February

Ilyo Imfumu Hisekia yalwele sana, yalilombele Yehova ukuti aiposhe. Yehova aliposeshe Imfumu Hisekia. (2 Isha. 20:​1-6) Nomba ilyo umutumwa Paulo apepele kuli Yehova ukuti amufumye “umunga mu mubili,” Yehova tamuposeshe. (2 Kor. 12:​7-9) Abatumwa babili, Yakobo na Petro Imfumu Herode yalefwaya ukubepaya bonse babili. Yakobo balimwipeye, lelo Petro ena balimufumishe mu cifungo kuli malaika. (Imil. 12:​1-11) Nalimo kuti twalatontonkanya ukuti mulandu nshi Yehova apusushishe Petro, lelo akana ukupususha Yakobo? Baibo tayalanda. Ico twingacetekela fye ca kuti Yehova taba na “lufyengo.” (Amala. 32:4) Inshita shimo Yehova te kuti asuke amapepo yesu ukulingana ne fyo twale-enekela. Nomba apo twalicetekela ukuti Yehova alaasuka amapepo yesu mu nshila iisuma kabili iya mulinganya, tatuilishanya nga asalapo ukwasuka amapepo yesu mu nshila tushile-enekela.—Yobo 33:13. w23.11 ibu. 21 para. 6

Yakobo alembele ukuti aba mano ‘bali ne cumfwila.’ Tontonkanyeni pa fyo aya mashiwi alandile yapilibula. Tufwile ukuitemenwa ukumfwila abo Yehova asala ukulatungulula. Kwena Yehova tatweba ukulaumfwila umuntu uutweba ukukanaumfwila amafunde yakwe. (Imil. 4:​18-20) Kuti twalamona kwati calyanguka ukumfwila Yehova ukucila ukumfwila abantu banensu. Na kuba lyonse Yehova atupeela amafunde ayapwililika. (Amalu. 19:7) Nomba abantu abatungulula, amafunde batupeela tayapwililika. Nangu ca kuti amafunde batupeela tayapwililika, Yehova alipeela abafyashi, abalashi babuteko, e lyo na baeluda amaka ya kutungulula. (Amapi. 6:20; 1 Tes. 5:12; 1 Pet. 2:​13, 14) Nga tulebomfwila ninshi tuleumfwila Yehova. w23.10 ibu. 6 amapara. 2-3

Cimo icingalenga icitetekelo cesu ukukosa, kutontonkanya pa maka Yehova akwata. Alikwata amaka ya kufikilisha fyonse ifyo alaya ukucita. Na kuba ni Lesa wa maka Yonse. (Yobo 42:2; Marko 10:27; Efes. 3:20) Alyebele Abrahamu na Sara ukuti bali no kukwata umwana umwaume nangu ca kuti balikotele. (Ukute. 17:​15-17) Na kabili aebele Abrahamu ukuti abali no kufuma mu lupwa lwakwe bali no kubapeela icalo ca Kaanani. Ilyo abena Israele abafumine mu lupwa lwa kwa Abrahamu bali mu busha mu Egupti pa myaka iingi, balemona kwati ifyo Lesa alaile Abrahamu tafyakacitike. Lelo fyalicitike. Yehova aebele Maria uwali nacisungu ukuti ali no kukwata Umwana umwaume uwa kwa Lesa uo Yehova alaile imyaka iingi mwi bala lya Edeni ukuti ali no kwisa. Ifi fyacitike fyali no kufikilisha ubusesemo Yehova alaile. (Ukute. 3:15) Nga twatontonkanya pa fyo Yehova alandile e lyo ne fyo afifikilishe tuleshiba ukuti alikwata sana amaka ne ci cilalenga tucetekele ukuti icalo cipya ico atulaya cikesa.—Yosh. 23:14; Esa. 55:​10, 11. w23.04 ibu. 28 amapara. 10-12

