Ano an Katuyohan nin Buhay?—Paano Nindo Manonompongan Iyan?

Kapitulo 5: An Buhay May Marahayon na Katuyohan

1, 2. Paano niato masasabi na an Dios may pagmakolog sa sato, asin saen kita maninigong dumolok para sa simbag sa mga hapot sa buhay?

An pagkagibo sa daga asin sa mga nabubuhay dian nagpapaheling na an Kaglalang sa mga iyan Dios nin pagkamoot na talagang may pagmakolog. Asin ipinaheheling kan saiyang Tataramon, an Biblia, na sia may pagmakolog; itinatao kaiyan sa sato an pinakasimbag mapadapit sa mga hapot na: Taano ta yaon kita digdi sa daga? asin, Pasaen kita?

² Kaipuhan na siyasaton niato an Biblia para sa mga simbag na iyan. An Tataramon nin Dios nagsasabi: “Kun sia hahanapon nindo, itotogot nia na sia makua nindo, alagad kun bayaan sia nindo babayaan man nia kamo.” (2 Cronica 15:2) Kun siring, ano an ihinahayag kan pagsiyasat sa Tataramon nin Dios manongod sa saiyang katuyohan para sa sato?

Kun Taano ta Linalang nin Dios an mga Tawo

3. Taano ta linalang nin Dios an daga?

³ Ipinaheheling kan Biblia na inandam nin Dios an daga na nasa isip nangorogna an mga tawo. Sinasabi kan Isaias 45:18 mapadapit sa daga na an Dios “dai iyan linalang na dai nin kapakanan [kundi] naghaman kaiyan tanganing pag-istaran.” Asin ibinugtak nia sa daga an gabos na kakaipuhanon nin tawo, bako sanang tanganing mag-eksister, kundi tanganing lubos na masiraman sa buhay.​—Genesis, kapitulo 1 asin 2.

4. Taano ta linalang nin Dios an enot na mga tawo?

⁴ Sa saiyang Tataramon, isinasaysay nin Dios an paglalang sa enot na mga tawo, si Adan asin Eva, asin ihinahayag an nasa isip nia para sa pamilya nin tawo. Sinabi nia: “Gibohon niato an tawo sa satong ladawan, kasugad niato, asin ipasakop sa sainda an mga sira sa dagat asin an naglalayog na mga linalang sa kalangitan asin an magarong mga hayop asin an bilog na daga patin an lambang naghihirong hayop na naghihiro sa ibabaw kan daga.” (Genesis 1:26) An mga tawo an mangangataman sa “bilog na daga” asin sa mga linalang na hayop dian.

5. Saen ibinugtak an enot na mga tawo?

⁵ An Dios guminibo nin mahiwas, garo parkeng tatamnan sa lugar na inaapod Eden, na yaon sa Tahaw na Sirangan. Dangan “kinua [nia] an tawo asin ibinugtak sia sa tatamnan nin Eden tanganing babolon iyan asin atamanon iyan.” Idto sarong paraiso na igwa kan gabos na kakaipuhanon na kakanon kan enot na mga tawo. Asin kaiba dian “an lambang kahoy na magayon na paghelingon asin masiram na kakanon,” saka an iba pang mga pananom asin dakol na interesanteng klase nin hayop.​—Genesis 2:​7-9, 15.

6. May anong mental saka pisikal na mga kualidad na an mga tawo linalang?

⁶ An hawak kan enot na mga tawo linalang na sangkap, kaya dai sinda magkakahelang, maggugurang, o magagadan. Tinawan man sinda nin ibang mga kualidad, arog baga kan libreng pagpili. An pagkagibo sa sainda ipinaliliwanag sa Genesis 1:27: “Linalang nin Dios an tawo sa saiyang ladawan, sa ladawan nin Dios linalang nia sia; linalang nia sindang lalaki asin babae.” Mantang kita linalang sa ladawan nin Dios, an itinao sa sato bako sanang pisikal saka mental na mga kualidad kundi siring man an moral saka espirituwal na mga aspekto, asin dapat na mapanigoan an mga ini tangani na kita magin tunay na maogma. Itatao nin Dios an paagi na mapanigoan an mga pangangaipong iyan saka an pangangaipo nin kakanon, tubig, asin aire. Arog kan sabi ni Jesu-Cristo, “an tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.”​—Mateo 4:4.

