Bakalemba ba Lyashi Aba ku Russia Batasha Inte sha kwa Yehova
IFIKUULWA fya maofesi ya Nte sha kwa Yehova mu Russia fyapeelwe pa June 21, 1997. Ici cifulo cakwata amayanda 7 aya kwikalamo, Ing’anda ya Bufumu iikalamba, umuputule wa kuliilamo, ne cikuulwa icikalamba icakwata amaofesi no mwakusungilamo ifipe. Cabela apalepa mupepi na bakilomita 40 pa kati ka kapinda ka kuso na masamba aka St. Petersburg, mu mushi wa Solnechnoye.
Ukupeelwa kwa fikuulwa kwalisabankanishiwe apakalamba kuli bakalemba ba lyashi abalaalikwe kuli programu. Umo uwa bene alembele muli magazini wa mu Moscow uwitwa Literaturnaya gazeta, uubelengwa na bantu ukucila pali 250,000, ukuti: “Lintu umuntu amona ifi fikuulwa ico engabalilapo ukulanda ca kuti, Eya, e fyo amakuule yalingile ukuba!”—Moneni ifikope pa mabula 14 na 15.
Kalemba, Sergey Sergiyenko, alondolola ukuti: “BaNte pa lwabo e babombele imilimo yonse kuno: Umulimo wa bukuule wabombelwe maka maka na bena Finland, abena Sweden, abena Denmark, abena Norway, na bena Germany. Imisebo ya njelwa iya busaka; ulunkoto ulwateetwa bwino; ifikuulwa ifya mitenge ya matailoshi iyabalabata, amawindo ayakalamba, ne fiibi fya makalashi—ici e cifulo ca bwangalishi ica kuteyanya kwa mipepele ya Nte sha kwa Yehova mu Russia.”
Bakalemba ba lyashi abafumine ku Moscow, apalepa ukucila pali bakilomita 650 pa kati ka kapinda ka kulyo na kabanga aka maofesi, balilaalikwe ku kupeelwa kwa fikuulwa kabili balibapekanishishe bamotoka ba kubasenda. Balitandashiwe mu fikuulwa, pa numa ya ico, kwali inshita ya fipusho ne fyasuko, umo utwa kulya utwayanguka twapayanishiwe. Sergiyenko alembele ukulingana ne fyo amwene ati:
“Nga fintu abantu basosa, baNte balifuuka kabili tabakwata akabepekesho . . . Nga twaalula insoselo yalumbuka iya bena Russia kuti twatila, ‘BaNte bekala pa [mwabo] kwati fye bali pa cifuba ca kwa Yehova.’ . . . Nangu cingati lyonse baNte balacita icikuuku ku bantu bonse, lelo balasakamana bamunyinabo mu nshila yaibela.”
Icipande icalembelwe na S. Dmitriyev camoneke mu Moskovskaya Pravda, inyunshipepala iibelengwa na bantu mupepi na 400,000. Mu cipande icaleti: “Nga Mwatemwa Kuti Mwaipangila Icalo Cenu,” kalemba alondolwele ukuti:
“Pa numa ukuteyanya kwa mipepele ukwa Nte kwasuminishiwe mu Russia [mu 1991], icipusho ca kuikuulila amaofesi yakalamba calimineko. Balefwailisha icifulo icabela mupepi na Moscow lintu mu kukanaenekela baumfwile ukuti impanga iyalebomfiwa nge nkambi ya misepela mupepi na St. Pete[rsburg] yaleshitishiwa. Ilya mpanga yalishitilwe, kabili balitendeke no kukuula. . . .
“Iyo papitile umwaka umo na hafu, pa January 1, 1996, icifulo icabela mu mushi wa Solnechnoye caishilebe ofesi lya bwangalishi ilya kuteyanya kwa mipepele yabo. Pa kati ka June, ibumba lya bakalemba ba lyashi aba mu Moscow ilyakokweleko mu St. Pete[rsburg], lyalefwaya ukwishiba ukuti, Bushe Inte sha kwa Yehova ni bani?”
Bushe Dmitriyev ayaswike shani? “Baba fye nga bantu bambi.” Nangu cibe fyo, balipusanako, nga fintu Dmitriyev alandile mu nsondwelelo ya cipande cakwe ati: “Ba mutende pa kati kabo, na ku bantu bonse. Bushe ciloto? Ee. Lelo e fyo cili.”
Maksim Yerofeyev, kalemba wa lyashi umbi uwa ku Moscow, uwalembele muli Sobesednik, inyunshipepala iibelengwa na bantu ukucila pali 300,000, alandile ukuti: “Ukwampana konse muli uyu mushi uunono kukonka icishinte ica kuti: Takuli uupatikishiwa ukubomba, nalyo line, bonse balaibombela abene beka.”
Pa numa ya kulondolola umuputule uwa kutuushishamo uwa kwa kangalila wa Komiti ya Maofesi, Vasily Kalin, Yerofeyev alandile ukuti: “Bakalemba besu abaletwishika balefwaya ukutandalila imiputule imbi iyo balefwaya. Na kuba ubukulu ne fipe ifya mu miputule imbi tafyapusene ne mimonekele yalinga iya muputule wa kwa Vasily Kalin.”
Anastasiya Nemets, kalemba umbi wa lyashi, alembele icipande icaleti “Ukuba no Mutende wa Muntontonkanya.” Umutwe uunono uwa lyashi mu nyunshipepala ya Vechernyaya Moskva waleti: “Ifi E Fintu Abantu Balesambilila mu Mushi wa Kupapusha Ku Nse ya St. Pete[rsburg].”
Pa kulondolola icifulo ne mimonekele ya fikuulwa ifya maofesi, Nemets alembele ukuti: “Icifulo calikwata imitengo iingi ne nika. Icisumbu ca Finland cabela lwa mupepi. Kuno kwaba utuyanda utwa busaka utwakuulwa mu musango wa bena Europe, imisebo iya njelwa iyapyangwa bwino, na mabala ya maluba ayayemba.
“Utwampani tukuulila ‘abena Russia abapakama’ imisumba inono iya musango yu. Nangu cibe fyo, abantu abashapakama e bekala muli uyu mushi . . . Balekala bwino, ne cacilishapo ukucindama ca kuti, bekala pamo nge fibusa. Kwaba abantu mupepi fye na 350 abekala kuno, abafuma mu ncende shonse ishe sonde; umuntu kuti aumfwa indimi ishingi shilelandwa—iciSpanish ne ciPortuguese nangu fye iciFinnish ne ciSwedish.
“Mu cine cine, uyu mushi walipindililwa: Uyu mushi waliikwatila umwa kupangila ifintu no mwa kulungishisha, uko bapekanishisha ulupwa lukalamba ulwa ndimi ishingi icili conse ico lwingakabila; kabili baliikwatila kiliniki yabo.”
Mu cine cine, abantu 1,492 ukufuma ku fyalo 42 abasangilwe ku Solnechnoye ku kupeelwa kwa fikuulwa balisekelele apakalamba. Icinabwingi cabo shali ni nkonkotela ishabombele amakumi ya myaka lintu umulimo wa kushimikila wabindilwe. Bushe kuti mwaelenganya fintu ishi nkonkotela shapapushiwe no kusekelela ilintu shaletandashiwa mu fikuulwa fyayemba ifyabela mu cifulo icapala ibala, ica bukulu bwa bahekita 6.9? Kwena kuti twaumfwikisha umulandu bamwenene kwati balelota fye.
[Ifikope pe bula 22]
Bakalemba ba lyashi baletandashiwa mu fikuulwa
Inshita ya fipusho ne fyasuko