Ibuuku lya Kubalilapo Ilya kwa Samwele
21 Pa numa Davidi afikile ku Nobu+ kuli Ahimeleke shimapepo. Ilyo Ahimeleke amwene Davidi atampile ukututuma, kabili amwipwishe ati: “Cinshi waishila weka?”+ 2 Davidi ayaswike Ahimeleke shimapepo ati: “Imfumu yantumine ukucita fimo, lelo yanjebele aiti, ‘Takuli uufwile ukwishiba ifyo nakweba ukuyacita e lyo ne fyo ulingile ukukonka pa kucita ifyo nakweba.’ Nimpangana na balumendo ukwa kukumanina. 3 Nomba nga namukwata imikate 5 nelyo conse ico mukwete, mpeeleni.” 4 Lelo shimapepo ayaswike Davidi ati: “Nshikwete umukate umbi kano fye umukate wa mushilo,+ cikulu fye abalumendo balitaluka ku banakashi.”*+ 5 Davidi ayaswike shimapepo ati: “Twalitaluka ku banakashi nga filya fine twabatalwike ilyo twaile ku nkondo.+ Nga ca kuti abalumendo balaisunga aba mushilo ilyo babomba umulimo uushili wa mushilo, ninshi lelo bafwile ukucilapo ukuba aba mushilo!” 6 E ico shimapepo amupeele umukate wa mushilo,+ pantu tapali umukate umbi kano fye umukate wa kutuula uo bafumishe pa cinso ca kwa Yehova pa kuti babikepo uupya pa bushiku bafumishepo uwa kale.
7 Nomba umo pa babomfi ba kwa Shauli ali kulya kwine, balimulindike pa cinso ca kwa Yehova. Ishina lyakwe ali ni Doege+ umwina Edomu,+ umukalamba wa bakacema ba kwa Shauli.
8 Lyena Davidi aipwishe Ahimeleke ati: “Bushe tamukweteko ifumo nelyo ulupanga? Nshasendele ulupanga lwandi nelyo ifyanso fyandi pantu umulimo imfumu yantumine ukubomba walipamfishe.” 9 Shimapepo amwaswike ati: “Nkwete fye ulupanga lwa kwa Galyati+ umuPelishiti uo waipaile mu Mupokapoka wa Ela.+ Lwalifungwa mu nsalu ku numa ya efode.+ Nga ulefwaya ukulusenda, lusende pantu e lulipo fye.” Davidi atile: “Takwaba ulwaba ngo lu. Mpeeleni.”
10 Bulya bwine bushiku Davidi alitwalilile ukufulumuka+ Shauli, kabili asukile afika na kuli Akishi imfumu ya Gati.+ 11 Ababomfi ba kwa Akishi bamwebele abati: “Bushe uyu te Davidi imfumu ya calo? Bushe te uyu baleimbapo uku ninshi balecinda, abati,
‘Shauli aipaya abalwani 1,000,
Davidi ena aipaya abalwani 10,000’?”+
12 Davidi alitontonkenye sana pali aya mashiwi, kabili alitiinine nga nshi+ Akishi imfumu ya Gati. 13 E ico ali-ifungushenye pa menso yabo kabili atampile ukucita kwati lishilu+ ilyo ali nabo.* Aleshilaula pa fiibi fya mpongolo kabili aleleka ululenda lulekonkolokela ku mwefu wakwe. 14 E lyo Akishi aebele ababomfi bakwe ati: “Namumona ukuti uyu muntu lishilu! Cinshi mwamuletela kuli ine? 15 Bushe amashilu nakwata nayacepa pa kuti mundetele ili ishilu na limbi? Bushe uyu e o ningengisha mu ng’anda yandi?”