Magpapayunir daw Kamo Ngonyan na Tig-initan?
1 Si apostol Pablo nagsurat: “An nagtatanom nin abunda mag-aani man nin abunda. Gumibo an lambang saro nin oyon sa napagdesisyonan nia sa saiyang puso.” (2 Cor. 9:6, 7) An prinsipyong ini espesyalmenteng totoo kun an saro “nagtatanom nin abunda” paagi sa paggamit nin mas dakol na oras sa ministeryo sa langtad bilang auxiliary o regular payunir.
2 An mga bulan sa tig-initan na Pebrero sagkod Mayo nagtatao nin ekselenteng oportunidad na magdusay nin mas dakol na oras sa ministeryo paagi sa pagpapayunir. ‘Napagdesisyonan na daw nindo sa saindong puso’ na magpayunir sa tig-initan na ini?
25,000 NA AUXILIARY PAYUNIR SA ABRIL?
3 Kan 1987 nakaoogmang maheling an 5,433 na auxiliary payunir kan Pebrero, 9,611 kan Marso, 21,567 kan Abril, asin 12,285 kan Mayo. Kan Abril 35,424 gabos an payunir, na 35% kan kagabsan na parahayag niato. Dakol na nasyon an nakareport nin 40% na nasa pagpapayunir o labi pa. Bako daw na marahay kun maabot man niato an pasohan na ini sa Abril? Mantang igwa kita nin mga 15,000 na regular payunir, ini mangangahulogan na kaipuhan na makareport kita nin kisuerra 25,000 na auxiliary payunir sa Abril. Makakabilang daw kamo sa sainda?
4 Maaabot an bilang na ini kun sa kada kongregasyon kisuerra 25% sa total na parahayag (kabilang an mga regular payunir) an nasa pag-auxiliary payunir. Kan nakaaging taon dakol na kongregasyon an nagreport nin 50% o labi pa na nasa pag-auxiliary payunir. Minsan ngani mas dakol ngonyan an satong regular payunir kisa nakaaging taon, mas dakol man an satong bagong mga parahayag, na an dakol magmamawot na makanamit sa mga kagayagayahan nin pagpapayunir.
5 Sinasadol mi an gabos na umatender sa miting sa Pebrero 21 para sa mga ma-auxiliary payunir sa Marso, Abril asin Mayo. Kun maheling nindo na kadakol na nagpapalista, sierto na mapakokosog man kamong makikabtang.
AN PAGPAPAYUNIR BILANG KARERA
6 Narisa daw nindo sa mga kabilangan sa itaas na dakol an nag-auxiliary payunir sa laog nin tolo o apat na sunod-sunod na bulan kan nakaaging tig-initan? An paggibo kaini nagtatao nin orog pang kagayagayahan kisa paggibo kaiyan sa laog sana nin sarong bulan. Asin an dakol sa sainda kan huri naglaog sa pagregular payunir o nagpadagos na regular na auxiliary payunir, sa siring ginigibong magin karera ninda an pagpapayunir.
7 Kaya dinadagka mi an gabos, nangorogna an mga bagong mabautismohan sa pandistritong kombension, na namitan an mga kagayagayahan sa pagpapayunir ngonyan na tig-initan. Dudugangan kaiyan an saindong pag-apresyar asin paririkason an saindong pag-oswag pasiring sa pagkamaygurang. Tibaad pukawon man kaiyan an gana nindo sa pagpapayunir bilang sarong karera.
8 Arangon niato an bendisyon ni Jehova sa satong mga paghihingoa na dugangan an pag-omaw sa saiyang ngaran paagi sa pagpapayunir sa mga bulan nin tig-initan.