An Libro nin Job Makakatabang sa Saimo Pag Nagtatao nin Sadol

1-2. Napaatubang sa anong dipisil na sitwasyon an tulong kairiba ni Job saka si Elihu?

MARIKASON na naglakop an bareta sa mga taga Sirangan. Si Job, na midbid na marhay huli sa saiyang kayamanan, nawara an gabos na igwa siya. Kan mabaretaan iyan kan tulo sa mga kairiba niya—si Elifaz, Bildad, saka Zofar—nagbaklay sinda pasiring sa Uz para rangahon siya. Pero pag-abot ninda, nabigla sinda sa nahiling ninda.

² Imahinara an eksena. Garo man sana kinurua ki Job an gabos na igwa siya. An dakulon niyang karnero, baka, kamelyo, saka asno mayo na. Nagadan an saiyang mga aki pati man an kadaklan kan saiyang mga suruguon. Asin an harong kun sain nagadan an saiyang mga aki nagaba man. Dai pa diyan natatapos, si Job mismo nagkaigwa nin malalang hilang. An saiyang hawak napano nin makulog na mga pigsa. Kan natatanaw na si Job kan tulong lalaki, nahiling ninda na mamunduon siya asin nakalapiga sa abo. Ano an nagin reaksiyon ninda? Sa laog nin pitong aldaw, mayo sindang sinabi maski sarong tataramon sa lalaking ini na grabe an namamatian na kulog. (Job 2:​12, 13) Nag-abot man an mas hoben na lalaking si Elihu asin nagtukaw sa may harani. Dangan nagtaram na si Job; isinumpa niya an aldaw kan saiyang pagkamundag asin sinabi niya na mas marahay pang nagadan na sana siya. (Job 3:​1-3, 11) Malinaw na kaipuhan nanggad ni Job nin tabang! An sasabihon kan mga lalaking ini saka kun paano ninda iyan sasabihon mapatunay kun baga mga amigo talaga sinda ni Job asin kun baga nagmamalasakit talaga sinda sa saiyang kapakanan.

3. Sa ano kita mapokus ngunyan?

³ Ipinasurat ni Jehova ki Moises an mga sinabi asin ginibo kan tulong kairiba ni Job asin pati man an ki Elihu. Mahalagang mangnuhon na an nagkapira sa mga sinabi ni Elifaz garo baga ipinasabong nin maraot na espiritu. Sa kabaliktaran, an mga sinabi ni Elihu ipinasabong ni Jehova. (Job 4:​12-16; 33:​24, 25) Kaya bakong makangangalas na dawa ngani yaon sa libro nin Job an nagkapira sa pinakamarahay na mga sadol o konseho na itinao kasuarin man, yaon man diyan an nagkapira sa mga pinakamaraot. Pag-uulayan ta sa artikulong ini kun paano makakatabang sa sato an libro nin Job pag kaipuhan tang magtao nin sadol. Inot, tutukaron ta an manungod sa maraot na halimbawa kan tulong kairiba ni Job. Dangan, pag-uulayan ta an marahay na halimbawa ni Elihu. Sa kada saro kaiyan, aaramon niyato kun paano posibleng nakinabang an mga Israelita sa libro nin Job asin kun paano kita makikinabang diyan ngunyan.

