Bushe Fyalola Mwi?

YESU KRISTU atile: “Impela ya bwikashi” yali no kwishibikilwa ku nkondo, ukucepa kwa fya kulya, ifikuko, ne finkukuma.—Mateo 24:1-8; Luka 21:10, 11.

Ukutula mu 1914 abantu bepaiwa ku nkondo sha fyalo filelwishanya ne sha mikowa. Ne cilenga ilingi line ni co aba mapepo baipoosa mu fya mapolitiki, kabili ino nshita icilelenga kusansa kwa tupondo ukuli fye mpanga yonse.

Te mulandu no buyantanshi bwa sayansi mu fya bulimi, imintapendwa ya bantu pe sonde tabakwata fya kulya. Cila mwaka abantu ukufika ku mamilioni balafwa ku kubulwa ifya kulya.

Ifikuko, e kuti ukusalangana kwa malwele yambukila, na fyo fyaba mu cishibilo Yesu apeele. Pa numa ya Nkondo ya Calo iya 1, icikuko ca influenza caipeye abantu ukucila pa mamilioni 21. Calipusene ne fikuko fimbi ifya kale pantu cena cakumine isonde lyonse, ilyo ifya kale fyena fyalekuma fye abantu mu ncende imo. Cakumine ifyalo mwi sonde lyonse pamo ne fishi fyabela ukutali. Ubulwele bwa AIDS nomba bwandatile fye isonde lyonse, kabili ifikuko pamo nga TB, ubulwele bwa mpepo, ubupofu fileya fye pa ntanshi mu fyalo ifipiina.

Cashimikwa ukuti cila mwaka kwaba ifinkukuma ifingi ificitika mu calo ifya bukulu bwapusanapusana. Te mulandu ne fibombelo fyabako no buyantanshi mu kucita lipoti ilyashi, amasanso ayaponena ukwaba sana abantu pa mulandu wa finkukuma yaba e malyashi mu nyunshipepala ne milabasa.

Baibolo yasobele no kuti: “Ishibe ci, ukuti mu nshiku sha kulekelesha mukesaba inshita shaibela ishayafya. Pantu abantu bakaba abaitemwa, abatemwe ndalama, aba mataki, aba matutumuko, aba miponto, abashumfwila abafyashi babo, abashitasha, abashaba na bucishinka, abashaba na citemwishi, abashifwaya fipangano, aba lwambo, abashailama, abakali, abashatemwa busuma, bashikamfutu, bamunshebwa, abatuumikwa ku cilumba, abatemwo kwangala ukucisho kutemwa Lesa, abamoneka kwati bali-ipeelesha kuli bukapepa lelo abakaana amaka ya buko; kabili kuli aba talukako.”—2 Timote 3:1-5.

Na imwe kuti mwasumina ukuti tuleikala mu “nshita shaibela ishayafya,” bushe te ifyo?

Bushe mwalimona ukuti abantu bali-itemwa sana, ukutemwisha indalama, kabili baba ne cilumba?

Cine cine icalo lelo caisulamo abantu bapampamina pa kuti ico balefwaya mpaka cicitike kabili baba abashitasha, abashifwaya fipangano, abashaba na bucishinka.

Bushe mwalishiba ukuti bucintomfwa ku bafyashi pamo no kubulwe citemwishi ukwabipisha nafifulilako mwi sonde fye lyonse?

Mufwile mwalishiba ukuti tuleikala mu calo ca-andatilwa no kutemwa umusamwe lelo umushaba kutemwa busuma.

Ifyo e fintu Baibolo ilondolola imibele yali no kufula mu “nshiku sha kulekelesha.”

Bushe kulefwaikwa ubushininkisho na bumbi ubwa kwishibisha inshita tuleikalamo? Yesu asobele no kuti muli yi ine nshita, imbila nsuma ya Bufumu bwa kwa Lesa yali no kushimikilwa pano isonde ponse. (Mateo 24:14) Bushe ileshimikilwa?

Ulupungu lwa kwa Kalinda, ulupapulo lulanda pa fya mu Baibolo ulwabelako fye ukubilisha imbila nsuma ya Bufumu bwa kwa Yehova, lulalembwa mu ndimi ishingi sana ukucila ulupapulo ululi lonse ulwa pa mweshi.

Cila mwaka, Inte sha kwa Yehova babomba ama-awala ukucila pali 1 bilioni ukushimikila bambi ulwa Bufumu bwa kwa Lesa.

