Umulumendo Watemwa Imipepele Yakwe

ILYO Andrew ali ne myaka 13, apeelwe umulimo pa sukulu uwa kulemba ilyashi pa fishilano. Andrew atile: “Intanshi nafwaile ukulemba pali bashikulu, lelo natile: ‘ntekanye! Ndi Nte ya kwa Yehova. Ili shuko lisuma nga nshi ilya kulanda pa citetekelo candi!’

“Pa kubomba uyu umulimo nasalile umutwe uwa kuti ‘Ukuba Uwashangila,’ kabili napangile icipampa icikulu ica kulangisha ukupakaswa kwabipisha Inte sha kwa Yehova bapitilemo mu Nazi ku Germany. Ifikope nakwete fyasanshishemo ica kufwala ca purple triangle ne fikope ifyapusanapusana pamo na makalata ya lupwa lwa ba Kusserow.a Napeele abantu amakalata nakwete ayo Inte sha kwa Yehova shalembele ubuteko bwa German. Muli aya makalata, Inte sha kwa Yehova tabalandile pa fya bupolitiki, lelo bashangile no kulanda pa fyo ubu buteko bwabacushishe ku lufyengo fye. Pamo no yu mulimo, kwaliko ukutamba vidio uwa Jehovah’s Witnesses Stand Firm Against Nazi Assault. Kabili baBaibolo, babroshuwa, na matrakti nabikile apo fingamonwa bwangu.

“Ica kubalilapo, imilimo iyo twabombele yalilangilwe mu cikulwa ca pa sukulu ku basambi na kuli bakafundisha. Icungulo cakonkelepo indupwa ne fibusa fyabo nabo balilaalikwe. Abengi balinjipwishe ifipusho, pantu tabaishibe ukuti Inte sha kwa Yehova balipakeswe ku baNazi.”

Andrew asumine ukuti ukushipa kwalekabilwa pa kulanda pa citetekelo cakwe. Atila: “Nalishibe ukuti bamo bali no kumpumya, lelo, nga nshalandile pa lwa citetekelo candi nga nalibipilwe sana. Mu fyo nacitile, natontomeshe pa bantu abaipeeleshe ubumi ku kulwila icitetekelo cabo kuli Yehova, e co naelengenye ukuti icacepesha ningacita kushipikisha uku kusuusha.”

Pa kulekelesha, Andrew alitemenwe pa kuti akwete ili shuko ukucitilo bunte. Atila: “Nalandile na bantu abengi pa lwa mulandu tushilwila inkondo, kabili nashalike amaBaibolo, ifitabo, na matrakti ku bantu abalefwaya.” Asosele no kuti, “Nshileibukisha inshita imbi ilyo natemenwe nga nshi pa kuba Inte ya kwa Yehova ukucila pali iyi.”

[Futunoti]