“Nimbake Citetekelo”

NGA FINTU CASHIMIKWA KU FIBUSA FYA KWA BRUNELLA INCONDITI

“UBUSHIKU bwa pa Cibelushi bwali ubwalepa kabili ubwa mutalalila. Nali fye neka mu muputule, ukuyumfwa uwapelelwa. Nalefwaya ukwendaukako mu lukungu. Fyonse fyaleenda fye bwino, kabili mu kupumikisha, umuntu umo apamine ciibi pa menso yandi, kabili takwali ukwa kufumina, te mulandu no kwesha naeseshe.”

Ukufulunganishiwa kwacishamo kwali ukwafinisha pa mutima wa kwa Brunella Inconditi wa myaka ya bukulu 15. Ubushiku bwacilapo ukukatama mu bumi bwakwe ubwacaice bwalepita. Mu kubangilila ulya mwaka ukutemwa kwakwe ukwalekula ukwa kuli Yehova na Baibolo kwalimuseseshe ukupeela ubumi bwakwe kuli wene. Mu July 1990 ali no kubatishiwa pe Bungano lya Citungu ilya Nte sha kwa Yehova ilya “Ululimi Lwine Lwine” mu Montreal, Canada. Mu cifulo ca ico, Brunella ali no kulolenkana no bwesho bwa citetekelo cakwe ubo bwali no kusenda inshita yasheleko iya bumi bwakwe.

Inshiku shibili pa ntanshi aleenekela ukulangisha ukuipeela kwakwe ukupitila mu lubatisho lwa mu menshi, Brunella aishileishiba ukuti alikwete kansa wa mu mulopa. Badokota pa cipatala ca bana ica mu bwikashi balefwaya ukutendeka ukundapa ilyo line, e co Brunella atwalilile ukuba mu cipatala.

Amashiwi Yakwe Yakumbamo Badokota

Brunella alishibe ukuti umulopa walishila kuli Yehova Lesa. (Ubwina Lebi 17:11) Abafyashi bakwe, Edmondo na Nicoletta, balisuminishenye ukuti takuli ukukuushishamo kwa mulopa ukwali no kubomfiwa mu kundapwa kwa mwana wabo. “Brunella alefwaya badokota ukumfwa na kuli wene, nelyo ca kuti ali mwana umunono,” e fibukisha wishi. “Mu kushangila abebele ukuti talefwaya ukundapa uko kwali no kutoba ikambisho lya Baibolo ilya ‘kutalukako ku mulopa.’”—Imilimo 15:20.

Pa July 10, 1990, badokota batatu no mubomfi wa fya kwangalila capamo bakumene na bafyashi ba kwa Brunella na batumikishi babili ukufuma mu cilonganino ca cikaya ica Nte sha kwa Yehova. Ukuceeceeta kwashininkishe ukuti Brunella alikwete kansa wa mu mulopa uwa lymphoblastic uwatapata. Badokota balondolwele amapange yabo aya kulwisha ubu bulwele. Mu kucenjela balondolwele ukuti bwali ubwakosa nga nshi ukundapa. “Ukuisunga kwa kwa Brunella no mupampamina wakwe uwa kumfwila Lesa fyalyambukile badokota no mubomfi wa fya kwangalila capamo. Bali abaebekeshiwa ku kutemwa kwa bafyashi bakwe no kutungilila kwa fibusa ukufuma ku cilonganino ca Bwina Kristu. Na kabili balitashishe inshila twaumfwikishe no kucindika icifulo cabo.” E fibukisha umo uwa baeluda ba mu cilonganino.

Badokota bapangile ukusengauka ukukuushishamo kwa mulopa. Brunella ali no kupokelela ukundapa kwa fya kutumbinkanya ukukalamba, lelo takwali no kuba ukwakakala nga lyonse. Ici cali no kucefyako ukonaula ku nsandesande shakwe isha mulopa isho ukundapa kuletako. “Badokota balangulukileko ukukabila kwa ku mubili, ukwa mu nkuntu, no kwa ku mupashi ukwa kwa Brunella,” e filondolola Nicoletta. “Lintu twabepwishe ukutununuka uwaishibisha uwabelesha ukubomba na kansa wa mu mulopa uwa ku bwaice ukwabula ukubomfya umulopa, balisumine.” Brunella na bakabomba ba mu cipatala bapangile icikakilo ca citemwishi ica cikabilila.

Amabuyo ya ku Mupashi

Nangu ca kuti ukundapa kwa kutendekelako kwaleteleko ifya kufumamo fisuma, kwali fye e kutendeka kwa ca kukumanya ca kutiinya ica kwa Brunella. Ukufika mu November 1990 ubulwele bwakwe bwaliko eyefilya, e co ukwabula ukushingashinga alibatishiwe. Ukubelebesha pa myeshi yafumineko inono, Brunella asumine ukuti: “Tacali icayanguka nangu panono. Cikabila ubukose ubwingi, kabili cikabila ukutontonkanya kwashininkishiwa. . . . Icitetekelo candi cabikilwe ku bwesho, lelo natwalilile uwakosa, kabili ncili ndepanga ukukwata incito nga painiya wa nshita yonse [umutumikishi wa nshita yonse].”

