An Pinakadakulang Tawo na Nabuhay Kasuarin Pa Man

Kapitulo 116: Pag-andam sa mga Apostol Para sa Saiyang Paghale

Tapos na an pamanggihan na memorial, alagad si Jesus asin an saiyang mga apostol yaon pa sa kuwarto sa itaas. Minsan ngani mahale si Jesus sa dai na mahahaloy, kadakol pa siang sasabihon. “Dai mahadit an saindong puso,” an pagranga nia sainda. “Tumubod kamo sa Dios.” Alagad saiyang idinugang: “Tumubod man kamo sa sako.”

“Sa harong kan sakong Ama kadakol kan ontokan,” an pagpadagos ni Jesus. “Ako maduman tanganing mag-andam nin lugar para sa saindo . . . tanganing kun saen ako duman man kamo. Asin sa dudumanan ko tatao kamo kan dalan.” An mga apostol dai nakakasabot na si Jesus nagtataram manongod sa paghale pasiring sa langit, kaya si Tomas naghapot: “Kagurangnan, dai mi aram kun saen ka maduman. Paano ngani na makaaram kami kan dalan?”

“Ako iyo an dalan asin an katotoohan patin an buhay,” an simbag ni Jesus. Iyo, solamente paagi sa pag-ako sa saiya asin pag-arog sa saiyang dalan nin buhay na an siisay man makakalaog sa langitnon na harong kan Ama huli ta, siring kan sabi ni Jesus: “Mayo nin makaduduman sa Ama kun bakong huli sa sako.”

“Kagurangnan, pahelingan sa samo an Ama,” an pakiolay ni Felipe, “asin igo na iyan para sa samo.” Malinaw na gusto ni Felipe na si Jesus magtao nin naheheling na kapahayagan nin Dios, arog kan itinao kan suanoy na mga panahon sa mga bisyon na itinao ki Moises, Elias, asin Isaias. Alagad, an totoo, an mga apostol igwa nin sarong bagay na orog pa karahay kisa kan arog kaiyan na klase nin mga bisyon, siring kan ikinomento ni Jesus: “Nakaibahan na daw nindo ako sa haloyon nang panahon, asin dai mo pa giraray ako namimidbid, Felipe? An nakaheling sa sako nakaheling man sa Ama.”

Lubos na gayong ipinabanaag ni Jesus an personalidad kan saiyang Ama kaya an pamumuhay sa kaibahan nia asin pagmasid sa saiya garo man sana arog sa aktuwal na pakaheling sa Ama. Minsan siring, an Ama mas halangkaw sa Aki, siring kan pag-ako ni Jesus: “An mga bagay na sinasabi ko sa saindo dai ko itinataram hale sa sako man sana.” Tamang itinao ni Jesus sa saiyang langitnon na Ama an gabos na kredito sa saiyang mga katokdoan.

Siertong nakapakokosog nanggad para sa saiyang mga apostol na madangog ngonyan si Jesus na nagtataram sa sainda: “An minatubod sa sako, an saro man na iyan makagigibo sa mga gibo na ginigibo ko; asin magibo sia nin mga gibo na orog pa kaini”! Dai boot sabihon ni Jesus na an saiyang mga parasunod magkakaigwa nin mas dakulang milagrosong mga kapangyarihan kisa sa saiya. Dai, kundi boot niang sabihon na sinda magibo kan ministeryo sa mas halawig na panahon, sa mas mahiwas na lugar, asin sa mas dakol na tawo.

Dai pababayaan ni Jesus an saiyang mga disipulo pakahale nia. “An ano man na hagadon nindo sa ngaran ko,” an panuga nia, “gigibohon ko ini.” Dugang pa, sia nagsabi: “Makikimaherak ako sa Ama asin tatawan nia kamo nin saro pang paratabang tanganing makaibanan nindo sagkod lamang, an espiritu kan katotoohan.” Kan huri, pakasakat nia sa langit, ibinubo ni Jesus sa saiyang mga disipulo an banal na espiritu, an saro pang paratabang na ini.

Harani na an paghale ni Jesus, arog kan sabi nia: “Kadikit pang panahon asin an kinaban dai na makakaheling sa sako.” Si Jesus magigin espiritung linalang na mayong tawo na makakaheling. Alagad sa giraray si Jesus nanuga sa saiyang maimbod na mga apostol: “Kamo makakaheling sa sako, huli ta ako buhay asin kamo mabubuhay.” Iyo, si Jesus bako sanang mapaheling sa sainda sa pormang tawo pagkabuhay nia liwat kundi sa itinalaan na panahon bubuhayon nia sinda liwat kaiba nia sa langit bilang espiritung mga linalang.

