Kalata wa Ntanshi uwa kwa Yohane
1 Twamulembela pali ulya uwaliko ku kutendeka,+ uo twaimwenene na menso yesu,+ uo twalolekeshe,+ kabili uo iminwe yesu yaikete,+ uwaletele amashiwi ayapeela umweo,+ ayo twayumfwilile.+ 2 (Cine cine, umweo walimoneke,+ kabili twaliumwene kabili ni fwe bakambone.+ Tulemushimikila pa mweo wa muyayaya+ uwafumine kuli Shifwe kabili uwamoneke kuli ifwe.) 3 Ifyo twamwene no kumfwa e fyo tulemwebako,+ e pa kuti imwe na ifwe tuleumfwana muli fimo fine,+ nga filya tumfwana+ na Shifwe no Mwana wakwe Yesu Kristu.+ 4 E ico tulelemba ifi fintu pa kuti ukusekelela kwesu kufikepo.+
5 Aya e mashiwi twaumfwile kuli ena kabili ayo tulebila kuli imwe,+ ukuti Lesa lubuuto,+ kabili muli ena tamwaba imfifi nakalya.+ 6 Nga twasosa atuti: “Tulomfwana nankwe,” lelo tule-enda mu mfifi,+ ninshi tulebepa kabili ninshi tatulesosa icine iyo.+ 7 Lelo, nga tule-enda mu lubuuto nga filya na o aba mu lubuuto,+ ninshi tulomfwana na banensu,+ no mulopa+ wa kwa Yesu Umwana wakwe ulatusangulula+ ku lubembu lonse.+
8 Nga twasosa atuti: “Tatuli na lubembu,”+ ninshi tuleibepa fye,+ kabili ninshi muli ifwe tamwaba ne cine. 9 Nga twasumina imembu shesu,+ apo ena wa cishinka kabili mulungami, kuti atwelela pa membu shesu no kutusangulula ku kukowela konse.+ 10 Nga twasosa atuti: “Tatwabembuka,” ninshi tuleti wa bufi, ninshi na mashiwi yakwe tamwaba muli ifwe.+
2 Mwe twana twandi, ndemulembela ifi fintu pa kuti mwibembuka.+ Lelo, ngo muntu abembuka, natukwata kaafwa,+ no yu ni Yesu Kristu umulungami, uwaba na Shifwe.+ 2 Kabili ena e lambo+ lya pa membu shesu ilitubwesesha+ kuli Lesa,+ kabili te shesu+ fye sheka lelo ne sha ba pano calo bonse.+ 3 Ne ca kwishibilako ukuti twalimwishiba ni ci ica kuti tulakonka amafunde yakwe.+ 4 Uutila: “Nalimwishiba,”+ lelo takonka amafunde yakwe,+ ninshi wa bufi, ne cine tamwaba muli ena.+ 5 Lelo onse uukonka amashiwi yakwe,+ ninshi ukutemwa Lesa kwaba muli ena umupwilapo.+ Kuli ici e ko twaishibila ukuti twaba muli ena.+ 6 Uutila aikalilila muli+ ena afwile ukuba ne mibele iyo na Yesu aali na yo.+
7 Mwe batemwikwa, ifunde ndemulembela te lipya, ni lilya line ilya kale+ ilyo mwakwata ukufuma ku kutendeka.+ Ili funde lya kale, e mashiwi ayo mwaumfwile. 8 Nomba namulembela ifunde ilipya, ilyo Yesu alekonka kabili ilyo na imwe mukonka, pantu imfifi+ ileya ilepwa, no lubuuto+ lwine lwine lulesanika.
9 Uutila aaba mu lubuuto lelo alipata+ munyina ninshi aaba mu mfifi na nomba line.+ 10 Uwatemwa munyina ekalilila mu lubuuto,+ kabili takwaba icingamulenga ukuipununa.+ 11 Lelo uwapata munyina aaba mu mfifi kabili enda mu mfifi,+ kabili teshiba uko alelola,+ pantu imfifi yalipofwisha amenso yakwe.