KUN PAANO SI JOB TINAWAN NIN KONSEHO KAN TULONG KAIRIBA NIYA

4. Taano ta dai nagibo kan tulong kairiba ni Job an saindang obheto? (Hilingon man an ritrato.)

⁴ Sinasabi kan Bibliya na an tulong kairiba ni Job ‘dinamayan siya saka rinanga’ pagkatapos na mabaretaan an maraot na mga nangyayari sa saiya. (Job 2:11) Minsan siring, dai ninda nagibo an obheto ninda. Taano? Huli sa kisiyera tulong dahilan. Inot, nagkongklusyon tulos sinda nin sala. Halimbawa, inisip ninda na pinapadusahan si Job dahil may mga nagibo daa siyang kasalan.a (Job 4:7; 11:14) Ikaduwa, an kadaklan sa konsehong itinao ki Job kan mga lalaking idto bakong kapaki-pakinabang, bakong mabuot, saka nakakakulog talaga. Halimbawa, nagtaram an tulong lalaki nin mga tataramon na magayon pagdangugon pero dai man talaga nakakatabang. (Job 13:12) Si Bildad duwang beses na sinabi ki Job na matabilon daa si Job. (Job 8:2; 18:2) Asin ipinarisa ni Zofar na si Job daa “daing isip.” (Job 11:12) Ikatulo, dawa ngani tibaad bako man pakurahaw an pagtaram ninda ki Job, pero sa parati mapangmenos, sarkastiko, saka mapang-akusar an pagtaram ninda. (Job 15:​7-11) Panghuri, an mga lalaking ini mas interesadong patunayan na sala si Job kisa sa rangahon siya o pakusugon an saiyang pagtubod.

5. Ano an nagin resulta kan konsehong itinao kan mga kairiba ni Job?

⁵ Bakong makangangalas na bakong marahay an nagin resulta kan konsehong itinao kan mga kairiba ni Job. Narunot an puso ni Job huli kan saindang mga tataramon. (Job 19:2) Masasabutan niyato kun taano ta namatian ni Job na kaipuhan niyang idepensa an saiyang reputasyon. Nagin dahilan iyan na magin bakong balanse an saiyang kaisipan asin na makapagtaram siya nin bakong madunong. (Job 6:​3, 26) An kaisipan na ihiniras kan mga kairiba ni Job bakong kauyon kan kaisipan ni Jehova; dai man ninda trinatar si Job nin may pagmalasakit. Bilang resulta, mayo sindang kaaram-aram na nagin mga kasangkapan na palan sinda ni Satanas. (Job 2:​4, 6) Paano posibleng nakinabang sa salaysay na ini an mga lingkod kaidto, asin paano kita makikinabang diyan ngunyan?

6. Ano an mga posibleng nanudan kan kamagurangan sa Israel sa maraot na halimbawa kan tulong kairiba ni Job?

⁶ Kun paano posibleng nakinabang an mga Israelita. Pagkatapos na mabilog an nasyon nin Israel, nagnombra si Jehova nin kuwalipikadong mga lalaki, o kamagurangan, para maghusgar sa nasyon kauyon kan saiyang matanos na mga pamantayan. (Deu. 1:​15-18; 27:1) An mga lalaking ini kaipuhan na magdangog ngunang marhay bago magtao nin sadol o maghusgar. (2 Cron. 19:6) Kaipuhan man nindang maghapot imbes na isipon na aram na ninda an gabos na detalye. (Deu. 19:18) Kaipuhan nindang likayan na magtaram nin bakong mabuot sa mga nagdudulok sa sainda para maghagad nin tabang. Taano? Huling kun mapahiling sinda nin pagkairitar puwede iyan na makapadisganar sa saro na sabihon kun ano an nasa puso niya. (Exo. 22:​22-24) An mga ini an pira sa mga leksiyon na posibleng nanudan kan kamagurangan sa Israel na nagtaong atensiyon sa salaysay manungod ki Job.

7. Apuwera sa kamagurangan sa Israel, sairisay pa an puwedeng magtao nin sadol, asin paano sinda posibleng nakinabang sa salaysay manungod ki Job? (Talinhaga 27:9)

⁷ Siyempre, bako lang an maygurang na mga lalaki sa Israel an puwedeng magtao nin sadol. Sa katunayan, an siisay man na Israelita—hoben man o may edad, lalaki man o babayi—puwedeng magtao nin sadol sa saro na nangangaipo nin tabang para mapauswag an saiyang pagsamba o maitanos an saiyang paggawi. (Sal. 141:5) An saro na nagtatao nin siring na sinserong sadol sarong tunay na amigo. (Basahon an Talinhaga 27:9.) An maraot na halimbawa kan tulong kairiba ni Job posibleng nakatao sa mga Israelita nin halimbawa na nangyari sa tunay na buhay manungod sa kun ano an dai dapat sabihon asin dai dapat gibuhon pag nagtatao nin sadol.