Isinabi ngonyan ni Jesus an simpleng susundon: “An igwa kan sakong mga togon asin minaotob kaiyan, an sarong iyan iyo an namomoot sa sako. Asin an namomoot sa sako mamomotan man kan sakong Ama, asin ako mamomoot sa saiya asin ihahayag ko an sakong sadiri sa saiya.”

Ngonyan si apostol Judas, an saro na inaapod man na Tadeo, nakitumoy: “Kagurangnan, ano an nangyari ta intension mo na ihayag an saimong sadiri sa samuya asin bakong sa kinaban?”

“Kun an siisay man namomoot sa sako,” an simbag ni Jesus, “ootobon nia an sakong tataramon, asin an sakong Ama mamomoot sa saiya . . . An dai namomoot sa sako dai nag-ootob sa sakong mga tataramon.” Bakong arog kan saiyang makinuyog na mga parasunod, dai iniintindi kan kinaban an mga katokdoan ni Cristo. Kaya dai nia sa sainda ihinahayag an saiyang sadiri.

Durante kan saiyang ministeryo sa daga, dakol an itinokdo ni Jesus sa saiyang mga apostol. Paano ninda iyan gabos magigirumdoman, nangorogna huling, dawa sagkod sa oras na ini, dakol sindang dai nasasabotan? Nakaoogma nanggad, si Jesus nanuga: “An paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.”

Rinaranga giraray sinda, si Jesus nagsabi: “Winawalatan ko kamo nin katoninongan, itinatao ko saindo an sakong katoninongan. . . . Dai mahadit an saindong puso.” Totoo, pahale si Jesus, alagad ipinaliwanag nia: “Kun kamo namomoot sa sako, kamo maggagayagaya na ako maduman sa Ama, huli ta an Ama orog na dakula kisa sako.”

Halipot na sana an natatadang panahon ni Jesus sa kaibahan ninda. “Dai na ako magtataram saindo nin dakol,” an sabi nia, “huli ta an poon kan kinaban madatong. Asin mayo siang kapangyarihan sa sako.” Si Satanas na Diablo, an saro na nakalaog ki Judas asin nagkaigwa nin kapangyarihan sa saiya, iyo an poon kan kinaban. Alagad mayo nin makasalan na kaluyahan ki Jesus na puwedeng aprobetsaran ni Satanas tanganing patalikodon sia sa paglilingkod sa Dios.

Pagkamit nin Dayupot na Relasyon

Kasunod kan pamanggihan na memorial, pinakokosog ni Jesus an saiyang mga apostol paagi sa impormal na puso-sa-pusong orolay. Puwedeng matanga nang marhay. Kaya nagsadol si Jesus: “Buhat kamo, maghale na kita digdi.” Alagad, bago sinda naghale, si Jesus, huling napahiro kan saiyang pagkamoot sa sainda, padagos na nagtataram, na nagtatao nin nakamomotibar na ilustrasyon.

“Ako iyo an tunay na poon nin ubas, asin an sakong Ama iyo an paraataman,” an pagpoon nia. An Dakulang Paraataman, si Jehova Dios, itinanom an simbolikong poon nin ubas na ini kan lahidan nia si Jesus kan banal na espiritu sa saiyang bautismo kan tigholog nin 29 C.E. Alagad ipinaheling ni Jesus na bako sanang sia an isinisimbolo kan poon nin ubas, na nagkokomento: “An lambang sanga sa sako na dai nagbubunga hinahale nia, asin an lambang nagbubunga linilinig nia, tanganing iyan magbunga nin orog. . . . Kun paanong an sanga dai makakapagbunga sa saiya man sana kun dai iyan magdanay sa poon nin ubas, ni kamo man, kun dai kamo magdanay na kasaro ko. Ako an poon nin ubas, kamo an mga sanga.”

Kan Pentecostes, 51 aldaw an nakalihis, an mga apostol asin iba pa nagin mga sanga kan poon nin ubas kan an banal na espiritu ibubo sa sainda. Sa katapustapusi, 144,000 katawo an nagin sanga kan piguratibong poon nin ubas. Kaiba kan lawas kan poon nin ubas, si Jesu-Cristo, an mga ini minakompuwesto nin simbolikong poon nin ubas na nagpapaluwas kan mga bunga kan Kahadean nin Dios.