12 Ndelembela imwe mwe twana, pantu imembu shenu nashelelwa pa mulandu we shina lyakwe.+ 13 Ndelembela imwe mwe bashifwe, pantu mwalimwishiba uwafuma ku kutendeka.+ Ndelembela imwe mwe balumendo,+ pantu mwalicimfya umubifi.+ Nalembela imwe mwe bana banono,+ pantu mwalimwishiba Shifwe.+ 14 Nalembela mwe bashifwe,+ pantu mwalimwishiba uwafuma ku kutendeka.+ Nalembela imwe mwe balumendo, pantu mwalikosa,+ ne cebo ca kwa Lesa caikalilila muli imwe+ kabili mwalicimfya umubifi.+
15 Mwitemwa ici calo nelyo ifya muli ici calo.+ Ngo muntu atemwa icalo, ninshi tatemwa Shifwe;+ 16 pantu fyonse ifya muli ici calo+—ulunkumbwa lwa mubili+ no lunkumbwa lwa menso,+ no kuitakishisha pa fyo umuntu akwata+—tafyafuma kuli Shifwe, lelo fyafuma muli ici calo.+ 17 Na kuba, ici cine calo cileya pamo no lunkumbwa lwa ciko,+ lelo uucita ukufwaya+ kwa kwa Lesa akekalilila umuyayaya.+
18 Mwe twana, ino ni nshita ya kulekelesha,+ kabili, filya mwaumfwile ukuti mukaanya Kristu akesa,+ na nomba line e ko bali bamukaanya Kristu abengi;+ kuli ici cine e ko twaishibila ukuti ino e nshita ya kulekelesha. 19 Bafumine muli ifwe, lelo tabaali abena mwesu;+ pantu ababa abena mwesu, nga baikalilile pamo na ifwe.+ Lelo balifumine pa kuti cimoneke apabuuta ukuti te bonse abali abena mwesu.+ 20 Kabili imwe mwasubwa ku wa mushilo;+ imwe bonse mwalishiba icine.+ 21 Nshimulembele pa mulandu wa kuti tamwaishiba icine,+ lelo ni pa mulandu wa kuti mwalicishiba,+ kabili pa mulandu wa kuti takwaba ubufi ubufuma ku cine.+
22 Bushe uwa bufi te ukaana, ati, Yesu te Kristu?*+ Uyu e mukaanya Kristu,+ uukaana Wishi no Mwana.+ 23 Onse uukaana Umwana ninshi te mubomfi wa kwa Wishi.+ Uutetekela+ Umwana ninshi e mubomfi wa kwa Wishi.+ 24 Lelo imwe, lekeni ifyo mwaumfwile ukufuma ku kutendeka fiikalilile muli imwe.+ Ifyo mwaumfwile ukufuma ku kutendeka nga fyaikalilila muli imwe, na imwe bene mukekala mu+ Mwana na muli Wishi.+ 25 Kabili, ubu e bulayo ubo umwine atulaile, umweo wa muyayaya.+
26 Namulembela aya mashiwi pa mulandu wa balefwaya ukumulufya.+ 27 Lelo imwe, Lesa amusubile+ no mupashi wakwe uwaikalilila muli imwe, kabili tamukabila uwa kulamusambilisha;+ lelo ukusuba uko Lesa amusubile kwa cine,+ te kwa bufi, kabili kulemusambilisha fyonse.+ Filya fine kwamusambilisha, e fyo mwikalilile muli+ ena. 28 E ico nomba, mwe twana,+ ikalilileni muli+ ena, ukuti ilyo akamoneka+ tukabe no buntungwa bwa kulanda+ kabili twikalengwa insoni no kufuma pali ena pa nshita ya kubapo kwakwe.+ 29 Nga mwalishiba ukuti alilungama,+ ninshi mwalishiba no kuti onse uucita ubulungami afyalwa kuli ena.+
3 Moneni ukutemwa+ uko Shifwe atutemwa! Alitutemwa nga nshi, icalenga no kuti tuleitwa ati abana ba kwa Lesa;+ kabili ca cine e fyo twaba. E mulandu wine aba pano calo+ bashatwishibila, pantu na o wine tabamwishiba.+ 2 Mwe batemwikwa, pali nomba tuli bana ba kwa Lesa,+ lelo tucili tatulaishiba ifyo tukaba.+ Ico twishibe ca kuti ilyo akamoneka+ tukaba nga ena,+ pantu tukamumona ifyo aba.+ 3 Na onse uusubila ena alaisangulula+ ifyo ena aba uwasanguluka.+
