Nagpapatotoo an Pagkakan na Nasa Kahon

KAIDTONG mga aldaw pakalihis kan linog sa Kobe, Hapon, kan nakaaging Enero, an mga tawo sa apektadong lugar nasakitan sa paghanap nin kakanon. Pero, an Mga Saksi ni Jehova duman dai nagkulang nin ikabubuhay, huli sa maboot na tabang kan saindang mga katood. Sa enot na duwa o tolong aldaw pakalihis kan linog, an kataraed na kongregasyon nagtarao nin binolabolang maluto. Dai nahaloy, an may pagmakolog na mga katood nanao nin mga pagkakan na nasa kahon. Sa mga pagkakan na nasa kahon, dakol an nagbugtak nin halipot na mga surat na nagpapahayag nin pagmakolog sa mga apektado. An mga nakaresibi kan pagkakan nagsabi na an lambang pagkakan “uminasgad” ta dai ninda mapogolan an saindang pagluha kun binabasa an mga surat.

An Mga Saksi ni Jehova ihiniras an saindang pagkakan sa iba na nasa pangangaipo. An sarong Saksi nangongodto mantang nagbibiahe sa kotse kaiba nin sarong bakong Saksing katrabaho nia sa kompaniya. Kaya itinao nia an saro sa mga pagkakan na nasa kahon na naresibi nia.

“Saen mo binakal an pangodtohan na ini na nasa kahon?” an hapot kan saiyang katrabaho. Ipinaliwanag kan tugang an pag-ayuda kan mga Saksi. “Dakol nang aldaw na dai ako nakakakan nin gulay. Itatada ko an iba asin ipupuli ko iyan para sa sakong pamilya,” an may pag-apresyar na sabi kan lalaki.

Kan ikatolong beses na nangyari ini, an katrabaho nagtao nin 3,000 na yen (mga $35, E.U.) sa Saksi asin nagsabi: “Pamilyar ako sa aktibidad nindo, kaya togoti tabi akong magdonar sa saindong gibohon. Inaapresyar ko an paghiras mo sako kan saimong pangodtohan. Tunay nanggad, an saimong mga katood gabos marahayon na tawo.”