Yehova alyaswike ipepo Davidi apepele ilya kuti amupusushe. (1 Sam. 19:​10, 18-20; 2 Sam. 5:​17-25) Na ifwe bene kuti twacetekela Yehova nge fyo amucetekele. (Amalu. 145:18) Inshita shimo Yehova tasuka amapepo yesu ukulingana ne fyo tule-enekela. Paulo alombele Lesa ukuti amufumye “umuunga mu mubili.” Pa miku itatu alipepeele pali ubu bwafya ubo akwete. Bushe Yehova alyaswike ifyo Paulo apepele? Ee alyaswike, nomba mu nshila iyo Paulo ashale-enekela. Mu cifulo ca kufumyapo amafya ayo akwete, Yehova apeele Paulo amaka ayo alekabila pa kuti atwalilile ukumubombela ne cishinka. (2 Kor. 12:​7-10) Na ifwe bene, Yehova inshita shimo kuti aasuka ipepo mu nshila tushile-enekela. Kuti twacetekela ukuti Yehova alishiba ifyo engasuka amapepo yesu. Kuti a-asuka “ukucila na pa fyo twingamulomba nelyo pa fyo twingatontonkanyapo” (Efes. 3:20) Pa mulandu ne fi twalandapo, limo Yehova kuti a-asuka amapepo yesu pa nshita nelyo mu nshila tushile-enekela. w23.05 amabu. 8-9 amapara. 4-6

Calicindama ukuti tuletontonkanya pa fyo Baibolo yatulaya ukuti kukaba ukubuuka. Mulandu nshi cacindamina? Pantu inshita iili yonse, kuti twalwala sana nelyo lupwa wesu nangu cibusa wesu kuti afwa. (Luk. Mil. 9:11; Yako. 4:​13, 14) Isubilo twakwata ilya kuti kukaba ukubuuka, kuti lyalenga twashipikisha amafya ya musango uyo. (1 Tes. 4:13) Amalembo yatweba ukuti Shifwe wa ku muulu alitwishiba bwino kabili alitutemwa icine cine. (Luka 12:7) Tontonkanyeni pa fyo Yehova atwishiba bwino, alitwishiba sana ica kuti akatubuusha filya fine fye twali ilyo tushilafwa. Yehova alitutemwa sana, kabili alilenga twaba ne subilo lyakwikala umuyayaya. Mulandu nshi tulingile ukucetekelela ukuti abafwa bakabuuka? Pantu twalicetekela ukuti uwatulaya alafwaisha ukucita ifyo atulaya, kabili alikwata na maka ya kucita ifyo. w23.04 amabu. 8-9 amapara. 2-4

Yosefe na Maria balebombela pamo pa kuti batwalilile ukukosha bucibusa bwabo na Yehova. Balishibe ico cacindamina ukupepa Yehova pamo no lupwa lwabo. (Luka 2:​22-24; 4:16) Abaupana muno nshiku kuti basambililako ku fyo Yosefe na Maria balecita. Nga mwalikwata abana nga filya Yosefe na Maria bakwete, nalimo kuti calamukosela ukulalongana nelyo ukukwata inshita ya mapepo ya lupwa. Kabili kuti cakoselako ukusanga inshita ya kuisambilisha nelyo iya kupepela pamo na bena mwenu. Nomba muleibukisha ukuti nga mulepepela pamo na bena mwenu, mukapalama sana kuli Yehova kabili mukatemwana sana. Kanshi mulemona ukuti ukupepa Yehova pamo no lupwa lwenu kwalicindama sana. Nga ca kuti namukwata amafya mu cupo cenu, ukukwata amapepo ya lupwa nalimo kuti kwamoneka kwati te kuti kumwafwe. Ifi nga e fyo mutontonkanya, nalimo kuti mwatendekelapo ukulakwata amapepo ya lupwa pa nshita iipi ayo bonse mwingatemwa ukusambilila. Ukucita ifi kuti kwalenga mwatemwana sana kabili mwalafwaya ukulapepela Yehova capamo. w23.05 ibu. 22 amapara. 7-8

Bushe uku kutiina aletiina Lesa kwalenge Obadia aba shani? Kwalengele aba uwa cishinka kabili uo abantu bengacetekela. E calengele imfumu imupeele umulimo wa kwangalila ing’anda ya iko. (Linganyeniko Nehemia 7:2.) Na kabili ukutiina Lesa kwalengele Obadia abe uwashipa, kabili alekabila sana ukuba uwashipa. Aliko ilyo imfumu yabipa Ahabu aleteka. (1 Isha. 16:30) Na kabili, Yesebele umukashi wa kwa Ahabu uwalepepa Baali, alipatile sana Yehova ica kuti talefwaya umuntu nangu umo mu mikowa 10 iya bena Israele ukulapepa Yehova. Alipeye na bakasesema ba kwa Lesa abengi. (1 Isha. 18:4) Ilyo Yesebele atendeke ukufwayafwaya bakasesema ba kwa Lesa ukuti abepaye, Obadia abuulile bakasesema 100 no kubafisa, “Mwi bumba limo mwali bakasesema 50 e lyo mwi bumba limbi namo mwali 50, kabili alebatwalila umukate na menshi.” (1 Isha. 18:​13, 14) Obadia abamwikata, nga balimwipeye. Afwile aleumfwa umwenso kabili talefwaya ukumwipaya. Lelo alitemenwe Yehova na bantu abalebombela Yehova ukucila umweo wakwe. w23.06 ibu. 16 amapara. 9-10

