“Ilinalampog, Alagad Dai Nalalaglag”

ISINAYSAY NI ULF HELGESSON

Kan Hulyo 1983, an mga doktor na nag-aamba sa sako nagkagsing: “Mata na sia!” Sarong tumor na 12 sentimetros an laba an hinale sa sakong udog sa 15 oras na komplikadong operasyon. Biyo akong naparalisar.

PAKALIHIS nin nagkapirang aldaw, ibinalyo ako sa sarong ospital na haros 60 kilometros hale sa sakong sadiring banwaan nin Hälsingborg, sa timog nin Sweden. Duman nag-entra ako sa sarong programa sa rehabilitasyon. An physiotherapist nagsabi na labi-labi iyan kapagal, pero gustong-gusto kong makapoon. Talagang boot kong makalakaw giraray. Paagi sa mahigos na pagsunod sa limang oras kada aldaw na programa nin ehersisyo, nagin marikas an sakong pagrahay.

Pakalihis nin sarong bulan kan maglingkod sa samong kongregasyon an nagbibiaheng paraataman, sia asin an iba pang Kristianong kamagurangan nagbiahe nin harayo tanganing gibohon an miting kan kamagurangan sa kongregasyon sa sakong kuarto sa ospital. Kanigoan an paggayagaya kan sakong puso sa ebidensiang ini nin sa magturugang na pagkamoot! An bilog na grupo pinameryenda kan mga nars nin tsa asin mga sanwits pakatapos kan miting.

Sa primero napangalas an mga doktor sa sakong pagrahay. Pakalihis nin tolong bulan nakatutukaw na ako sa sakong silyang de rueda asin nakatitindog pa ngani nin pirang segundo. Naogma ako asin lubos na determinadong makalakaw giraray. Pinakosog akong marhay kan sakong pamilya asin mga kapwa Kristiano durante kan saindang mga pagsongko. Nahihimo ko na nganing magpuli sa halipot na mga panahon.

Sarong Tunay na Kaolangan

Minsan siring, pakatapos kaidto nagpondo na ako sa pagrahay. Dai nahaloy itinao sa sako kan physiotherapist an makolog na mensahe: “Sagkod na sana digdi an pagrahay mo!” An pasohan ngonyan pakosogon ako na makasolong maghirohiro sa silyang de rueda. Inisip-isip ko kun ano an mangyayari sa sako. Paano na an sakong agom? Sia mismo nag-agi nin seryosong operasyon asin nangangaipo kan sakong tabang. Mangangaipo daw ako nin permanenteng institusyonal na pag-ataman?

Namondo ako nin labi-labi. Luway-luway na nauubos an sakong kosog, kapusoan, asin bagsik. Nag-agi an mga aldaw, asin dai pa giraray ako naghihiro. Bako sanang paralisado ako sa pisikal kundi namamagol na ako kun sa emosyonal asin espirituwal. Ako “ilinalampog.” Perming makosog sa espirituwal an pagheling ko kaidto sa sakong sadiri. Yaon sa sako an marigon na nakagamot na pagtubod sa Kahadean nin Dios. (Daniel 2:44; Mateo 6:10) Kombensido ako sa panuga kan Biblia na an gabos na helang asin kamatean paoomayan sa matanos na bagong kinaban nin Dios asin na an bilog na katawohan ibabalik sa sangkap na buhay duman. (Isaias 25:8; 33:24; 2 Pedro 3:13) Ngonyan paralisado na ako bako sanang sa pisikal kundi siring man sa espirituwal. An pagmate ko “nalalaglag” na ako.​—2 Corinto 4:9.

Bago ako magpadagos, togoti nindo akong isaysay sa saindo an halipot na estorya kan sakong buhay.

Sarong Maogmang Pamilya

Namundag ako kan 1934, asin perming marahay an sakong salud. Kan enot na mga taon nin 1950, nakamidbid ko si Ingrid, asin nagpakasal kami kan 1958 asin nag-istar sa banwaan nin Östersund, sa sentral na Sweden. Uminabot sa buhay mi an sarong mahalagang pangyayari kan 1963 kan magpoon kaming makipag-adal sa Biblia sa Mga Saksi ni Jehova. Kan panahon na idto tolo an saradit ming aki​—si Ewa, Björn, asin Lena. Dai nahaloy an bilog ming pamilya nag-aadal na asin marahay an pag-oswag sa kaaraman sa mga katotoohan kan Biblia.