Ipinaliwanag ni Jesus an liyabe sa pagpaluwas nin bunga: “An nagdadanay na kasaro ko, asin ako kasaro nia, an sarong ini nagbubunga nin dakol; huli ta kun siblag sa sako mayo kamong magigibong ano man.” Alagad, kun an saro dai makapaluwas nin bunga, si Jesus nagsabi, “sia itinatapok bilang sanga asin naaalang; asin tinitipon nin mga tawo an mga sangang iyan asin isinusugba sa kalayo asin sinda natototong.” Sa ibong na kampi, si Jesus nanuga: “Kun kamo magdanay na kasaro ko asin an sakong mga tataramon magdanay dian sa saindo, hagada nindo an ano man na boot nindo asin iyan gigibohon para sa saindo.”

Dugang pa, si Jesus nagsabi sa saiyang mga apostol: “An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo.” An bunga na minamawot nin Dios hale sa mga sanga iyo an pagpaheling ninda kan arog-Cristong mga kuwalidad, partikularmente an pagkamoot. Saro pa, huling si Cristo sarong parabalangibog kan Kahadean nin Dios, kabale man sa minamawot na bunga an saindang aktibidad na paggibo nin mga disipulo arog kan ginibo nia.

“Magdanay kamo sa sakong pagkamoot,” an sadol ngonyan ni Jesus. Minsan siring, paano iyan magigibo kan saiyang mga apostol? “Kun otobon nindo an sakong mga togon,” an sabi nia, “magdadanay kamo sa sakong pagkamoot.” Sa pagpadagos, si Jesus nagpaliwanag: “Ini an sakong togon, na kamo magkaminorootmootan siring kan pagkamoot ko sa saindo. Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.”

Nagkapira na sanang oras, ipapaheling ni Jesus an nangongorog na pagkamoot na ini paagi sa pagtao kan saiyang buhay para sa saiyang mga apostol, patin man sa gabos na iba pa na magtutubod sa saiya. An saiyang halimbawa maninigong magpahiro sa saiyang mga parasunod na magkaigwa kan iyo man sanang mapagsakripisyo sa sadiring pagkamoot para sa lambang saro. An pagkamoot na ini magpapamidbid sa sainda, arog kan naenot nang sinabi ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”

Minimidbid an saiyang mga katood, si Jesus nagsabi: “Kamo an mga katood ko kun gibohon nindo an mga pagboot ko sa saindo. Dai ko na kamo inaapod na mga oripon, huli ta an oripon dai nakakaaram sa ginigibo kan saiyang kagurangnan. Kundi inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.”

Kanigoan kahalagang relasyon na mapapasato​—na magin dayupot na mga katood ni Jesus! Alagad tanganing padagos na magkamit kan relasyon na ini, an saiyang mga parasunod dapat na “padagos na magbunga.” Kun gigibohon ninda iyan, si Jesus nagsabi, “ano man an hagadon nindo sa Ama sa ngaran ko [itatao] nia sa saindo.” Sierto nanggad, iyan dakulang balos huli sa pagpaluwas nin bunga kan Kahadean! Pakasadola giraray sa saiyang mga apostol na “magkaminorootmootan,” ipinaliwanag ni Jesus na an kinaban maoongis sa sainda. Pero, rinanga nia sinda: “Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo.” Dangan ihinayag ni Jesus kun taano an kinaban ta naoongis sa saiyang mga parasunod, na sinasabi: “Huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo.”

Orog pang ipinaliliwanag an dahelan kan pagkaongis kan kinaban, si Jesus nagpadagos: “Gigibohon ninda an gabos na bagay na ini tumang sa saindo huli sa ngaran ko, huli ta dai ninda namimidbid sia [si Jehova Dios] na nagsugo sa sako.” An milagrosong mga gibo ni Jesus garo man sana kinondenar an mga naoongis sa saiya, siring kan sabi nia: “Kun dai ko ginibo sa tahaw ninda an mga gibo na mayo pa nin ibang minagibo, mayo kutana sinda nin kasalan; alagad ngonyan nakaheling na sinda asin naongis na sa sako asin sa sakong Ama.” Kaya, arog kan sabi ni Jesus, an kasuratan naotob: “Ikinaongis ninda ako na mayo nin dahelan.”