Yehova alitwalilila ukutungulula abantu bakwe na muno nshiku mwine nga filya fine alecita na ku nshita ya ku numa. Abatungulula ukupitila mu Cebo cakwe na mu Mwana wakwe uwaba e mutwe wa cilonganino. Bushe tulamona ubushininkisho bwa kuti na muno nshiku mwine Yehova atutungulula ukupitila mu bantunse? Ee, tulabumona. Ku ca kumwenako, natulande pa fyacitike pa numa ya mwaka wa 1870. Ba Charles Taze Russell na banabo balilwike ukuti mu mwaka wa 1914 mwali no kucitika ifyali no kulanga ukuti Ubufumu bwa kwa Lesa bwali no kutendeka ukuteka muli uyu wine mwaka. (Dan. 4:​25, 26) Icalengele beluke ifi ni co balibelengele ubusesemo bwa mu Baibo kabili balicetekele ukuti bwali no kufikilishiwa. Bushe Yehova alebatungulula ilyo balefwailisha mu Baibo? Ukwabula no kutwishika alebatungulula. Ifyalecitika mu mwaka wa 1914 fyalelangilila ukuti Ubufumu bwa kwa Lesa bwalitendeke ukuteka muli uyu wine mwaka. Inkondo ya Kubalilapo yalitendeke, kabili pakonkele ifikuko, ifinkukuma ne fipowe. (Luka 21:​10, 11) Cine cine Yehova alebomfya aba abaume abali ne cishinka pa kutungulula abantu bakwe. w24.02 ibu. 22 para. 11

Fwe babomfi ba kwa Yehova twalishiba ukuti Yehova alitutemwa kabili afwaya tuleba ne nsansa lyonse. (Rom. 8:​35-39) Twalicetekela no kuti nga tulekonka amashinte ya mafunde aya mu Baibolo ifintu filatuwamina. (Esa. 48:​17, 18) Nomba tufwile ukucita shani nga twakwata amafya ayo tushile-enekela? Ku ca kumwenako, uwa mu lupwa kuti acita fimo ifingalenga twaba no bulanda. Nalimo kuti twalwala ica kuti twalafilwa ukubombesha mu mulimo wa kwa Yehova. Kuti kwacitika ubusanso ubukalamba ubwingalenga twaba na mafya na yambi. Nelyo kuti balatucusha pa mulandu ne fyo twasuminamo. Nga twakwata amafya ya musango uyu nalimo kuti twalatontonkanya ukuti: ‘Mulandu nshi ifintu fya musango uyu filencitikila? Bushe paba ifyo nalufyanya? Bushe aya amafya yalelangilila ukuti Yehova talempaala?’ Bushe mwalibala amutontonkanyapo ifi? Nga mwalitontonkanyapo ifi tamufwile ukufuupuka. Ababomfi ba kwa Yehova aba cishinka abengi balitontonkanyapo pali ifi fipusho.—Amalu. 22:​1, 2; Haba. 1:​2, 3. w23.04 ibu. 14 amapara. 1-2

Nga twatunkwa ukucita ifyabipa, tatutontonkanya pa kucita ifili fyonse ifingalenga bucibusa bwesu na Lesa bwapwa. Yehova atwenekela ukuba “ne cumfwila ica kufuma ku mutima.” (Rom. 6:17) Ifyo atweba ukucita lyonse filaba fye bwino, kabili te kuti twalule amafunde yakwe. (Esa. 48:​17, 18; 1 Kor. 6:​9, 10) Satana alabomfya ukutucusha nelyo ukutupatikisha ukucita fimo ifyo Yehova alesha pa kuti fye atunenune. Ico afwaisha ‘kutulya,’ pa kuti apwishe bucibusa bwesu na Yehova. (1 Pet. 5:8) Abena Kristu bakubalilapo balebatiinya, baleboma, kabili balebepaya, pa fyo balefwaya ukutwalilila aba cishinka kuli Yehova. (Imil. 5:​27, 28, 40; 7:​54-60) Na muno nshiku mwine Satana alacusha abantu ba kwa Yehova. Tulamona ifyo abalwani besu baba no bunkalwe kuli bamunyinefwe na bankashi mu fyalo pamo nga Russia. Kabili mu calo fye conse abalwani besu balacusha aba bwananyina mu nshila ishalekanalekana. Satana tatusansa fye mu kulungatika, lelo alabomfya ne “micenjelo” pa kuti apwishe bucibusa bwesu na Yehova.—Efes. 6:11. w23.07 amabu. 15-16 amapara. 6-9

