Pagpaogma sa Saindong Buhay Pampamilya
Kapitulo 2: Pagbugtak nin Marahay na Pundasyon Para sa Saindong Pag-agom
1-3. Sono sa Mateo 7:24-27, sa ano minadepende an tunay na kapangganahan sa buhay?
1 An harong, buhay o pag-agom kapareho sana karahay sa pundasyon na napasisikadan kaiyan. Sa saro sa saiyang mga ilustrasyon si Jesus nagtaram dapit sa duwang tawo—sarong madonong na nagtogdok kan saiyang harong sa ibabaw nin gapo asin sarong mangmang na nagtogdok sa baybay. Kan bumagyo, asin inagihan nin baha asin makosog na doros an mga harong, an harong sa ibabaw nin gapo nagdanay na nagtitindog, alagad an nasa baybay nagaba.
2 Si Jesus dai nagtotokdo sa mga tawo kun paano matogdok nin mga harong. Idinodoon nia an pangangaipo na itogdok ninda an saindang buhay sa marahay na pundasyon. Bilang mensahero nin Dios, sia nagsabi: “An gabos na nagdadangog sa mga tataramon kong ini asin naggigibo kaiyan” kabaing kan tawo na nagtogdok sa gapo. Alagad “an gabos na nagdadangog sa mga tataramon kong ini asin dai naggigibo kaiyan” kabaing kan saro na nagtogdok sa baybay.—Mateo 7:24-27.
3 Mangnoha na sa duwang kaso ipinaheling ni Jesus na an kaipuhan bako sanang pagdangog sa madonong na hatol asin pakaaram kan gigibohon. An pinagkakalaenan kan kapangganahan asin pagkasudya iyo an paggibo kan sinasabi kan madonong na hatol. “Kun aram nindo an mga bagay na ini, maogma kamo kun gibohon nindo iyan.”—Juan 13:17.
4. Ano an pira sa mga bagay na manonodan niato sa pag-agoman kan enot na tawong mag-agom? (Genesis 2:22–3:19)
4 Ini totoo nanggad sa pag-agom. Kun itotogdok niato an satong pag-agom sa garo-gapong pundasyon, iyan makatatagal sa mga kasakitan sa buhay. Alagad saen minagikan an marahay na pundasyon na ini? Sa Kaglalang sa pag-agoman, si Jehova Dios. Pinundar nia an pag-agoman kan kasalon nia an enot na tawong mag-agom. Dangan tinawan nia sinda nin madonong na mga instruksion para sa ikararahay ninda. An pagsunod ninda sa madonong na mga instruksion na ini madeterminar kun baga igwa sinda nin daing katapusan na mamuraway na ngapit o mayo. Sindang duwa pareho nakakaaram kan mga instruksion nin Dios, alagad ta, makamomondo, tinogotan ninda an kapasloan na makaolang sa sainda sa pagkuyog sa mga giyang ini. Pinili nindang dai pag-intindihon an hatol asin, bilang resulta, an saindang pag-agoman asin an saindang buhay nagaba na garo binagyong harong na natotogdok sa baybay.
5, 6. Anong tabang an itinatao nin Dios para sa mga may agom asin sa mga nagpaplanong mag-agom?
5 Si Jehova Dios an nagkasal sa enot na mag-agom, alagad sa ngonyan dai na nia personalmenteng inaareglar an pag-agoman nin mga tawo. Minsan siring, yaon pa man giraray an saiyang madonong na hatol para sa maogmang mga pag-agoman. Bahala na an kada indibiduwal ngonyan na nagpaplanong mag-agom na magdesisyon kun baga iaaplikar nia an hatol. Ipinaheheling man kan Tataramon nin Dios na makahahagad kita nin tabang sa saiya sa paggibo nin madonong na desisyon dapit sa pinaplanong agomon.—Santiago 1:5, 6.
6 Siempre, laen-laen na gayo an kamugtakan sa laen-laen na parte kan daga. Sa dakol na lugar ngonyan an mga lalaki asin babae iyo an mismong minapili sa saindang aagomon. Alagad sa dakulang kabtang kan populasyon nin daga mga magurang an nag-aareglar sa pag-agoman, kun beses paagi sa sarong “paraareglar nin maaagom.” Sa ibang lugar an lalaki nakakaagom sana pakapagbayad nin “dote” sa mga magurang kan babae, asin tibaad huli sa kantidad kan dote dai makaya kan lalaki an pag-agom. Minsan siring, ano man an kamugtakan, an Biblia nagtatao nin hatol na makatatabang sa nagdadanay na kapangganahan nin pag-agoman.
