Kasal na Nagtataong Onra ki Jehova—Paano Gigibuhon?

1-2. Ano an gusto ni Jehova para sa aldaw kan saindong kasal?

MAPAKASAL na daw kamo? Kun iyo, nauugma kami para sa saindo! Posibleng marhay na sibot-sibot na kamo sa pagplano kan saindong kasal. Interesado si Jehova sa saindong pag-aguman saka gusto niya na magin maugma kamo sa aldaw kan saindong kasala asin na magkaigwa nin maugmang puturo bilang mag-agom.​—Tal. 5:18; Awit ni Sol. 3:11.

² Maninigo si Jehova na tawan nin onra sa aldaw kan saindong kasal. Taano? Asin paano nindo iyan magigibo? Dawa ngani an artikulong ini panginot nang para sa mga magkatrato na naghahanda na para sa saindang kasal, an mga prinsipyong pag-uulayan digdi makakatabang sa sato gabos na matawan nin onra si Jehova pag nag-aatender kita sa kasal o pag hinahagadan kita nin opinyon manungod sa mga planong ginigibo.

TAANO TA DAPAT TAWAN NIN ONRA SI JEHOVA?

3. Ano an dapat na ikonsiderar kan Kristiyanong magkatrato sa pagplano ninda kan saindang kasal, asin taano?

³ An Kristiyanong magkatrato na nagpaplano para sa saindang kasal dapat na gibuhon iyan kauyon kan mga prinsipyo ni Jehova na nakasurat sa saiyang Tataramon. Taano? Huling si Jehova an Kag-establisar kan pag-aguman. Siya an nagsagibo kan pinakainot na kasal na diyan pinagsaro si Adan asin Eva bilang mag-agom. (Gen. 1:28; 2:24) Kaya an kaisipan nin Diyos an dapat na panginot na ikonsiderar kan mga magkatrato sa pagplano ninda kan saindang kasal.

4. Ano an iba pang dahilan kaya gusto kan magkatrato na tawan nin onra si Jehova sa aldaw kan saindang kasal?

⁴ May mahalagang marhay kamong dahilan tanganing ikonsiderar an kaisipan ni Jehova sa pagplano nindo kan saindong kasal: Siya an saindong Ama sa langit asin an saindong pinakadayupot na Amigo. (Heb. 12:9) Daing duda na gusto nindong padagos na magin dayupot sa saiya. Habo nanggad nindong may mangyaring ano man na makakakulog sa saindong Amigo sa aldaw na iyan o sa ano man na iba pang aldaw. (Sal. 25:14) Pag iniisip-isip nindo an gabos na ginibo asin gigibuhon ni Jehova para sa saindo, bako daw na mauyon kamong maninigo nanggad siyang tawan nin onra sa saindong kasal?​—Sal. 116:12.

PAANO NINDO MATATAWAN NIN ONRA SI JEHOVA?

5. Paano makakatabang an Bibliya sa mga magkatrato na nagpaplano kan saindang kasal?

⁵ An Bibliya mayong itinataong lista nin mga susundon manungod sa kun paano dapat gibuhon an seremonya sa kasal o an resepsiyon na tibaad kasunod kaiyan. Kaya puwedeng planuhon kan magkatrato an saindang kasal kauyon kan saindang kamugtakan saka kagustuhan, asin kauyon kan mga kaugalian saka kostumbre sa saindang lugar. Sinusunod man kan tunay na mga parasamba an legal na mga kahagadan kan gobyerno para sa kasal. (Mat. 22:21) Alagad, pag an kasal inorganisar kauyon kan mga prinsipyo sa Bibliya, makakatao iyan nin onra ki Jehova asin makakapaugma sa saiya. Kaya, anong mga prinsipyo an dapat nindong isaisip?