8. Ano an mga kaipuhan tang likayan pag nagtatao nin sadol? (Hilingon man an mga ritrato.)

⁸ Kun paano kita makikinabang. Bilang mga Kristiyano, gusto niyatong tabangan an satong mga tugang pag napapaatubang sinda sa mga pagbalo. Alagad para magibo iyan, dapat tang likayan an ginibo kan tulong kairiba ni Job. Inot, dapat tang likayan na magkongklusyon tulos asin siguraduhon niyato na an mga sinasabi ta nakabasar sa masasarigan na mga katotoohan. Ikaduwa, dai ta dapat ibasar an satong sadol panginot na sa personal na eksperyensiya na bako pirming masasarigan, arog kan parating ginibo ni Elifaz, imbes, ibasar ta iyan sa Tataramon nin Diyos na sarong masarig na pundasyon. (Job 4:8; 5:​3, 27) Ikatulo, kaipuhan tang likayan na magtaram nin bakong mabuot o magin mapagkritika. Girumdumon na nagtaram man si Elifaz saka an mga kairiba niya nin nagkapirang katotoohan; kinotar pa ngani nin sarong kagsurat kan Bibliya an saro sa mga sinabi ninda. (Ikumparar an Job 5:13 sa 1 Corinto 3:19.) Dawa arog kaiyan, an kadaklan sa mga sinabi ninda manungod sa Diyos bakong totoo saka nakulgan ninda si Job, kaya sinabi ni Jehova na dai ninda itinaram an katotoohan. (Job 42:​7, 8) An marahay na sadol nungkang nagtatao kan impresyon na bakong rasonable si Jehova o na dai angay na mamutan an saiyang mga lingkod. Pag-ulayan ta ngunyan an mga manunudan ta sa halimbawa ni Elihu.

KUN PAANO NI ELIHU TINAWAN NIN KONSEHO SI JOB

9. Taano ta kinaipuhan ni Job nin tabang pagkatapos na magtaram an mga kairiba niya, asin paano ni Jehova itinao an tabang na iyan?

⁹ Kan matapos na sa pag-argumento si Job saka an mga kairiba niya, siguradong pano nin tensiyon an sitwasyon. Inabot nin 28 kapitulo kan Bibliya an gabos na sinabi kan mga lalaking ini, asin an kadaklan diyan nagpapahiling nin kaanggutan o pagkauyam. Kaya bakong makangangalas na yaon pa an kulog na namamatian ni Job! Kaipuhan niya pa man giraray nin karangahan asin pagtatanos. Paano ni Jehova tinabangan si Job? Ginamit niya si Elihu tanganing tawan siya nin konseho. Taano ta dai tulos nagtaram si Elihu? Sinabi niya: “Hoben pa ako asin kamo may edad na. Kaya dai tulos ako nagtaram bilang paggalang saindo.” (Job 32:​6, 7) Narealisar ni Elihu kun ano an narerealisar kan dakul ngunyan: An mga mas maedad mas haloy nang nabubuhay saka mas dakul nang nanudan, kaya igwa sinda kan kadunungan pati man kan mga eksperyensiya sa buhay na sa parati mayo an mga mas hoben. Alagad pagkatapos na mapasensiyang magdangog ki Job saka sa mga kairiba niya, dai na kaya ni Elihu na magdanay na silensiyo. Sinabi niya: “Dai igo an edad sana para magin madunong an saro, asin bako lang an mga gurang an nakakasabot kan tama.” (Job 32:9) Ano an sunod na sinabi ni Elihu, asin paano niya iyan sinabi?