Ilyo mulesambilila ifingi ifyaba mu Cebo ca kwa Lesa, mwakulaya muletemenwako Yehova. Ukutemwa Yehova e kulenga ukuti mulecita ifyo musambilila. Kulalenga mulesalapo bwino ifyakucita ukubomfya amashinte ya mafunde aya mu Baibo. Mulaaluka mu fyo muletontonkanya ne fyo mucita pantu mulafwaya ukulalenga Lesa ukulasekelela. Nga filya fine umwana apashanya wishi uwamutemwa, e fyo na imwe mulepashanya Shinwe wa ku muulu. (Efes. 5:​1, 2) Kuti twatontonkanya ukuti: ‘Bushe ino nshita nalitemwa sana Yehova ukucila ifyo namutemenwe ilyo nabatishiwe? Ukutula apo nabatishiwilwa, bushe ndapashanya Yehova mu fyo ntontonkanya na mu fyo ncita ifintu, maka maka ukutemwa aba bwananyina?’ Nga ca kuti pali ino nshita tamwatemwa Yehova nge fyo mwamutemenwe ilyo mwabatishiwe, tamufwile ukufuupuka. Ifi fine e fyacitikile na Bena Kristu ba kubalilapo. Yesu takeene Abena Kristu ba kubalilapo, na ifwe bene takatukaane. (Ukus. 2:​4, 7) Alishiba ukutila kuti twamutemwa na kabili nge fyo twamutemenwe ilyo twasambilile fye icine. w23.07 ibu. 8 amapara. 2-3

Umutumwa Petro alicitile ifilubo ifingi. Ica kubalilapo, Petro ali-icetekele sana ica kuti alilandile no kuti nangu abatumwa bambi bashe Yesu ena tali no kumusha. (Marko 14:​27-29) Inshita imbi, pa miku iingi Petro alifililwe ukutwalilila ukuba uwalola. (Marko 14:​32, 37-41) Ilyo ibumba lyaishile ne mpanga ne nkonto mu kwikata Yesu, Petro alimushile. (Marko 14:50) Mu kulekelesha, Petro alikeene Yesu ukuti tamwishibe, ica kuti alilapile no kulapa pali ubu bufi abepele. (Marko 14:​66-71) Cinshi Petro acitile ilyo ailwike ukuti alicitile ulubembu ulukalamba? Alyumfwile ubulanda kabili alililile icine cine. (Marko 14:72) Yesu takalipile Petro pa fyo alufyenye, lelo amwebele ukuti ali no kumupeela imilimo iikalamba. (Yoh. 21:​15-17) Petro alishibe ukuti alicitile ulubembu ulukalamba, lelo alitwalilile ukwesha ukulacita ifisuma. Cinshi calengele? Ni co alishininkishe ukuti Shikulu wakwe Yesu talekele ukumutemwa. Finshi tulesambililako? Yehova afwaya twashininkisha ukuti alitutemwa kabili kuti atwelela.—Rom. 8:​38, 39. w24.03 amabu. 18-19 amapara. 13-15

