An Pinakadakulang Tawo na Nabuhay Kasuarin Pa Man

Kapitulo 117: Labi-labing Kamondoan sa Tatamnan

Kan si Jesus matapos sa pagpamibi, sia asin an saiyang 11 maimbod na apostol nag-awit nin mga awit nin pag-omaw ki Jehova. Dangan naghilig sinda hale sa kuwarto sa itaas, naglakaw sa preskong kadikloman kan banggi, asin nag-agi sa Kababan nin Cedron papuli sa Betania. Alagad sa saindang pagbaklay, nag-ontok sinda sa sarong paboritong lugar, an tatamnan nin Getsemani. Yaon ini sa o harani sa Bukid nin mga Olibo. Si Jesus parateng nakikipag-olay digdi sa saiyang mga apostol sa tahaw kan mga poon nin olibo.

Iwinawalat an walo sa mga apostol​—posibleng harani sa may tata kan tatamnan—​pinagbotan nia sinda: “Tukaw kamo digdi mantang ako maereenotan asin mamimibi.” Dangan ipinag-iba nia an tolo​—si Pedro, Santiago, asin Juan—​asin luminaog sa tatamnan. Si Jesus namondo asin nahahadit na marhay. “An sakong kalag mamondong gayo, sagkod sa kagadanan,” an sabi nia sa sainda. “Pawalat kamo digdi asin magpuka kamo sa kaibanan ko.”

Uminabante nin kadikit, si Jesus luminuhod sa daga asin mantang nakalaob nagpoon na odok sa boot na mamibi: “Ama ko, kun mapupuwede, togoti na an kopang ini lumihis sa sako. Minsan siring, bakong an boot ko, kundi an boot mo.” Ano an boot niang sabihon? Taano sia ta “mamondong gayo, sagkod sa kagadanan”? Minaatras daw sia sa saiyang desisyon na magadan asin itao an pantubos?

Dai nanggad! Si Jesus dai nakikimaherak na iligtas sa kagadanan. Maski an pag-isip na likayan an sakripisyal na kagadanan, na isinuherir kaidto ni Pedro, ikinaoongis nia. Imbes, labi-labi an saiyang kamondoan huli ta ikinatatakot nia na an paagi kan pagkagadan nia sa dai na mahahaloy​—bilang sarong ikinaoongis na kriminal—​magdadara nin langhad sa ngaran kan saiyang Ama. Namamatean na nia ngonyan na nagkapirang oras na sana sia ipapako sa sarong harigi bilang pinakamaraot na klase nin tawo​—sarong paralanghad tumang sa Dios! Ini an ikinahahadit niang marhay.

Pakapamibi nin haloy-haloy, nagbalik si Jesus asin nanompongan na natotorog an tolong apostol. Kinakaolay si Pedro, sia nagsabi: “Ano, dai man lamang kamo makakapagpuka minsan sarong oras sa kaibanan ko? Magpuka kamo asin padagos na mamibi, tanganing dai kamo makalaog sa sugot.” Alagad, sinasabot an tension na namatean ninda asin an kamatangaan kan oras, sia nagsabi: “An espiritu nagmamawot na gayo, alagad an laman maluya.”

Dangan naghale si Jesus sa ikaduwang beses asin nakimaherak na haleon sa saiya nin Dios an “kopang ini,” an boot sabihon, an iinasignar na kabtang, o kabotan, ni Jehova para sa saiya. Pagbalik nia, nanompongan nia giraray na natotorog an tolo mantang maninigo kutana sindang namimibi na dai sinda makalaog sa sugot. Kan kaolayon sinda ni Jesus, dai ninda aram kun ano an sasabihon bilang simbag.

Sa katapustapusi, sa ikatolong beses, ruminayorayo si Jesus nin kadikit, asin nakaluhod, na may makosog na pagtangis asin luha, sia namibi: “Ama, kun boot mo, halea an kopang ini sa sako.” Nakakamateng gayo si Jesus nin grabeng kolog huli kan langhad na dadarahon sa ngaran kan saiyang Ama kan saiyang kagadanan bilang kriminal. Tara, an pagsahotan bilang paralanghad​—saro na isinusumpa an Dios—​masakiton na haros dai iyan kayang tagalan!

Minsan siring, si Jesus padagos na namibi: “Bakong an boot ko, kundi an boot mo.” Makinuyog na ipinasakop ni Jesus an saiyang kabotan sa kabotan nin Dios. Huli kaini, sarong anghel hale sa langit an nagtunga asin pinakosog sia paagi sa nagkapirang nakapakokosog na mga tataramon. Posible na sinabihan kan anghel si Jesus na yaon sa saiya an huyom nin pag-oyon kan saiyang Ama.

Pero, abaang gabat kan pinapasan ni Jesus! An saiya mismong buhay na daing sagkod asin kan bilog na rasa nin tawo an nakataya. Grabe an tension sa emosyon. Kaya si Jesus padagos na namimibi nin orog pa kaigot, asin an saiyang ganot nagin siring sa mga toro nin dugo mantang nagbobolos iyan sa daga. “Minsan ngani bihirang marhay na pangyayari ini,” an komento kan The Journal of the American Medical Association, “an ganot na dugo . . . puwedeng mangyari sa grabe kaemosyonal na mga kamugtakan.”

Pakatapos kaiyan, si Jesus nagbalik sa ikatolong beses sa saiyang mga apostol, asin sa giraray nanompongan sindang natotorog. Nanluluya sindang marhay huli sa labi-labing kamondoan. “Sa siring kaining oras kamo tororog asin nagpapahingalo!” an ikinagsing nia. “Igo na! Nagdatong na an oras! Uya! An Aki nin tawo ipinasaloib na sa kamot nin mga parakasala. Buhat kamo, magduman na kita. Uya! Harani na an nagpasaloib sa sako.”

Mantang sia nagtataram pa, nagdolok si Judas Iscariote, kaiba nin sarong dakulang kadaklan na may darang mga karaba asin ilawan patin armas. Mateo 26:​30, 36-47; 16:​21-23; Marcos 14:​26, 32-43; Lucas 22:​39-47; Juan 18:​1-3; Hebreo 5:7.

▪ Pakahale sa kuwarto sa itaas, saen ipinag-iba ni Jesus an mga apostol, asin ano an ginibo nia duman?

▪ Mantang namimibi si Jesus, ano an ginigibo kan mga apostol?

▪ Taano ta labi-labi an kamondoan ni Jesus, asin ano an ipinakimaherak nia sa Dios?

▪ Ano an ipinaririsa kan pagigin garo mga toro nin dugo kan ganot ni Jesus?