ISAMBILILO 04

Bushe Lesa Nani?

Ifimoneka Ulwapulintwa

Ukufuma fye na kale, abantu balapepa balesa abalekanalekana. Lelo Baibo ilanda fye pali Lesa umo “umukalamba ukucila balesa bambi.” (2 Imilandu 2:5) Nani uyu wine Lesa? Kabili cinshi calenga abe umukalamba sana ukucila balesa bonse abo abantu bapepa? Muli ili isambililo, mumone ifyo uyu Lesa afwaya mwaishiba pali ena.

1. Bushe Lesa nani ishina, kabili kuti twashininkisha shani ukuti alafwaya twaishiba ishina lyakwe?

Lesa umwine ali-ilondolola mu Baibo. Alanda ukuti: “Nine Yehova. Ili e shina lyandi.” (Belengeni Esaya 42:5, 8.) Ishina “Yehova” balipilibula ukufuma kwi shiwi lya ciHebere ilyo abasambilila ifya mu Baibo abengi balanda ukuti lipilibula ukutila “E Ulenga Ifintu Ukubako.” Yehova alafwaya twaishiba ishina lyakwe. (Ukufuma 3:15) Twaishiba shani ukuti Yehova alafwaya twaishiba ishina lyakwe? Alilenga ishina lyakwe ukulembwa mu Baibo ukucila pa miku 7,000!a Ishina lya kuti Yehova lilosha fye kuli “Lesa wa cine ku muulu na pano isonde.”—Amalango 4:39.

2. Finshi Baibo itweba pali Yehova?

Baibo itila pali balesa bonse abo abantu bapepa, Yehova fye e Lesa wa cine. Cinshi ilandila ifi? Kwaliba ifingi ifilanga ukuti Yehova e Lesa wa cine eka. Yehova e wakwatisha amaka ya kuteka, kabili eka fye ‘E Wapulamo pano isonde ponse.’ (Belengeni Amalumbo 83:18.) Baibo imwita ukuti “Uwa Maka Yonse,” pantu alikwata amaka ya kucita conse ico alefwaya ukucita. ‘E wabumbile ifintu fyonse,’ e kutila umuulu ne sonde e lyo na fyonse ifya mweo ifyabamo. (Ukusokolola 4:8, 11) Na kabili Yehova fye e wabako ukufuma umuyayaya, kabili akatwalilila ukubako umuyayaya.—Amalumbo 90:2.

SAMBILILENI NA FIMBI

Sambilileni ubupusano bwaba pa malumbo ya kwa Lesa ne shina lyakwe ilyaibela. Lyena sambilileni ne fyo acita pa kulenga mwishibe ishina lyakwe, ne co afwaila mwalishiba.

Umwaume alelolesha mu muulu ubushiku. Ishina Yehova na balilemba mu muulu.

3. Lesa alikwata amalumbo ayengi, lelo akwata fye ishina limo

Pa kuti mwishibe ubupusano bwaba pa malumbo abantu babomfya pa kwita umuntu e lyo ne shina lyakwe, tambeni VIDIO, lyena lanshanyeni icipusho cakonkapo.

VIDIO: Alikwata Amalumbo Ayengi, Lelo Akwata fye Ishina Limo (0:41)

Bupusano nshi bwaba pa malumbo pamo nga “Shikulu,” e lyo ne shina?

Baibo itila abantu balapepa balesa abengi na bashikulu abengi. Belengeni Amalumbo 136:1-3, lyena lanshanyeni ici cipusho:

Bushe “Lesa uwacila tulesa tonse” kabili “Shikulu uwacila bashikulu bonse” nani?

4. Yehova afwaya mwaishiba ishina lyakwe no kulalibomfya

Finshi filanga ukuti Yehova afwaya mwaishiba ishina lyakwe? Tambeni VIDIO, lyena lanshanyeni icipusho cakonkapo.

VIDIO: Bushe Lesa Alikwata Ishina?—Iyo Baipifya (3:11)

Icikope icifumine muli vidio itila ‘Bushe Lesa Alikwata Ishina?—Iyo Baipifya.’ Umwaume alelolesha pe shina lya kuti Yehova pa Amalumbo 83:18, muli Baibo ya ‘King James Version’ iya mu 1611.

