Ica Kukumanya ca Kulengo Kumanama ica kwa Maggy ne Paalo Lyandi
Cibili, May 2, 1995, bwali e bushiku umwana wandi umwanakashi afyelwe kabili e bushiku umukashi wandi afwile. Ku ca bulanda, Maggy tabalile amonapo umwana wakwe. Nomba isubilo lyandi lya kwisalanga Tamara banyina lintu bakabuushiwa.
PA NUMA ya myaka 16 iya kuba mu cupo, umukashi wandi, Maggy, aebelwe kuli dokota wakwe ukuti alikwete kansa wa ku mabele no kuti aali no kwikala fye imyeshi inono. Ico cali imyaka isano iyapitapo. Ku ca kutootela, Maggy alikele fye bwino muli yo myaka ya kulekelesha iya bumi bwakwe. Cali fye ni ku mpela e lintu ubukali bwacishishemo.
Pa mulandu wa kuti kansa yalicililemo, badokota basosele ifyo takwaliko ishuko line line ilya kuti Maggy kuti akwata ifumo. E co kuti mwaelenganya fintu twapeshiwe amano lintu pa nshita ya kupimwa kwa lyonse ukwa kumona apapelele bamumena ba kansa, bamwene akanya mwi fumo lya kwa Maggy! Cali mwana mwanakashi. Maggy aali ne fumo lya myeshi ine na hafu. Aali uwa buseko pa cilolelo ca kuba nacifyashi pa muku wa kubalilapo.
Maggy acitile apo engapesha ku kushininkisha ukuti umwana akafyalwe umutuntulu. Aleceeceeta ifyo alelya, kabili nangu fye ni mu milungu ya kulekelesha ibili iya bumi bwakwe, lintu ubukali bwacishishemo, alenwa fye umuti wa kushinshibalika ubukali lyeka fye lintu alefilwa ukushipikisha.
Ukupaalwa no Mwana Umutuntulu
Pa Cibelushi, April 29, Maggy aumfwile umutima ukukulunkunta nga nshi asukile asoso kuti: “Ndemona kwati nalafwa.” Naikele nankwe impela ya mulungu yonse. Pa numa ya kwishibisha dokota pali Cimo, ilyo line fye namutwele ku cipatala mu Montreal, Canada, mupepi fye na ku mwesu mu St. Jérôme.
Mupepi na 5:30 hrs ulucelo lwakonkelepo, nasi umo apitile mupepi na ku mwinshi wa muputule walimo Maggy no kumono kuti aali mu kumanama. Cilemoneka kwati, aali no lupumo lwa ku mutima. Bwangu bwangu baitile dokota uwali mu muputule wakonkelepo. Nangu cingati Maggy alifwile, badokota balipuswishe umwana wesu. Tamara afyelwe ilyo kwali kucili imyeshi ibili na hafu pa kuti inshita ikumane kabili afinine fye kilogramu umo na bagramu 100.
Apantu umulopa wa kwa Tamara walicepele nga nshi, badokota balefwaya ukumubikamo umulopa. Nangu cibe fyo, bakoseleshiwe ukubomfya erythropoietin uwa fya menshi menshi ifyatumbinkanishiwa mu cifulo ca kubomfya umulopa. E fyo bacitile, kabili lintu batungulwike mu kufusha umulopa wa kwa Tamara ukupitila mu kubomfya ifi ifya kutumbinkanya, nasi atile: “Mulandu nshi bashibomfesha ifi ku bana bonse?”
Tamara alikwete amafya yambi ayalundana na bana bafyalwa abashakosa, lelo yonse yalibombelwepo. Na kuba, lintu Dokota Watters, uwasambilila ifya mishipa, amupimine pa numa, aebele nasi ukuti: “Ndemona kwati ulya mwana mumpeele ukupima ni umbi; kuli ine ali fye bwino.”
Ukulolenkana ne Mfwa na pa Numa Ukubomba na Yene
Ukumona Maggy uko alefwa cali cintu cakosa kuli ine. Nayumfwile uwapelelwa nga nshi. Cali cintu cakosa ukulanda pa mfwa ya kwa Maggy. Lelo, nalelandapo lintu bamunyinane ba Bwina Kristu na bankashi baleisa ku cipatala. Panono panono ubukali bwalecepa pa mulandu wa kulandaukapo. Ilili lyonse lintu nabelenga icipande ca mu Ulupungu lwa kwa Kalinda nelyo Loleni! ico cilenyambukila nga nshi, ndacibika pa mbali mu ciputulwa candi icinono ica fitabo no kucifumya ku kucibelenga ilyo ndecikabila.