Ukucita ubulalelale kulalenga umuntu alaumfwa insoni, alaimona ukuti tacindama, kabili kuti akwata ifumo nelyo icupo ukupwa. Kanshi kuti cawama ukukanaya ku “ng’anda” ya mwanakashi umuwelewele. Abacita ubulalelale balaleka ukuba ifibusa fya kwa Yehova, kabili abengi balambula na malwele ayalenga bafwa bwangu. (Amapi. 7:23) Amashiwi ya kulekeleshako mu cipandwa 9 icikomo 18 ica Amapinda yatila: “abo eta baba umwashika mu Nshiishi.” Nomba mulandu nshi abengi basuminina ukuya umwanakashi umuwelewele nga abeta, nangu ca kutila kuti bakwata amafya ayengi? (Amapi. 9:​13-18) Cimo ico tufwile ukutalukako iciseekele sana muno nshiku, kutamba ifye shiku. Abantu bamo bamona ukuti ukutamba ifye shiku takwabipa. Ukutamba ifye shiku kulalenga umuntu aonaika, alaimona ukuti wa cabecabe kabili tacindika na bantu bambi. Na kabili calyafya ukuleka ukutamba ifye shiku. Umuntu nga atamba ifye shiku cilafya ukuleka ukutontonkanya pa fyo amwene. E lyo kabili, ukutamba ifye shiku kulalenga alatontonkanya pa fyabipa, kabili alafwaisha ukucita ifyo atambile. (Kol. 3:5; Yako. 1:​14, 15) Abengi abatamba ifye shiku balacita ifyo batamba. w23.06 ibu. 23 amapara. 10-11

Nangu ca kuti amabuteko yambi limo yalalwishanya no buteko bwa Anglo-America, tayakafumyepo ubu buteko. Pantu “ilibwe” ilimininako Ubufumu bwa kwa Lesa likashonaula amakasa ya cimpashanya ayemininako ubuteko bwa Anglo-America. (Dan. 2:​34, 35, 44, 45) Bushe mwalishininkisha ukuti ubusesemo bwa kwa Daniele ubulanda pa makasa ya cela e lyo ne bumba bwa cine? Nga mwalishininkisha, ninshi mufwile ukutontonkanya pa fyo mutungulula ubumi bwenu pali ino nshita. Tamwakulafwaisha ukukwata ifyuma pantu namwishiba ukuti cino calo cabipa cili no konaulwa nomba line. (Luka 12:​16-21; 1 Yoh. 2:​15-17) Ukumfwikisha ubu busesemo kukalenga mukamone umulandu cacindamina ukubomba umulimo wa kubila imbila nsuma e lyo no kusambilisha. (Mat. 6:33; 28:​18-20) Pa numa ya kubelenga ubu busesemo, kuti mwatontonkanya pali ici cipusho, ‘Bushe ifyo nsalapo ukucita filalangilila ukuti nalicetekela ukuti Ubufumu bwa kwa Lesa buli no konaula amabuteko ya bantunse?’ w23.08 ibu. 11 amapara. 13-14

Muleicefya kabili muleibukisha ukutila te kuti mucite fye fyonse ifyo mufwaya ukucita pa mulandu no mushinku wenu, ubumi bwenu, nelyo ifintu fye fimbi. Nga filya Barsilai acitile, mwilasumina ukubomba imilimo imo iyo mumwene ukuti pa mulandu no mushinku wenu e lyo no bumi bwenu, te kuti mukumanishe ukuibomba. (2 Sam. 19:​35, 36) Mulepeelako bambi imilimo nga filya Mose acitile. (Ukufu. 18:​21, 22) Nga namuicefya tamwakale-enekela ukucita ifintu ifingalenga mwanaka. Tatulingile no kulaumfwa kwati ni fwe tulengele bambi basalepo ukucita ifyabipa. Tekuti tusalileko bambi ifya kucita, kabili tekuti tubacingilile ku mafya yesako nga basalapo ukucita ifyabipa. Ku ca kumwenako, umwana umwaume nelyo umwana umwanakashi, mu kuya kwa nshita kuti asalapo ukuleka ukubombela Yehova. Ici kuti calenga abafyashi ukumfwa ububi icine cine. Nomba ici ciba cisendo icafina, ku bafyashi abalemona kwati e balengele umwana asalepo ukuleka ukubombela Yehova. Yehova tafwaya abafyashi ukulaumfwa ukuti e balengele umwana ukuleka ukumubombela. w23.08 ibu. 29 amapara. 11-12

