Ano an Katuyohan nin Buhay?—Paano Nindo Manonompongan Iyan?
Kapitulo 6: Taano ta Grabe an Pagdusa Asin Inhustisya?
1, 2. Huli sa inagihan nin tawo, ano an mga puedeng ihapot?
Minsan siring, kun katuyohan kan Supremong Persona na an sangkap na mga tawo mabuhay digdi sa daga sagkod lamang sa paraisong mga kamugtakan asin kun iyo pa man giraray iyan an saiyang katuyohan, taano ta mayo nin paraiso ngonyan? Imbes, taano an katawohan ta nag-agi nin dakolon na siglo nin pagdusa asin inhustisya?
2 Daing kuestion, an kasaysayan nin tawo pano nin kamondoan na bunga nin guerra, imperyalistang pagkongkistar, pag-aprobetsar, inhustisya, kadukhaan, kalamidad, helang, asin kagadanan. Taano ta nangyari an kadakol na maraot na bagay sa kadakol na inosenteng biktima? Kun an Dios makapangyarihan sa gabos, taano ta tinogotan nia an kadakoldakol na pagdusang ini sa laog nin rinibong taon? Mantang marahayon an pagkadisenyo asin pagkaareglar nin Dios sa uniberso, taano ta totogotan nia an pagkadesareglado asin pagkalaglag digdi sa daga?
Sarong Halimbawa
3-5. (a) Anong ilustrasyon an makatatabang sa sato na masabotan kun taano ta totogotan nin sarong Dios nin areglo an pagkadesareglado digdi sa daga? (b) Arin sa nagkapirang pagpipilian an tama sa situwasyon mapadapit sa daga?
3 Gumamit kita nin sarong halimbawa sa pag-ilustrar kun taano ta totogotan nin sarong Dios nin areglo an pagkadesareglado digdi sa daga. Imahinara tabi na kamo naglaog sa sarong kadlagan asin naabotan nindo an sarong harong. Mantang iniinspeksion nindo an harong, naheling nindo na iyan desareglado. Raraot an bintana, grabe an danyos sa atop, labot-labot an berandang kahoy, an pinto nagkakalaykalay sa sarong bisagra, asin raot an instalasyon nin mga tubo.
4 Kaatubang an gabos na kakundian na ini, iisipon daw nindo na imposibleng may madonong na kagdisenyo sa harong na iyan? An pagkadesareglado daw makombensir sa saindo na solamente pagkanorongod sana an posibleng guminibo sa harong? O kun inisip nindo na may saro na nagdisenyo asin nagtogdok kaiyan, iisipon daw nindo na an tawong ini bakong eksperto asin bakong makonsiderasyon?
5 Kun orog nindong sisiyasaton an harong, maheheling nindo na sa kapinonan marahay an pagkagibo kaiyan asin na iyan nagtatao nin ebidensia nin dakulang makonsiderasyon na pagmakolog. Alagad ngonyan iyan rapak na asin malalaglag na. Ano an puedeng iparisa kan mga kakundian asin problema? An mga iyan puedeng magsuherir na (1) an kagsadiri nagadan; (2) sia may kakayahan na kagtogdok alagad dai nang interes sa harong; o (3) temporaryo niang pinaarkilahan an saiyang rogaring sa mga enkargado na daing apresasyon. An huri kaagid kan situwasyon mapadapit sa dagang ini.
(Ipagpapadagos sa masunod na luwas.)