Arugon an Kapakumbabaan ni Jehova

1. Taano ta pambihira an kapakumbabaan ni Jehova?

PAG iniisip o inoobserbaran mo an mga tawong tagapamahala ngunyan, masasabi mo daw na mapakumbaba sinda? Posibleng marhay na dai. Pero si Jehova, dawa ngani makakamhan sa gabos, mapakumbaba. (Sal. 113:​5-8) Mababanaag sa bilog na personalidad ni Jehova an kapakumbabaan; mayo lamang nin ano man na kapalangkawan sa saiya. Makikinabang kita kun sisiyasaton ta an apat na aspekto kan magayunon na personalidad ni Jehova asin kun paano nababanaag sa kada saro kaiyan an saiyang kapakumbabaan. Pag-uulayan ta man kun paano inarog ni Jesus an kapakumbabaan kan saiyang Ama. Makakatabang sato an pagsiyasat sa mga bagay na ini na magin mas harani kita ki Jehova asin na urog pang maarog an saiyang kapakumbabaan.

SI JEHOVA MADALING DULUKON

2. Ano an ihinahayag kan Salmo 62:8 manungod ki Jehova? (Hilingon man an ritrato.)

² An tawong mapalangkaw, sa parati, bakong madaling dulukon. Huli sa halangkaw niyang paghiling sa sadiri, minagawi siya sa mga paaging nagigin dahilan na mag-alangan na sa saiya na dumulok an iba o biyo na ninda siyang likayan. Pero si Jehova ibang-iba nanggad! Huling mapakumbaba an satong Ama sa langit, dinadagka niya kita na magdulok sa saiya asin sabihon sa saiya an gabos na ikinakapurisaw kan satong isip saka puso. (Basahon an Salmo 62:8.) Kun paanong gustong-gusto nin sarong mapagmakulog na ama na dangugon an mga ikinakahadit kan saiyang mga aki, gustong-gusto man ni Jehova na dangugon an mga pamibi kan saiyang mga parasamba. Sa katunayan, ipinasurat niya sa Bibliya an dakul sa mga pamibing ini. Ipinapahiling kaiyan kun gurano nanggad siya kadaling dulukon. (Jos. 10:​12-14; 1 Sam. 1:​10-18) Pero paano kun huli sa sarong partikular na dahilan, may mga pagkakataon na mamatian niyato na bako kitang angay na dumulok ki Jehova?

3. Taano ta makakasigurado ka na gusto ni Jehova na parati kang dumulok sa saiya sa pamibi?

³ Puwede kitang magdulok ki Jehova sa pamibi dawa kun pagmati ta bako kitang angay sa pagkamuot niya. Taano ta nasabi niyato iyan? Sa parabula ni Jesus manungod sa aking naparaot an buhay, iinagid niya si Jehova sa sarong mapagmalasakit na ama na an nagsusulsol na aki nakamating dai angay na akuon giraray sa pamilya. Ano an nagin reaksiyon kan ama kan magpuli na an saiyang aki? Sinabi ni Jesus na kan matanaw na kan ama an saiyang aki, an ama “duminalagan . . . saka kinugos siya asin mapagpadaba siyang hinadukan.” (Luc. 15:​17-20) Arog kaiyan si Jehova. Pag nadadangog niya an mga pamibi kan mga indibidwal na an puso nalugadan asin runot huli sa pagkakonsiyensiya o paghadit, pinapahiro siya kan saiyang kapakumbabaan na itao sa sainda an saiyang bilog na atensiyon. (Lam. 3:​19, 20) Dahil sa pagkahirak niya, garo man sana minadalagan siya pasiring sa sainda tanganing rangahon asin asiguraron sinda kan saiyang pagkahirak saka pagkamuot. (Isa. 57:15) Paano si Jehova “minadalagan sa sato” ngunyan? Sa parati, paagi sa mga elder, kapagtubod na mga kapamilya, asin iba pang kapwa mga parasamba. (Sant. 5:​14, 15) Itinatao ni Jehova an siring na tabang huling gusto niya na magin harani kita sa saiya.