6. Taano ta importante na sunudon kan magkatrato an legal na mga kahagadan para sa kasal?

⁶ Sunudon an legal na mga kahagadan. (Roma 13:​1, 2) Sa kadaklan na nasyon, dapat na sunudon kan magkatrato an nagkapirang legal na kahagadan bago magpakasal. Dapat nindang aramon kun ano an mga ini sa lugar kun sain sinda nakaistar. Kun may mga hapot kamo manungod digdi, dai mag-alangan na maghagad nin tabang sa mga elder.b

7. Ano an dapat na mabanaag sa kasal?

⁷ Siyertuhon na may dignidad an okasyon. (1 Cor. 10:​31, 32) Hinguwahon na maipabanaag sa okasyon an bunga kan espiritu nin Diyos imbes na an espiritu kan kinaban. (Gal. 5:​19-26) Kauyon kan prinsipyo sa Kasuratan manungod sa pagkapayo, an nobyo an may paninimbagan na siguraduhon na magin maugma asin may dignidad na okasyon an kasal. Ano an makakatabang para magibo iyan? An sarong basado sa Bibliyang pahayag sa kasal, na iprinesentar sa paaging mamumuton, mabuot, asin may dignidad, makakatabang sa mga nagdadangog na lalong mapahalagahan an areglo nin Diyos sa pag-aguman. Makakatabang man iyan sa gabos na nag-atender na mahiling kun gurano kahalaga asin kaseryoso an okasyon. Huli kaiyan, an kadaklan na Kristiyanong magkatrato nagdedesisyon na gibuhon sa Kingdom Hall an seremonya, kun posible iyan. Kun gusto nindong gamiton an Kingdom Hall, dapat kamong magsurat nin request sa grupo nin kamagurangan haloy pa bago an okasyon.

8. Ano an makakatabang tanganing mapagdanay na may dignidad an resepsiyon? (Roma 13:13)

⁸ Basahon an Roma 13:13. Kun napagdesisyunan nindong magkaigwa nin resepsiyon sa kasal, paano nindo malilikayan na maipabanaag diyan an espiritu kan kinaban? An Griegong tataramon na itrinadusir na “nagwawarala-walang pag-urugmahan” nanunungod sa mga pagturutiripon na may kaibang sobrang pag-inom nin inumon na de-alkohol asin musika na inaabot sagkod sa banggihon na. (Hilingon an “walang-patumanggang mga pagsasaya” sa study note sa Roma 13:13.) Kun napagdesisyunan nindong magserbi nin inumon na de-alkohol, patiinot nang pag-isipan kun ano an mga puwedeng gibuhon tanganing masiguradong mayo nin siisay man na magpapasobra sa pag-inom.c Kun may musika, siguraduhon na pagdanayon an volume kaiyan sa lebel na komportable pa man giraray na makakapag-urulay-ulay an mga bisita. Repasuhon na marhay an klase (genre) nin mga musikang ipi-play pati man an mga liriko tanganing mayo nin siisay man na masingkog.

9. Ano an dapat na isaisip kan magkatrato manungod sa mga mensahe o iba pang entertainment sa resepsiyon?

⁹ Sa resepsiyon, may mga matao daw nin halipot na mensahe, may ipapahiling daw na mga slideshow, video, o iba pang entertainment? Sa parati, nakakadagdag iyan sa pagigin memorable kan okasyon. Alagad, siguraduhon na magin nakakapakusog an mga ipepresentar diyan. (Fil. 4:8) Haputon an sadiri: ‘Magpapahiling daw iyan nin paggalang sa iba? Matatawan daw kaiyan nin dignidad an areglo nin pag-aguman?’ Asin an mas mahalaga, haputon an sadiri: ‘Makakatao daw iyan nin onra ki Jehova?’ Puwede man na magpangisi, pero dapat na likayan an ano man na bakong maninigo, arog kan mga pananaram o suba na magpapangyaring mag-isip an mga tawo manungod sa sex. (Efe. 5:3) Siguraduhon na nasasabutan asin iginagalang kan mga kapamilya saka mga amigo na matao nin halipot na mensahe an manungod sa saindong mga kagustuhan.