Samsone tali uwapwililika, ali fye muntu nga ifwe. E ico inshita shimo talesalapo bwino ifya kucita. Fimo ifyo asalilepo ukucita mwalifumine ifyabipa nga nshi. Ilyo Samsone abombele nga kapingula pa nshita iinono, “atemenwe umwanakashi wa ku Mupokapoka wa Soreke, ishina lyakwe ali ni Delila. Inshita imo Samsone alikobekele umwanakashi umuPelishiti. Ifi acitile ‘fyafumine kuli Yehova,’ pantu “alefwaya apa kulwila na baPelishiti.” Pa numa, Samsone aliile mu ng’anda ya kwa cilende mu ncende ya baPelishiti ku Gasa. Pali ubu bwine bushiku Lesa apeele Samsone amaka ica kuti anukwile ifiibi fya pa mpongolo ya musumba no kufisenda, kabili ifi acitile fyalengele umusumba ukukanacingililwa. (Abapi. 14:​1-4; 16:​1-3) Nomba Delila ena nalimo ali mwina Israele, kanshi filya Samsone atemenwe Delila tafyali no kulenga alelwa na baPelishiti. Delila alisumine ukuti abaPelishiti bamupeele indalama ishingi pa kuti afutuke Samsone. w23.09 ibu. 5 amapara. 12-13

Ukwiluka kuti kwalenga twaba abafuuka. Umuntu uwafuuka alailama nga ca kuti bamo balanda ifipusene ne fyo asuminamo. Icishinka ca kuti, abantu kuti batwipusha icipusho nelyo ukucita fimo ukwabula no kutweba umulandu bacitila ifyo. Kanshi ilyo tushila-asuka, kuti cawama ukwibukisha ukuti tatwishibe icilengele ukuti uyo muntu epushe ico cipusho. (Amapi. 16:23) Natumone ifyo Gideone ayaswike abaume abena Efraimu. Balimwipwishe ninshi nabakalipa nga nshi, umulandu ashabetile ku kulwisha abalwani ba bena Israele. Nomba cinshi calengele bafulwe sana? Nalimo cilumba calengele. Te mulandu ne calengele, Gideone alicindike sana ifyo baleumfwa, kabili alibaswike no mutima uwafuuka. Finshi fyacitike pa numa? Baibo itila: “Ilyo alandile aya mashiwi, balitekele imitima.”—Abapi. 8:​1-3. w23.09 ibu. 16 amapara. 8-9

Yehova na Yesu balitemwana icine cine nga filya wishi atemwana no mwana umwaume. Ukwabula no kutwishika Yehova alyumfwile sana ububi ilyo amwene umwana wakwe balemucusha kabili bamukaana. Abafyashi bonse abafwilwapo balishiba ifyo cikalipa ukufwilwa umwana. Twalikwata icitetekelo icakosa ica kuti abafwa bakabuuka, lelo ici tacifumyapo ubukali tumfwa lupwa lwesu nga afwa. Ici cilangililo cilalenga twaumfwikisha ifyo Yehova aleumfwa ilyo alemona umwana wakwe alecula no kufwa muli ulya mwaka wa 33 C.E. (Mat. 3:17) Kanshi ilyo ubushiku bwa Cibukisho bushilafika, mukeshe ukuisambilishako pa cilubula pe sambililo lya pa lwenu, nelyo pa mapepo ya lupwa. E lyo pa bushiku bwa Cibukisho mwikalaba ukutamba amapepo ya lucelo ayaibela. Nga twaipekanishisha limo ukusangwa ku Cibukisho cikatwangukila ukwafwako bambi ukuti nabo bakanonkelemo.—Esra 7:10. w24.01 ibu. 11 amapara. 10-12

Inshila imo iyo Yehova engalengelamo twaba na maka, kupepa kuli ena. Yehova akasuka amapepo yesu ilyo akatupeela “amaka ayacila aya bantunse.” (2 Kor. 4:7) Na kabili kuti twaba na maka nga ca kuti tulebelenga Icebo cakwe no kutontonkanya pa fyo tulebelenga. (Amalu. 86:11) Amashiwi ayaba mu Cebo ca kwa Lesa ‘ya maka.’ (Heb. 4:12) Nga mulepepa kuli Yehova no kubelenga Icebo cakwe, mukaba na maka ayo mukabila pa kulashipikisha, ukulasekelela e lyo no kubomba umulimo uwakosa uo bengamupeela. Lekeni tulande pa fyo Yehova akoseshe kasesema Yona. Yona alibutwike umulimo uwakosa uo Yehova amupeele. Pa mulandu ne fyo acitile, kwashele fye kwempe nga alifwile, kabili nga alipaishe na abo ali nabo mu bwato. Ilyo bamupoosele muli bemba, aisangile mu nda ya cisabi icikalamba umwaletiinya sana. Finshi Yona acitile ilyo ali mu nda ya cisabi pa kuti abe na maka? Alipepele kuli Yehova.—Yona 2:​1, 2, 7. w23.10 ibu. 13 amapara. 4-6