Dai nahaloy pakapoon ming mag-adal, buminalyo kami sa Hälsingborg. Duman, idinusay niamo mag-agom an samong sadiri ki Jehova asin nabautismohan kami kan 1964. Nadugangan an samong kaogmahan kan an pinakamatua ming aking babae, si Ewa, nabautismohan kan 1968. Pakalihis nin pitong taon, kan 1975, nabautismohan man si Björn asin Lena, asin kan sumunod na taon ninombrahan akong magurang sa Kristianong kongregasyon.

Paagi sa sakong sekular na trabaho nasustentohan ko nin igo an materyal na mga pangangaipo kan sakong pamilya. Nag-orog an samong kaogmahan kan si Björn asin Lena naglaog sa pambilog na panahon na ministeryo. Dai nahaloy si Björn inimbitaran na maglingkod sa sangang opisina kan Mga Saksi ni Jehova sa Arboga. Marahayrahay an buhay mi. Dangan, sa pagpoon kan 1980, nagpoon na mamatean ko an pisikal na mga epekto kan tumor na sa kahurihurihi hinale sa seryosong operasyon na idto kan 1983.

Pagdaog sa Espirituwal na Paralisis

Kan sabihan ako na dai na ako makalalakaw giraray, an buhay garo baga buminagsak sa sako. Paano ko nakamtan liwat an espirituwal na kosog? Mas pasil iyan kisa sa pinaghona ko. Kinua ko sana an sakong Biblia asin pinonan na basahon. Mientras na ako nagbabasa, nag-oorog man an espirituwal na kosog na sakong inaako. Orog sa gabos nasabotan ko an Sermon sa Bukid ni Jesus. Paorootro kong binasa asin hinorophorop iyan.

Nakabalik an sakong maogmang punto-de-vista sa buhay. Paagi sa pagbasa asin paghorophorop, nagpoon akong makaheling nin mga oportunidad imbes na mga kaolangan. Nakabalik an sakong pagmawot na ihiras sa iba an mga katotoohan kan Biblia, asin pinanigoan ko an pagmawot na ini paagi sa pagpatotoo sa mga tawohan sa ospital asin iba pang nakakaolay ko. Lubos akong sinuportaran kan sakong pamilya asin nag-ako sinda nin pagsasanay kun paano an pag-ataman sa sako. Sa kahurihurihi nakaluwas ako sa ospital.

Sa katapustapusi nasa harong na ako. Kanigoan kaogmang aldaw idto para sa samo gabos! An sakong pamilya nag-areglo nin sarong iskedyul na kaiba an pag-ataman sa sako. An aki kong lalaki, si Björn, nagdesisyon na bayaan an trabaho sa sangang opisina kan Mga Saksi ni Jehova, asin nagpuli sia tanganing tumabang na atamanon ako. Nakararanga nanggad na umako nin dakulang pagkamoot asin pagmakolog kan sakong pamilya.

Pakapanggana sa Saro Pang Kaolangan

Minsan siring, mantang nag-aagi an panahon, nagluluya an sakong salud, asin nasasakitan akong maghiro. Sa kahurihurihi, sa ibong kan debotadong mga paghihingoa kan sakong pamilya, dai na ninda ako kayang atamanon sa harong. Kaya naisip ko na pinakamarahay para sa sako na lumaog sa klinika para sa pag-ataman sa mga may helang. Sa giraray, nangahulogan iyan nin mga pagliliwat asin bagong rutina. Alagad dai ko ini tinogotan na magin espirituwal na kaolangan.

Dai ako noarin man uminontok sa pagbasa asin pagsiyasat sa Biblia. Padagos kong iniisip kun ano an sakong magigibo, bakong an dai ko magigibo. Naghohorophorop ako sa espirituwal na mga bendisyon na yaon sa gabos na Saksi ni Jehova. Nagdanay akong dayupot ki Jehova paagi sa pamibi asin ginamit ko an lambang oportunidad na maghulit sa iba.

Ngonyan sa klinika ako natotorog asin nagdadanay nin pirang oras kun aldaw. An mga hapon asin banggi ginagamit ko magsalang sa harong o sa satong Kristianong mga pagtiripon. An sarong serbisyo sosyal kan munisipyo nag-aareglo nin regular na transportasyon pasiring asin hale sa mga pagtiripon saka pasiring asin hale sa sakong harong. An sakong debotadong pamilya, an mga tugang sa kongregasyon, asin an mga tawohan sa klinika inaataman ako sa makangangalas na paagi.