4. Paano ipinahiling ni Jesus na madali siyang dulukon?

⁴ Inaarog ni Jesus an saiyang Ama. Arog kan saiyang Ama, mapakumbaba si Jesus. Huli kaiyan, kan yaon siya digdi sa daga, dai nag-alangan an mga tawo na magdulok sa saiya. Dai man sinda natakot na maghapot sa saiya. (Mar. 4:​10, 11) Kaya pag hinapot niya sinda manungod sa sarong bagay, sinasabi ninda sa saiya kun ano talaga an namamatian ninda. (Mat. 16:​13-16) Asin pag nakagibo sinda nin sala, dai sinda natatakot na aanggutan sinda ni Jesus huling aram nindang mabuot siya, mahihirakon, saka mapasensiya. (Mat. 17:​24-27) Mahalagang mangnuhon na huling inarog na marhay ni Jesus an saiyang Ama, mas namidbid si Jehova kan mga parasunod niya. (Juan 14:9) Nahiling ninda na si Jehova bako lamang arog kan mga lider nin relihiyon kaidto na maringis, mapalangkaw, asin daing malasakit. Imbes, mapakumbaba siya asin madaling dulukon.

5. Paano an kapakumbabaan makakatabang sa sato na magin mas madali kitang dulukon?

⁵ Paano ta maaarog si Jehova? Mantang mas hinihinguwa tang magin mapakumbaba, magigin mas madali man kitang dulukon. Maililikay kita kan kapakumbabaan na magin maurihon, orgulyoso, asin bakong mapagpatawad—mga ugali na magigin dahilan na rayuan kita kan iba. Pero matatabangan kita kan kapakumbabaan na magin mabuot, mapasensiya, asin mapagpatawad—mga ugali na makakatabang na maparani sa sato an iba. (Col. 3:​12-14) Lalo nang dapat hinguwahon kan mga elder na magin madaling dulukon. Siyempre, para magibo ini, kaipuhan nindang parating makaibanan an mga tugang. Nangangahulugan iyan na sagkod na posible hihinguwahon nindang mag-atender nin in person sa mga pagtiripon kan kongregasyon imbes na mag-atender paagi sa videoconferencing. Asin sagkod na itinutugot kan saindang kamugtakan, hihinguwahon nindang makaibanan an mga tugang sa pagharong-harong. Mantang urog na nabibisto kan mga tugang an mga elder, magigin mas komportable man sinda na magdulok sa mga elder pag kaipuhan ninda nin tabang.

SI JEHOVA RASONABLE

6-7. Magtao nin mga halimbawa kun paano si Jehova nagpahunod, o nagdangog, sa mga pakiulay kan saiyang mga lingkod.

⁶ Dakul na tawong mapalangkaw an bakong rasonable sa pagtratar ninda sa iba. Pero huling mapakumbaba si Jehova, rasonable siya, o mapagpahunod—dawa ngani nakakalabi siya sa gabos sa lambang aspekto. Pag-isipan kun paano niya trinatar an tugang ni Moises na si Miriam. Siya, kaiba si Aaron, naggumod-gumod laban ki Moises na iyo an representante kaidto ni Jehova. Kaya kan gibuhon iyan ni Miriam, an totoo, dai niya irinerespeto si Jehova. Bilang resulta, naanggot na marhay si Jehova ki Miriam asin nagkaigwa siya nin leproso. Pero kan nakiulay si Aaron alang-alang sa saiya asin nakimahirak si Moises ki Jehova na paumayan an tugang niya, ano an ginibo nin Diyos? Dai nin Diyos pinangaptan nin may kapalangkawan an desisyon niya—an padusang itinao niya ki Miriam. Huling mapakumbaba si Jehova, nagpahunod siya, o nagdangog, paagi sa pagpaumay ki Miriam.​—Bil. 12:​1-15.

⁷ Nagpahiling man si Jehova nin kapakumbabaan sa pagtratar niya ki Hading Hezekias. Paagi sa Saiyang propeta, sinabi ni Jehova sa hadi na magagadan na siya. Naghibi nin grabe si Hezekias asin nakimahirak ki Jehova na paumayan siya. Bilang simbag, may pagkahirak na dinugangan ni Jehova nin 15 taon an buhay kan hadi. (2 Ha. 20:​1, 5, 6) Iyo, pinapahiro si Jehova kan saiyang kapakumbabaan na magin mahihirakon, rasonable, asin andam na magdangog.