Pali ino nshita, Inte balalemba impapulo shilondolola Baibolo mu ndimi mupepi na 400 ukusanshako fye ne ndimi shilandwa na bantu aba ncepela abekala mu ncende umushailepela. Inte sha kwa Yehova balifisha imbila nsuma ku nko shonse; kabili balishimikila mu fishi ifingi na mu fifulo ifyacepesha ica kuti ukulingana na mapolitiki tafimonwa nge fyalo. Mu fyalo ifingi, balabomba umulimo wa kusambilisha Baibolo lyonse.

Cine cine, imbila nsuma ya Bufumu bwa kwa Lesa ileshimikilwa mwi sonde lyonse, te ku kwalula aba pano calo bonse, lelo ku kubo bunte. Abantu konse konse balepeelwa ishuko lya kulanga nampo nga balyangwa ku wabumbile imyulu ne sonde kabili nampo nga bali no kucindika amafunde yakwe no kulanga ukuti balitemwa abantu banabo.—Luka 10:25-27; Ukusokolola 4:11.

Nomba line fye, Ubufumu bwa kwa Lesa buli no kuwamya isonde ukufumyapo ububifi bonse no kulilenga ukuba paradaise.—Luka 23:43.

[Akabokoshi pe bula 6]

Inshiku sha Kulekelesha Isha Cinshi?

Te nshiku sha kulekelesha isha bantunse. Ku bacita ukufwaya kwa kwa Lesa, Baibolo yatambika isubilo lya kwikala umuyayaya.—Yohane 3:16, 36; 1 Yohane 2:17.

Te nshiku sha kulekelesha ishe sonde. Icebo ca kwa Lesa cilaya ukuti isonde likekala umuyayaya.—Amalumbo 37:29; 104:5; Esaya 45:18.

Lelo, shino ni nshiku sha kulekelesha isha bwikashi bwabipa, umushaba ukutemwa kabili ni nshiku sha kulekelesha ku bacita ifyaba muli buno bwikashi.—Amapinda 2:21, 22.

[Akabokoshi ne Cikope pe bula 7]

Bushe Baibolo Cine Cine Cebo ca kwa Lesa?

Libili libili, bakasesema ba mu Baibolo balelemba ati: “E fyo Yehova asosa.” (Esaya 43:14; Yeremia 2:2) Nangu fye ni Yesu Kristu, Mwana Lesa, akomailepo ukuti ‘talelanda ifyakwe umwine.’ (Yohane 14:10) Baibolo iine ilandilapo fye aiti: “Amalembo yonse yantu yapuutwamo kuli Lesa.”—2 Timote 3:16.

Takwaba icitabo cimbi icasabankanishiwa mu ndimi ishingi nga Baibolo—ukucila pa ndimi 2,200, nga fintu cashimikwa na ba United Bible Societies. Takwaba icitabo cimbi icafulishe fi—pali leelo kwaba amaBaibolo ukucila pa mabilioni 4. Ifyo e fyo mwingenekela ku cebo ca kwa Lesa ico apeela abantunse bonse, bushe te ifyo?

Nga mulefwaya umo balanda ubushininkisho na bumbi ubwa kuti Baibolo yalipuutwamo, moneni icitabo citila Baibolo—Cebo ca kwa Lesa Nelyo ca Muntu?, icalembwa ne Nte sha kwa Yehova.

Nga mwabelenga Baibolo no kutesekesha ukuti cine cine yaba Cebo ca kwa Lesa, mukanonkelamo nga nshi.

[Akabokoshi ne Fikope pe bula 8]

Bushe Ubufumu bwa kwa Lesa Cinshi?

Buteko bwa mu muulu ubo Lesa wa cine, Yehova, Kabumba wa muulu ne sonde aimika.—Yeremia 10:10, 12.

Baibolo yalumbula Yesu Kristu ukuti e untu Lesa apeela amaka ya kuteeka. (Ukusokolola 11:15) Ilyo Yesu aali pe sonde, alilangile ukuti alikwete amaka ya kupapusha ayafuma kuli Lesa—amaka yamulengele ukulama imiceele, icipuupu na bemba, ukuundapa amalwele ya misango yonse, no kubuusha fye abafwa. (Mateo 9:2-8; Marko 4:37-41; Yohane 11:11-44) Ukusesema kwa mu Baibolo ukwapuutwamo kwasobele ukuti Lesa aali no kumupeela “ukuteka, no bukata, no bufumu, ukuti abantu na bantu bonse, na bantu ba nko, ne ndimi, bamupyungile.” (Daniele 7:13, 14) Ubo buteko bwitwa Ubufumu bwa mu muulu; ni mu muulu e mo Yesu Kristu nomba ateekela.

[Ifikope pe bula 7]

Ukushimikila imbila nsuma mwi sonde lyonse