Ukusonsomba na kumbi kwali kubwelela ku ŋanda ukwabula umuntu. Ukutalalilwa kwalyafya ukubomba na ko. Uku kuyumfwa kucili kulabweluluka, nangu cingati ndamwenamo muli bucibusa bwa kukuulilila ubwa Bwina Kristu. Ine na Maggy twalecitila ifintu fyonse capamo, kabili twalelanda pa lwa bwafya nali no kukwata ubwa kutalalilwa. Aalefwaya ukuti nkoope umbi pa numa ya mfwa yakwe. Lelo, ifintu tafyayanguka nge fyo.
Ukutungililwa na Bena Kristu Banandi
Nshishibe ifyo nali no kucita akukanaba ukutungilila kwa Hospital Liaison Committee (HLC) (Komiti wa Kumfwaninamo ne Fipatala) uwa Nte sha kwa Yehova. Ulucelo luntu Maggy afwilepo, Nte wacenjelesha mu fya cipatala uwa mu HLC e po aali pa cipatala no kumpayanishisha ukwaafwa uko nalekabila.
Bakabomba ba mu cipatala balipeshiwe amano pa kwaafwa uko icilonganino cesu ica Bwina Kristu mu St. Jérôme pamo pene ne filonganino fimbi muli ilya ncende bangafwile. Icungulo bushiku lintu imfwa ya kwa Maggy yabilishiwe pa kulongana kwesu ukwa Bwina Kristu, ifibusa fyatemwikwa ukucila pali 20 balyankwileko pa kutendeka ukungafwa. Mu cine cine ukutungilila kwalipulilemo.
Ifibusa e balenjipikila ifya kulya; fuliji wandi aiswilemo ifintu pa myeshi iingi. Ulupwa lwandi na bamunyina ba Bwina Kristu ne nkashi basakamene no kufwaya ifya kufwala fya mwana wandi umwanakashi. Bandetele ifintu ifingi nga nshi ica kuti nshakwete icifulo cakumanina ukwa kufisungila.
Ubuseko Pali Nomba na pa Filolelo fya ku Ntanshi
Tamara alangafwa ukulaba ku fyo nalufya. Umutima wandi walimutemwisha umupwilapo. Cila bushiku lintu ndemuposha mu nsansa nati “mwashibukeni,” alamwentula apakalamba, atampa “ukulanda,” no kupepesha amaboko yakwe na molu, ninshi natemwa.
Apo nalishibako ifinono pa lwa maplaneti, ndolela mu buseko lintu nkabika Tamara pa ceni candi no kumweba ukulolesha muli telescope no kumona ifipapwa fya mu muulu ifya kwa Kalenga wesu Uwakulisha, Yehova. Ukutontonkanya pa bumi bwabule mpela muli Paradise pe sonde kwaba ni ntulo ya cisansamushi nga nshi. Kabili ukwishiba ukuti ici e cilolelo ca kwa Tamara cilampeela ubuseko bwalundwako.—Ilumbo 37:9-11, 29.
Ukupituluka mu fya kuponako fya mu myaka isano iyapitapo, kuti nafilondolola bwino ukuti fya bulanda kabili fya buseko. Ninsambilila ifingi pa lwa ne mwine na pa lwa bumi bwine. Mu kuswatuka ndolela inshita ya ku ntanshi lintu, nga fintu Baibolo ilondolola, “imfwa tayakabeko kabili iyo; takwakabe kabili ukuloosha nangu kukuuta nangu kucululuka.”—Ukusokolola 21:3, 4.
Lyene, pa kubuuka, Maggy akaba na maka ya kufishapo kwishe cefu ukwabula ukumfwa ubukali. Pali fyonse, isubilo lyandi ilyashangila no kufwaisha fyaba kwisasangwako no kulangisha Tamara kuli Maggy, pa kuti engamona umukashana munono uo abombele ifyafula.—Nga fintu cashimikwa na Lorne Wilkins.
[Icikope pe bula 14]
No mukashi wandi
[Icikope pe bula 14]
Umwana wesu umwanakashi, Tamara