Paggibo kan Makakaya Ko

Dai ko ibinibilang na imbalido an sakong sadiri, asin dai ako tinatratar na siring kaiyan kan sakong pamilya, ni kan sakong Kristianong mga tugang. Inaataman ako sa mamomoton na paagi, na nagpapangyari sa sako na padagos na maglingkod nin epektibo bilang sarong magurang sa kongregasyon. Nagkokondukta ako nin Pag-adal sa Libro kan Kongregasyon kada semana, patin kan semanal na pag-adal kan kongregasyon sa An Torrengbantayan sa Kingdom Hall. Nasasakitan ako sa pagbuklad kan mga pahina sa Biblia, kaya may sarong iinasignar na tabangan akong gibohon iyan sa mga pagtiripon. Nagkokondukta ako nin mga pagtiripon asin nagdidiskurso na nasa sakong silyang de rueda.

Sa siring nagigibo ko pa giraray an dakol sa mga bagay na ikinaoogma kong gibohon kaidto, kabale an pagpapastor. (1 Pedro 5:2) Ginigibo ko ini kun an mga tugang na lalaki asin babae minadigdi sa sako para sa tabang o hatol. Ginagamit ko man an telepono, na nagsasadiring boot paagi sa pag-apod sa iba sa telepono. Pareho kami napakokosog. (Roma 1:​11, 12) Sarong katood an dai pa sana nahahaloy na nagsabi: “Sa oras na ako nagmomondo, minaapod ka tanganing rangahon ako.” Alagad napakokosog man ako, sa pakaaram na binebendisyonan ni Jehova an sakong mga paghihingoa.

Bago asin pakatapos kan mga pagtiripon, marahay an sakong pakiaasosyar sa mga aki sa kongregasyon. Huling nakatukaw ako sa sakong silyang de rueda, nag-oolay-olay kami na pantay an samong mga mata. Inaapresyar ko an saindang sinseridad asin pagkasadiosan. Sarong aking lalaki an sarong beses nagsabi sa sako: “Pambihira kamo kaguapong imbalido!”

Paagi sa pagkonsentrar sa kun ano an magigibo ko imbes na mapungot sa kun ano an dai ko magigibo, ikinaoogma ko an paglilingkod ki Jehova. Dakol akong nanodan sa nangyari sa sako. Narealisar ko na kita napapatood asin napakokosog paagi sa mga pagbalo na inaagihan niato.​—1 Pedro 5:10.

An dakol na tawong marahay an salud, sa obserbasyon ko, dai nakasasabot na dapat niatong perming isaboot an pagsamba sa satong langitnon na Ama. Kun dai niato iyan gigibohon, an satong iskedyul sa pag-adal, mga pagtiripon, asin ministeryo sa langtad puedeng magin rutina na sana. Ibinibilang ko na an mga probisyon na ini kaipuhan tanganing makaligtas sa katapusan kan kinaban na ini pasiring sa ipinanuga nin Dios na Paraiso digdi sa daga.​—Salmo 37:​9-11, 29; 1 Juan 2:17.

Dapat na permi niatong papagdanayon na buhay sa satong puso an paglaom na buhay sa maabot na bagong kinaban nin Dios. (1 Tesalonica 5:8) Nanodan ko man na dai sumuko sa pakikilaban tumang sa ano man na tendensia na manluya an boot. Nanodan kong mansayon si Jehova bilang sakong Ama asin an saiyang organisasyon bilang sakong Ina. Narealisar ko na kun kita maghihingoa, puedeng gamiton ni Jehova an siisay man sa sato na magin epektibong lingkod nia.

Minsan ngani kun beses namamatean ko na garo ako “ilinalampog,” ako “dai nalalaglag.” Dai ako noarin man binayaan ni Jehova asin kan saiyang organisasyon, ni kan sakong pamilya asin kan sakong Kristianong mga tugang. Huli sa pagkua ko kan Biblia asin pagpoon na basahon iyan, nagkamit liwat ako nin espirituwal na kosog. Nagpapasalamat ako ki Jehova Dios, na nagtatao nin “kapangyarihan na lihis sa ordinaryo” kun kita nananarig sa saiya.​—2 Corinto 4:7.

May lubos na kompiansa asin biyong pagsarig ki Jehova, galaga akong nagtatanaw sa ngapit. Kompiado ako na sa dai na nanggad mahahaloy ootobon ni Jehova Dios an saiyang panuga manongod sa sarong ibinalik na paraiso digdi sa daga kadungan kan gabos na makangangalas na bendisyon na dadarahon kaiyan.​—Kapahayagan 21:​3, 4.