10. Ano nguna an ginibo ni Elihu bago niya tawan nin sadol si Job? (Job 33:​6, 7)

¹⁰ Bago si Elihu nagtao nin ano man na konseho ki Job, hininguwa niya ngunang andamon an sitwasyon tanganing magin madaling akuon an itatao niyang konseho. Paano? Inot, pinakalma nguna ni Elihu an sadiri niyang emosyon. Aram niyatong ginibo niya iyan huling sinasabi kan Bibliya na kan primero anggot si Elihu. (Job 32:​2-5) Dawa arog kaiyan, dai niya tinugutan an emosyon niya na magin dahilan na magtaram siya nin ano man na makakakulog ki Job. Sa kabaliktaran, nagtaram siya sa saiya sa nakakapakusog na paagi. Halimbawa, sinabi niya ki Job: “Hilinga! Pareho lang kita sa paghiling kan tunay na Diyos.” (Basahon an Job 33:​6, 7.) Dangan malinaw na ipinahiling ni Elihu na nagdangog siyang marhay ki Job. Sa katunayan, sinumaryo niya an panginot na mga punto kan anom na pagkakataon sa salaysay, na diyan ipinahayag ni Job an saiyang sabuot. (Job 32:11; 33:​8-11) Kaagid man kaiyan an ginibo ni Elihu kan tawan niya giraray nin konseho si Job.​—Job 34:​5, 6, 9; 35:​1-4.

11. Paano ni Elihu tinawan nin konseho si Job? (Job 33:1)

¹¹ Mantang nagtatao nin konseho si Elihu, ginibo niya iyan sa paaging natatawan nin dignidad an maimbod na lalaking si Job. Halimbawa, ginamit niya an pangaran ni Job, na minalataw na dai ginibo kan tulong iba pang lalaki. (Basahon an Job 33:1.) Tibaad nagigirumduman ni Elihu na gustong-gusto niya kuta kaidtong magtaram mantang nag-aargumento si Job saka an tulo niyang kairiba, kaya tinawan niya nin pagkakataon si Job na magsimbag sa itinatao niyang sadol. (Job 32:4; 33:32) Malinaw man na pinatanidan ni Elihu si Job na peligroso an nagkapira sa mga pangangatanusan niya asin mabuot niyang ipinagirumdom ki Job an manungod sa kadunungan ni Jehova, kapangyarihan, hustisya, asin maimbod na pagkamuot. (Job 36:​18, 21-26; 37:​23, 24) Daing duda na nakatabang an marahay na konseho ni Elihu na magin nasa tamang kamugtakan nin isip si Job na mag-ako nin dugang pang pagtutukdo—sa pagkakataon na ini, hali sa saiyang Kaglalang. (Job 38:​1-3) Paano posibleng nakinabang sa halimbawa ni Elihu an mga lingkod kaidto, asin paano kita makikinabang diyan ngunyan?

12. Paano ginamit ni Jehova an mga propeta tanganing tabangan an saiyang banwaan, asin paano posibleng nakinabang an mga Israelita sa marahay na halimbawa ni Elihu?

¹² Kun paano posibleng nakinabang an mga Israelita. Sa bilog na kasaysayan kan Israel, nagnombra si Jehova nin mga propeta tanganing ipaabot sa mga Israelita an saiyang katuyuhan. Halimbawa, durante kan panahon kan mga Hukom, an propetisang si Debora tinawan nin paggiya sa espirituwal an nasyon asin si Samuel maigot nanggad na naglingkod bilang tagapagtaram ni Jehova puon kan siya hoben pa. (Huk. 4:​4-7; 5:7; 1 Sam. 3:​19, 20) Dangan durante kan panahon kan mga hadi, haros dai nawawaran nin mga propetang itinatao si Jehova tanganing pakusugon sa espirituwal an saiyang banwaan asin tanganing tawan nin konseho an mga naparayo sa dalisay na pagsamba. (2 Sam. 12:​1-4; Gibo 3:24) An halimbawa ni Elihu na nakasurat sa libro nin Job puwedeng nakatabang sa maimbod na mga lalaki asin babayi kaidto na maaraman kun ano an sasabihon asin kun paano iyan sasabihon pag nagtatao nin sadol.