8. Magtao nin mga halimbawa na nagpapahiling na rasonable si Jesus. (Marcos 3:​1-6)

⁸ Inaarog ni Jesus an saiyang Ama. Kan si Jesus yaon digdi sa daga, pirmi siyang naggigibo nin marahay sa mga tawo nuarin man posible o rasonable. Halimbawa, nagpaumay siya nin mga may hilang sa panahon nin Sabbath sa ibong kan mga pagkontra kan mga lider nin relihiyon na matagas an puso. (Basahon an Marcos 3:​1-6.) Padagos na nagpapahiling nin pagigin rasonable si Jesus bilang payo kan Kristiyanong kongregasyon. Halimbawa, pag may sarong indibidwal sa kongregasyon na nakagibo nin magabat na kasalan, mapasensiya si Jesus sa saiya, asin tinatawan niya siya nin dakul na oportunidad na itanos an saiyang dalan.​—Kap. 2:​2-5.

9. Paano kita makakapahiling nin pagigin rasonable? (Hilingon man an mga ritrato.)

⁹ Paano ta maaarog si Jehova? Dapat na mapakumbaba niyatong hinguwahon na arugon an pagigin rasonable ni Jehova sa paagi niyato nin pag-iisip asin sa satong paggawi. (Sant. 3:17) Halimbawa, an rasonableng mga magurang, bagaman bakong mga kunsintidor, dai naghahagad nin labi sa kayang gibuhon kan saindang mga aki. Marahay na halimbawa kaini si Jacob, arog kan mahihiling ta sa salaysay na nasa Genesis 33:​12-14. Dapat man na likayan kan mapakumbaba asin rasonableng mga magurang na ikumparar an saindang aki sa iba pa nindang mga aki. An Kristiyanong mga elder dapat man na magin rasonable. An sarong paagi na magigibo ninda ini iyo an pagpahunod sa desisyon kan mayoriya sa grupo pag mayo man nin mga prinsipyo sa Bibliya na nababalga. (1 Tim. 3:​2, 3) Asin gabos kita dapat na hinguwahon na sabuton an pagmansay kan iba dawa kun lain kan sa sainda an pagmansay ta sa mga bagay-bagay. (Roma 14:1) Iyo, dapat na hinguwahon kan gabos sa kongregasyon na “mahayag . . . sa gabos na tawo an [saindang] pagigin rasonable.”​—Fil 4:5.

SI JEHOVA MAPASENSIYA

10. Sa anong mga paagi nagpahiling nin pagigin mapasensiya si Jehova?

¹⁰ Posibleng marhay na narisa mong an mga tawong mapalangkaw habong pinapahalat. Mapalangkaw sinda kaya bako sindang mapasensiya. Lain na marhay sa sainda si Jehova, na iyo an pinakamapasensiya sa gabos! Halimbawa, kan panahon ni Noe, sinabi ni Jehova na mahalat Siya nin 120 taon bago laglagon an mga maraot. (Gen. 6:3) Huli kaiyan, nagkaigwa nin panahon si Noe para padakulaon an saiyang mga aki asin gibuhon an arka sa tabang kan saiyang pamilya. Sa ibang pagkakataon, an anghel na representante ni Jehova mapasensiyang nagdangog sa mga paghapot sa saiya ni Abraham manungod sa paglaglag sa Sodoma asin Gomorra. Sa arog kaiyan na sitwasyon, tibaad sabihon nin sarong tawong mapalangkaw, ‘Siisay ka man para kuwestiyunon ako!’ Alagad huling inaarog kan anghel si Jehova, nagin siyang mapasensiya ki Abraham.​—Gen. 18:​20-33.

