Gamiton an mga Publikasyon na Bagong Iluwas sa Pag-otob sa Kabotan nin Dios
1 Daing duwa-duwa, si Jehova Dios ‘sinangkap kita nin lambang marahay na bagay sa pag-otob kan saiyang kabotan.’ (Heb. 13: 20, 21) An modernong kasaysayan kan saiyang banwaan malinaw na nagpapaheling na si Jehova nagtao nin paggiya asin sinangkapan kita nin mga publikasyon na kaipuhan niato tanganing mahaman an saiyang gibohon. (Mat. 24: 14; 28: 19, 20; Kap. 9: 17, 19) Binendisyonan ni Jehova an paggamit sa mga probisyon na ini, asin an Kristianong kongregasyon nagpapadagos na magkamit nin pambihirang pag-oswag.
BAGONG ILUWAS NA MGA PUBLIKASYON
2 Kasuarin pa sana, sa satong “Manarig ki Jehova” na Pandistritong mga Kombension, naogma kitang akoon an bagong mga publikasyon sa pagtabang sa iba na parigonon an saindang pagsarig sa Dios. Kan Biyernes na aga ilinuwas kan tsirman an bagong pulyeto, Why You Can Trust the Bible. Dangan, pagkahapon ipinaheling sato nin mga demonstrasyon kun paano iyan gagamiton.
3 Ginagamit na daw nindo an pulyetong ini? An iba na kaipuhan na gumamit nin simple sanang pag-aatubang matatabangan na gayo kaiyan. An kadaklan sa sato magagamit iyan sa laen-laen na paagi —tibaad sa pag-introdusir kan satong pag-aatubang, ialok iyan kun sibot an kagharong, o iwalat iyan kun mayo kitang naabotan na tawo sa harong.
4 Nakaoogmang maaraman na tolo pang pulyeto an makukua na ngonyan. Iyan an What Do Jehovah’s Witnesses Believe?, Life in a Peaceful New World, asin What Hope for Dead Loved Ones? Seguradohon na pumedido tolos kaini asin magdara nin nagkapira tanganing magamit sa regular asin impormal na paghuhulit.
5 An mahalagang bagong ilinuwas sa kombension iyo an pambulsang edisyon kan New World Translation of the Holy Scriptures. Ngonyan igwa na kita nin Biblia na madadara sa bulsa o pitaka. Uya an saro pang ebidensia na si Jehova ‘sinangkap kita nin lambang marahay na bagay sa pag-otob kan saiyang kabotan.’ Kaya baga man kita naggigibo kan regular na mga kabtang nin paglilingkod o nagpapatotoo sa impormal, may magagamit kitang kopya kan Tataramon nin Dios tanganing suportaran an satong sinasabi.
GAMITON IYAN SA MARAHAY NA PAAGI
6 Sa pagkua nin leksion sa parabola ni Jesus manongod sa mga talento, aram niato na linalaoman kita ni Jehova na gamiton sa marahay an gabos na itinao nia sa sato. Kun siring, lubos niatong hamanon an satong ministeryo na ginagamit an saiyang mga probisyon, kaiba an bagong mga iluwas na publikasyon na ini. Mantang ginagamit niato nin lubos an mga iyan, makalalaom kita na madugangan an satong kagayagayahan huli sa pag-oyon kan satong Kagurangnan asin sa magigin resultang marahay na bungang pan-Kahadean.—Mat. 25: 21; Juan 15:8.