Midbidon Nguna an Saindong Sadiri
7-10. (a) Kun nagpaplanong mag-agom, ano an dapat na maaraman nin saro dapit sa saiyang sadiri? Paano nia iyan aaramon? (b) Ano an sinasabi kan Biblia dapit sa pagigin balido nin mga dahelan sa pag-agom?
7 Ano an gusto nindong makamtan sa pag-agom? Ano an saindong mga pangangaipo—sa pisikal, emosyonal, espirituwal? Ano an mahalaga sa saindo, an saindong mga pasohan asin an saindong mga paagi na maabot iyan? Tanganing masimbag an mga hapot na ini dapat na saindong mamidbid an saindong sadiri. Ini bakong siring kapasil sa tibaad paghona nindo. Kaipuhan an emosyonal na pagkamaygurang tanganing masiyasat an satong sadiri, asin minsan pa igwa na kita kaiyan dai pa man giraray posibleng maheling an tunay niatong pagkatawo sa gabos na detalye. Ipinarisa ini kan Kristianong apostol na si Pablo kan sia sumurat, sa 1 Corinto 4:4: “Dai ako nakakaaram nin ano man na tumang sa sako. Pero sa paaging ini dai ako napatutunayan na matanos, kundi an nagsisiyasat sa sako iyo si Jehova.”
8 Sarong beses boot kan Kaglalang na mamidbid kan tawong si Job an pirang bagay na dai nia namamansayan, asin an Dios nagsabi sa saiya: “Hahapoton taka, asin simbagon mo ako.” (Job 38:3) An mga hapot makatatabang sato na mamidbid an satong sadiri asin maaraman an mga motibo. Kaya hapota an saindong sadiri dapit sa saindong interes sa pag-agom.
9 Boot daw nindong mag-agom tanganing panigoan an pisikal na mga pangangaipo—kakanon, gugubingon, erokan? An mga pangangaipong iyan nasa sato gabos, arog kan sabi kan Biblia: “Kun igwa na nin kakanon asin gubing, manigoan na kita kan mga bagay na iyan.” Asin an pangangaipo sa sekso? Iyan normal man na pagmawot. “Marahay pang mag-agom kisa sa maglaad sa horot.” (1 Timoteo 6:8; 1 Corinto 7:9) Iyan daw tanganing may makaibaiba kamo? Iyan mayor na rason na pinundar nin Dios an areglo nin pag-agom. An saro pa iyo na tanganing an duwang tawo magtinabangan sa pagtrabaho. (Genesis 2:18; 1:26-28) An pakahaman nin marahay na trabaho gikanan nin pagkakontento asin maninigong may balos: “An lambang saro magkakan asin mag-inom asin magkamit nin karahayan sa gabos niang hinigosan. Ini iyo an balaog nin Dios.”—Eclesiastes 3:13.
10 An puso haloy nang pinagheling nin mga tawong namomoot bilang simbolo kan saindang mga saboot. Minsan siring, an Biblia may nakahahadit na hapot dapit sa puso: “Siisay an makamimidbid kaiyan?” (Jeremias 17:9) Segurado daw nindo na aram nindo an nasa saindong puso?
11. Anong pundamental na emosyonal na mga pangangaipo an maninigong mapanigoan sa pag-agom?
11 Parate na an pisikal na pagkaakit nakabubuta sato sa ibang emosyonal na mga pangangaipo. Sa paghanap nin maaagom, tinatawan daw nindo nin igong gabat an saindong pangangaipo na mag-ako nin pagsabot, kabootan asin pagdamay? An pundamental na mga pangangaipo niato gabos iyo ini: saro na makakadayupot, mapagkokompiaran, mapagpapahayagan kan satong mga saboot na dai natatakot na makolgan an satong boot; saro na dai mapinto “kan saiyang mamomoton na pagdamay” sa sato. (1 Juan 3:17) Ini daw gabos ikatatao nindo sa saindong maaagom, asin ikatatao man daw nia iyan sa saindo?