4 Onse uubembuka+ ninshi alapula na mu mafunde,+ pantu ulubembu+ ni bumpulamafunde. 5 Mwalishiba no kuti ico Yesu aishiile kusenda imembu shesu,+ kabili tamwaba ulubembu+ muli ena. 6 Onse uwaikalilila muli+ ena tacita ulubembu;+ onse uucita ulubembu ninshi tatala amumona nelyo ukumwishiba.+ 7 Mwe twana, mwileka umuntu amulufye; uucita ifyalungama ninshi alilungama, ifyo na ulya aba uwalungama.+ 8 Uucita ulubembu wa kwa Satana Kaseebanya, pantu ukufuma fye ku kutendeka, Satana Kaseebanya alabembuka.+ Ni pali uyu mulandu Umwana wa kwa Lesa amonekele,+ pa kuti onaule imilimo ya kwa Satana Kaseebanya.+
9 Onse uwafyalwa kuli Lesa tacita ulubembu,+ pantu ulubuto lwa mweo ulwa kwa Lesa lwaikalilila mu waba ifi, kabili te kuti acite ulubembu, pantu afyalwa kuli Lesa.+ 10 Abana ba kwa Lesa na bana ba kwa Satana Kaseebanya beshibikilwa kuli ici cine ica kuti: Onse uushicita ubulungami+ ninshi te wa kwa Lesa, nangu ni ulya uushatemwa munyina.+ 11 Pantu ubu e bukombe mwaumfwile ukufuma ku kutendeka,+ ubwa kuti tuletemwana;+ 12 twiba nga Kaini, uwali wa mubifi kabili aipeye+ munyina. Nga kanshi cinshi amwipaile? Pantu imilimo yakwe yali iyabipa,+ lelo iya kwa munyina yali iyalungama.+
13 Mwe bamunyinane, mwipapa, ukuti aba muli ici calo balimupata.+ 14 Twalishiba ukuti twalifwile lelo nomba tuli aba mweo,+ pantu twalitemwa bamunyinefwe.+ Uushatemwa munyina aikalilila mu mfwa.+ 15 Onse uwapata+ munyina ni kepaya,+ kabili mwalishiba ukuti kepaya+ takwata umweo wa muyayaya.+ 16 Icalenga ukuti twishibe ukutemwa+ ni cilya cacitile Kristu ica kutufwila;+ na ifwe tulingile ukufwila bamunyinefwe.+ 17 Lelo onse uukwete ifikabilwa mu mikalile+ ya pano calo, nga amona munyina nabulisha,+ lelo akaana ukumulanga inkumbu,+ bushe ninshi ukutemwa Lesa kwaikala shani muli uyu muntu?+ 18 Mwe twana, twitemwa+ fye ku mashiwi nangu ku lulimi,+ lelo tutemwane mu milimo+ na mu cine.+
19 Ni kuli ici e ko tukeshibila ukuti tuli ba mu cine,+ kabili tukashinina imitima yesu ku cinso cakwe 20 muli fyonse ifyo imitima yesu ingatuseka,+ pantu Lesa alicila imitima yesu kabili alishiba fyonse.+ 21 Mwe batemwikwa, imitima yesu nga taituseka, ninshi kuti twalanda na Lesa ukwabula umwenso;+ 22 kabili conse ico twalomba kuli ena tulapokelela,+ pantu tulakonka amafunde yakwe kabili tulacita ne fyo atemwa.+ 23 Ca cine, ifunde lyakwe lya kuti, tutetekele ishina lya Mwana wakwe Yesu Kristu+ no kuti tutemwane,+ ifyo atwebele. 24 Kabili uukonka amafunde yakwe aikalilila muli ena, na o ekala mu waba ifi;+ kabili ico twishibilako ukuti aikalilila muli ifwe+ ni co alitupeela umupashi+ wakwe.