Mu kubangilila kwa 1991, Brunella aculile ukulwala na kabili. Apene afwe ilintu aleundapwa ku fya kutumbinkanya, lelo icapapwishe bonse no kubalengo buseko, alipuupuutwike. Ukufika mu August aliko bwino ica kuti aali no kupoosa umweshi mu butumikishi bwa pa cintubwingi pamo nga painiya wa kwafwilisha. Ubulwele bwakwe bwalibipileko na kabili, kabili ukufika mu November 1991 umubili wakwe walipuminwe mu mbali ishingi kuli kansa. Ibumba na limbi ilya badokota pa cipatala cimbi lyatendeke ukumundapa mu kuba no kundapa kwa myengelele.

Nelyo fye pe samba lya mibele yayafya iya musango yo, Brunella atwalilile uushitelententa kabili aimikile umwine amabuyo ya ku mupashi. Lintu aishibe intanshi pa lwa kansa wa mu mulopa, aebelwe ukuti napamo akekala fye imyeshi mutanda. Nomba, mupepi no mwaka umo na citika, Brunella aali acili alecita amapange ya nshita ya ku ntanshi. “Tapoosele nshita mu kubomba ukulola ku mabuyo yakwe,” e fyalandilepo eluda wa mu cilonganino umo. “Icitetekelo ca kwa Brunella muli Paradise wa kwa Lesa uwalaiwa calimutungilile ukupulinkana ica kukumanya cakwe ica kutiinya conse. Akulile ku kukosoka kwa Bwina Kristu nangula ca kuti ali umwaice mu myaka. Ukuisunga kwakwe ne mibele ya mutima fyapuutilemo icilonganino kabili calengele abengi abo aishibe ukumutemwa, ukusanshako bakabomba ba mu cipatala.” Nyina ebukisha ukuti: “Tatalile ailishanya. Lintu umo amwipwishe ifyo aleumfwako, ali no kwasuka ati, ‘Bwino’ nelyo, ‘Eyefilyako, katwishi imwe?’”

Inshita ya ku Ntanshi Iyacingililwa

Brunella apangile ukusangwa kwi Bungano lya Citungu ilya “Bakasenda ba Lubuuto” ilya Nte sha kwa Yehova mu July 1992. Pa nshita ye bungano, nangu cibe fyo, Brunella aliteekelwe mu cipatala, kabili ubumi bwakwe bwalefumapo panono panono. Nangu ni fyo, alisangilwe kwi bungano mu cipuna ca mipeto, uwapampamina pa kumona icilangililo Ukucite Calungama mu Menso ya kwa Yehova.

Alibwelele ku ŋanda ku lupwa lwakwe ku kupoosa inshiku shinono ishasheleko isha bumi bwakwe. “Ukufika na ku mpela, ali uwayangwako apakalamba pa lwa bambi ukucila pa lwa mwine,” e fisosa Nicoletta. “Alebakoselesha ukusambilila Baibolo, ukubeba ukuti, ‘Tukaba bonse mu Paradise.’”

Brunella afwile pa July 27, 1992, uwakosa mwi subilo lyakwe ilya kubuushiwa ku bumi muli Paradise pe sonde. E lintu fye atendeke ukusupila amabuyo yakwe, lelo apangile ukutwalilila mu nshila yakwe iya kuipeela pa numa ya kubuushiwa kwakwe. Inshiku fye shinono pa ntanshi ya mfwa yakwe, Brunella alembele kalata wakonkapo, uwabelengelwe pa cililo cakwe.

“Ku Fibusa Fyatemwikwa:

“Namutasha pa kwisa. Ukusangwako kwenu kuleafwa ulupwa lwandi apakalamba.

“Kuli abo abapalamishe kuli ine—natupita mu fintu ifingi. Twalikwete inshita shabipa ishingi, lelo kwaliko no tushita twa kusekesha. Bwali bulwi ubwakosa kabili ubwalepa, lelo nshileyumfwa ukuti ninfilwa. Nga fintu cisoswa mu Malembo, ‘Nimpilikito kupilikita kusuma; nimpwisho lubilo; nimbake citetekelo.’—2 Timote 4:7.

“Na kabili ninsambilile fingi, kabili nalikulileko apakalamba, kabili ifibusa fyandi na abo abali na ine na bo balimwene ukwaluka. Ndefwaya ukutasha abo bonse abantungilile.

“Kuli imwe mwe bacetekela mu micitile ipya na muli Yehova mwalishiba ukuti kukabako ukubuuka, nga fintu fye Yohane 5:28, 29 asosa. E co beni abakosa mu cine, kabili tukaba na maka ya kumonana na kabili.

“Ndefwaya ukutasha abo abaishiba ico napitamo. Nakumbatila umo umo uwa imwe no kumufyompa. Nalimutemwa bonse.”

Brunella talekele ubwaice bwakwe nelyo ubulwele bwakwe ukulaalikisha ukuipeela kwakwe kuli Lesa. Ica kumwenako cakwe ica citetekelo no mupampamina fikoselesha abacaice pamo pene na bakalamba ukufuula icili conse icingabacilikila ukufuma ku kubutuka nakatango wa bumi.—AbaHebere 12:1.