Ni Bani Baumfwilile Lesa pa Nshita ya Lyeshi Likalamba? Ni Bani Bashamumfwilile?

Abantu abengi mu nshiku sha kwa Noa balecita ifyabipa. Ukutendeka 6:5

Adamu na Efa baishilekwata abana, kabili abantu pe sonde balifulile. Umuye nshiku, bamalaika bamo bailundile kuli Satana no kupondokela Lesa.

Baishile pe sonde no kufwala imibili ya buntu pa kuti bope abanakashi. Abanakashi bafyele abana baume amapaka, abakwatishe amaka kabili abali abakali icine cine.

Mu calo mwafulile abalecita ifyabipa. Baibolo itila: “Abantu [bacililemo] ukucita ifyabipa pano isonde, no kuti fyonse ifyo imitima yabo yaletontonkanya fyaleba fye ifibi inshita yonse.”

Noa aumfwilile Lesa no kupanga icibwato. Ukutendeka 6:13, 14, 18, 19, 22

Noa ali muntu umusuma. Yehova aebele Noa ukuti akaleta ilyeshi ilikalamba ilyali no kwipaya abalecita ifyabipa.

Lesa aebele Noa no kukuula icibwato icikalamba, kabili amwebele no kuti e mo akengile pamo no lupwa lwakwe e lyo ne misango yonse iya nama.

Noa alisokele abantu pa Lyeshi lyali no kwisa, lelo tabakutike. Bamo balemuseka; bambi balimupatile.

Ilyo Noa apwile ukupanga icibwato, aingishemo inama.