Arog kan ginibo nia bago kaini, rinanga giraray sinda ni Jesus paagi sa panunuga na isusugo an paratabang, an banal na espiritu, na iyo an makapangyarihan na puwersa aktiba nin Dios. “An sarong iyan magpapatotoo dapit sa sako; asin kamo kaipuhan man na magpatotoo.”

Dugang Pang Sadol Bago Maghale

Si Jesus asin an mga apostol andam nang humale sa kuwarto sa itaas. “An mga bagay na ini itinaram ko saindo tanganing dai kamo magkasiringkog,” an pagpadagos nia. Dangan itinao nia an solemneng patanid: “Kamo pahahaleon nin mga tawo sa mga sinagoga. Sa katotoohan, maabot an oras na an lambang gumadan sa saindo maghohona na nakagibo sia nin banal na paglilingkod sa Dios.”

An mga apostol malinaw na napurisaw na marhay kan patanid na ini. Minsan ngani naenot nang sinabi ni Jesus na an kinaban maoongis sa sainda, dai nia ihinayag nin siring kadirekta na sinda gagadanon. “Dai ko nguna [ini] isinabi sa saindo,” an paliwanag ni Jesus, “huli ta ako nasa kaibahan nindo.” Minsan siring, kanigoan karahay na patienot na sindang andamon paagi sa impormasyon na ini bago sia maghale!

“Alagad ngonyan,” an pagpadagos ni Jesus, “ako maduman sa saiya na nagsugo sa sako, alagad mayo ni saro sa saindo na naghahapot sako, ‘Saen ka maduman?’” Amay pa kan banggi, naghapot sinda kun saen sia maduman, alagad ngonyan natikbahan sindang marhay kan sinabi nia sa sainda kaya dai na ninda nahimong maghapot pa manongod kaini. Siring kan sabi ni Jesus: “Huli ta itinaram ko sa saindo an mga bagay na ini napano nin kamondoan an saindong puso.” Namomondo an mga apostol bako sanang huli ta naaraman ninda na maagi sinda nin makaturotristeng paglamag asin gagadanon kundi huli ta babayaan sinda kan saindang Kagurangnan.

Kaya nagpaliwanag si Jesus: “Para sa saindong kapakinabangan na ako mahale. Huli ta kun dai ako maghale, an paratabang dai madigdi sa saindo; alagad kun ako paduman, isusugo ko sia sa saindo.” Bilang sarong tawo, si Jesus puwede sanang mamugtak sa sarong lugar sa sarong panahon, alagad kun sia yaon duman sa langit, ikakasugo nia an paratabang, an banal na espiritu nin Dios, sa saiyang mga parasunod saen man sinda digdi sa daga. Kaya an paghale ni Jesus magigin kapakipakinabang.

An banal na espiritu, an sabi ni Jesus, “matao sa kinaban nin nakakakombensir na patotoo dapit sa kasalan asin dapit sa katanosan patin dapit sa paghokom.” An kasalan kan kinaban, an dai kaiyan pagtubod sa Aki nin Dios, ibubuyagyag. Dugang pa, an nakakakombensir na patotoo dapit sa katanosan ni Jesus ipapaheling kan saiyang pagsakat sa Ama. Asin an pagkasudya ni Satanas asin kan saiyang maraot na kinaban na raoton an integridad ni Jesus nakakakombensir na patotoo na an poon kan kinaban sinilotan na.

“Igwa pa ako nin dakol na isasabi saindo,” an pagpadagos ni Jesus, “alagad ta dai pa nindo iyan kaya ngonyan.” Kaya ipinanunuga ni Jesus na kun ibubo na nia an banal na espiritu, na iyo an puwersa aktiba nin Dios, gigiyahan sinda kaiyan pasiring sa pakasabot sa mga bagay na ini sono sa saindang kakayahan na saboton iyan.

An mga apostol partikularmenteng dai nakasabot na si Jesus magagadan dangan mapaheling sa sainda pakatapos na sia buhayon liwat. Kaya sinda nagpaharapothapot: “Ano an boot sabihon kaini na sia nagsasabi sa sato, ‘Sa kadikit na panahon dai nindo ako maheheling, asin, sa giraray, sa kadikit na panahon maheheling nindo ako,’ asin, ‘huli ta ako maduman sa Ama’?”

