Ni Kwi Ubumi Bwenu Bulelola?

• Abantu abengi balisendwa sana ne fyakuma imikalile yabo iya cila bushiku ica kuti tabatontonkanya no ko balelola.

• Baibolo itweba ulwa fintu fyawamisha ifili ku ntanshi. Itusoka na pa cimfundawila cileisa ku ntanshi icikakuma utubungwe twa bantunse mwi sonde lyonse. Nga tulefwaya ukunonkelamo mu fyo Baibolo isosa no kuleuka ako kayofi, tufwile ukucitapo cimo bwangu bwangu.

• Kwaba abaishiba ifyo Baibolo isosa no kwesha ukucite fyo fine lelo baleka amasakamika ya bwikashi ukubapumbula.

• Bushe nga mwamona ukulelola ubumi bwenu mulomfwa fye bwino? Ilyo mwapanga ifya kucita, bushe mulatontonkanya pa fyo fili no kukuma amabuyo yenu aya ku ntanshi?

[Akabokoshi ne Fikope pe bula 9]

Cinshi Cacindamisha Kuli Imwe?

Kuti mwatantika shani ifyakonkapo? Fitantikeni ukubalilapo ne fyo mulemona ukuti e fyacindama ukufuma pa 1 ukufika ku 10.

Ifingi fyalilinga ukucita mu bumi, lelo nga muli no kusala, finshi fili no kubalilapo? ifya cibili? ne fyakonkapo?

․․․ Ifya kuleseshamo icitendwe/ukwangala

․․․ Incito momba

․․․ Ubumi bwandi

․․․ Insansa sha pa lwandi

․․․ Umwina mwandi

․․․ Abafyashi bandi

․․․ Abana bandi

․․․ Ing’anda isuma, ifya kufwala fya mutengo

․․․ Ukucila bonse muli fyonse ncita

․․․ Ukupepa Lesa

[Akabokoshi pe bula 10, 11]

Bushe Ifyo Musala Fimutwala Uko Kwine Mufwaya Ukulola?

TONTONKANYENI PALI FI FIPUSHO

IFYA KULESHE CITENDWE/UKWANGALAKO: Bushe ukwangala natemwa kulampembesula? Bushe kusanshamo fimo ifingonaula ubumi bwandi nelyo ukundemanika? Bushe musamwe wabamo ifya kucincimusha napamo ifya pa kashita fye lelo ifingandetela ubulanda ubumi bwandi bonse? Nangu ca kuti ifya kusekesha natemwa fyaliba fye bwino, bushe ndapoosapo sana inshita ica kuti nafilwa no kukwate nshita ya kucita ifintu fyacindamapo?

INCITO MOMBA: Bushe ya kunjafwa ukukwata umwa kuliila, nelyo bushe ndi musha kuli yo ncito? Bushe ikabila inshita ikalamba no kubombesha ica kuti kuti yaonaula no bumi bwandi? Bushe kuti nafwaya ukubomba ama-awala ayafulilako ukucila ukupoosa inshita no mwina mwandi nelyo abana bandi? Nga ca kuti umukalamba wa ncito alefwaya mombe umulimo uo kampingu wandi ashilesuminisha nelyo umulimo uupumfyanya ifya ku mupashi, bushe kuti nabomba uyo mulimo pa kuti fye bekantamfye ncito?

UBUMI BWANDI: Bushe nalisuulako ku bumi bwandi, nelyo bushe ndabubakilila bwino? Bushe e bo nandapo pe fye? Bushe ifyo nsakamana ubumi bwandi filanga ukuti nalyangwa ulupwa lwandi?

INSANSA SHA PA LWANDI: Bushe e sho nayangwako sana? Bushe e sho mpooseshako amano ukucila insansa sha mwina mwandi nelyo isha lupwa lwandi? Bushe inshila mfwailamo insansa shintu shalinga kuli kapepa wa kwa Lesa wa cine?

UMWINA MWANDI: Bushe mona fye umwina mwandi ngo munandi lilya ndefwaya fye ifintu fingwamine? Bushe ndacindika umwina mwandi, pamo ngo muntu walinga ukucindikwa? Bushe ukutetekela Lesa e kukuma ifyo mona umwina mwandi?

ABAFYASHI BANDI: Nga ncili umwaice, bushe ndomfwila abafyashi bandi—ukwasuka mucinshi mucinshi, ukubomba imilimo bantuma, ukubwela pa nshita balanda, ukukana-angala na bo bandesha ukwangala na bo no kukanacite fintu bankaanya? Nga ndi mukalamba, bushe ndomfwa ku bafyashi bandi no mucinshi, ukubaafwako nga balekabila ubwafwilisho? Bushe mba fye bwino ku bafyashi bandi nga ndefwaya ukumwenamo nelyo pa mulandu wa kufunda kwaba mu Cebo ca kwa Lesa?

