Pagpaogma sa Saindong Buhay Pampamilya
Kapitulo 4: An Agom na Lalaki na Nagkakamit nin Hararom na Paggalang
1, 2. Paano nakakamtan an paggalang, asin paano ini iinilustrar na marhay sa kaso ni Jesu-Cristo?
1 An paggalang dai nakakamtan paagi sana sa pagmando sa saro na igalang kamo. Kaipuhan na kamo magin maninigo sa paggalang paagi sa saindong pagtaram asin paghiro asin paagi sa saindong pagkatawo.
2 Iinilustrar ini sa kaso ni Cristo Jesus. Iginalang sia bilang paratokdo huli kan saiyang paagi nin pagtotokdo. Pakatapos kan saiyang Sermon sa Bukid “napangalas an kadaklan sa saiyang paagi nin pagtotokdo.” Ano an nagpangyari sa saiya na magin maninigo sa paggalang na ini? An saiyang pagsarig sa tataramon nin Dios na an Biblia imbes na sa mga opinyon nin ibang tawo. An solamenteng autoridad nia iyo si Jehova Dios asin an Saiyang tataramon nin katotoohan. Si Jesus nagkamit nin paggalang kapwa gikan sa katood asin kaiwal, paagi sa pagigin maninigo dian.—Mateo 7:28, 29; 15:1-9; Juan 7:32, 45, 46.
3. Anong obligasyon an itinatao kan Efeso 5:33 sa agom na babae, asin ano an hinahagad kaini sa agom na lalaki?
3 “An agom na babae maninigong magkaigwa nin hararom na paggalang sa saiyang agom,” an instruksion sa Efeso 5:33. Alagad an lalaki maninigong maghingoa na magin maninigo sa paggalang na ini; ta kun dai, madedepisilan na gayo an saiyang agom na kuyogon an instruksion na ini. Paano maootob nin agom na lalaki an saiyang papel na sinasabi sa Biblia tanganing kamtan an siring na paggalang?
Paagi sa Paggibo nin Tamang Pagkapayo
4. Anong katongdan an itinatao kan Biblia sa agom na lalaki?
4 An lalaki ibinubugtak kan Biblia sa katongdan nin pagkapayo sa areglo nin pag-agoman, na an sabi: “Magpasakop an mga agom na babae sa saindang agom nin siring sa Kagurangnan, huli ta an lalaki iyo an payo kan saiyang agom kun paanong si Cristo iyo man an payo kan kongregasyon, mantang sia an paraligtas kan hawak na ini. Sa katunayan, kun paanong an kongregasyon nagpapasakop ki Cristo, siring man an mga babae sa saindang agom sa gabos na bagay.” (Efeso 5:22-24) An areglo daw na ini talagang makatatabang na magin maogma an pamilya? May mga babae na nagtataram tumang sa inaapod nindang chauvinismo nin mga lalaki, an boot sabihon, labi-labi kaabhaw o sobrang pagheling nin pirang lalaki sa saindang kamugtakan kun dapit sa mga babae. Alagad linawon niato sa kapinonan pa sana na an mga katokdoan kan Biblia dai nagsusuportar sa siring na chauvinismo nin mga lalaki.
5. Ano an maninigong midbidon nin lalaki dapit sa pagkapayo, asin kiisay na mga halimbawa an maninigong arogon nia?
5 Idinodoon kan Biblia an bagay na, bako sanang an babae, kundi pati an lalaki nasa irarom nin pagkapayo. Sa pagbukas sa libro kan Biblia na 1 Corinto, kapitulo 11, bersikulo 3, maheheling niato na isinurat ni apostol Pablo an mga tataramon na ini sa kongregasyon sa Corinto: “Boot kong maaraman nindo na an payo kan lambang lalaki iyo an Cristo; an payo man nin babae iyo an lalaki; an payo man kan Cristo iyo an Dios.” An payo nin lalaki iyo si Cristo, asin sa Dios asin ki Cristo bilang mga arogan asin paratokdo na kamo, agom na lalaki, maninigong makanood kun paano gigibohon an pagkapayo.
(Ipagpapadagos sa masunod na luwas.)