11. Arog kan sinambit sa 2 Pedro 3:​9, taano ta nagpapahiling si Jehova nin pagigin mapasensiya sa panahon niyato?

¹¹ Mapakumbaba man na nagpapahiling nin pagigin mapasensiya si Jehova sa panahon niyato. Hinahalat niyang mag-abot an itinalaga niyang panahon tanganing ipaabot an katapusan. Taano ta mapasensiya siya? “Huling habo niyang malaglag an siisay man, imbes, gusto niya na an gabos makapagsulsol.” (Basahon an 2 Pedro 3:9.) Sayang sana daw an pagigin mapasensiya ni Jehova? Bako nanggad! Huling minilyon nang tawo na igwang pusong nasa tamang kamugtakan an ruminani sa saiya. Asin mawot niyatong dakul pa an maggibo kaiyan. Alagad, may limitasyon an pagigin mapasensiya ni Jehova. Namumutan ni Jehova an mga tawo, alagad bako siyang kunsintidor. Dai niya tutugutan na magpadagos sagkod lamang an karatan.​—Hab. 2:3.

12. Paano inaarog ni Jesus an pagigin mapasensiya ni Jehova?

¹² Inaarog ni Jesus an saiyang Ama. Sa laog nin rinibong taon, inarog ni Jesus an pagigin mapasensiya ni Jehova. Nahiling ni Jesus kun paano ni Satanas pinakaraot si Jehova saka an maimbod na mga tawo. (Gen. 3:​4, 5; Job 1:11; Kap. 12:10) Nahiling man ni Jesus an grabeng mga kasakitan na inagihan kan mga tawo. Kaya imahinara na sana kun gurano na niya kagustong “rauton an mga gibo kan Diyablo”! (1 Juan 3:8) Ano an nakakatabang ki Jesus na mapasensiyang halaton na sabihon na ni Jehova na oras na tanganing lubos na rauton an mga gibo kan Diyablo? An saro iyo an pagigin mapakumbaba ni Jesus. Pinapahiro siya kaiyan na ipabaya sa kamot ni Jehova an pagtalaan nin panahon kun nuarin mangyayari an mga bagay-bagay, huling si Jehova sana an may awtoridad sa bagay na iyan.​—Gibo 1:7.

13. Paano ipinahiling ni Jesus na mapasensiya siya sa saiyang mga apostol, asin taano ta mapasensiya siya sa sainda?

¹³ Kan si Jesus yaon digdi sa daga, mapasensiya man siya sa saiyang mga apostol. Halimbawa, kan pauruutrong nagdidiriskutiran an mga apostol kun siisay sa sainda an pinakaurog, dai si Jesus nadisganar sa sainda, dai niya sinda binayaan. Imbes, padagos siyang nagin mapasensiya. (Luc. 9:46; 22:​24-27) Nagtiwala siya na sa paglihis nin panahon gigibuhon ninda an kinakaipuhan na mga pagbabago. Pauruutro mo daw na nagigibo an sarong partikular na sala? Kun iyo, bako daw na nagpapasalamat kang igwa ka nin siring kamapakumbaba asin kamapasensiyang Hadi?

14. Paano kita magigin mas mapasensiya?

¹⁴ Paano ta maaarog si Jehova? Pag igwa kita kan “pag-iisip ni Cristo,” magigin mas pasil man sa sato na magin arog kan ki Jehova an satong pag-iisip asin paggawi. (1 Cor. 2:16) Paano ta urog na masasabutan an pag-iisip ni Cristo? Mayong shortcut diyan. Dapat tang basahon an Mga Ebanghelyo. Dangan kaipuhan tang magtao nin panahon na hurop-hurupon kun paano ihinahayag kan mga salaysay na binabasa ta an kaisipan ni Jesus sa mga bagay-bagay. Asin siyempre, dapat tang hagadon ki Jehova na tabangan kitang arugon an kapakumbabaan ni Jesus sa paagi ta nin pag-iisip. Mantang urog niyatong inaarog an pag-iisip ni Cristo, urog man niyatong maaarog an Diyos paagi sa pagigin mas mapasensiya sa satong sadiri asin pati man sa satong mga kapagtubod.​—Mat. 18:​26-30, 35.