Narealisar ni Jesus na sia boot nindang hapoton, kaya sia nagpaliwanag: “Sa katotoohan sinasabi ko saindo, Kamo magtatarangis asin mag-aaragrangay, alagad an kinaban maggagayagaya; kamo mamomondo, alagad an saindong kamondoan magigin kagayagayahan.” Sa huri kan aldaw na iyan, pagkahapon, kan gadanon si Jesus, an mga namomoon sa relihiyon kan kinaban naggayagaya, alagad an mga disipulo nagmondo. Alagad an saindang kamondoan nagin kagayagayahan kan si Jesus buhayon liwat! Asin an saindang kagayagayahan nagpadagos kan tawan nia sinda nin kapangyarihan kan Pentecostes tanganing magin saiyang mga saksi paagi sa pagbubo sa sainda kan banal na espiritu nin Dios!

Ikinokomparar an situwasyon kan mga apostol sa situwasyon nin sarong babae durante kan kolog sa pangangaki kaini, si Jesus nagsabi: “An sarong babae, kun sia nangangaki, igwa nin kamondoan, huli ta an saiyang oras nagdatong na.” Alagad sinabi ni Jesus na dai na nagigirumdoman kan babae an saiyang kakologan oras na mamundag an saiyang aki, asin pinakosog nia an saiyang mga apostol, na sinasabi: “Kaya kamo man ngonyan igwa nanggad nin kamondoan; alagad maheheling ko kamo liwat [pagkabuhay ko liwat] asin an saindong puso maggagayagaya, asin mayo nin siisay man na makua sa saindo kan saindong kagayagayahan.”

Sagkod sa oras na ini, an mga apostol dai pa noarin man naghagad sa ngaran ni Jesus. Alagad sinabi nia ngonyan: “Kun humagad kamo sa Ama nin ano man iyan itatao nia sa saindo sa ngaran ko. . . . Huli ta an Ama mismo nagpapadangat sa saindo, huli ta kamo nagpadangat sa sako asin tuminubod na ako nagdatong bilang representante kan Ama. Hale ako sa Ama asin nagdigdi sa kinaban. Dugang pa, babayaan ko an kinaban asin maduman ako sa Ama.”

An mga tataramon ni Jesus dakulang pagpakosog sa mga apostol. “Huli kaini kami minatubod na ika hale sa Dios,” an sabi ninda. “Ano, minatubod kamo ngonyan?” an hapot ni Jesus. “Uya! an oras madatong, sa katunayan, iyan nagdatong na, na kamo magkakawararak an lambang saro sa saiyang sadiring harong asin babayaan nindo ako na magsolosolo.” Garo baga bakong kapanipaniwala, nangyari ini bago natapos an banggi!

“Isinabi ko an mga bagay na ini sa saindo tanganing paagi sa sako magkaigwa kamo nin katoninongan.” Si Jesus nagkonklusyon: “Sa kinaban magkakaigwa kamo nin kasakitan, alagad magmapuso kamo! Nadaog ko an kinaban.” Nadaog ni Jesus an kinaban paagi sa maimbod na paggibo kan kabotan nin Dios sa ibong kan gabos na hinihingoang gibohon ni Satanas asin kan saiyang kinaban tanganing raoton an integridad ni Jesus.

Pantapos na Pamibi sa Kuwarto sa Itaas

Napahiro nin hararom na pagkamoot sa saiyang mga apostol, inaandam sinda ni Jesus para sa saiyang nagdadangadang na paghale. Ngonyan, pakatapos na sinda sadolon asin rangahon nin harohalawig, itiningkalag nia an saiyang mga mata sa langit asin pinakiolayan an saiyang Ama: “Pamurawaya an saimong aki, tanganing pamurawayon ka kan saimong aki, sono sa pagkatao mo sa saiya nin kapangyarihan sa gabos na laman, tangani na, kun manongod sa bilog na kabilangan na itinao mo sa saiya, matawan nia sinda nin buhay na daing katapusan.”

Kanigoan kanakapakokosog na tema an iinintrodusir ni Jesus​—buhay na daing katapusan! Huling tinawan na nin “kapangyarihan sa gabos na laman,” ikakatao ni Jesus an mga pakinabang sa saiyang pantubos na atang sa bilog na magagadanon na katawohan. Pero, nagtatao sia nin “buhay na daing katapusan” sa mga inooyonan sana kan Ama. Ginigibong pundasyon an temang ini dapit sa buhay na daing katapusan, ipinadagos ni Jesus an saiyang pamibi:

“Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” Iyo, an kaligtasan nasasarig sa pagkua niato nin kaaraman manongod kapwa sa Dios asin sa saiyang Aki. Alagad bako sanang kaaraman sa payo an kaipuhan.