10. Taano ta dapat na magpahiling nin kababaan nin buot an magkatrato sa pagplano ninda kan saindang kasal? (1 Juan 2:​15-17)

¹⁰ Magin hababa an buot asin mabini. (Basahon an 1 Juan 2:​15-17.) Naaapresyar ni Jehova pag an saiyang mga parasamba hinihinguwang tawan siya nin onra imbes na magdara nin bakong maninigong atensiyon sa sadiri ninda. Kaya lilikayan kan mga Kristiyanong hababa an buot an paggastos nin sobra-sobrang kuwarta asin an “pagpasikat.” Ano an mga pakinabang kan pagkaigwa nin simpleng kasal? Pag-isipan an nagin eksperyensiya kan brother sa Norway na si Mike. Sinabi niya: “Dai kami nagkautang kaya nakapagpadagos kami sa pagpayunir. Simple sana an samong kasal pero nagin magayon pa man giraray iyan saka memorable.” Si Tabitha na sarong sister sa India nagsabi: “Nakalikay kami sa grabeng stress. Dahil pinagdanay ming simple an samong kasal, nangaipo lang iyan nin dikit na pagplano saka dikit man an nagin mga dai pagkauruyon.”

11. Paano makakapahiling nin kabinian an nobya asin nobyo sa saindang pagbado asin pag-ayos sa sadiri? (Hilingon man an mga ritrato.)

¹¹ Nakapagdesisyon na daw kamo kun ano an isusulot nindo? Siguradong gusto nindong magin magayon asin guwapo an itsura nindo lalo na sa aldaw kan saindong kasal. Dawa kan mga panahon kan Bibliya, tinatawan na marhay nin atensiyon kan nobya asin nobyo an saindang itsura. (Isa. 61:10) Totoo, an isusulot nindo sa saindong kasal tibaad medyo iba man sa isinusulot nindo sa ibang mga okasyon, pero dapat na magin mabini pa man giraray iyan. (1 Tim. 2:9) Dai pagtugutan na an saindong bado—o an ano man na iba pang materyal na bagay—an magin pinakaimportanteng aspekto kan saindong kasal.​—1 Ped. 3:​3, 4.

12. Taano ta dapat na siguraduhon kan magkatrato na isikwal an ano man na bakong suno sa Kasuratan na mga kostumbre sa kasal na komun sa lugar ninda?

¹² Isikwal an bakong suno sa Kasuratan na mga kostumbre. (Kap. 18:4) An mga seremonya sa kasal sa kinaban na ini ni Satanas kontaminado nin mga kostumbre na pagano, espiritistiko, asin superstisyoso. Malinaw kitang pinapatanidan ni Jehova na padagos na rumayo sa siring na maating mga bagay. (2 Cor. 6:​14-17) Kun igwa sa lugar nindo nin kuwestiyonableng mga kostumbre, o mga tradisyon, mag-research manungod sa pinaghalian kan mga iyan asin maghanap nin mga prinsipyo sa Bibliya na makakatabang sa pagdesisyon nindo kun arin sa mga kostumbreng iyan an iiiba sa saindong kasal.

13. Paano maaarog kan magkatrato an pagmansay ni Jehova manungod sa pag-ako nin mga regalo?

¹³ Kinaugalian daw sa lugar nindo na an mga bisita nagtatao nin regalo sa bagong kasal? An regalong itatao kan mga bisita nakadepende sa pinansiyal na kamugtakan ninda. Siyempre, dinadagka an mga Kristiyano na magtao, asin nakakapaugma iyan sa sainda. (Tal. 11:25; Gibo 20:35) Alagad, dai ta gugustuhon na maipamati sa satong mga bisita na obligado sindang magtao; ni gugustuhon ta man na maipamati sa sainda na dai ta papahalagahan an saindang regalo kun simple sana iyan. Hinihinguwa niyatong arugon an pagmansay ni Jehova manungod sa mga regalo—inaapresyar ta an ano man na hali sa pusong regalo na itinatao kauyon kan kakayahan kan nagtatao kaiyan.​—2 Cor. 9:7.