4 Mwe batemwikwa, mwilasumina amashiwi yonse ayamoneka kwati yafuma kuli Lesa,+ lelo muletala mwaesha ayo mashiwi ukumona nga yafuma kuli Lesa,+ pantu bakasesema ba bufi abengi nabafumina muli ici calo.+
2 Ica kwishibilako amashiwi ayafuma kuli Lesa+ ni ci: Amashiwi yonse ayatila Yesu Kristu alishile pano calo no kuba umuntunse e yafuma kuli Lesa,+ 3 lelo amashiwi yonse ayatila Yesu taishile pano calo no kuba umuntunse tayafuma kuli Lesa.+ Kabili, aya e mashiwi ya kwa mukaanya Kristu ayo mwaumfwile ukuti yakesa,+ na nomba e mo yali muli ici calo.+
4 Mwe twana, imwe muli ba kwa Lesa, kabili mwalicimfya abo bantu,+ pantu uuli kuli+ imwe mukalamba+ ukucila uuli ku ba muli ici calo.+ 5 Bena ba muli ici calo;+ e co balandila ne fifuma ku ba muli ici calo, na ba muli ici calo balabomfwa.+ 6 Ifwe tuli ba kwa Lesa.+ Uwaishiba Lesa alatumfwa;+ uushili wa kwa Lesa tatumfwa.+ Ni kuli ici e ko twishibila amashiwi ya cine ayafuma kuli Lesa, na mashiwi ya bufi ayashafuma kuli Lesa.+
7 Mwe batemwikwa, natuletemwana,+ pantu ukutemwa+ kwafuma kuli Lesa, na onse uwakwata ukutemwa ninshi afyalwa kuli Lesa+ kabili ninshi alishiba Lesa.+ 8 Uushakwata ukutemwa taishiba Lesa, pantu Lesa kutemwa.+ 9 Kuli ici e ko ukutemwa kwa kwa Lesa kwamonekele muli ifwe,+ pantu Lesa atumine Umwana+ wakwe uwafyalwa eka ukwisa muli ici calo ukuti tukwatile umweo muli ena.+ 10 Uku e kutemwa, te mu kuti ni fwe twatemenwe Lesa, lelo ni mu kuti ena e watutemenwe no kutuma Umwana wakwe ku kuba ilambo+ lya kufuta+ pa membu shesu.+
11 Mwe batemwikwa, nga ifi e fyo Lesa atutemenwe, kanshi na ifwe tufwile ukutemwana.+ 12 Takwaba nangu umo uwamonapo Lesa.+ Nga tuletemwana, Lesa akekalilila muli ifwe na o akatutemwa sana.+ 13 Kuli ici e ko twishibila ukuti twaikalilila muli ena,+ na o muli ifwe,+ pantu alitupeela umupashi wakwe.+ 14 Kabili, na ifwe bene twalimona+ kabili tuli nte+ ukuti Wishi alitumine Umwana wakwe ku kuba Umupusushi wa ba muli ici calo.+ 15 Onse uusumina ukuti Yesu Kristu Mwana wa kwa Lesa,+ Lesa alekalilila muli uyu muntu, na o ekalilila muli Lesa.+ 16 Na ifwe bene twalishiba kabili twalisumina ukutemwa+ uko Lesa atutemwa.