Dapat na sinda mamidbid nin saro sa dayupot na paagi, na nagpapatalubo nin mapagsabot na pakikikatood sa sainda. An saboot nin saro dapat na arog kan saboot ninda dapit sa mga bagay asin helingon an mga bagay paagi sa saindang mga mata. Asin orog sa gabos, an saro dapat na maghingoang arogon an saindang daing kaagid na mga kuwalidad sa pakiibaiba sa iba.

Sunod namibi si Jesus: “Pinamuraway taka sa daga, na hinaman ko an trabaho na itinao mo sakong gibohon.” Huling naotob na an saiyang asignasyon sagkod sa oras na ini asin kompiado na sa saiyang magigin kapangganahan, sia nakimaherak: “Ama, pamurawaya ako sa kataed mo kan kamurawayan na dating yaon sa sako bago an kinaban.” Iyo, hinahagad nia ngonyan na ikabalik sia sa saiyang langitnon na kamurawayan kaidto paagi sa pagkabuhay liwat.

Sinusumaryo an saiyang pangenot na gibohon digdi sa daga, si Jesus nagsabi: “Ipinahayag ko an saimong ngaran sa mga tawo na itinao mo sa sako hale sa kinaban. Sinda saimo, asin itinao mo sinda sa sako, asin kinuyog ninda an saimong tataramon.” Ginamit ni Jesus an ngaran nin Dios, an Jehova, sa saiyang ministeryo asin nagpaheling sia nin tamang pagpronunsiar kaiyan, alagad bako sana iyan an saiyang ginibo tanganing ikapamidbid an ngaran nin Dios sa saiyang mga apostol. Dinugangan man nia an saindang kaaraman asin pagpahalaga ki Jehova, sa saiyang personalidad, asin sa saiyang mga katuyohan.

Itinatao ki Jehova an kredito bilang Mas Halangkaw sa saiya, an Saro na saiyang pinaglilingkodan, si Jesus mapakumbabang nag-ako: “An mga tataramon na itinao mo sa sako itinao ko sa sainda, asin sinda nag-ako kaiyan asin siertong nakaaram na ako nagdigdi bilang saimong representante, asin nagtubod sinda na isinugo mo ako.”

Pinaglalaen an saiyang mga parasunod asin an iba pa kan katawohan, si Jesus sunod na namibi: “Ako nakikimaherak, bakong manongod sa kinaban, kundi manongod sa mga itinao mo sa sako . . . Kan ako nasa kaibanan ninda binantayan ko sinda . . . , asin iningatan ko sinda, asin mayo ni saro sa sainda na nalaglag apuwera sa aki nin kalaglagan,” siisay na baga, si Judas Iscariote. Sa oras mismong ini, si Judas nasa saiyang makaoongis na misyon na pasaloiban si Jesus. Kaya, si Judas mayong pakaaram na nag-ootob kan Kasuratan.

“An kinaban naongis sa sainda,” an padagos na ipinamibi ni Jesus. “Ako nakikimaherak sa saimo, bako na haleon sinda sa kinaban, kundi na bantayan mo sinda huli sa maraot. Sinda bakong kabtang kan kinaban, kun paanong ako bakong kabtang kan kinaban.” An mga parasunod ni Jesus nasa kinaban, an organisadong sosyedad na ini nin katawohan na pinamamahalaan ni Satanas, alagad sinda siblag asin dapat na perming magdanay na siblag dian asin sa karatan kaiyan.

“Pakangbanala sinda paagi sa katotoohan,” an pagpadagos ni Jesus, “an saimong tataramon katotoohan.” Digdi inaapod ni Jesus na “katotoohan” an ipinasabong na Hebreong Kasuratan, na danay niang pinagkokotaran. Alagad an saiyang itinokdo sa saiyang mga disipulo asin an saindang isinurat kan huri paagi sa pasabong bilang an Kristianong Griegong Kasuratan “katotoohan” man. An katotoohan na ini puwedeng magpakangbanal sa saro, biyong bagohon an saiyang buhay, asin gibohon siang persona na siblag sa kinaban.