13. Paano mapapakusog kan mga Kristiyano ngunyan an saindang mga kapwa parasamba?

¹³ Kun paano kita makikinabang. Bilang mga Kristiyano, ipinapamidbid ta man an kabutan nin Diyos paagi sa pagbalangibog sa kun ano an mahihiling sa saiyang Tataramon, an Bibliya. An saro pang paagi na ginigibo ta iyan iyo an paggamit nin mga tataramon na nakakapakusog asin nakakaparigon sa buot kan satong mga kapwa parasamba. (1 Cor. 14:3) An mga elder an lalo nang kaipuhan na “magtaram na may pagranga” sa mga tugang, dawa sa mga tibaad napupurisaw o sa mga may tendensiyang magtaram nin “dai . . . na napag-iisipan.”​—1 Tes. 5:14; Job 6:3.

14-15. Iilustrar kun paano maaarog nin sarong elder si Elihu pag nagtatao nin sadol.

¹⁴ Imahinara an sitwasyon na ini. Naaraman nin sarong elder na may sister sa kongregasyon ninda na nakakamati nin pangluluya nin buot. Marahay na sana ta dinalaw kan elder saka kan saro pang brother an sister tanganing pakusugon ini. Durante kan pagdalaw, ipinahayag kan sister an negatibo niyang mga namamatian. Sinambit niya na dawa ngani nag-aatender siya sa mga pagtiripon saka nakikikabtang sa ministeryo, dai siya nakakamati nin kaugmahan. Ano an gigibuhon kan elder?

¹⁵ Inot, posibleng marhay na hihinguwahon niyang aramon kun ano talaga an mga dahilan kaya nakakamati nin arog kaiyan an sister. Para magibo iyan, kaipuhan niyang mapasensiyang magdangog. Namamatian daw kan sister na bako siyang maninigo sa pagkamuot nin Diyos? Pinangluluyahan daw siya nin buot huli sa “mga kahaditan sa buhay”? (Luc. 21:34) Ikaduwa, hihinguwahon kan elder na komendaran an marahay na mga ginigibo kan sister. Tutal, dawa ngani pinangluluyahan nin buot an sister, nag-aatender pa man giraray siya sa mga pagtiripon asin nakikikabtang sa ministeryo. Asin ikatulo, pag nasabutan na kan elder an sitwasyon kan sister saka an dahilan kan saiyang pangluluya nin buot, gagamiton kan elder an Bibliya para pakusugon an kumpiyansa niya na namumutan siya nin Diyos.​—Gal. 2:20.

PADAGOS NA MAKINABANG SA LIBRO NIN JOB

16. Paano kita padagos na makikinabang sa libro nin Job?

¹⁶ Dakul nanggad na pakinabang an nakukua ta sa pagsiyasat sa libro nin Job! Arog kan nanudan ta sa nainot na artikulo, an ipinasabong na salaysay na ini nagtutukdo sa sato bako lang kun taano ta tinutugutan nin Diyos an pagsakit kundi kun paano ta man iyan matatagalan. Asin arog kan napag-ulayan ta sa artikulong ini, gabos kita puwedeng makanuod na magtao nin epektibong sadol paagi sa pagsunod sa marahay na halimbawa ni Elihu asin bako sa maraot na halimbawa kan tulong kairiba ni Job. Pag may kaipuhan kang tawan nin sadol, puwede mo daw ngunang repasuhon an mga leksiyon na nanudan mo sa libro nin Job? Asin kun medyo haloy-haloy mo nang nabasa an libro nin Job, gibuhon na pasuhan na basahon giraray an magayon na librong iyan. Mahihiling mong kapaki-pakinabang pa man giraray iyan ngunyan arog kaidtong panahon na isurat iyan.