Kinonsiderar Giraray an Pag-ineksion nin Dugo

SA MALUMLOM na panahon na ini nin AIDS, an pinakadakulang peligro sa salud nin sarong pasyente sa ospital tibaad nagtatago sa sala de operasyon. “Mayo nin paagi na magibo niatong biyong esterilisado an suplay nin dugo,” an sabi ni Dr. Richard Spence, na labi nang sarong dekada na namamahala sa Center for Bloodless Surgery sa Cooper Hospital-University Medical Center sa Camden, New Jersey, E.U.A.

Bakong makangangalas, an center nagbobolong sa dakol sa Mga Saksi ni Jehova, na an basado sa Bibliang pagsayuma sa pag-ineksion nin dugo bantog. (Levitico 17:11; Gibo 15:​28, 29) Minsan siring, an nagkapirang pasyente na bakong Saksi nagpapabolong man sa center, na nahahadit manongod sa posibleng mga peligro nin pag-ineksion nin dugo, na kabale an pagkaolakit nin hepatitis, AIDS, asin iba pang helang. “An paglataw nin AIDS nagpaheling kan pangangaipong eksaminon an dugo,” an sabi kan Courier-Post Weekly Report on Science and Medicine. “Alagad an ibang kaso puede pa man giraray na makalusot sa proseso nin pag-eksamin huli ta an saro puedeng igwa na nin virus bago pa iyan maheling sa eksaminasyon.”

Huli sa mga peligrong iyan, an Center for Bloodless Surgery naggagamit nin mga pansalida sa pag-ineksion nin dugo, kabale an paggamit giraray kan sadiring dugo kan pasyente​—sarong paagi na tibaad ibilang nin ibang Saksi na puede man sa irarom nin nagkapirang kamugtakan.a An saro pang pagbolong kabale an paggamit nin mga droga na nagpapakosog sa produksion nin dugo kan pasyente. Dugang pa, an artipisyal na pansalida sa dugo sa panapanahon ginagamit sa pagpakosog kan bolos nin oksiheno na dai na kaipuhan an iinineksion na dugo. “Gusto an Mga Saksi ni Jehova nin pinakamarahay na medikal na pag-ataman,” an sabi ni Dr. Spence, “alagad gusto ninda nin mga pansalida sa pag-ineksion nin dugo.”

Pinasasalamatan kan Mga Saksi ni Jehova an kooperasyon asin tabang na inaako ninda hale sa mga doktor na naggagalang sa saindang relihiosong mga kombiksion. Bilang resulta, sinda talagang nag-aako kan “pinakamarahay na medikal na pag-ataman” asin nakapagpapadanay nin malinig na konsensia sa atubangan ni Jehova Dios.​—2 Timoteo 1:3.

[Nota sa Ibaba]