Sala daw an Pagbalos?

Sa sarong tinampo sa Estados Unidos, an sarong kotse atrasado sa paggilid asin pagpaagi sa saro pang kotse. An drayber kan ikaduwang kotse buminalos paagi sa pagbadil sa nasalang kotse, na nagadan an sarong daing salang pasahero.

An sarong daragita nawaran nin papel sa sarong drama sa eskuwelahan ta iyan itinao sa saro pang daragita. Buminalos sia paagi sa pag-estorya sa kailusyon kan daragita na ini nakikipaghelingan sa sarong solterito sa ibang eskuwelahan. Kaya naraot nia an relasyon kan daragita sa kailusyon.

AN DAKOL naghohona na sinda may katanosan na bumalos kun sa paghona ninda pinagkasalaan sinda. Sa laen-laen na paagi, sinusunod ninda an sarabihon na: “Dai maanggot, bumalos sana.” Ngonyan, maluya an pagkamoot sa kapwa, asin naglalakop an espiritu nin pagbalos.—Mateo 24:12.

Alagad ano an pagheling nindo sa pagbalos? Kun kamo nagtutubod sa Biblia, tibaad sa paghona nindo sa pundamental sala an pagbalos. Alagad huling kita nabubuhay sa maraot na kinaban, tibaad hinohona nindo na an pagpatawad, an kabaliktaran nin pagbalos, sa parate bakong realistiko. Ano an reaksion nindo kun kamo dayaon o bugbugon? Kamo daw nagigin benggatibo kun dai kamo iniintindi o rinaraot kamo sa iba? Kamo daw benggatibo o nagpapatawad?

An Benggatibong Kaisipan Nakararaot

Siyempre, laen-laen an gabat nin pagkakasala. Pero an kadaklan na gustong bumalos dai man binugbug o kinolgan. An mga “kasalan” na sinabi sa kapinonan kan artikulong ini sadit man sana, minsan ngani iyan dakula sa isip kan mga nagdesisyon na bumalos.

Sinasabi kan Biblia na dai kita maninigong magpatubo nin benggatibong kaisipan. An Talinhaga 24:29 nagsasadol: “Dai ka magsabi: ‘Kun ano an ginibo nia sa sako, siring man an gigibohon ko sa saiya.’” Taano ta dai? Primero, an siring na kaisipan nakararaot sa emosyonal asin pisikal. An benggatibong mga kaisipan nakahahale sa toninong na isip asin nakaoolang sa tamang pangangatanosan. Horophoropa an baretang ini: “An duwang paraoma na nagbibinadilan hale sa saindang mga trak na pik-ap nagkaginadanan sa sarong paradahan, na tinatapos an 40 anyos na iriwal na nagpoon kan sinda aki pa.” Isip-isipa, sa bilog nindang buhay an isip kan duwang tawong ini nailo nin naggagrabe, benggatibong espiritu!—Talinhaga 14:29, 30.

An saro pang dahelan na dai patuboon an benggatibong espiritu iyo na an mga nagkasala—minsan an mga nagkasala nin magabat—puwedeng magbakle. Halimbawa, si apostol Pablo kaidto ‘nag-oyon sa paggadan’ ki disipulo Esteban asin ‘naghangos pa nin mga pag-uma asin paggadan tumang sa mga disipulo kan Kagurangnan.’ Pero nagbakle sia. Pakalihis nin mga taon si apostol Pedro—na an buhay nameligro huli ki Pablo kan enot na mga panahon na idto—inapod siang “an satong namomotan na tugang na si Pablo.” (Gibo 8:1; 9:1; 2 Pedro 3:15) An mga Kristiano puwede kutanang buminalos ki Pablo, nangorogna kan sia naghahalat, na buta, sa Damasco. (Gibo 9:3-15) Nagin kutana idtong makamomondong sala!

Kaya si Pablo nakapagsadol, sa Roma 12:20: “Kun nagugutom an saindong kaiwal, pakakana sia; kun sia napapaha, painoma sia.” Taano? Huli ta kun kita bumalos sa kaiwal, pinatatagas niato an saiyang kaisipan asin ginigibo na niatong permanente an pag-iiwal niato. Pero kun gigibohan niato nin karahayan an saro na nagkakasala o nakakokolog sa sato, tibaad mapalomoy niato an saiyang kaisipan asin magibong katood an dating kaiwal.

An pagmidbid sa satong mga kaluyahan nakatatabang man na mahale an kapaitan na nagdadara sa pagmawot na bumalos. An salmista naghapot: “Kun mga sala an saimong binabantayan, O Jah, O Jehova, siisay an makatitindog?” (Salmo 130:3) Kita gabos nakakolog na o nagkasala na sa iba. Bako daw na naoogma kita kun sinda dai naghihingoang bumalos? Kun siring, bako daw na maninigo man kitang gumawe na may kaagid na pagpopogol? Nagsadol si Jesus: “Kaya an gabos na boot nindong gibohon sa saindo nin mga tawo, gibohon man nindo sa sainda.”—Mateo 7:12.

