Ubulanda bwa Kulekako Abana Abakalamba

“Umulume wandi alinsokele pa bushiku ibeli lyesu lyafyelwe—atile ‘We mutemwikwa, ukukusha abana, mulimo ushaikulila uwa kubalekako nga baba abakalamba.’”—Ourselves and Our Children—A Book by and for Parents.

ABAFYASHI abengi balakwate nsansa—nangu fye ukucincimushiwa—lintu ibeli lyabo lyafyalwa. Te mulandu na fyonse ifya kupumfyanya, ukufulwisha, ukukalipa, ukukalifya, no kusakamika ifyo ukusunga abana kuletako, abana kuti baba ni ntulo ya kusekelela kukalamba. Mupepi ne myaka 3,000 iyapitapo, Baibolo yabilishe ukuti: “Abana bupe ubufuma kuli SHIKULU; lipaalo ilya cine cine.”—Ilumbo 127:3, Today’s English Version.

Nangu ni fyo, Baibolo na kabili isobela mu kushilimuna ukuti: “Umwaume [akaleka] wishi na nyina.” (Ukutendeka 2:24) Ni pa milandu yalekanalekana abana bakalamba ilingi line bafumina pa ng’anda—ukufwaya amasomo atemwa incito, ukulundulula ubutumikishi bwabo ubwa Bwina Kristu, nelyo ukuupwa. Lelo ici nga cacitika, abafyashi bamo ukwabulo kutwishika balakalipwa sana. Balaleka ukulwisha kwa cifyalilwa ukwa bana babo ukwa kuikalila ukubalenga—nga fintu kalemba umo alanda—“ukuyumfwa abasaalulwa, abakalifiwa, abalengwe nsoni, abatiinishiwa nelyo abakankambwa.” Ici ilingi line ciletako ukukangana no kutintana ukwa mutatakuya mu lupwa. Pa kukanasumina ukuti bushiku bumo abana babo bakafuma pa ng’anda, abafyashi bamo balafilwa ukubapangasha ukuti bakeseimwena mu bukalamba. Ifingafumamo mu mulekelesha wa musango yo fintu fyabipisha: mufuma abakalamba abashafundwa bwino ukusunge ng’anda, ukusakamana ulupwa, atemwa nangu fye ukusanga no kusunga incito.

Ubulanda bwa kupaatukana kuti pambi bwacilanapo mu ndupwa sha bafyashi abashimbe. Umufyashi umushimbe uwitwa Karen asoso kuti: “Ine no mwana wandi umwanakashi twalipalamana; twalundulwile icikakilo ica cine cine ica bucibusa. Nalemusenda konse fye uko naleya.” Ukwampana kwapalamisha pa kati ka bafyashi na bana kwaliseeka mu mayanda ya bafyashi abashimbe. Mu kumfwika, ukulufya ukupalamana kwa musango yo kuti pambi kwaletako ubulanda.

Nangu cibe fyo, icitabo Traits of a Healthy Family (Imibele ya Lupwa Ulutuntulu) pa kucinkulako abafyashi citila: “Icakulapo fye mu bumi bwa lupwa: kukusha akanya akashingaisunga ukwisaba umukalamba uwingaisunga.” Lyene cisoka ukuti: “Amafya ayengi mu ndupwa yesako nga ca kuti abafyashi bafilwa ukulekako abana abakalamba.”

Ni shani pa lwa imwe? Bushe muli bafyashi? Nga ni fyo, bushe mwalipekanishisha ubushiku lintu mukalekako abana benu nga bakula? Kabili ni shani pa lwa bana benu? Bushe mulabapangasha ukuti bakeseikalila bwino bwino?