Pagpaogma sa Saindong Buhay Pampamilya
Kasumpay kan Kapitulo 8: An Saindong Katongdan Bilang mga Magurang
An Kamugtakan sa Harong
28, 29. Anong klaseng kamugtakan sa harong an marahay, asin taano?
28 An katongdan kan duwang magurang magtao nin harong na may pagkamoot. Kun ini namamate kan mga aki, an saindang mga pagduwaduwa o sala dai matitipon sa saindang boot huli ta natatakot sindang magsabi sa saindang mga magurang. Aram ninda na puede sindang makikomunikar asin masabotan, asin na an mga bagay aasikasohon na may mamomoton na pagmakolog. (Ikomparar an 1 Juan 4:17-19; Hebreo 4:15, 16.) An harong dai sana magigin sisirongan kundi magigin man lugar nin kapahingaloan. An pagpadangat nin mga magurang mapatalubo asin mapaoswag sa boot kan mga aki.
29 Dai kamo makabubugtak nin espongha sa suka asin laoman na iyan mapapano nin tubig. Nasusupsup sana kaiyan an nasa palibot kaiyan. An espongha makasusupsup sana nin tubig kun dian iyan ibugtak. An mga aki nakasusupsup man kan nasa palibot ninda. Naririsa ninda an mga gawe asin namamasdan an mga ginigibo sa palibot ninda, asin an mga ini sinusupsup ninda na garo espongha. Naririsa kan mga aki an saindong mga saboot, kun baga iyan kahaditan o katrangkilohan. Minsan mga omboy nakasusupsup sa mga kualidad na nasa harong, kaya mahalagang marhay an mga kualidad na pagtubod, pagkamoot, espirituwalidad asin pagsarig ki Jehova Dios.
30. Anong mga hapot an puedeng ihapot nin mga magurang sa saindang sadiri tanganing maaraman kun baga nagtatao sinda nin marahay na paggiya sa saindang mga aki?
30 Hapoton an saindong sadiri: Anong mga pamantayan an linalaoman nindong aboton kan saindong aki? Iyan daw naootob nindong duwang magurang? Ano an pinaninindogan kan saindong pamilya? Anong klase kamong halimbawa sa aki? Kamo daw nagrereklamo, naghahanap nin sala, nagtatatsar sa iba, nagpaparaisip nin negatibong mga kaisipan? Iyan daw an klase nin mga aki na gusto nindo? O, igwa daw kamo nin halangkaw na mga pamantayan para sa saindong pamilya, namumuhay sono dian, asin linalaoman an saindong mga aki na gumibo man kaiyan? Nasasabotan daw ninda na tanganing magin miembro kan pamilyang ini may mga kahagadan na kaipuhan na maotob, may gawe na inaako, asin may mga hiro asin kaisipan na dai inaako? Gusto nin mga aki na mamatean an katiwasayan na gikan sa pagigin kabilang, kaya ipamate sa sainda an saindong pag-oyon asin pag-ako kun naaabot ninda an mga pamantayan kan pamilya. An mga tawo may tendensiang otobon an linalaoman sa sainda. Sabihon nindo na maraot an saindong aki asin posible na patotoohan nia iyan. Maglaom kamo nin marahay sa saiya, asin dinadagka sia nindo na otobon iyan.
31. Ano an maninigong perming magsuportar sa paggiya kan magurang?
31 An mga tawo mas hinuhusgaran sono sa saindang mga hiro kisa sa saindang mga sinasabi. An mga aki tibaad magtao man nin orog na atension sa mga hiro kisa sa mga tataramon asin parateng alisto sindang marisa an ano man na pagsaginsagin. An kadakoldakol na tataramon puedeng makaribaraw sa mga aki. Seguradohon nindo na an saindong mga tataramon suportado kan saindong paggibo kaiyan.—1 Juan 3:18.
32. Kiisay na hatol an maninigong perming kuyogon?
32 Baga man kamo ama o ina, mapan-angat an saindong katongdan. Alagad an angat maaatubang na may maogmang mga resulta paagi sa pagkuyog sa hatol kan Kagtao nin buhay. Otobon nindong may kaimbodan an katongdan na itinao sa saindo, na siring kun para sa Saiya. (Colosas 3:17) Likayan nindo an mga pagsobra, magdanay kamong timbang asin “ipaaram nindo sa gabos na tawo an saindong pagkamakatanosan,” pati sa saindong mga aki.—Filipos 4:5.