Igwa Kita nin Sarong Bagong Kasangkapan Para sa Pagpoon nin mga Pag-adal!
1 An babaeng taga Amerika sarong debotong Katoliko Romano. Fiel niang idinepensa an mga katokdoan kan iglesia. Nagperegrino pa ngani sia sa Batikano. Alagad ta kan an saro sa mga Saksi ni Jehova sumongko sa saiyang harong, inako nia an alok na pag-adal sa Biblia. Taano? Huli ta gusto niang manodan kun ano an sinasabi kan Biblia asin an saiyang iglesia dai nag-alok nin pag-adal sa Biblia. Ano daw an itinotokdo sa sato kan eksperyensiang ini? Na nungka niatong aram kun siisay an posibleng mag-ako nin daing bayad na pag-adal sa Biblia.—Ecl. 11:6.
2 Nagduwaduwa na daw kamong sabihon sa mga tawo na andam kitang ipakipag-adal an Biblia sa siisay man na interesado? An gabos daw sa komunidad nindo nakaaaram na kita nag-aalok kan daing bayad na paglilingkod na ini? Paano niato masesegurado na aram ninda? Paagi sa paggamit nin sarong bagong kasangkapan! Iyan sarong magayon, anom na pahinang pulyeto na may temang Ano Gusto Nindong Makaaram Pa nin Orog Manongod sa Biblia? Magin pamilyar kita sa pulyetong ini, subtema por subtema.
3 “Taano ta Dapat Basahon an Biblia?” An mga dahelan na itinatao kan pulyeto nakaaakit na marhay. Ipinaliliwanag kaiyan na an Biblia igwa nin “mamomoton na pagtotokdo nin Dios,” na nagpapaheling kun paano madolok sa saiya paagi sa pamibi para sa tabang asin kun paano aakoon an saiyang regalo na buhay na daing katapusan. (1 Tes. 2:13) Nasasambitan kan pulyeto an manlaenlaen na “mga katotoohan [sa Biblia] na nagtatao nin kaliwanagan,” arog baga kan kun ano an nangyayari pagkagadan niato asin kun taano ta kadakol kan problema sa daga. Ilinaladawan kaiyan an “diosnon na mga prinsipyo sa Biblia” na kun iaaplikar nagtatao nin pisikal na mga pakinabang asin nagpapalakop nin kaogmahan, paglaom, asin iba pang kawiliwiling mga kualidad. Nasasambitan kan pulyeto an saro pang dahelan sa pagbasa kan Biblia—an mga hula manongod sa ngapit na nagpapaheling kun ano an nasa enotan na niato.—Kap. 21:3, 4.
4 “Tabang na Masabotan an Biblia”: An pulyeto nagsasabi: “Kita gabos nagkakaipo nin tabang na masabotan an Tataramon nin Dios.” Dangan ilinaladawan kaiyan an paagi niato nin pag-adal kan Biblia: “Parate na pinakamarahay na progresibong adalan an Biblia, poon sa pundamental na mga katokdoan.” Minsan ngani ipinaliliwanag kaiyan na “an Biblia an autoridad,” espesipikong sinasambit kan pulyeto an brosyur na Kahagadan na makakatabang sa inaadalan “na masabotan an teksto sa Kasuratan manongod sa laen-laen na tema.” An masunod na subtema nagpapalataw nin nakapahihirong hapot.
5 “Andam daw Kamong Magtao nin Panahon Serosemana sa Pagsabot sa Biblia?” Ipinaliliwanag kan pulyeto na puedeng iareglo an pag-adal sa Biblia sa panahon asin lugar na kombenyente para sa inaadalan, magsalang sa pribado niang harong o dawa paagi sa telepono. Siisay an puedeng makikabtang sa orolay? Nagsisimbag an pulyeto: “An bilog nindong pamilya. Puede man na makikabtang an siisay man na katood na gusto nindong imbitaran. O kun gusto nindo, puedeng kamo sana an kaolay.” Gurano kahaloy na dapat mag-adal an saro? Iyan nagpapaliwanag: “An dakol nagtatagama nin sarong oras serosemana na mag-adal sa Biblia. Kun kaya nindong tumao nin mas dakol na oras o kun mas kadikit an oras nindo kada semana, an mga Saksi magibo nin paagi na matabangan kamo.” Iyan an importante! Andam kitang makibagay sa mga kamugtakan kan lambang inaadalan.
6 “Imbitasyon na Makanood”: May kupon na dian an nakaresibi kan pulyeto puedeng humagad kan brosyur na Kahagadan o magpadalaw tangani na ipaliwanag an satong daing bayad na programa nin pag-adal sa Biblia. An tutob kan brosyur na Kahagadan ipinaheheling na may kompletong kolor. Dai daw nindo naheheling kun taano an pulyetong ini ta makaeenkaminar nin dakol pang sadiosan an puso na akoon an tabang niato? Ngonyan, paano niato pinakamarahay na magagamit an bagong kasangkapan na ini?