Bushe muletontonkanya ukuti Yehova alafwaya abantu baishiba ishina lyakwe? Cinshi muletontonkanisha ifyo?

Yehova afwaya abantu balebomfya ishina lyakwe. Belengeni Abena Roma 10:13, lyena lanshanyeni aya mepusho:

Bushe ukubomfya ishina lya kwa Lesa ilya kuti Yehova kwacindama shani?
Bushe mumfwa shani umuntu nga aibukisha ishina lyenu no kulibomfya?
Bushe mulemona ukuti Yehova omfwa shani nga mwabomfya ishina lyakwe?

5. Yehova afwaya ukuti mwaba cibusa wakwe

Ba Soten abanakashi aba ku Cambodia batile, ilyo basambilile pe shina lya kwa Lesa bali ne nsansa isho bashabalile abakwatapo. Tambeni VIDIO, lyena lanshanyeni icipusho cakonkapo.

VIDIO: Nalefwaya Ukwishiba Lesa wa Cine (8:18)

Ifikope: Ifikope ififumine muli vidio itila ‘Nalefwaya Ukwishiba Lesa wa Cine.’ 1. Ba Soten nabekala mwi samba lya cimuti mu mpanga, balelolesha mu muulu kabili balepepa kuli Lesa wa cine. 2. Ba Herold balesambilisha ba Soten ukuti ishina lya kwa Lesa ni Yehova.

Muli iyi vidio twatamba, finshi fyafuminemo ilyo ba Soten baishibe ishina lya kwa Lesa?

Ilingi line ilyo mushilaba ifibusa no muntu, mubalilapo ukwishiba ishina lyakwe. Belengeni Yakobo 4:8a, lyena lanshanyeni aya mepusho:

Cinshi Yehova afwaya mwacita?
Bushe ukwishiba ishina lya kwa Lesa no kulalibomfya kuti kwalenga shani mwaba sana icibusa cakwe?

ABANTU BAMO BATILA: “Kwaba fye Lesa umo, kanshi kuti mwamwita ifyo mulefwaya.”

Bushe namushininkisha ukuti ishina lya kwa Lesa ni Yehova?
Kuti mwalondolwela shani umuntu ukuti Lesa alafwaya tulebomfya ishina lyakwe?

IFYO MUSAMBILILE

Kwaba fye Lesa wa cine umo, ishina lyakwe ni Yehova. Alafwaya twaishiba ishina lyakwe no kulalibomfya pa kuti tube sana ifibusa fyakwe.

Ukupitulukamo

Bushe Yehova apusanako shani kuli balesa bambi abo abantu bapepa?
Mulandu nshi tulingile ukubomfesha ishina lya kwa Lesa?
Finshi filanga ukuti Yehova alafwaya mwaba sana cibusa wakwe?

Ubushiku mwapwisha ili isambililo:

Ifyo Mwingacita

Ilyo mulelanda pali Lesa, mulebomfya ishina lyakwe ilya kuti Yehova.

Fimbi:

Your other goal

ISHIBILENIPO NA FIMBI

Moneni ifintu 5 ifingalenga twashininkisha ukuti Lesa e ko aba

“Bushe Lesa E ko Aba?” (Icipande ca pa jw.org)

Moneni umulandu tulingile ukucetekelela ukuti Lesa e ko aba ukufuma umuyayaya no kuya umuyayaya.

“Nani Uwapangile Lesa?” (Ulupungu lwa kwa Kalinda, August 1, 2014)

Moneni ico tulingile ukulabomfesha ishina lya kwa Lesa nangu ca kuti tatwaishiba bwino bwino ifyo balelishimbula kale sana.

“Bushe Yehova Nani?” (Icipande ca pa jw.org)

Bushe Lesa kuti twamwita fye ifili fyonse ifyo tulefwaya? Moneni ico twingalandila ukuti akwata fye ishina limo.

“Bushe Lesa Akwata Amashina Yanga?” (Icipande ca pa jw.org)

a Nga mulefwaya ukwishibilapo na fimbi pa bupilibulo bwe shina lya kwa Lesa e lyo ne co balifumishamo mu maBaibo yamo, moneni Ifyebo Fyalundwako A4 muli Baibo ya Amalembo ya Calo Cipya iyapitulukwamo.