Patoodon Sinda Poon sa Pagkaomboy
IPINARIRISA nin modernong pagsiyasat na “an mga feto igwa nin pisyolohikong mga reaksion sa mga boses.” An mga parasiyasat sa Unibersidad nin North Carolina “nadiskobre na pakatapos na basahan nin mga ina an saindang mga aki mantang nasa matris pa, an mga bagong mamundag nagkakaigwa nin reaksion kun binabasa liwat an mga tataramon,” an sabi kan Winnipeg Free Press. Kun an mga babae nagbabasa nin makosog mantang bados, ini puede nanggad na makakontribwir sa pagtadom nin marahay na moral na mga pamantayan sa aki. An Biblia nagsasabi na si Timoteo ‘nakaaram kan banal na mga kasuratan poon sa pagkaomboy.’ (2 Timoteo 3:14, 15) Malinaw na nasabotan kan saiyang ina asin kan saiyang lola an halaga nin pagpatood sa saiya poon sa pagkaomboy, na posibleng marhay na kaiba an pagbasa nin makosog.
An pagbasa iyo “an pinakamapuersang abilidad sa buhay na yaon sa sato sa satong sosyedad ngonyan,” an sabi kan autor na si Jim Trelease. An mga abilidad sa lenguahe asin bokabularyo napaooswag paagi sa pagbasa nin makosog.
Madonong na ponan an pagbasa nin makosog kisuerra dai mahaloy na kamo pumoon na makipag-olay sa saindong omboy. Minsan ngani sa primero dai masasabotan kan saindong aking dai pa namumundag o bagong mamundag an sinasabi nindo, bawi an magigin halawig na mga pakinabang. An Talinhaga 22:6 nagsasabi: “Patoodon mo an aki oyon sa dalan para sa saiya; minsan kun sia maggurang dai sia masiko dian.”
Ano an puede nindong basahon na kapwa praktikal asin kapakipakinabang? Basahon nin makosog an Biblia sa saindong aki kada aldaw. Basahon man an iba pang kapakipakinabang na mga publikasyon, arog baga kan Paghinanyog sa Dakulang Paratokdo, My Book of Bible Stories, The Greatest Man Who Ever Lived, asin mga artikulo sa magasin na Torrengbantayan asin Awake!
Totoo, an paghihingoa nindo sa paaging ini may kalabot na panahon, alagad iyan panahon na ginamit sa marahay. Iyan sarong aktuwal na paagi na ipaheling na kamo nagmamakolog asin namomoot sa saindong aki.