An Pinakadakulang Tawo na Nabuhay Kasuarin Pa Man

Kapitulo 119: Dinara ki Anas, Dangan ki Caifas

Si Jesus, na nagagapos bilang sarong ordinaryong kriminal, dinara ki Anas, an maimpluwensiang dating halangkaw na saserdote. Si Anas an halangkaw na saserdote kan si Jesus bilang 12-anyos na aki pinangalas an mga paratokdong rabi sa templo. An nagkapira sa mga aking lalaki ni Anas kan huri naglingkod bilang halangkaw na saserdote, asin sa presente an saiyang manugang na si Caifas an nasa katongdan na iyan.

Si Jesus posibleng dinara nguna sa harong ni Anas huli kan haloy nang pagkaprominente kan poon na saserdoteng iyan sa relihiyosong buhay kan mga Judio. An paghapit na ini tanganing makaolay si Anas nagtao nin panahon ki Halangkaw na Saserdote Caifas na tiponon an Sanhedrin, an may 71 miembrong halangkaw na korte kan mga Judio, patin magtipon nin putik na mga saksi.

An poon na saserdoteng si Anas hinahapot ngonyan si Jesus manongod sa saiyang mga disipulo asin manongod sa saiyang katokdoan. Alagad, si Jesus nagsabi bilang simbag: “Ako nagtaram nin hayag sa kinaban. Danay akong nagtotokdo sa sinagoga asin sa templo, na pinagtitiriponan kan gabos na Judio; asin mayo ako nin itinaram sa hilom. Taano ta hinahapot mo ako? Hapota an mga nakadangog kan mga sinabi ko sa sainda. Uya! An mga ini nakakaaram kan sinabi ko.”

Huli kaini, an saro sa mga opisyal na nagtitindog kataed ni Jesus tinaplong sia, na sinasabi: “Siring kaiyan an pagsimbag mo sa poon na saserdote?”

“Kun sala an itinaram ko,” an simbag ni Jesus, “patotoohan mo an sala; alagad kun tama, taano ta tinaplong mo ako?” Pakatapos kan simbagan na ini, isinubol ni Anas si Jesus pasiring ki Caifas.

Sa oras na ini an gabos na poon na saserdote asin an kamagurangan na lalaki patin mga eskriba, iyo, an bilog na Sanhedrin, nagpopoon nang magtiripon. An saindang lugar nin pagtiripon malinaw na an harong ni Caifas. An paggibo nin siring na pagbista sa banggi nin Paskua malinaw na kontra sa Judiong pagboot. Alagad dai kaini napogolan an mga namomoon sa relihiyon sa saindang maraot na katuyohan.

Mga semana bago kaini, kan buhayon liwat ni Jesus si Lazaro, an Sanhedrin nakapagdesisyon na sa saindang sadiri na sia dapat na magadan. Asin duwang aldaw sana bago kaini, kan Miyerkoles, an mga autoridad sa relihiyon nagpaharatolhatol na dakopon si Jesus paagi sa tusong pakana tanganing gadanon sia. Honahonaon nindo, sia talagang kinondenar na bago kan pagbista sa saiya!

Ginigibo ngonyan an mga paghihingoa na humanap nin mga saksi na matao nin putik na ebidensia tanganing makabilog nin kaso tumang ki Jesus. Alagad, mayo nin nakukuang saksi na nagkakaoroyon sa saindang patotoo. Sa katapustapusi, may duwang uminatubang asin nagsabi: “Nadangog mi sia na nagsabi, ‘Gagabaon ko an templong ini na ginibo nin kamot asin sa laog nin tolong aldaw matogdok ako nin saro na bakong gibo nin kamot.’”

“Ano mayo kang sasabihon bilang simbag?” an hapot ni Caifas. “Ano an pinatototoohan kan mga ini tumang sa saimo?” Pero nagdanay na mayong girong si Jesus. Maski sa putik na sahot na ini, sa kasopganan kan Sanhedrin, dai mapagkaoyon kan mga saksi an saindang mga estorya. Kaya prinobaran kan halangkaw na saserdote an laen na taktika.

Aram ni Caifas kun gurano kasensitibo an mga Judio manongod sa siisay man na naghihingakong iyo mismo an Aki nin Dios. Sa duwang naenot na pangyayari, daing pagmamaan na inapod ninda si Jesus na paralanghad na maninigo sa kagadanan, na kan sarong beses nasala sinda sa paghona na sia naghihingakong kapantay nin Dios. May katusohan na hinagad ngonyan ni Caifas: “Sa ngaran kan nabubuhay na Dios ibinubugtak taka sa irarom nin sumpa na magsabi samo kun baga ika an Cristo na Aki nin Dios!”

Ano man an paghona kan mga Judio, si Jesus iyo talaga an Aki nin Dios. Asin an pagdanay na mayong girong puwedeng ipakahulogan na pagpainda sa saiyang pagigin Cristo. Kaya si Jesus mapusong nagsimbag: “Iyo ako; asin maheheling nindo an Aki nin tawo na nagtutukaw sa too nin kapangyarihan asin minadatong sa mga panganoron nin langit.”

Huli kaini, sa sarong dramatikong pagpaheling, ginisi ni Caifas an saiyang gubing asin nagkagsing: “Naglanghad sia! Ano pa an kaipuhan ta sa mga saksi? Uya! Ngonyan nadangog na nindo an langhad. Ano an paghona nindo?”

“Maninigo sia sa kagadanan,” an ipinahayag kan Sanhedrin. Dangan pinonan nindang pag-olog-ologon sia, asin dakol an sinabi ninda bilang paglanghad tumang sa saiya. Tinaplong sia ninda asin linutaban sa lalauogon. An iba tinakopan an saiyang bilog na lalauogon asin sinuntok sia patin mapagtuyang nagsabi: “Maghula ka sa samo, Cristo. Siisay an tuminaplong sa saimo?” An mapan-abuso, ilegal na paggaweng ini nangyari durante kan pagbista sa banggi. Mateo 26:​57-68; 26:​3, 4; Marcos 14:​53-65; Lucas 22:​54, 63-65; Juan 18:​13-24; 11:​45-53; 10:​31-39; 5:​16-18.

▪ Saen nguna dinara si Jesus, asin ano an nangyari sa saiya duman?

▪ Saen sunod na dinara si Jesus, asin sa anong katuyohan?

▪ Paano nakombensir ni Caifas an Sanhedrin na ipahayag na si Jesus maninigo sa kagadanan?

▪ Anong mapan-abuso, ilegal na paggawe an nangyari durante kan pagbista?