7. Anong mandato an itinao sa enot na mag-agom?

⁷ Dugang pa, tinawan nin Dios nin marahayon na mandato an enot na mag-agom kan sinda yaon sa Eden: “Pangagbunga asin pangagdakol kamo asin panoa nindo an daga.” (Genesis 1:28) Kaya sinda makakapagreprodusir asin makakapangaki nin sangkap na mga aki. Asin mantang nagdadakol an populasyon na tawo, magkakaigwa sinda kan nakaoogmang marhay na trabaho na pagpahiwas kan mga linderos kan orihinal na garo parke, paraisong lugar kan Eden. Sa katapustapusi, an enterong daga gigibohon na paraiso, na may nag-iistar na sangkap, maogmang mga tawo na puedeng mabuhay sagkod lamang. Sinasabi sa sato kan Biblia na pakapamugtakan kan gabos na bagay na ini, “naheling nin Dios an gabos niang ginibo asin, uya! idto marahayon.”​—Genesis 1:31; helingon man an Salmo 118:17.

8. Paano dapat na atamanon nin mga tawo an daga?

⁸ Risang-risa na an nasakop na daga tanganing gamiton nin mga tawo para sa saindang pakinabang. Alagad ini dapat na gibohon sa responsableng paagi. An mga tawo dapat na magin magalang na mga pinaniniwalaan kan daga, bakong mga parasalakat dian. An paglaglag sa daga na naheheling niato ngonyan tumang sa kabotan nin Dios, asin an mga nakikakabtang dian sinasarongat an katuyohan nin buhay digdi sa daga. Kaipuhan na magbayad sinda kan penalidad dian, ta sinasabi kan Biblia na ‘lalaglagon nin Dios an mga naglalaglag kan daga.’​—Kapahayagan 11:18.

Iyo Pa Man Giraray an Katuyohan nin Dios

9. Taano ta kompiado kita na maootob an katuyohan nin Dios?

⁹ Sa siring, poon sa kapinonan katuyohan nin Dios na an sangkap na pamilya nin tawo mag-istar digdi sa daga sagkod lamang sa sarong paraiso. Asin iyo pa man giraray iyan an saiyang katuyohan! Daing salto, maootob an katuyohan na iyan. Sinasabi kan Biblia: “Si Jehova nin mga hukbo nanumpa, na an sabi: ‘Sierto nanggad na siring sa sakong dinesisyonan, iyan an dapat na mangyari; asin siring sa sakong isinabi, iyan an maootob.’” “Itinaram ko iyan; padadatngon ko man iyan. Inisip ko iyan, gigibohon ko man iyan.”​—Isaias 14:24; 46:11.

10, 11. Paano si Jesus, si Pedro, asin an salmistang si David nagtaram manongod sa Paraiso?

¹⁰ Si Jesu-Cristo nagtaram manongod sa katuyohan nin Dios na ibalik an paraiso digdi sa daga kan sabihan nia an sarong tawo na gustong magkaigwa nin paglaom sa ngapit: “Ika makakaibahan ko sa Paraiso.” (Lucas 23:43) Si apostol Pedro nagtaram man manongod sa nagdadangadang na bagong kinaban kan saiyang ihula: “Igwa nin bagong kalangitan [bagong areglo nin gobyerno na namamahala hale sa langit] asin sarong bagong daga [bagong daganon na sosyedad] na satong hinahalat oyon sa . . . panuga [nin Dios], asin sa mga ini magdadanay an katanosan.”​—2 Pedro 3:13.

¹¹ An salmistang si David nagsurat man manongod sa madatong na bagong kinaban asin kun gurano iyan kahaloy na magdadanay. Saiyang ihinula: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Kaya ngani si Jesus nanuga: “Maogma an mga mahoyo, mantang mamanahon ninda an daga.”​—Mateo 5:5.

12, 13. Sumaryohon an marahayon na katuyohan nin Dios para sa katawohan.

¹² Kanigoan karahay na esperansa iyan, an mabuhay sagkod lamang sa sarong paraisong daga na mayo kan gabos na karatan, krimen, helang, pagkamondo, asin kolog! Sa huring libro kan Biblia, sinusumaryo kan makahulang Tataramon nin Dios an marahayon na katuyohan na ini sa pagsabi: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Idinugang kaiyan: “Asin an Saro na nagtutukaw sa trono nagsabi: ‘Uya! ginigibo kong bago an gabos na bagay.’ Siring man, sia nagsabi: ‘Isurat mo, huli ta an mga tataramon na ini fiel asin totoo.’”​—Kapahayagan 21:​4, 5.

¹³ Iyo, an Dios may nasa isip na marahayon na katuyohan. Iyan magigin bagong kinaban nin katanosan, daing sagkod na paraiso, na ihinula kan Saro na kaya asin talagang ootobon an saiyang ipinanuga, huli ta an saiyang ‘mga tataramon fiel asin totoo.’