Totoo, sinasabi kan Biblia: “Ikaongis nindo an maraot.” (Salmo 97:10; Amos 5:15) Pero dai kita sinasabihan kaiyan na ikaongis an naggigibo kan maraot. Sa katunayan, pinagbotan kita ni Jesus: “Padagos na mamoot sa saindong mga kaiwal asin ipamibi idtong mga naglalamag saindo.” (Mateo 5:44) Kun balosan niato nin pangongolog an pangongolog, inaarog niato an espiritu kan parakasala. An sabi kan suanoy na talinhaga: “Dai ka magsabi: ‘Mabalos ako nin maraot!’ Maglaom ka ki Jehova, asin ililigtas ka nia.” (Talinhaga 20:22) Kanigoan kadonong na kaisipan! Mas marahay nanggad na ipaheling na kita an mga nanggana paagi sa paglaban sa sugot na arogon an mga parakasala.—Juan 16:33; Roma 12:17, 21.

Padusa—Niisay?

Siyempre, an ibang gibo mas magabat kisa personal na kasalan o pangongolog. Ano kun biktima kita nin krimen? Natural, sa paghona niato sa ngaran nin hustisya, maninigo na may gibohon. Alagad ano? Sa nagkapirang sosyedad bakong pambihira na personal na asikasohon an mga bagay asin bumalos. Alagad an siring na mga sosyedad sa parate nalalaglag nin mga iriwal nin magpapamilya. Ngonyan, an mga pagboot nin Dios asin sa kadaklan mga pagboot nin tawo parehong dai minatogot sa mga indibiduwal na personal na bumalos para sa mga krimen, asin ini may marahay na dahelan. An siring na personal na kadahasan daing ibang ibinubunga kundi orog na kadahasan.

Kun siring, an biktima daw nin krimen matukaw na sana asin daing girong na akoon an pagmaltrato? Dai man. Kun nalalapas kita o an satong rogaring, may mga autoridad na dapat dolokan. Tibaad boot nindong apodon an pulis. Sa trabaho, dumolok sa superbisor. Sa eskuwelahan, tibaad boot nindong makipag-olay sa prinsipal. Iyan an sarong dahelan na sinda yaon—tanganing suportaran an hustisya. Sinasabi sato kan Biblia na an mga autoridad kan gobyerno mga “ministro nin Dios, sarong parabalos na nagpapahayag nin kaanggotan sa naggigibo nin maraot.” (Roma 13:4) Hinahagad nin hustisya na gamiton kan gobyerno an autoridad kaiyan, papondohon an salang gibo, asin padusahan an mga nagkasala.

Totoo, kun beses atrasado an hustisya. An sarong nauuyam na sa kinaban na parasurat nagsabi: “An hustisya garo tren na haros perming huri.” An totoo, kun beses an tren nungka na minaabot. An mga paragibo nin inhustisya tibaad makapangyarihan na marhay na dai sinda kayang pamogolan kan mga autoridad. Pero, an madonong pa man giraray na gibohon pagpopogol sa sadiri. “An gabos niang espiritu an pinaluluwas nin sarong mangmang, alagad an madonong kinakalma iyan sagkod sa katapusan,” sabi kan Biblia.—Talinhaga 29:11.

Pagbalos—Niisay?

An pagpogol sa satong sadiri sa pagbalos matao sa sato nin mga pakinabang, asin kita makapaghahalat nin kalmado, sa pakaaram na kun kaipuhan na gibohon an hustisya, iyan gigibohon nin Dios sa igong panahon. Aram ni Jehova na an pagkakasala na dai napopogolan nagbubunga nin karatan. (Eclesiastes 8:11) Dai nia itotogot na an katawohan apihon sagkod lamang nin matagas nang mga maraot. Iyan an dahelan na hinatolan kita ni apostol Pablo: “Dai kamo magbalos, mga namomotan, kundi magtao nin lugar sa karatan; huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:19) Tunay nanggad, an Biblia nagtataram manongod sa aldaw nin pamalos kan Kaglalang. Ano daw an aldaw na ini nin pamalos? Asin siisay an tatamaan kan pamalos nin Dios? Pag-oolayan niato ini sa masunod na artikulo.

[Kahon sa pahina 4]

Tanganing mapogolan an mga saboot na bumalos, girumdomon na

□ an Dios nagmamakolog sa hustisya

□ nakararaot an pagkaigwa nin benggatibong kaisipan

□ an pagigin maboot parateng nakaiina sa mga problema sa iba

□ an dakol niatong kasalan liningawan

□ an mga nagkasala puwedeng magbakle

□ dinadaog niato an kinaban paagi sa paglaban sa mga gibo kaiyan