An Pinakadakulang Tawo na Nabuhay Kasuarin Pa Man

Kapitulo 124: Itinao Asin Dinara

Kan si Pilato, na napahiro kan toninong na dignidad kan pinasakitan na si Jesus, magprobar giraray na butasan sia, an mga poon na saserdote orog na naanggot. Determinado sinda na dai pagtogotan an ano man na makaolang sa saindang maraot na katuyohan. Kaya inotro ninda an saindang pagkurahaw: “Ipako sia! Ipako sia!”

“Kuana sia nindo asin ipako sia,” an simbag ni Pilato. (Kabaliktaran sa naenot nindang mga sinabi, an mga Judio puwedeng magkaigwa nin autoridad na gumadan nin mga kriminal huli sa mga pagkakasala sa relihiyon na may igong gabat.) Dangan, sa kisuerra ikalimang beses, ipinahayag ni Pilato na daing sala si Jesus, na sinasabi: “Dai ako nin nakukuang sala sa saiya.”

An mga Judio, kan maheling na an saindang politikal na mga sahot daing ibinunga, binalikan an relihiyosong sahot na paglanghad na ginamit mga oras bago kaini sa pagbista ki Jesus sa atubangan kan Sanhedrin. “Igwa kami nin pagboot,” an sabi ninda, “asin sono sa pagboot sia maninigong magadan, huli ta sia nagpakang-aki nin Dios.”

Bago an sahot na ini para ki Pilato, asin orog na ikinatakot nia ini. Sa ngonyan narerealisar na nia na si Jesus bakong ordinaryong tawo, arog kan ipinaririsa kan pangatorogan kan saiyang agom asin kan pambihirang rigon nin personalidad ni Jesus. Alagad “aki nin Dios”? Aram ni Pilato na si Jesus taga-Galilea. Pero, posible daw na sia nabuhay na kaidto? Ibinabalik giraray sia sa palasyo, si Pilato naghapot: “Tagasaen ka?”

Si Jesus nagdanay na daing girong. Bago kaini sinabihan nia si Pilato na sia sarong hade alagad na an saiyang Kahadean bakong kabtang kan kinaban na ini. Dai nang saysay an dugang pang paliwanag ngonyan. Minsan siring, an amor-propio ni Pilato nakolgan kan pagsayumang sumimbag, asin naanggot sia ki Jesus paagi sa mga tataramon na: “Ano dai ka magtataram sa sakuya? Dai mo aram na ako igwa nin autoridad na butasan ka asin ako igwa nin autoridad na ipako ka?”

“Dai ka kutana nin autoridad tumang sa sako kun dai iyan itinao sa saimo hale sa itaas,” an magalang na simbag ni Jesus. An boot niang sabihon iyo an pagtao nin Dios nin autoridad sa mga namamahalang tawo na magpadalagan sa mga aktibidad sa daga. Idinugang ni Jesus: “Ini an dahelan na an tawo na nagtao sako sa saimo orog an kasalan.” Iyo nanggad, an halangkaw na saserdoteng si Caifas asin an saiyang mga kasapakat pati si Judas Iscariote gabos mas magabat an paninimbagan kisa ki Pilato huli sa bakong makatanosan na pagtratar ki Jesus.

Orog pang pinahanga ni Jesus asin natatakot na si Jesus tibaad naggikan sa Dios, inotro ni Pilato an saiyang mga paghihingoa na butasan sia. Alagad, kinontra kan mga Judio si Pilato. Inotro ninda an saindang politikal na sahot, na tusong nanhuhuma: “Kun butasan mo an tawong ini, bako kang katood ni Cesar. An lambang tawo na nagpapakanghade nagtataram tumang ki Cesar.”

Sa ibong kan maraot na mga implikasyon, dinara giraray ni Pilato si Jesus sa luwas. “Uya! An saindong hade!” an pakiolay nia giraray.

“Halea sia! Halea sia! Ipako sia!”

“Ipapako ko an saindong hade?” an may pagkadesesperar na hapot ni Pilato.

An mga Judio nasusurang sa irarom kan pamamahala kan mga Romano. Iyo nanggad, ikinaoongis ninda an pagdominar kan Roma! Pero, mapagsaginsagin na an mga poon na saserdote nagsabi: “Mayo kaming hade kundi si Cesar.”

Natatakot huli sa saiyang politikal na posisyon asin dangog, si Pilato sa katapustapusi napadara sa daing ontok na mga kahagadan kan mga Judio. Itinao nia si Jesus. An mga soldados hinubaan si Jesus kan gubing na purpura asin sinulotan sia kan saiyang pan-ibabaw na gubing. Mantang dinadara si Jesus tanganing ipako, ipinapasan sa saiya an saiyang hariging pasakitan.

Sa ngonyan katahawan na nin agang Biyernes, Nisan 14; posibleng mag-oodto na. Si Jesus dai nang torog poon pa kan amay na agang Huwebes, asin sunod-sunod an tinios niang labi-labi kasakit na eksperyensia. Siyempre, dai nahaloy naubos an saiyang kosog huli sa gabat kan harigi. Kaya an sarong minaagi, sarong Simon na taga-Cirene sa Aprika, kinuang magpasan kaiyan para sa saiya. Mantang naglalakaw sinda, an dakol na tawo, kabale an mga babae, nagsusurunod, na nagtatarangis asin nananambitan para ki Jesus.

Sa pagsalingoy sa mga babae, si Jesus nagsabi: “Mga aking babae nin Jerusalem, ontok na kamo sa pagtangis sa sako. Sa kabaliktaran, tangisan nindo an saindong sadiri asin an saindong mga aki; huli ta, uya! maabot an mga aldaw na sasabihon kan mga tawo, ‘Maogma an mga babaeng bawas, asin an mga matris na dai nangaki asin an mga daghan na dai nagpasuso!’ . . . Huli ta kun ginigibo ninda an mga bagay na ini kun an kahoy hilaw, ano an mangyayari kun iyan alang na?”

An boot sabihon ni Jesus iyo an kahoy kan Judiong nasyon, na medyo igwa pang alumaad nin buhay huli kan presensia ni Jesus asin kan pag-eksister nin sarong natatada na nagtutubod sa saiya. Alagad kun an mga ini kuanon na sa nasyon, solamente sarong gadan sa espirituwal na kahoy an mawawalat, iyo, sarong alang nang nasyonal na organisasyon. A, kanigoan na dahelan nin pagtangis kun an mga hukbo nin Roma, na naglilingkod bilang mga parakastigo nin Dios, laglagon na an Judiong nasyon! Juan 19:​6-17; 18:31; Lucas 23:​24-31; Mateo 27:​31, 32; Marcos 15:​20, 21.

▪ Anong sahot tumang ki Jesus an ginibo kan mga namomoon sa relihiyon kan an saindang politikal na mga sahot daing ibinunga?

▪ Taano si Pilato ta orog na natakot?

▪ Siisay an may orog na kasalan para sa nangyari ki Jesus?

▪ Sa katapustapusi, paano nakombensir kan mga saserdote si Pilato na itao si Jesus tanganing gadanon?

▪ Ano an isinabi ni Jesus sa mga babae na nagtatarangis huli sa saiya, asin ano an boot niang sabihon kan sambiton nia an kahoy na “hilaw” dangan “alang na”?