An Pinakadakulang Tawo na Nabuhay Kasuarin Pa Man

Kapitulo 125: Makuring Pagsakit sa Harigi

Kasabay ni Jesus duwang parahabon an dinadara tanganing gadanon. Sa haroharayo sa siudad, uminontok sinda sa pagralakaw sa lugar na inaapod Golgota, o Lugar nin mga Bungo.

Hinubaan an mga bilanggo kan saindang mga gubing. Dangan may itinaong arak na binugtakan nin drogang mirra. Malinaw na iyan inandam kan mga babae sa Jerusalem, asin an mga Romano dai ipinangunguri sa mga ipinapako an nakakahale nin kolog na inomon na ini. Alagad, kan namitan iyan ni Jesus, nagsayuma siang uminom. Taano? Malinaw na boot niang magkaigwa nin lubos na kontrol sa bilog niang pag-isip durante kan pinakalubos na pagbalong ini sa saiyang pagtubod.

Si Jesus ngonyan nakaunat sa harigi na an saiyang mga kamot nasa itaas kan saiyang payo. Dangan an mga soldados nagpulpog nin darakulang pako sa saiyang mga kamot asin sa saiyang mga bitis. Namiripit sia sa kolog mantang tinutusok kan mga pako an laman asin mga latid. Kan patindogon an harigi, grabe an kolog, huli ta an gabat kan hawak nakarurugtas sa mga lugad kan pako. Pero, imbes na manhuma, si Jesus namibi para sa mga Romanong soldados: “Ama, patawada sinda, huli ta dai ninda naaaraman an saindang ginigibo.”

Si Pilato nagpaskil nin karatula sa harigi na nagsasabi: “Si Jesus na Nazareno an Hade kan mga Judio.” Minalataw na isinurat nia ini bako sanang huli ta iginagalang nia si Jesus kundi huli ta ikinababalde nia an mga Judiong saserdote huli ta sia pinirit ninda na sentensiahan nin kagadanan si Jesus. Tanganing mabasa kan gabos an karatula, ipinasurat iyan ni Pilato sa tolong lenguahe​—sa Hebreo, sa opisyal na Latin, asin sa ordinaryong Griego.

An mga poon na saserdote, kabale si Caifas asin Anas, nahadit. An positibong proklamasyon na ini nakakaraot sa oras kan saindang kapangganahan. Kaya sinda nagreklamo: “Dai mo ipagsurat na ‘An Hade kan mga Judio,’ kundi na sia nagsabi, ‘Ako Hade kan mga Judio.’” Huling ikinasusurang an pagserbi bilang kasangkapan kan mga saserdote, si Pilato nagsimbag na may marigon na pagduhagi: “An isinurat ko na isinurat ko na.”

An mga saserdote, kaiba an sarong dakulang kadaklan, nagtiripon ngonyan sa lugar kan paggagadanan, asin pinahimutikan kan mga saserdote an patotoo sa karatula. Inotro ninda an putik na patotoo na naenot nang itinao sa mga pagbista sa Sanhedrin. Kaya bakong makangangalas na an mga nag-aagi nagpoon na magtaram na may pag-insulto, na nagpipilingpiling kan saindang payo sa pag-olog-olog asin nagsasabi: “Ika na magaba kan templo asin matogdok kaiyan sa laog nin tolong aldaw, ligtasan an saimong sadiri! Kun ika aki nin Dios, humilig ka sa hariging pasakitan!”

“Nagligtas sia sa iba; an sadiri nia dai ikinakaligtas!” an pagsegunda kan mga poon na saserdote asin kan saindang mga katood sa relihiyon. “Sia an Hade nin Israel; tumanggal sia ngonyan sa hariging pasakitan asin matubod kita sa saiya. Nanarig sia sa Dios; iligtas Nia sia ngonyan kun boot Nia sia, huli ta sia nagsabi, ‘Ako Aki nin Dios.’”

Nadara an boot, an mga soldados pinagtuya man si Jesus. Mapag-olog-olog na sia tinangroan ninda nin maalsom na arak, na malinaw na kinakapotan iyan na mas halangkaw nin kadikit sa saiyang marang mga ngabil. “Kun ika an hade kan mga Judio,” an pagduhagi ninda, “ligtasan an saimong sadiri.” Pati an mga parahabon​—an saro nakapako sa too ni Jesus, asin an saro sa saiyang wala—​tinuya sia. Isip-isipa nanggad iyan! An pinakadakulang tawo na nabuhay kasuarin pa man, iyo, an saro na tuminabang ki Jehova Dios sa paglalang sa gabos na bagay, marigon na tinitios an gabos na pan-iinsultong ini!

Kinua kan mga soldados an pan-ibabaw na gubing ni Jesus asin binaranga iyan sa apat na kabtang. Nagpabunotan sinda tanganing helingon kun mapapasa kiisay ini. Alagad an pan-irarom na gubing mayo nin tahi, huling marahay na klase. Kaya an mga soldados nagpaorolay-olay: “Dai niato iyan paggision, kundi aramon ta paagi sa pabunotan kaiyan kun mapapasa kiisay iyan.” Kaya, daing pakaaram na inootob ninda an kasuratan na nagsasabi: “Pinagbaranga ninda sa saindang sadiri an sakong pan-ibabaw na gubing, asin sa sakong bado sinda nagpabunotan.”

Pag-abot nin oras, nasabotan kan saro sa mga parahabon na si Jesus sierto nanggad na hade. Kaya, sinasaway an saiyang kaibahan, sia nagsabi: “Dai ka daw nanggad natatakot sa Dios, ngonyan na ika nasa siring man sanang silot? Asin kita, sa katotoohan, makatanosan, huli ta lubos niatong inaako an maninigong balos sa mga bagay na satong ginibo; alagad an tawong ini dai nakaginibo nin ano man na maraot.” Dangan kinaolay nia si Jesus, na an pakimaherak: “Girumdoma man ako kun ika yaon na sa saimong kahadean.”

“Sa katotoohan sinasabi ko saimo ngonyan,” an simbag ni Jesus, “Ika makakaibahan ko sa Paraiso.” An panugang ini maootob kun si Jesus mamahala na bilang Hade sa langit asin buhayon nia liwat an may pagsolsol na paragibo nin maraot na ini digdi sa daga sa Paraiso na an mga makakaligtas sa Armagedon asin an saindang kairiba magkakapribilehiyo na kultibaron. Mateo 27:​33-44; Marcos 15:​22-32; Lucas 23:​27, 32-43; Juan 19:​17-24.

▪ Taano ta sinayumahan ni Jesus na inomon an arak na binugtakan nin drogang mirra?

▪ Ano an minalataw na dahelan na ipinaskil sa harigi ni Jesus an sarong karatula, asin anong simbagan an pinonan kaini sa pag-oltanan ni Pilato asin kan mga poon na saserdote?

▪ Ano pang pan-iinsulto an inako ni Jesus sa harigi, asin ano an malinaw na pinonan kaiyan?

▪ Paano naotob an hula sa ginibo sa mga gubing ni Jesus?

▪ Anong pagbabago an ginibo kan saro sa mga parahabon, asin paano ootobon ni Jesus an saiyang pakimaherak?