KUN PAANO MALILIKAYAN ASIN MAKAKAYANAN AN MGA KADIPISILAN

14. Anong mga kadipisilan an napapaatubang sa nagkapirang magkatrato?

¹⁴ Gusto nindong matawan nin onra si Jehova sa aldaw kan saindong kasal, pero tibaad mapaatubang kamo sa mga kadipisilan sa pagplano kaiyan. Halimbawa, tibaad masakitan kamong magplano nin simpleng kasal. Si Charlie na taga Solomon Islands nagsabi: “Masakiton magdesisyon kun sairisay an iimbitaran sa resepsiyon. Dakul kaming amigo, saka sa kultura mi, inaasahan kan gabos na iimbitaran sinda!” Si Tabitha na sinambit kasubago nagsabi: “Sa lugar mi, komun an pagkaigwa nin resepsiyon na dakulon an imbitado. Nahaloy bago naako kan samong mga magurang an desisyon mi na mga 100 katawo sana an imbitaran.” Si Sarah na taga India nagsabi: “May mga tawong grabe an pagpapahalaga sa estado sa buhay. An mga pinsan ko enggrande an kasal, kaya medyo na-pressure ako na dapat mas enggrande pa an kasal ko.” Ano an makakatabang sa saindo na makayanan an mga kadipisilan na arog kaini asin iba pa?

15. Taano ta importanteng parte kan pagplano sa kasal an pagpamibi?

¹⁵ Iiba sa saindong mga pamibi an manungod sa mga ginigibo nindong plano sa kasal. Puwede nindong sabihon ki Jehova sa pamibi an ano man na isyu na napapaatubang sa saindo o an mga namamatian nindo. (Fil. 4:​6, 7 asin study note na “lahat”) Puwede nindong hagadon sa saiya na tabangan kamong makagibo nin marahay na mga desisyon, magdanay na kalmado pag nahahadit, asin makapahiling nin kusog nin buot pag kaipuhan. (1 Ped. 5:7) Magkukusog an pagtitiwala nindo ki Jehova mantang nahihiling nindo kun paano siya minahiro alang-alang sa saindo. Si Tabitha na sinambit kasubago nagsabi: “Nahahadit kami kan katrato ko na tibaad magkaigwa kami nin mga dai pagkauruyon o an samong mga kapamilya. Kaya sa kada pinag-uurulayan mi an mga plano sa kasal, pinupunan mi iyan paagi sa pamibi. Namamati mi talaga an tabang ni Jehova saka nagigin matuninong an pag-urulay.”

16-17. Paano makakatabang an marahay na komunikasyon pag nagpaplano sa kasal?

¹⁶ Makikomunikar sa malinaw asin mataktikang paagi. (Tal. 15:22) Bilang magkatrato, kakaipuhanon nindong gumibo nin dakul na desisyon manungod sa saindong kasal. Kaiba diyan an petsa, badyet, mga iimbitaran, asin dakul pang iba. Bago gumibo nin desisyon, magkaibanan nindong repasuhon an mga opsiyon asin pag-ulayan an mga prinsipyo sa Bibliya na aplikado diyan pati man an ano man na suhestiyon hali sa maygurang asin eksperyensiyadong mga Kristiyano. Pag ipinapahayag nindo an saindong personal na mga kagustuhan, magin mabuot, rasonable, asin madaling mag-adjust. Kun an saindong dayupot na mga kapamilya—arog kan saindong mga magurang—igwa nin mga kahagadan na rasonable man, hinguwahon na paonrahan sinda. Espesyal man para sa sainda an okasyon na ini. Kun dai nindo magigibo an mga hinahagad ninda, mataktikang ipaliwanag an mga dahilan. (Col. 4:6) Malinaw na ipaliwanag sa saindong mga kapamilya na an panginot nindong pasuhan iyo na magkaigwa nin maugmang okasyon na nagtataong onra ki Jehova.