Namibi ngonyan si Jesus “bako sanang para sa mga ini, kundi kaidto man na nagtutubod sa [saiya] paagi sa saindang tataramon.” Kaya ipinapamibi ni Jesus an magigin saiyang linahidan na mga parasunod asin an iba pang magigin mga disipulo na titiponon pa sa “sarong aripompon.” Ano an ipinakikimaherak nia para sa gabos na ini?

“Tanganing sinda gabos magin saro, kun paanong ika, Ama, kasaro ko asin ako kasaro mo, . . . tanganing sinda magin saro siring na kita saro.” Si Jesus asin an saiyang Ama bakong literal na sarong persona, kundi sinda nagkakaoyon sa gabos na bagay. Ipinamibi ni Jesus na an saiyang mga parasunod magkamit kan kaagid na pagkakasarong ini tanganing “an kinaban makaaram na ika an nagsugo sa sako asin na ika namoot sa sainda siring kan pagkamoot mo sa sako.”

Dahel kaidtong magigin saiyang linahidan na mga parasunod, si Jesus nakiolay ngonyan sa saiyang langitnon na Ama. Para sa ano? “Na, kun saen ako, sinda makaibahan ko man, tanganing maheling an sakuyang kamurawayan na itinao mo sako, huli ta ika namoot sako bago lalangon an kinaban,” an boot sabihon, bago si Adan asin Eva mamundagan nin mga aki. Haloy pa bago kaiyan, namotan nin Dios an saiyang bugtong na Aki, na nagin si Jesu-Cristo.

Tinatapos an saiyang pamibi, idinoon liwat ni Jesus: “Ipinamidbid ko sa sainda an saimong ngaran asin ipapamidbid ko pa, tanganing an pagkamoot na ikinamoot mo sa sako mapasa sainda asin ako sa kasaro ninda.” Para sa mga apostol, kalabot sa pakamidbid sa ngaran nin Dios an personal na pakaaram sa pagkamoot nin Dios. Juan 14:1–17:26; 13:​27, 35, 36; 10:16; Lucas 22:​3, 4; Exodo 24:10; 1 Hade 19:​9-13; Isaias 6:​1-5; Galacia 6:16; Salmo 35:19; 69:4; Talinhaga 8:​22, 30.

▪ Saen maduman si Jesus, asin anong simbag an inako ni Tomas mapadapit kan dalan pasiring duman?

▪ Paagi sa saiyang ipinakiolay, ano an malinaw na boot ni Felipe na itao ni Jesus?

▪ Taano an saro na nakaheling na ki Jesus ta nakaheling na man sa Ama?

▪ Paano an mga parasunod ni Jesus magibo nin orog na gibohon kisa kan ginibo nia?

▪ Sa anong sentido na si Satanas mayo nin kapangyarihan ki Jesus?

▪ Kasuarin itinanom ni Jehova an simbolikong poon nin ubas, asin kasuarin asin paano an iba nagin kabtang kan poon nin ubas?

▪ Sa katapustapusi, pira an nagin sanga kan simbolikong poon nin ubas?

▪ Anong bunga an minamawot nin Dios hale sa mga sanga?

▪ Paano kita puwedeng magin mga katood ni Jesus?

▪ Taano ta ikinaoongis kan kinaban an mga parasunod ni Jesus?

▪ Anong patanid ni Jesus an ikinapurisaw kan saiyang mga apostol?

▪ Taano an mga apostol ta dai na nakahapot ki Jesus manongod sa kun saen sia maduman?

▪ Ano an partikularmenteng dai nasabotan kan mga apostol?

▪ Paano iinilustrar ni Jesus na an situwasyon kan mga apostol maliliwat hale sa kamondoan pasiring sa kagayagayahan?

▪ Ano an sinabi ni Jesus na gigibohon kan mga apostol sa dai na mahahaloy?

▪ Paano dinaog ni Jesus an kinaban?

▪ Sa anong sentido na si Jesus tinawan nin “kapangyarihan sa gabos na laman”?

▪ Ano an boot sabihon kan pagkua nin kaaraman dapit sa Dios asin sa saiyang Aki?

▪ Sa anong mga paagi ipinamidbid ni Jesus an ngaran nin Dios?

▪ Ano an “katotoohan,” asin paano kaiyan ‘pinapakangbanal’ an sarong Kristiano?

▪ Paano na an Dios, an saiyang Aki, asin an gabos na tunay na parasamba saro?

▪ Kasuarin an ‘paglalang kan kinaban’?