An Pinakadakulang Tawo na Nabuhay Kasuarin Pa Man

Kapitulo 118: Pagpasaloib Asin Pag-arestar

Lihis na sa matangang banggi mantang pinangengenotan ni Judas an sarong dakulang kadaklan nin mga soldados, mga poon na saserdote, Fariseo, asin iba pa pasiring sa tatamnan nin Getsemani. An mga saserdote nag-oyon na bayadan si Judas nin 30 pidasong pirak tanganing pasaloiban si Jesus.

Bago kaini, kan si Judas pinahale sa pamanggihan kan Paskua, malinaw na nagdiretso na sia sa mga poon na saserdote. An mga ini tolos-tolos na tiniripon an saindang sadiring mga opisyal, patin man an sarong hukbo nin mga soldados. Posible na dinara nguna sinda ni Judas sa lugar na pinagselebraran ni Jesus asin kan saiyang mga apostol kan Paskua. Kan maaraman na sinda naghale na, an dakulang kadaklan na may darang mga armas asin ilawan patin karaba nagsurunod ki Judas paluwas sa Jerusalem asin nag-agi sa Kababan nin Cedron.

Mantang pinangengenotan ni Judas an prosesyon patukad sa Bukid nin mga Olibo, naseseguro nia na aram nia kun saen manonompongan si Jesus. Durante kan nakaaging semana, mantang si Jesus asin an mga apostol pabalikbalik sa pag-oltanan kan Betania asin Jerusalem, sinda parateng minaontok sa tatamnan nin Getsemani tanganing magpahingalo asin mag-orolay-olay. Alagad, ngonyan, na si Jesus posibleng natatago sa kadikloman sa sirong kan mga poon nin olibo, paano sia mamimidbid kan mga soldados? Puwedeng dai pa noarin man ninda sia naheling kaidto. Kaya si Judas nagtao nin sarong tanda, na nagsasabi: “An siisay man na sakong hadokan, sia ini; dakopon nindo sia asin ligtas nindo siang darahon.”

Pinangenotan ni Judas an dakulang kadaklan pasiring sa tatamnan, naheling si Jesus kaiba an saiyang mga apostol, asin diretso nang nagdolok sa saiya. “Marahay na aldaw, Rabi!” an saiyang sinabi asin mamomoton na marhay na hinadokan nia sia.

“Katood, sa anong katuyohan na yaon ka digdi?” an simbag ni Jesus. Dangan, sinisimbag an saiyang sadiring hapot, sia nagsabi: “Judas, pinapasaloiban mo an Aki nin tawo sa sarong hadok?” Alagad sukat na para sa mapasaloib sa saiya! Ruminani si Jesus sa liwanag kan naglalaad na mga karaba asin ilawan asin naghapot: “Siisay an hinahanap nindo?”

“Si Jesus na taga-Nazaret,” an simbag.

“Ako iyo sia,” an simbag ni Jesus, mantang mapuso siang nagtitindog sa atubangan ninda gabos. Napangalas sa saiyang kapusoan asin dai aram an mangyayari, an mga tawo uminatras asin napahuruhod.

“Sinabi ko na sa saindo na ako iyo sia,” an kalmadong sinabi pa ni Jesus. “Kaya, kun ako an hinahanap nindo, pabayae nindo na humale an mga ini.” Dai pa sana nahahaloy sa kuwarto sa itaas, sinabihan ni Jesus an saiyang Ama sa pamibi na iningatan nia an saiyang maimbod na mga apostol asin mayo ni saro sa sainda na nawara “apuwera sa aki nin kalaglagan.” Kaya, tanganing maotob an saiyang tataramon, hinagad niang pabayaan na humale an saiyang mga parasunod.

Kan an mga soldados maulian, nagtindog, asin nagpoon na gaposon si Jesus, narisa kan mga apostol kun ano an mangyayari. “Kagurangnan, ano maninigbas na kami paagi sa minasbad?” an hapot ninda. Bago nakasimbag si Jesus, si Pedro, kapot an saro sa duwang minasbad na dara kan mga apostol, inatake si Malco, sarong oripon kan halangkaw na saserdote. An taga ni Pedro suminalto sa payo kan oripon alagad napalong an saiyang toong talinga.

“Pabayae nindo na sumagkod na sana digdi,” an sabi ni Jesus mantang nangongoltanan sia. Dinuduotan an talinga ni Malco, pinaomayan nia an lugad. Dangan nagtokdo sia nin sarong importanteng leksion, na pinagbobotan si Pedro: “Sarungan an saimong minasbad, huli ta an gabos na minabingat nin minasbad sa minasbad man magagadan. O naghohona ka na dai ako makakapakimaherak sa sakong Ama na tawan ako ngonyan nin labi sa kagduwang hukbo nin mga anghel?”

Si Jesus andam na arestaron, huli ta sia nagpaliwanag: “Paano maootob an Kasuratan na siring kaini an kaipuhan na mangyari?” Asin idinugang nia: “An kopa na itinao sa sako kan Ama, bako daw na iyan maninigo nanggad na inomon ko?” Sia lubos na oyon sa kabotan nin Dios para sa saiya!

Dangan kinaolay ni Jesus an kadaklan. “Ano, nagruluwas kamo na may mga minasbad asin samulig na garo tumang sa sarong parahabon tanganing arestaron ako?” an hapot nia. “Aroaldaw akong nagtutukaw kaidto sa templo na nagtotokdo, alagad dai nindo ako dinakop. Alagad an gabos na ini nangyari tanganing maotob an mga kasuratan kan mga propeta.”

Sa oras na idto an hukbo nin mga soldados asin komandante militar pati an mga opisyal kan mga Judio dinakop si Jesus asin ginapos sia. Kan maheling ini, binayaan si Jesus kan mga apostol asin nagdurulag. Alagad, an sarong barobata​—na posibleng an disipulong si Marcos—​nagpawalat sa tahaw kan kadaklan. Puwedeng nasa harong sia na pinagselebraran ni Jesus kan Paskua asin pakatapos kaiyan nagsunod sa kadaklan paghale duman. Alagad ngonyan, nabisto sia asin hiningoang dakopon sia. Alagad iwinalat nia an saiyang gubing na lino asin nagdulag. Mateo 26:​47-56; Marcos 14:​43-52; Lucas 22:​47-53; Juan 17:12; 18:​3-12.

▪ Taano ta naseseguro ni Judas na manonompongan nia si Jesus sa tatamnan nin Getsemani?

▪ Paano si Jesus nagpaheling nin pagmakolog sa saiyang mga apostol?

▪ Anong paghiro an ginibo ni Pedro bilang pagsurog ki Jesus, alagad ano an sinabi ni Jesus ki Pedro manongod kaiyan?

▪ Paano ihinayag ni Jesus na sia lubos na oyon sa kabotan nin Dios para sa saiya?

▪ Kan bayaan si Jesus kan mga apostol, siisay an nagpawalat, asin ano an nangyari sa saiya?

(Ipagpapadagos sa masunod na luwas.)