TINATAWAN NI JEHOVA NIN DIGNIDAD AN MGA MAPAKUMBABA

15. Paano pinatunayan ni Jehova na tinatawan niya nin atensiyon an mga mapakumbaba? (Salmo 138:6)

¹⁵ Basahon an Salmo 138:6. Sarong onra nanggad para sa mga mapakumbaba na tawan nin atensiyon kan Soberano kan uniberso! Pag-isipan an pira sana sa mga halimbawa nin mapakumbabang mga tawo na tinawan ni Jehova nin dignidad sa naglihis na mga siglo. Tibaad bako kitang pamilyar sa nagkapira sa sainda, alagad iiniba sinda sa rekord kan Bibliya. Pinasabngan ni Jehova si Moises na isurat an pangaran kan paraaling na si Debora, na nabuhay kan panahon kan mga patriyarka. Maimbod siyang naglingkod sa pamilya ni Isaac asin ni Jacob sa laog nin mga 125 taon! Dawa ngani dikit lang na detalye an binanggit manungod sa maimbod na babaying ini, sinigurado ni Jehova na maiiba sa ipinasabong na rekord kun gurano siya kanamumutan. (Gen. 24:59; 35:​8, nota sa ibaba) Pakalihis nin mga siglo, pinili ni Jehova an sarong hoben na pastor na an pangaran David asin ginibo ining hadi kan nasyon nin Israel. (2 Sam. 22:​1, 36) Dai nahaloy pagkamundag ni Jesus, nagsugo an Diyos nin mga anghel para tawan nin onra an mapakumbabang mga pastor paagi sa pagtao sa sainda kan pribilehiyo na inot na makaaram na sa kaharaning lugar na Betlehem ipinangaki an maabot na Mesiyas. (Luc. 2:​8-11) Asin kan darahon ni Jose asin Maria si Jesus sa templo, tinawan ni Jehova nin dignidad an may edad nang si Simeon asin Ana paagi sa pagtao sa sainda kan pribilehiyo na mahiling an Saiyang Aki. (Luc. 2:​25-30, 36-38) Iyo, “dawa si Jehova halangkaw, tinatawan niya nin atensiyon an mapakumbaba”!

16. Paano inarog ni Jesus an saiyang Ama sa pagtratar niya sa iba?

¹⁶ Inaarog ni Jesus an saiyang Ama. Arog kan saiyang Ama, tinawan ni Jesus nin dignidad an mapakumbabang mga tawo. Tinukduan niya an mga “daing inadalan asin mga ordinaryong tawo” nin mga katotoohan manungod sa Kahadian nin Diyos. (Gibo 4:13; Mat. 11:25) Pinaumayan man ni Jesus an mga may hilang asin ginibo iyan sa paaging natatawan an mga ini nin dignidad. (Luc. 5:13) Kan huring banggi bago an saiyang kagadanan, ginibo ni Jesus an trabaho nin sarong suruguon paagi sa paghanaw sa mga bitis kan saiyang mga apostol. (Juan 13:5) Asin bago siya magsakat sa langit, tinawan niya nin dignidad an gabos niyang mapakumbabang parasunod, kaiba na kita, paagi sa pagtao sa sainda kan pinakaimportanteng gibuhon na itinao sa mga tawo kasuarin man—an pagtabang sa iba na magkamit nin buhay na daing katapusan.​—Mat. 28:​19, 20.

17. Paano ta matatawan nin dignidad an iba? (Hilingon man an ritrato.)

¹⁷ Paano niyato maaarog si Jehova? Tinatawan ta nin dignidad an mga tawo pag ihinihiras ta an maugmang bareta sa gabos, ano man an saindang pinaghalian, rasa, o inadalan. Asin tinatawan ta nin dignidad an satong mga tugang pag ibinibilang ta sinda na nakakalabi sa sato, ano man na kakayahan o pribilehiyo an tibaad igwa kita. (Fil. 2:3) Nauugma si Jehova pag mapakumbaba kitang ‘nanginginot’ sa pagtao nin onra sa lambang saro sa arog kaining mga paagi asin sa iba pa.​—Roma 12:10; Sof. 3:12.

18. Taano ta gusto mong arugon an kapakumbabaan ni Jehova?

¹⁸ Mantang hinihinguwa tang arugon an kapakumbabaan kan satong mamumuton na Ama sa langit, magigin kitang mas madaling dulukon, mas rasonable, asin mas mapasensiya. Matatawan ta man nin dignidad an iba, arog kan ginigibo ni Jehova. Mantang ginigibo ta an gabos tang makakaya tanganing arugon an satong mapakumbabang Diyos, mas lalo kitang magigin mahalagang marhay sa saiyang mga mata!—Isa. 43:4.