An Pinakadakulang Tawo na Nabuhay Kasuarin Pa Man
Kapitulo 126: “Totoong Gayo na Ini Iyo an Aki nin Dios”
Si Jesus dai pa nahahaloy sa harigi kan, sa odto, nangyari an sarong misteryoso, tolong oras an lawig na kadikloman. Bako iyan huli sa pag-eklipse kan aldaw, huli ta ini nangyayari sana sa panahon kan bagong bulan asin bilog an bulan sa panahon nin Paskua. Saro pa, an mga pag-eklipse kan aldaw nagkapirang minuto sana an lawig. Kaya an kadikloman gibo nin Dios! Posibleng pinapondo nguna kaiyan an mga nag-oolog-olog ki Jesus, na pinaontok pa ngani an saindang mga pagtuya.
Kun an nakapangigirabong ngangalasan nangyari bago sagweon kan saro na paragibo nin maraot an saiyang kaibahan asin hagadon ki Jesus na girumdomon sia, iyan puwedeng nagin dahelan kan saiyang pagsolsol. Posibleng durante kan kadikloman na an apat na babae, siisay na baga, an ina ni Jesus asin an tugang kaining si Salome, si Maria Magdalena, asin si Maria na ina ni apostol Santiago na Sadang, nagrani sa may hariging pasakitan. Si Juan, an namomotan na apostol ni Jesus, kaibahan ninda duman.
‘Linagbas’ nanggad an puso kan ina ni Jesus mantang pinagmamasdan nia an aki na saiyang pinasuso asin inataman na nakabitin duman na labi-labi an pagsakit! Minsan siring an iniisip ni Jesus, bakong an sadiri niang kolog, kundi an kapakanan ni Maria. Naghihingoang marhay, tinangoan nia si Juan asin nagsabi sa saiyang ina: “Babae, uya! An saimong aki!” Dangan, nagtatango ki Maria, sia nagsabi ki Juan: “Uya! An saimong ina!”
Sa siring ipinagkatiwala ni Jesus an pag-ataman sa saiyang ina, na malinaw na balo na ngonyan, sa saiyang espesyalmenteng namomotan na apostol. Ginibo nia ini huli ta an ibang aki ni Maria dai pa nagpapaheling nin pagtubod sa saiya. Kaya nagtatao sia nin marahay na halimbawa sa paggibo nin probisyon bako sanang sa pisikal na mga pangangaipo kan saiyang ina kundi siring man sa saiyang espirituwal na mga pangangaipo.
Kan mga alas tres nin hapon, si Jesus nagsabi: “Napapaha ako.” Namamatean ni Jesus na an saiyang Ama garo man sana hinalean na sia nin proteksion tanganing lubos na mabalo an saiyang integridad. Kaya nagkurahaw sia sa makosog na tingog: “Dios ko, Dios ko, tadaw ta pinabayaan mo ako?” Kan madangog ini, an ibang nagtitirindog sa kataed nagkagsing: “Uya! Inaapod nia si Elias.” Tolos-tolos na duminalagan an saro sa sainda asin, ilinalaag sa poro nin paklang nin hisopo an espongha na binasa sa maalsom na arak, pinainom sia. Alagad an iba nagsabi: “Pabayae sia! Helingon ta kun baga dumigdi si Elias tanganing tanggalon sia.”
Kan akoon ni Jesus an maalsom na arak, sia kuminurahaw: “Tapos na!” Iyo, natapos na nia an gabos na isinugo sa saiya kan saiyang Ama na gibohon digdi sa daga. Sa katapustapusi, sia nagsabi: “Ama, sa saimong kamot ipinaniniwala ko an sakong espiritu.” Sa siring ipinaniniwala ni Jesus sa Dios an saiyang puwersa nin buhay na may kompiansa na ibabalik giraray iyan nin Dios sa saiya. Dangan idinuko nia an saiyang payo asin nagadan.
Sa oras kan ultimong hinangos ni Jesus, sarong makosog na linog an nangyari, na buminaraak sa darakulang gapo. Makosogon an linog kaya an mga lolobngan nin girumdoman sa luwas kan Jerusalem nagkaburukasan asin an mga bangkay nakaarapon sa luwas. An nag-aaragi na nakaheling na nakaruluwas an mga bangkay nagralaog sa siudad asin ibinareta iyan.
Dugang pa, kan oras na nagadan si Jesus, an dakulaon na kurtina na isiniseparar an Banal sa Kabanalbanale sa templo nin Dios nabanga, poon sa itaas paibaba. Minalataw na an magayon an pagkasamnong kurtinang ini mga 18 metros an langkaw asin mahibogon! An makangangalas na milagro bako sanang nagpaheling kan kabangisan nin Dios tumang sa mga guminadan sa Saiyang Aki kundi nangangahulogan man na an paglaog sa Kabanalbanale, sa langit mismo, pinagin posible na ngonyan kan kagadanan ni Jesus.
Bueno, kan mamatean kan mga tawo an linog asin maheling an mga bagay na nangyayari, nagkatarakot sinda nin makuri. An opisyal sa hukbo na namamahala sa paggadan nagtao nin kamurawayan sa Dios. “Totoong gayo na ini iyo an Aki nin Dios,” an ipinahayag nia. Posibleng presente sia kan an paghihingako sa pagigin aki nin Dios pinag-orolayan kan binibista si Jesus sa atubangan ni Pilato. Asin ngonyan kombensido na sia na si Jesus iyo an Aki nin Dios, iyo, na sia tunay na iyo an pinakadakulang tawo na nabuhay kasuarin pa man.
An iba nakubhanan man sa milagrosong mga pangyayaring ini, asin nagpoon na sindang magpuruli na tinutubtob an saindang mga daghan bilang tanda kan saindang makuring kamondoan asin pagkasopog. Sa haroharayo nagmamasid sa nangyayari an dakol na babaeng disipulo ni Jesus na odok na napahiro kan mahalagang mga pangyayaring ini. Yaon man si apostol Juan. Mateo 27:45-56; Marcos 15:33-41; Lucas 23:44-49; 2:34, 35; Juan 19:25-30.
▪ Taano an pag-eklipse kan aldaw ta bakong iyo an dahelan kan tolong oras na kadikloman?
▪ Dai nahaloy bago kan saiyang kagadanan, anong marahay na halimbawa an itinao ni Jesus para sa mga igwa nin may edad nang mga magurang?
▪ Ano an ultimong apat na pahayag ni Jesus bago sia nagadan?
▪ Ano an nagibo kan linog, asin ano an kahulogan kan pagkabanga kan kurtina sa templo?
▪ Paano an opisyal sa hukbo na namamahala sa paggadan naapektaran kan mga milagro?
(Ipagpapadagos sa masunod na luwas.)