Taano ta May Pagkabaranga?

AN PINAKACAUSA nin relihiyosong pagkabaranga, o pagkasiriblag, sinasabi sa sarong ensiklopedya nin relihiyon na tolo: doktrinal, organisasyonal, asin politikal. Helingon niato kun an pag-analisar na ini tama sa situwasyon sa Iglesya Katolika.

Teolohiya o Katotoohan kan Biblia?

Sa saiya mismong pag-analisar sa dahelan kan presenteng pagkabaranga sa Iglesya Katolika, an pading si René Laurentin nagsurat: “Garo malinaw para sa sako an nagdedeterminar na causa. Iyan an magkakalaen na ideolohiya.” Nagtataram sia manongod sa progresibong ideolohiya. Ini kabaliktaran nin tradisyon, an boot sabihon, an konserbatismo na pinipersonipikar ni Arsobispo Lefebvre. An padre superyor na Dominico na si Jean-Pierre Lintanf nagsasabi: “An pagtubod saro, an mga teolohiya magkalaenlaen.”

An laen-laen na ideolohiya, na iyo an responsable sa mga pagkabaranga sa laog kan iglesya, malilikayan kun an iglesya mangangapot sa Biblia bilang an burabod kan mga katokdoan kaiyan. Sa katunayan, ipinagboot kan Ikaduwang Konsilyo sa Batikano: “An sagradong Tataramon napakahalagang instrumento sa makapangyarihan na kamot nin Dios para sa pagkakamit kan pagkasararo na iinoopresir kan Paraligtas sa gabos na tawo.” Alagad, sa pagpaluya kan nakakabogkos na halaga kan Biblia, an iyo man sanang Konsilyo sa Batikano nagsabi: “An Iglesya dai nagkukua kan saiyang pakaseguro sa gabos na nahayag na katotoohan sa banal na Kasuratan sana. Kaya, an Kasuratan asin Tradisyon kapwa dapat na akoon asin igalang na may pantay na debosyon asin paggalang.” Asin saro pa: “An sagradong teolohiya nagsasarig sa nasusurat na Tataramon nin Dios, na kinua kaiba nin sagradong Tradisyon.”

An mga tataramon ni Jesus sa mga Fariseo puwedeng iaplikar sa autoridad sa pagtotokdo kan Iglesya Katolika: “Ginibo nindo an tataramon nin Dios na daing puwersa paagi sa saindong tradisyon.” (Mateo 15:6, The New Jerusalem Bible) An sarong sinserong Katolika nagsurat sa sarong peryodikong Katoliko sa Pransia: “Kun an klero dai na namomotibar na maghulit kan Marahay na Tataramon, makangangalas daw na an mga maimbod mas kadikit, o naghahanap nin iba? (Kun manongod sa mga Saksi ni Jehova asin sa mga tradisyonalista, an saindang pagtubod ipinalalaen sinda.)”

Nagkakabangang Hirarkiya

Helinga ngonyan an organisasyonal na causa kan pagkabaranga sa laog kan iglesya. An pagkasiriblag na pinapangyari ni Arsobispo Lefebvre direktang konektado sa mga doktrinang Katoliko na “Pagigin Kasalihid kan mga Apostol” asin pagigin pangenot kan papa. Hinihingako ni Lefebvre na an “kapangyarihan na magtokdo, mamahala, asin magpakabanal na itinao ni Cristo sa Saiyang mga Apostol . . . ipinagpapadagos sa kolehiyo nin mga obispo kan Iglesya.” Sa ibong na lado, hinihingako na an obispo sa Roma, an papa, iyo an “pangenot sa gabos na obispo, bako sanang sa ranggo o dignidad, kundi sa pastoral na autoridad.”—New Catholic Encyclopedia.

Alagad basado daw sa Biblia an mga doktrinang ini? An iyo man sanang Katolikong ensiklopedyang ini nag-aadmitir na “mayo nin makukua sa Bagong Tipan na ano man na tataramon ni Cristo na nagpaparisa kun paano ipamamana an apostolikong pagboot.” Asin itinuga man na “an pagigin pangenot kan papa” dai “klarong nasabotan o malinaw na hiningako” sa “Iglesya sa Solnopan [Latin]” sagkod kan ikalimang siglo C.E.

Sa presente an sistema hirarkiko kan Iglesya Katolika inaangat poon sa itaas sagkod sa ibaba. Iyan sarong bagay na nakakokontribuwir sa mga pagkabaranga, mantang an mga obispo, teologo, padi, asin lego nagpapahayag sa publiko kan saindang dai pag-oyon sa papa manongod sa pagtubod, moral, asin paggobyerno sa iglesya. An “Cologne Declaration” nagsabi: “Kun an papa gumibo nin bagay na dai kaiba sa saiyang katongdan, dai nia mahahagad an pagkuyog sa ngaran nin Katolisismo.”

Baranga sa Politika

An Economist nin Britania nagsurat: “Sa pagheling nin mga Lefebvrista, an saindang iglesya nabiktima nin pagkasapakat na nagbugtak kaiyan sa kamot nin mga Marxista, modernista asin Protestante. Si Monsenyor Lefebvre naniniwala na an Rebolusyon na Pranses nag-introdusir nin makamomondong modernismo asin liberalismo sa kinaban, asin na an Batikano II an nag-introdusir kan Rebolusyon na Pranses . . . sa iglesya.” An dakol na konserbatibong Katoliko arog man kaini an opinyon. Sa ibong na lado, an radikal na mga Katoliko apabor sa sosyal na mga reporma, an iba ngani sagkod pa sa pag-ako kan prinsipyo nin armadong rebolusyon. Kaya, an politika saro pang nakababangang bagay sa mga Katoliko.

Sa pagtatapos kan saiyang artikulo dapit sa “Why These Divisions Among Christians?” sinabi kan pading si Laurentin na an kredibilidad kan Iglesya Katolika depende sa pagkuyog kaiyan sa mga tataramon ni Jesus: “Paagi sa saindong pagkamoot sa lambang saro, na an gabos makakamidbid sa saindo bilang sakong mga disipulo.”—Juan 13:35, NJB.

Sa paggamit kan pangilatis na iyan, an dakol na sinserong Katoliko sa bilog na kinaban nakaabot sa konklusyon na an paghihingako kan Iglesya Katolika bilang an solamenteng tunay na iglesya dai mapaniwalaan. Sa pakaaram, arog man kan sabi ni Jesus, na “mayo nin harong na nababanga tumang sa saiya man sana an magdadanay,” dakol an “hilom na naghale” sa iglesya.—Mateo 12:25, NJB.

Dakol-dakol na Katoliko an naghahanap ngonyan nin “harong” na kompuwesto nin tunay na mga Kristiano, na sararo paagi sa tunay na pagkamoot sa tugang asin dai nagkakabaranga magsalang huli sa bakong biblikal na mga doktrina, siriblag na hirarkiya, o magkakakontrang politikal na opinyon. Rinibo an nakanompong kan saindang hinahanap kan sinda makiasosyar sa mga Saksi ni Jehova.

[Ritrato sa pahina 9]

Kinondenar ni Jesus an mga Fariseo huli sa pagpaorog kan saindang mga tradisyon sa Tataramon nin Dios