Bareta kan mga Parabalangibog kan Kahadean
An mga Hobenes Nagpapahayag kan Maogmang Bareta sa Aprika
DAI nahaloy pagkabuhay liwat ni Jesus, sarong lalaking taga-Aprika an nagsongko sa Jerusalem. Dai sinasabi kan Biblia an saiyang ngaran. Midbid sana sia bilang “sarong lalaking nasa kapangyarihan na sakop ni Candace na reyna kan mga taga-Etiopia, asin nagkakapot kan gabos niang kayamanan.” Taano ta nasasambitan sia sa Biblia? Huli ta an sarong anghel pinagbotan an Kristianong paraebanghelyo na si Felipe na ipahayag saiya “an maogmang bareta manongod ki Jesus.” An Etiopeng ini an enot na taga-Aprika sa rekord na nagin miembro kan Kristianong kongregasyon.—Gibo 8:26-39.
Ngonyan, ginatos na ribo an Saksi ni Jehova sa Aprika. Ginagamit ninda an gabos na oportunidad na ihiras sa iba an maogmang bareta manongod ki Jesus. An minasunod na eksperyensia nagpapaheling na pati an mga hobenes sa Aprika igwa nin kabtang digdi.
◻ Si Sandy asin Priya, duwang 11-anyos na daragita sa Nairobi, Kenya, magkataed an harong. Naoogma sindang magkawat asin magpasurusublian nin mga libro nin mga estorya. An mga magurang ni Priya nagpoon na mag-adal sa Biblia kaiba kan mga Saksi ni Jehova. Ngonyan si Priya igwa na nin bagong mga libro na idadagdag sa saiyang koleksion, kabale na partikularmente an saro na nagin saiyang paborito, an Paghinanyog sa Dakulang Paratokdo, na ipinublikar kan Watchtower Bible and Tract Society. Ipinapasubli nia an saiyang librong Dakulang Paratokdo sa saiyang amigang si Sandy, asin pinonan kan duwang aki na pag-adalan iyan nin regular.
Alagad, an ina ni Sandy, si Una, nagsisimba sa Iglesya Anglicano asin habong pabasahon an saiyang aki kan mga librong hale sa mga Saksi ni Jehova. Sa ibong kan pagtumang kan ina, nagpadagos an pag-adal. Sarong aldaw nakimaherak si Sandy sa saiyang nanay na maghinanyog sa saindang pag-oolay nin saro sanang beses. An kapitulo na binasa kan mga aki kan aldaw na idto may titulong “An Duwang Tawo na Nagselebrar nin Kompleanyo.” Naghinanyog si Una asin naghangang marhay. Tolos-tolos niang dinolok an ina ni Priya na igwang dakol na hapot sa Biblia.
Iinareglo kan ina ni Priya na may sarong Saksi na mag-adal sa Biblia kaiba ni Una. Dai nahaloy ihinihiras na mismo ni Una an saiyang nanonodan sa saiyang katrabahong si Dolly. Mientras tanto, an 11-anyos na si Priya nagpadagos na marahay an pag-oswag asin nagdesisyon na simbolisaran an saiyang pagdusay ki Jehova Dios paagi sa bautismo sa tubig sa sarong pandistritong kombension kan mga Saksi ni Jehova. Sa kombension man sanang idto, sa dakulang kaogmahan ni Priya, si Una asin Dolly nabautismohan man!
◻ Igwa nin nagkapirang nasyon sa Aprika na an gibohon kan mga Saksi ni Jehova bakong rehistrado. Sa sarong siring na nasyon, igwa nin pankagabsan na pagtogot sa relihiyosong mga aktibidad asin paniniwala kan mga Saksi. Sa sarong eskuwelahan sa nasyon na iyan, an sarong siete anyos na aking lalaki asin an saiyang sais anyos na tugang na lalaki—mga aki nin Saksi—tinotogotan na lumuwas sa klase durante kan oras nin relihiyosong mga pamibi.
Sarong aldaw hinagad nin sarong bagong maestro na an mga aking lalaki makisali sa pamibi kaiba kan ibang aki. An matuang aking lalaki nagsayuma asin pinakol kan maestro. An saiyang ngohod na tugang, an sais anyos na si Shadrack, nag-insister na makaolay an prinsipal sa saiyang opisina. An prinsipal asin an bagong maestro hinapot sia kun taano ta habo niang makisali sa iba. Hinapot sia ninda kun natatakot siang pakolon kan saiyang mga magurang. Nagsimbag sia sa marahayon na Arabe: “Dai po, an Dios na sakong sinasamba bakong Dios nin karibarawan kundi nin areglo. Dai po ako puwedeng magin saro sa mga Saksi ni Jehova sa harong asin iba naman an relihiyon sa eskuwelahan!” Bilang resulta, tinawan sia nin iksemsion.
Pakatapos na mabautismohan, an Etiope na nasambitan sa libro nin Gibo “nagdagos na naggagayagaya.” (Gibo 8:39) Siring man ngonyan, an mga parabalangibog kan Kahadean sa mahiwas na kontinente nin Aprika naggagayagaya sa saindang pribilehiyo na ‘magpahayag kan maogmang bareta manongod ki Jesus.’—Gibo 8:35.