12. Taano an pagpanigo sa pisikal asin emosyonal na mga pangangaipo ta kulang pa tanganing magin maogma an pag-agom?
12 Si Jesus nagsabi: “Maogma idtong mga nakamamate kan saindang espirituwal na pangangaipo.” (Mateo 5:3) Ano an saindong espirituwal na pangangaipo? Iyan daw konektado sa paghanap nin karera? Kayamanan? Materyal na mga rogaring? Bueno, an mga bagay daw na ini nakatatao nin panlaog na katoninongan asin pagkakontento? Parateng dai. Kaya kaipuhan na masabotan niato na sa laog nin gabos na tawo igwa nin nagdadanay na pagkagutom sa espiritu, minsan pa mapanigoan na an gabos na pisikal na pangangaipo. An satong espiritu nagugutom sa pakamidbid—na maaraman kun siisay kita, ano kita, taano ta yaon kita digdi, asin pasaen kita. Namamatean daw nindo an espirituwal na mga pangangaipong ini, asin kun paano iyan mapaninigoan?
Pagigin Magkabagay
13. Tanganing magin maogma an pag-agom, ano an dapat nindong mamansayan laen pa sa saindong sadiring mga pangangaipo?
13 Kun nasasabotan nindo an gabos na pangangaipong ini kan hawak, isip asin espiritu, aram daw nindo kun baga iyan nasasabotan man kan saindong maaagom? Dapat na bako sanang maaraman nindo an sadiri nindong partikular na mga pangangaipo tanganing maogma sa pag-agom kundi dapat na mamansayan man nindo an mga pangangaipo kan saindong agom. Siertong boot nindong maogma man an saindong agom. An kamondoan nin saro mangangahulogan nin kamondoan kan duwa.
14. Sa dakol na pag-agoman, taano ta nadidiskobre nin mga mag-agom na bako sindang magkabagay?
14 An dakol na pag-agoman natatapos sa kamondoan o diborsio huli a pagigin bakong magkabagay. An pagigin bakong magkabagay dakulang termino, alagad mas dakula pa an halaga kaiyan sa pag-agoman. Kun an duwang tawo bakong angay na mag-iba, puedeng magin masakit an buhay. An siring na kamugtakan nagpapagirumdom sa ipinagboot kan Mosaikong pagboot na may pagkaherak na nangalad sa pagsakal sa duwang hayop na magkalaen sa langkaw asin kosog, huli sa ibubungang kadepisilan. (Deuteronomio 22:10) Arog man kaiyan sa lalaki asin babae na bakong magkabagay pero pinagpadis sa pag-agoman. Kun an mag-agom may magkalaen na intereses, magkalaen na paborito sa mga amigo asin sa pag-aling-aling, asin kakadikit kan pinagkakaoyonan, nahihigotan na gayo an mga bogkos nin mag-agom.
15, 16. Ano an pira sa mga bagay na maninigong ipakipag-olay sa magigin agom nin saro, asin paano?
15 “Nasusudya an mga plano kun mayo nin pribadong orolay,” sabi sa sato kan Biblia. (Talinhaga 15:22) Sa pagplanong magpakasal, napag-olayan na daw an praktikal na mga bagay? Ano an magigin epekto kan trabaho nin lalaki sa pag-agom? Iyan an madeterminar kun saen kamo mag-iistar asin kun guranong kuarta an malaog na gagastuson sa praktikal na mga pangangaipo. Siisay an magkakapot kan kuarta? Kaipuhan daw na magtrabaho an babae, asin marahay daw iyan? Ano an magigin relasyon sa man-ibong-ibong na paryentes, orog na sa mga magurang kan mag-agom? Ano an saboot kan lambang saro dapit sa sekso, mga aki asin pagsasanay sa mga aki? Boot daw kan saro na dominaron an saro, o maboot na konsiderasyon daw an magiya sa relasyon?
16 Puede daw na an gabos na hapot na ini, patin an iba pa, mapag-olayan sa kalmado asin makatanosan na paagi, asin mapagkaoyonan sa paagi na magigin marahay sa saindong duwa? Puede daw na an mga problema magkaibanan na atubangon asin resolberan, asin papagdanayon na perming bukas an linya nin komunikasyon? Iyan an proteksion sa mapangganang pag-agom.