Lesa kutemwa,+ kabili uwaikalilila mu kutemwa+ ekalilila muli Lesa, na Lesa ekalilila muli+ ena. 17 Ifi e fyo atutemwa icine cine, pa kuti tube no buntungwa bwa kulanda+ mu bushiku bwa bupingushi,+ pantu, ifyo aba, e fyo na ifwe twaba pano calo.+ 18 Mu kutemwa tamwaba umwenso,+ lelo ukutemwa kwapwililika kupoosa umwenso ku nse,+ pantu umwenso ulacilikila. Cine cine, uuli no mwenso taba uwapwililika mu kutemwa.+ 19 Lelo ifwe, tulatemwa, pantu Lesa e wabalilepo ukututemwa.+
20 Ngo muntu asosa ati: “Nalitemwa Lesa,” lelo alipata munyina, ninshi wa bufi.+ Pantu uushatemwa munyina,+ uo amona, te kuti atemwe Lesa, uo ashamona.+ 21 Kabili ili e funde twakwata ukufuma kuli ena,+ ukuti uwatemwa Lesa alingile ukutemwa na munyina.+
5 Onse uutetekela ukuti Yesu e Kristu ninshi mwana wa kwa Lesa,+ na onse uwatemwa wishi ninshi alitemwa no mwana wakwe.+ 2 Ni kuli ici twishibila ukuti twalitemwa+ abana ba kwa Lesa,+ ilyo tuletemwa Lesa no kukonka amafunde yakwe.+ 3 Pantu uku e kutemwa+ Lesa, ukuti tulekonka amafunde yakwe;+ kabili amafunde yakwe taya-afya,+ 4 pantu umwana+ wa kwa Lesa onse alacimfya icalo.+ Ku citetekelo cesu natucimfya icalo.+
5 Uwingacimfya+ icalo+ nani? Ni uyo uwatetekela+ ukuti Yesu Mwana wa kwa Lesa.+ 6 Uyu Yesu Kristu e waishiile mu menshi no mulopa; te mu menshi+ fye yeka, lelo mu menshi no mulopa.+ Kabili umupashi+ e nte, pantu umupashi e cine. 7 Pantu kuli inte shitatu, 8 umupashi+ na menshi+ no mulopa,+ ne fi fitatu filasuminishanya.+
9 Nga tulasumina ubunte bwa bantu,+ ubunte bwa kwa Lesa bwena bwalicilapo, pantu ubu e bunte bwa kwa Lesa, ubunte+ ubo apeela pa Mwana wakwe. 10 Umuntu uutetekela Umwana wa kwa Lesa alikwata ubunte+ mu mutima wakwe. Umuntu uushitetekela Lesa ninshi aleti wa bufi,+ pantu tatetekela ubunte+ ubo Lesa alanda+ pa Mwana wakwe. 11 Kabili ubu e bunte bwa kuti Lesa alitupeele umweo wa muyayaya,+ no yu mweo uli mu Mwana wakwe.+ 12 Uukwete Umwana ninshi nakwata no mweo; uushikwete Umwana wa kwa Lesa ninshi takwete no mweo.+
13 Namulembela ifi fintu pa kuti mwishibe ukuti muli no mweo wa muyayaya,+ imwe mwe batetekela ishina lya Mwana wa kwa Lesa.+ 14 Kabili uku e kucetekela uko twamucetekela,+ ukuti conse ico twalomba, cikulu fye nacilingana no kufwaya kwakwe, alatumfwa.+ 15 Kabili nga ca kuti twalishiba ukuti alatumfwa pali conse ico twalomba,+ tuleshiba no kuti twalakwata ifyo twalomba pantu ni kuli ena e ko twalomba.+
16 Ngo muntu amona munyina alebembuka ulubembu ulushileta imfwa,+ akamupepeleko, na o Lesa akapeela umweo kuli ena,+ e kutila, ku balebembuka ulubembu ulushileta imfwa.+ Kuli ulubembu ululeta imfwa. Nshilemweba ukuti amupepele pali ulo lubembu.+ 17 Ukucita icabipa conse lubembu;+ lelo kuli ulubembu ulushileta imfwa.
18 Twalishiba ukuti onse uwafyalwa kuli Lesa+ tacita ulubembu, lelo Uwafyalwa+ kuli Lesa* alamulinda, no mubifi tamwikata iyo.+ 19 Twalishiba ukuti tuli ba kwa Lesa,+ lelo icalo conse calaala mu maka ya mubifi.+ 20 Lelo twalishiba ukuti Umwana wa kwa Lesa alisa,+ kabili alitupa amano+ pa kuti twishibe uwa cine.+ Twalyampana+ no wa cine, ukupitila mu Mwana wakwe Yesu Kristu. Uyu e Lesa wa cine+ kabili e mweo wa muyayaya.+ 21 Mwe twana, muletaluka ku tulubi.+
Ishiwi lya kuti “Kristu” mu malembo ya ciGriki nga lyabomfiwa kuli Yesu lipilibula ukuti “Uwasubwa, nelyo Mesia,” te shina lyakwe iyo.
“Uwafyalwa kuli Lesa,” e kutila, Yesu Kristu Umwana wa kwa Lesa, uulandilwepo mu cikomo 1.