7 Kiisay Nindo Puedeng Ialok an Pulyeto? An pulyeto puedeng itao nin personal sa mga tawo o iwalat sa mga harong na mayo nin tawo. Iyan puedeng idistribwir sa harong-harong, sa tinampo, asin sa komersial na teritoryo. Ialok iyan sa mga tawo baga man sinda nag-aako nin mga babasahon niato o habo kaiyan. Isalipit iyan sa mga magasin o iba pang mga publikasyon na ikinakapasakamot. Ilakip iyan kun kamo nagsusurat. Alokon na ipadara iyan paagi sa koreo sa mga nakokontak nindo paagi sa telepono. Pirme kamong magdara nin mga kopya na ididistribwir kun namamakal, kun nasa pampublikong mga sasakyan, asin kun impormal na naghuhulit. Itao iyan sa siisay man na nagsosongko sa saindong harong. Ialok iyan sa saindong mga paryente, kataraed, katrabaho, kaeskuela, asin iba pang mga kamidbid. Hingoahon na ikapasakamot an pulyetong ini sa gabos na nanonompongan nindo! Dangan ano na?
8 Kun Ensegida an Simbag: May mga indibiduwal na masimbag tolos-tolos paagi sa pagsabing gusto nindang magkaigwa nin pag-adal sa Biblia. Kun siring, kun naglilingkod sa langtad, seguradohon na pirme kamong igwa nin duwang kopya kan brosyur na Kahagadan—saro para sa inaadalan asin saro para sa saindo. Kun gusto kan tawo, ponan tolos-tolos an pag-adal. Buksan an laog na tutob, asin basahon an “Kun Paano Gagamiton an Pulyetong Ini.” Dangan dumuman tolos sa leksion 1, asin idemonstrar an pag-adal. Bako daw na pasil ini?
9 Kun an Naghihinanyog sa Saindo Nagkakaipo nin Panahon na Pag-isipan Iyan: Bago umagi an kadakol na panahon, hingoahon na kontakon giraray sia. Kun makontak nindo, seguradohon na magdara kamo nin brosyur na Kahagadan. Ipaheling sa saiya an mga laog sa laog na tutob. Papilion sia nin tema na pinakainteresante para sa saiya. Buksan iyan, asin ponan na ipakipag-olay an leksion na napili nia.
10 Pagkultibar sa mga Napasakamotan nin mga Magasin: Kun nakapagwalat kamo nin pulyeto na may kaibang mga magasin, puede kamong bumalik paagi sa pagdolok na ini: “Kan nakaagi kong pagsongko, naogma akong magwalat sa saindo nin sarong kopya kan magasin na Torrengbantayan. Tibaad narisa nindo na an bilog na titulo kan magasin iyo An Torrengbantayan Nagpapahayag kan Kahadean ni Jehova. Ngonyan gusto kong ipaliwanag kun ano an Kahadean na ini asin kun ano an magigin kahulogan kaiyan para sa saindo asin sa saindong pamilya.” Dangan buksan an brosyur na Kahagadan sa leksion 6. Poon sa enot na parapo, basahon asin pag-olayan sagkod na may panahon an kagharong para dian. Dangan gumibo nin mga areglo na bumalik sa ibang aldaw asin taposon an leksion.
11 Dai Maubosan nin mga Pulyeto: An paraataman sa paglilingkod asin an mga tugang na nag-aasikaso kan mga suplay nin literatura bobooton na magkaigwa nin bastanteng suplay kan pulyetong Makaaram sa Biblia sa gabos na panahon sa kongregasyon. Magbugtak nin nagkapira sa saindong bulsa o pitaka, sa saindong kotse, sa saindong lugar nin trabaho, sa eskuelahan, harani sa entrada kan saindong harong—saen man madaling kuanon iyan. Siempre, magdara nin nagkapira sa saindong bag para sa mga panahon na nakanunupar kamo nin saro na puede nindong makaolay manongod sa Biblia.
12 Logod na Bendisyonan ni Jehova an Satong mga Paghihingoa: An sarong kawiliwiling pasohan para sa gabos na Kristiano iyo na itokdo an katotoohan sa iba. (Mat. 28:19, 20) Kamo daw namamayo sa presente nin pag-adal sa Biblia? Kun iyo, puede daw kamong makakua nin panahon sa saindong semanal na iskedyul para sa saro pa? Kun dai pa kamo namamayo nin pag-adal ngonyan, segurado na bobooton nindong mamayo. Mamibi ki Jehova na bendisyonan logod an mga paghihingoa nindo na makanompong nin saro na puede nindong adalan. Dangan magmaigot kaoyon kan mga pamibing iyan.—1 Juan 5:14, 15.
13 Igwa kita nin sarong bagong kasangkapan para sa pagpoon nin mga pag-adal! Magin pamilyar dian. Idistribwir iyan nin daing pag-alangan. Gibohon an bilog na makakaya nindo na “maggibo nin marahay, magin mayaman sa marahay na mga gibo, magin matinao, andam na manhiras” kan nanodan nindo manongod sa Tataramon nin Dios.—1 Tim. 6:18.
[Kahon sa pahina 4]
MGA OPORTUNIDAD NA IDISTRIBWIR AN PULYETO
◼ Pakikipag-olay sa aroaldaw
◼ Kun may nag-ako kan satong mga babasahon
◼ Kun mayo nin tawo sa harong
◼ Kun kita nagdadalaw liwat
◼ Kun may nanompongan kita sa paghuhulit sa tinampo
◼ Kun kita nagpapatotoo sa komersial na teritoryo
◼ Kun impormal na naghuhulit
◼ Kun nagsusurat
◼ Kun nakalunad sa pampublikong mga sasakyan
◼ Kun may magsongko sa satong harong
◼ Kun nakikipag-olay sa mga paryente, kataed, katrabaho, kaeskuela, asin iba pang mga kamidbid