nia na sia an Mesiyas asin patitindogon an saiyang Kahadean. Tanganing itanos an ideyang ini asin ipaheling na an Kahadean haloy pang umabot, si Jesus nagtao nin sarong ilustrasyon.

“An sarong mahal na tawo,” an pagsaysay nia, “nagbiyahe pasiring sa harayong daga tanganing magkua nin makahadeng kapangyarihan para sa saiya man sana dangan magbalik.” Si Jesus an “mahal na tawo,” asin an langit an “harayong daga.” Pag-abot duman ni Jesus, tatawan sia kan saiyang Ama nin makahadeng kapangyarihan.

Alagad, bago naghale, an mahal na tawo nag-apod nin sampulong oripon asin tinawan an kada saro nin pirak na mina, na sinasabi: “Magnegosyo kamo sagkod na ako dumatong.” An sampulong oripon sa enot na kaotoban nagrerepresentar sa enot na mga disipulo ni Jesus. Sa pinadakulang kaotoban, sinda naglaladawan sa gabos na may paglaom na magin kairiba niang paramana sa langitnon na Kahadean.

An mga pirak na mina makantidad na mga kuwarta, na an kada saro katimbang nin mga tolong bulan na tangdan para sa sarong trabahador sa oma. Pero ano an irinirepresentar kan mga mina? Asin sa anong klaseng negosyo iyan dapat gamiton kan mga oripon?

An mga mina nagrerepresentar sa mga rogaring na magagamit kan pinaniaki sa espiritung mga disipulo sa pagpaluwas nin dakol pang paramana kan langitnon na Kahadean sagkod na dumatong si Jesus bilang Hade sa ipinanugang Kahadean. Pakatapos kan saiyang pagkabuhay liwat asin pagpaheling sa saiyang mga disipulo, itinao nia sainda an simbolikong mga mina para sa paggibo nin dakol pang disipulo asin sa siring dinadagdagan an grupong Kahadean nin langit.

“Alagad,” an pagpadagos ni Jesus, “an saiyang mga siudadano naoongis sa [mahal na tawo] asin nagsugo nin sarong grupo nin mga embahador na kasunod nia, tanganing magsabi, ‘Habo kami na an tawong ini maghade sa samo.’” An mga siudadano mga Israelita, o Judio, na bakong kabale an saiyang mga disipulo. Pakatapos na humale si Jesus pasiring sa langit, ipinahayag kan mga Judiong ini paagi sa paglamag sa saiyang mga disipulo na habo ninda na sia an magin saindang hade. Sa paaging ini guminawe sindang arog kan mga siudadano na nagsugo kan grupo nin mga embahador.

Paano ginamit kan sampulong oripon an saindang mga mina? Si Jesus nagpaliwanag: “Nangyari na kan makapuli na sia pakatapos na makua an makahadeng kapangyarihan, ipinagboot nia na apodon sa atubangan nia an mga oripon na ini na tinawan nia kan pirak, tanganing isihon kun ano an saindang nakua paagi sa pagnegosyo. Dangan an enot nagrani, na an sabi, ‘Kagurangnan, an saimong mina nakakua nin sampulong mina.’ Kaya sia nagsabi sa saiya, ‘Marahay an ginibo mo, marahay na oripon! Huli ta sa saditon sanang bagay pinatunayan mo an saimong sadiri na maimbod, pamahalaan mo an sampulong siudad.’ Ngonyan an ikaduwa nagdatong, na an sabi, ‘An saimong mina, Kagurangnan, nakakua pa nin limang mina.’ Nagsabi man sia sa sarong ini, ‘Mamahala ka man sa limang siudad.’”

An oripon na igwang sampulong mina naglaladawan sa sarong grupo nin mga disipulo poon kan Pentecostes 33 C.E. sagkod ngonyan na kabale an mga apostol. An oripon na nakakua nin limang mina nagrerepresentar man sa sarong grupo durante kan iyo man sanang peryodo nin panahon na, sono sa saindang mga oportunidad asin abilidad, dinugangan an mga rogaring kan saindang hade digdi sa daga. An duwang grupo maigot na naghuhulit kan maogmang bareta, asin bilang resulta, dakol na matanos an puso na nagin mga Kristiano. Siyam sa mga oripon an mapanggana sa pagnegosyo asin napaoswag an saindang mga rogaring.

“Alagad,” an pagpadagos ni Jesus, “may saro pang nagdatong, na an sabi, ‘Kagurangnan, uya an saimong mina, na tinongkosan ko sa podong. Aram mo, natatakot ako sa saimo, huli ta ika maringis na tawo; nagkukua ka kan dai mo ibinugtak asin nag-aani ka kan dai mo itinanom.’ Sia nagsabi sa saiya, ‘Gikan sa saimong ngoso hinohokoman taka, maraot na oripon. Aram mo palan na ako maringis na tawo, na nagkukua kan dai ko ibinugtak asin nag-aani kan dai ko itinanom? Kun siring, tadaw ta dai mo ibinugtak an pirak ko sa bangko? Dangan pagpuli ko kutana nakua ko iyan na may interes.’ Asin sia nagsabi sa mga nagtitindog sa harani, ‘Kuana nindo sa saiya an mina asin tawan iyan sa igwa nin sampulong mina.’”

Para sa maraot na oripon, an pagkawara kan simbolikong mina nangangahulogan kan pagkawara nin lugar sa langitnon na Kahadean. Iyo, garo man sana nawara nia an pribilehiyo na mamahala sa sampulong siudad o limang siudad. Mangnohon man na an oripon dai ipinahayag na maraot huli sa ano man na ginibo niang karatan kundi, imbes, huli sa dai pagtrabaho tanganing madugangan an kayamanan kan kahadean kan saiyang kagurangnan.

Kan an mina kan maraot na oripon itinao sa enot na oripon, ginibo an reklamo: “Kagurangnan, igwa na sia nin sampulong mina!” Pero, si Jesus nagsimbag: “An igwa na, tatawan pa; alagad an mayo, minsan an yaon na sa saiya kukuanon pa. Dugang pa, an mga kaiwal kong ini na habo na ako magin hade sa sainda daraha nindo digdi asin gadana nindo sinda sa atubangan ko.” Lucas 19:​11-27; Mateo 28:​19, 20.

▪ Ano an dahelan kan pagtao ni Jesus kan ilustrasyon dapit sa mga mina?

▪ Siisay an mahal na tawo, asin ano an lugar na saiyang dinumanan?

▪ Sairisay an mga oripon, asin ano an irinirepresentar kan mga mina?

▪ Sairisay an mga siudadano, asin paano ninda ipinaheling an saindang pagkaongis?

▪ Taano an sarong oripon ta inapod na maraot, asin ano an kahulogan kan pagkawara kan saiyang mina?

(Ipagpapadagos sa masunod na luwas.)