An Pinakadakulang Tawo na Nabuhay Kasuarin Pa Man
Kapitulo 120: Mga Pagpainda sa Patyo
Pakatapos na bayaan si Jesus sa tatamnan nin Getsemani asin dumulag huli sa takot kaiba kan iba pang apostol, si Pedro asin Juan uminontok sa saindang pagdulag. Posibleng inabotan ninda si Jesus kan sia dinadara sa harong ni Anas. Kan ipadara sia ni Anas ki Halangkaw na Saserdote Caifas, si Pedro asin Juan nagsunod sa haroharayo, na malinaw na nasa alanganon sa takot na mameligro an sainda mismong buhay asin sa saindang hararom na paghadit sa kun ano an mangyayari sa saindang Kagurangnan.
Kan makaabot sa mahiwas na residensia ni Caifas, nahimo ni Juan na makalaog sa patyo, huli ta midbid sia kan halangkaw na saserdote. Alagad, si Pedro nawalat na nagtitindog sa luwas sa may pinto. Pero dai nahaloy nagbuwelta si Juan asin kinaolay an bantay sa pinto, sarong oripon na babae, asin tinogotan na lumaog si Pedro.
Malipot na ngonyan, asin an mga surugoon sa harong asin an mga opisyal kan halangkaw na saserdote nagmakot nin uring. Nakisali sa sainda si Pedro tanganing magpahimbong mantang hinahalat an resulta kan pagbista ki Jesus. Duman, sa liwanag kan malaad na kalayo, an bantay sa pinto na nagpalaog ki Pedro mas nabisto sia. “Ika kaiba man ni Jesus na taga-Galilea!” an ikinagsing nia.
Nahahadit ta namidbid sia, pinaindahan ni Pedro sa atubangan ninda gabos na midbid nia si Jesus. “Dai ko sia midbid ni nasasabotan ko man an saimong sinasabi,” an sabi nia.
Dangan, si Pedro luminuwas harani sa may tata. Duman, saro pang babae an nakarisa sa saiya asin nagsabi man sa mga nagtitirindog duman: “An tawong ini kaiba ni Jesus na taga-Nazaret.” Sa giraray pinaindahan iyan ni Pedro, na nagsusumpa: “Dai ko midbid an tawong iyan!”
Nagdanay si Pedro sa patyo, na naghihingoang dai marisa sagkod sa mapupuwede. Posible na sa oras na ini nakilagan sia sa pagturaok nin manok sa kadikloman kan kaagahon. Mientras tanto, nagpapadagos an pagbista ki Jesus, na malinaw na ginigibo sa sarong kabtang kan harong sa itaas kan patyo. Mayong duwa-duwa na naheheling ni Pedro asin kan iba pang naghahalat sa ibaba an pag-arabot asin pagharale kan manlaenlaen na saksi na pinaatubang tanganing magpatotoo.
Mga sarong oras na an nakalihis poon kan huring mamidbid si Pedro na kaibahan ni Jesus. Ngonyan an nagkapirang nagtitirindog sa palibot nagdorolok sa saiya asin nagsarabi: “Sierto nanggad na ika saro man sa sainda, huli ta, sa katunayan, ihinahayag ka kan saimong dialekto.” An saro sa grupo paryentes ni Malco, na pinalongan nin talinga ni Pedro. “Naheling taka sa tatamnan na kaiba nia, bako daw?” an sabi nia.
“Dai ko midbid an tawong iyan!” an makosog na pag-insister ni Pedro. Sa katunayan, hiningoa niang kombensiron sinda na nasasala sinda gabos paagi sa pagmuda asin pagsumpa sa bagay, na garo man sana isinusumpa an saiyang sadiri kun sia dai nagsasabi kan totoo.
Kan mismong sinasabi ni Pedro an ikatolong pagpaindang ini, sarong manok an tuminuraok. Asin kan oras na idto, si Jesus, na malinaw na nagluwas pasiring sa balkon sa itaas kan patyo, nagkiling asin hineling sia. Tolos-tolos, nagirumdoman ni Pedro an sinabi ni Jesus nagkapirang oras sana bago kaini sa kuwarto sa itaas: “Bago tumuraok an manok nin makaduwa, paiindahan mo ako nin makatolo.” Laglag an boot huli sa gabat kan saiyang kasalan, si Pedro nagluwas asin nanangis nin mapaiton.
Paano ngani na nangyari ini? Paano na, pakatapos na nakaseseguro siang marhay sa saiyang kakosogan sa espirituwal, napaindahan ni Pedro an saiyang Kagurangnan nin makatolo na sunod-sunod? Mayong duwa-duwa na si Pedro nabigla sa mga pangyayari. Binibiribid an katotoohan, asin si Jesus ilinaladawan bilang maraoton na kriminal. An tama pinalalataw na sala, an daing sala pinalalataw na igwa nin sala. Kaya huli sa kagipitan kan pangyayari, nawara sa tamang pag-isip si Pedro. Biglang naraot an saiyang tamang pakamate nin kaimbodan; sa saiyang kamondoan pinaralisar sia kan pagkatakot sa tawo. Dai noarin man logod iyan mangyari sa sato! Mateo 26:57, 58, 69-75; Marcos 14:30, 53, 54, 66-72; Lucas 22:54-62; Juan 18:15-18, 25-27.
▪ Paano si Pedro asin Juan nakalaog sa patyo kan halangkaw na saserdote?
▪ Mantang si Pedro asin Juan nasa patyo, ano an nangyayari sa laog kan harong?
▪ Pirang beses na tuminuraok an manok, asin pirang beses na pinaindahan ni Pedro na midbid nia si Cristo?
▪ Ano an boot sabihon na si Pedro nagmuda asin nagsumpa?
▪ Ano an nagpangyari ki Pedro na magpainda na midbid nia si Jesus?