¹⁷ Kun bakong kapagtubod an saindong mga magurang, lalo nang puwedeng magin dipisil an pagpaliwanag sa sainda manungod sa mga desisyon nindo, alagad kaya nindong gibuhon iyan. “Gusto kan mga kapamilya mi na iiba an manlain-lain na Hindung ritwal,” an sabi ni Santhosh na sarong brother sa India. “Kinaipuhan nin haloy-haloy na panahon asin dakul na pakikipag-ulay tanganing ipaliwanag sa sainda an samuyang mga desisyon. Pag may hinahagad sinda na okey man samo saka dai man makakapamundo ki Jehova, naggigibo kami nin mga pagliliwat. Halimbawa, binago mi an menu sa resepsiyon sigun sa menu na gusto ninda saka nagdesisyon kami na dai magkaigwa nin ano man na pagkanta o pagbayle dahil bako sindang tuod diyan.”

18. Ano an makakatabang sa saindo para masiguradong magigin areglado an aldaw kan saindong kasal? (1 Corinto 14:40) (Hilingon man an ritrato.)

¹⁸ Magplanong marhay. Kun organisado kamo, dai kamo gayong mai-stress sa aldaw kan saindong kasal. (Basahon an 1 Corinto 14:40.) Si Wayne na taga Taiwan nagsabi: “Pirang aldaw bago an samuyang kasal, nagkaigwa kami nin sadit na miting kaiba an mga nagboluntaryong tumabang samo sa okasyon. Pinag-ulayan mi an mga areglo asin pigpraktis an pirang porsiyon kan kasal para masiguradong magigin areglado an mga iyan.” Bilang paggalang sa saindong mga bisita, gibuhon an pinakamakakaya na magdanay na nasa oras an mga bagay-bagay.

19. Ano an makakatabang sa saindo na magkaigwa nin kontrol sa mga bagay-bagay sa resepsiyon?

¹⁹ Dakul na problema an puwedeng maebitaran kun patiinot nindo iyan na pag-iisipan. (Tal. 22:3) Halimbawa, kun nakaistar kamo sa sarong lugar na diyan komun na may nag-aarabot sa resepsiyon na mga bisitang bako man imbitado, pag-isipan kun ano an puwede nindong gibuhon para malikayan ining mangyari. Kun igwa kamo nin mga paryenteng bakong kapagtubod, siguraduhon na aram ninda an mga puwede nindang asahan kun manungod sa okasyon, asin ipaliwanag an pagmansay nindo sa nagkapirang kostumbre sa kasal. Puwede nindong ipahiling sa sainda an artikulong “Ano ang Nangyayari sa Kasalan ng mga Saksi ni Jehova?” na nasa jw.org. Para matabangan kamong magkaigwa nin kontrol sa mga bagay-bagay sa saindong resepsiyon, puwede kamong pumili nin sarong maygurang na brother para maglingkod bilang “namamahala sa bangkete,” o director of the feast. (Juan 2:8) Kun malinaw nindong ipapaliwanag sa saiya an mga plano nindo sa kasal, matatabangan niya kamong masigurado na magdanay na may dignidad an saindong kasal asin mangyari iyan sigun sa plano.

20. Ano an dapat na tandaan kan magkatrato manungod sa saindang kasal?

²⁰ Tibaad mahadit kamong marhay mantang pigkokonsiderar nindo an gabos na kalabot sa pagplano para sa saindong kasal. Pero, tandaan na an saindong kasal sarong aldaw sana. Inot na aldaw pa sana iyan kan saindong magayunon na buhay na magkaibanan bilang mga lingkod ni Jehova. Gibuhon an saindong pinakamakakaya na magin simple asin may dignidad an saindong kasal. Magtiwala ki Jehova. Sa tabang niya, magigibo nindong makaorganisar nin kasal na magaya-gaya nindong gigirumdumon na mayo nin ano man na pagbasol huling nagin maugma iyan.​—Sal 37:​3, 4.