An Pinakadakulang Tawo na Nabuhay Kasuarin Pa Man

Kapitulo 99: Si Jesus Nagtokdo sa Jerico

Dai nahaloy si Jesus asin an mga kadaklan na kaiba niang nagbibiyahe nagdatong sa Jerico, na sarong siudad na mga sarong aldaw na babaklayon hale sa Jerusalem. Minalataw na an Jerico sarong dobleng siudad, na an daan na Judiong siudad mga saro may kabangang kilometro an rayo sa mas bagong Romanong siudad. Mantang an mga kadaklan paluwas sa daan na siudad asin palaog sa bago, nadangog nin duwang butang makilimos an pagkariribok. An saro sa sainda Bartimeo an ngaran.

Kan maaraman na si Jesus an minaagi, si Bartimeo asin an saiyang kaiba nagpoon na kumurahaw: “Kagurangnan, maherak ka samo, Aki ni David!” Kan estriktong sinabihan sinda kan kadaklan na sumilensio, orog pa sindang nagkurahaw asin sa mas makosog na tingog: “Kagurangnan, maherak ka samo, Aki ni David!”

Kan madangog an ribok, si Jesus uminontok. Ipinaapod nia sa saiyang kairiba an mga nagkukurahaw. An mga ini nagdolok sa butang mga makilimos asin nagsabi sa saro sa sainda: “Magmapuso ka, bumuhat ka, inaapod ka nia.” Sa labi-labing kagayagayahan, hinukas kan buta an saiyang pan-ibabaw na gubing, tuminindog nin madali, asin duminolok ki Jesus.

“Ano an boot nindong gibohon ko para sa saindo?” an hapot ni Jesus.

“Kagurangnan, buklata an samong mga mata,” an pakimaherak kan duwang buta.

Napahiro nin pagkaherak, dinootan ni Jesus an saindang mga mata. Sono sa tala ni Marcos, si Jesus nagsabi sa saro sa sainda: “Lakaw, pinaomayan ka kan saimong pagtubod.” Tolos-tolos na nakaheling an mga buta, asin mayong duwa-duwa na sinda pareho nagpoon na magpamuraway sa Dios. Kan maheling kan gabos na tawo an nangyari, sinda nag-omaw man sa Dios. Mayong pag-atraso, si Bartimeo asin an saiyang kaiba nagpoon na sumunod ki Jesus.

Mantang minaagi si Jesus sa Jerico, kadakoldakol kan kadaklan. An gabos gustong maheling an saro na nagpaomay sa mga buta. An mga tawo nagsurusuan ki Jesus hale sa gabos na direksion, asin bilang resulta, an iba dai na ngani sia naheheling. Kabilang digdi si Zaqueo, an poon kan mga parasingil nin buhis sa laog asin palibot kan Jerico. Hababaon sia kaya dai nia naheheling an nangyayari.

Kaya nagdalagan paenotan si Zaqueo asin nagsakat sa poon nin higos-sicomoro sa may aagihan ni Jesus. Sa halangkaw na kamugtakan na ini, maheheling niang marhay an gabos. Kan nagdadangadang an mga kadaklan, nagtangad si Jesus sa kahoy: “Zaqueo, dali asin humilig ka, huli ta ngonyan ako kaipuhan na dumagos sa saimong harong.” Huminilig si Zaqueo na naggagayagaya asin naghihidaling nagpuli tanganing andamon an mga bagay-bagay para sa saiyang bantog na bisita.

Alagad, kan maheling kan mga tawo an nangyayari, sinda gabos nagpoon na maghiringhingan. Ibinibilang nindang sala para ki Jesus na magin bisita kan siring na tawo. Aram nindo, si Zaqueo nagyaman paagi sa madayang pangingikil nin kuwarta sa saiyang negosyong paniningil nin buhis.

Dakol na tawo an nagsurunod, asin paglaog ni Jesus sa harong ni Zaqueo, sinda nagreklamo: “Sia nagdagos sa tawo na parakasala.” Pero naheling ni Jesus ki Zaqueo an potensial na magsolsol. Asin si Jesus dai nasala, huli ta si Zaqueo tuminindog asin nagpaisi: “Uya! An kabanga kan sakong mga rogaring, Kagurangnan, itatao ko sa mga dukha, asin an ano man na kinua ko sa pirit sa kiisay pa man paagi sa falsong akusasyon isusulit ko nin apat na doble.”

Pinatunayan ni Zaqueo na tunay an saiyang pagsolsol paagi sa pagtao kan kabanga kan saiyang mga rogaring sa mga dukha asin paggamit kan kabanga pa sa pagbayad sa mga dinaya nia. Minalataw na kaya niang kuwentahon sa saiyang mga rekord sa buhis kun gurano an babayadan nia sa mga tawong ini. Kaya nagsumpa sia na masulit nin apat na doble, bilang pagsunod sa pagboot nin Dios na nagsasabi: ‘Kun an sarong tawo maghabon nin sarong karnero, babayadan nia nin apat na karnero an karnerong iyan.’

Naogma si Jesus sa paagi nin pagpanuga ni Zaqueo na ipanao an saiyang mga rogaring, huli ta Sia nagsabi: “Sa aldaw na ini an kaligtasan nagdatong sa harong na ini, huli ta sia aki man ni Abraham. Huli ta an Aki nin tawo nagdatong sa paghanap asin pagligtas kan nawara.”

Dai pa sana nahaloy, iinilustrar ni Jesus an situwasyon kan ‘nawara’ paagi sa saiyang estorya manongod sa gastador na aki. Ngonyan igwa kita nin buhay na halimbawa nin sarong nawara na nanompongan. Minsan ngani an mga namomoon sa relihiyon asin an mga nagsusurunod sa sainda naggugurumodgumod asin nagrereklamo manongod sa pagtao ni Jesus nin atension sa mga tawong arog ni Zaqueo, si Jesus nagpadagos na hanapon asin ibalik an nawawarang mga aking ini ni Abraham. Mateo 20:​29-34; Marcos 10:​46-52; Lucas 18:35–19:10; Exodo 22:1.

▪ Saen, minalataw, na nanompongan ni Jesus an butang mga makilimos, asin ano an ginibo nia para sa sainda?

▪ Siisay si Zaqueo, asin taano ta nagsakat sia sa kahoy?

▪ Paano pinatunayan ni Zaqueo an saiyang pagsolsol?

▪ Anong leksion an satong manonodan sa pagtrato ni Jesus ki Zaqueo?