ABANA BANDI: Bushe nalishiba ukuti ni ncito yandi ukusambilisha abana bandi imibele isuma, nelyo bushe ntila bakasambilila ku sukulu? Bushe ndapoosako inshita ikalamba na bana bandi, nelyo bushe ntila bafwile ukupoosa inshita ku fya kwangasha, TV, nelyo ukwangala na baice banabo? Bushe ndasalapula abana bandi lyonse ilyo basuula ifya kucinkulako fya kwa Lesa nelyo bushe mbasalapula fye nga nakalipa?

ING’ANDA ISUMA, IFYA KUFWALA FYA MUTENGO: Cinshi cilenga ndeangwa imimonekele yandi ne fikwatwa? Bushe kusakamikwa pa fyo bambi bengamona? bushe ni pa kuti ciwamine ulupwa lwandi? bushe mulandu wa kuba kapepa wa kwa Lesa?

UKUCILA BONSE MULI FYONSE NCITA: Bushe mona kwati calicindama ukubomba ifintu bwino? Bushe ntukuta ukucila bonse? Bushe ndabipilwa nga umo abomba bwino ukuncila?

UKUPEPA LESA: Bushe ukusenaminwa kuli Lesa kwalicindama kuli ine ukucila ukusenaminwa ku mwina mwandi, ku bana bandi, ku bafyashi bandi, nelyo abakalamba ba ncito? Pa kutwalilila ne mikalile ya bwanalale, bushe kuti naleka no kukatamika ukubombela Lesa?

TONTONKANYENI SANA PA KUFUNDA KWA MU BAIBOLO

Bushe ukupepa Lesa kwacindama shani mu bumi bwenu?

Lukala Milandu 12:13: “Bela Lesa akatiina, baka amafunde yakwe; pantu ici e ca buntunse bonse.”

IPUSHENI AMUTI: Bushe imikalile yandi ilanga ukuti ifyo e fyo mona ifintu? Bushe ukumfwila amafunde ya kwa Lesa e kukuma ifyo nsakamana imilimo pa ng’anda, ku ncito, nelyo ku sukulu? Nelyo bushe ifintu fimbi nelyo amafya ya mu bumi e fipima nampo nga mfwile ukushako inshita ya kucita ifya kwa Lesa?

Bushe bucibusa bwenu na Lesa bwaba shani?

Amapinda 3:5, 6: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.”

Mateo 4:10: “Yehova Lesa obe e o ulepepa, kabili wene eka e o ulebombela umulimo washila.”

IPUSHENI AMUTI: Bushe ifyo e fyo ng’umfwa pali Lesa? Bushe ifyo ncita cila bushiku, ne fyo mombela pa mafya filanga ukuti nalitetekela Lesa no kuipeelesha kuli wene?

Bushe ukubelenga Baibolo no kuisambilila fyacindama shani kuli imwe?

Yohane 17:3: “Ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.”

IPUSHENI AMUTI: Bushe ifyo nakatamika ukubelenga Baibolo no kutontonkanya sana pa fyo isosa filanga ukuti nalitetekela ifyasosa ili lembo?

Bushe ukusangwa ku kulongana kwa Bwina Kristu kwacindama shani kuli imwe?

AbaHebere 10:24, 25: “Tutontonkanye ifya kucincishanya ku kutemwa kabili ku kubombe milimo isuma, twiba abaleko kulongana, . . . pali bufi apo mulemona ubushiku bulya bulepalama.”

Amalumbo 122:1: “Nasaminwe ilyo basosele kuli ine, abati, Tuleya ku ng’anda ya kwa Yehova.”

IPUSHENI AMUTI: Bushe imikalile yandi ilanga ukuti ndatasha pali uku kukonkomesha kwa mu Cebo ca kwa Lesa? Bushe mu mweshi wapwile nalipushilwe ku kulongana kwa Bwina Kristu ukuli konse pa mulandu wa kuleka fimo ukumpumfyanya?

Bushe mwalipimpa ukwebako bambi pali Lesa no bufwayo bwakwe?

Mateo 24:14: “Imbila nsuma iyi ya bufumu ikashimikilwa pano isonde ponse ku kubo bunte . . . , e lyo ne mpela ikesa.”

Mateo 28:19, 20: “E ico kabiyeni, kalengeni aba nko shonse ukuba abasambi, . . . mulebasambilisha ukubaka fyonse ifyo namwebele.”

Amalumbo 96:2: “Imbeni kuli Yehova, cindikeni ishina lyakwe; bileni ukupususha kwakwe akasuba na kasuba.”

IPUSHENI AMUTI: Bushe nalicindamika uyu mulimo ifyo ufwile ukucindama? Bushe ifyo momba uyu wine mulimo filangilila ukushininwa kwandi ukwa kuti inshita tuleikalamo shalikakaala?