Nangu ca kuti umutumwa Petro alembeele Abena Kristu ba kubalilapo aya makalata, Yehova alilengele yaba mu Cebo Cakwe. Kanshi fingi twingasambililako kuli aya makalata. (Rom. 15:4) Twikala na bantu abashacetekela amasesemo yaba mu Baibo. Abakaanya kuti balatupumya ukuti kale twatendeka ukulanda ukuti impela ili no kwisa. Bamo batila impela tayakese. (2 Pet. 3:​3, 4) Nga ca kuti uulelanda aya mashiwi untu tuleshimikilako, uo tubomba nankwe nelyo ni lupwa wesu, kuti twafilwa ukuba ne citetekelo. Petro alilandile pa fingatwafwa. Bamo batontonkanya ukuti Yehova alekokola ukuleta impela. Ifyo Petro alembele kuti fyalenga twalamona ifintu nge fyo Yehova afimona, pantu filatwibukishako ukuti ifyo Yehova amona inshita fyalipusana ne fyo tuimona. (2 Pet. 3:​8, 9) Kuli Yehova imyaka 1,000 aimona fye ngo bushiku bumo. Yehova alitekanya, tafwaya umuntu nangu umo ukonaulwa. Ilyo ubushiku bwakwe bukafika, akaleta impela. w23.09 amabu. 26-27 amapara. 2-5

Mulandu nshi umutumwa Paulo alembeele iyi kalata ku Bena Kristu abaHebere abaleikala mu Yudea? Nalimo kwali imilandu ibili iyalengele. Umulandu wa kubalilapo, alefwaya ukubakoselesha. Abengi ilyo tabalaba Abena Kristu balekonka imipepele ya ciYuda pa kupepa. Abali kale bashimapepo babo nalimo balebapumya ifi baishileba Abena Kristu. Mulandu nshi? Pantu Abena Kristu tabakwete itempele ilyalemoneka bwino ilyo balebomfya pa kupepa. Kabili tabakwete ne ciipailo apa kutuulila amalambo kuli Lesa, nelyo bashimapepo abakuba pa ntanshi pa kupepa. Ifi nalimo fyali no kulenga Abena Kristu bamo ukunenuka kabili fyali no kunasha icitetekelo cabo. (Heb. 3:​12, 14) Nalimo bamo baletontonkanya no kubwelela ku mipepele yabo iya baYuda. Umulandu uwalenga bubili wa kuti, Paulo alefwaya ukweba Abena Kristu abaHebere ukuti tabaleisambilisha icine icashika, e kutila“ukulya ifyakosa” ifyaba mu Cebo ca kwa Lesa. (Heb. 5:​11-14) Cimo icalengele bamo balefilwa ukuisambilisha icine icashika, ni co balitwalilile ukukonka Amafunde ya kwa Mose. w23.10 amabu. 24-25 amapara. 3-4

Abanakashi bamo balasalapo ukukanaupwa. (Mat. 19:​10-12) Mulecetekela ukuti Yehova na Yesu tabamona ukuti apo tamwaupwa tamwacindama kuli bena. Mwi sonde lyonse aba mu cilonganino balapashanya bankashi abashimbe. Apo balitemwa aba bwananyina kabili balabasakamana, balaba ni bankashi kabili abafyashi ku bantu abengi. (Marko 10:​29, 30) Bamo balabombesha mu mulimo wa kwa Lesa. Abena Kristu abanakashi balabombesha sana mu mulimo wa kubila imbila nsuma. (Amalu. 68:11) Bushe kuti mwabombako umulimo wa nshita yonse? Kuti mwabombako bupainiya bwa nshita yonse, umulimo wa makuule nelyo ukubombela pa Bethel. Mulepepelapo sana pa fyo mufwaya ukucita. Mule-ebako bambi ababombako imilimo mulefwaya ukubomba. Kabili mulebeba balemwebako fimo ifyalenga bakumanishe ukucita ifyo bapangile. Lyena mulepanga ukucita ifyo mwingakumanisha. Nga mwatendeka umulimo wa nshita yonse, mukabomba imilimo na imbi ingi mu cilonganino ca kwa Lesa. w23.12 ibu. 22 amapara. 16-17

Ilyo ubushiku bukalamba bulepalama, tulebukisha sana ukuti tulingile ukumfwila ifunde lya kulabila imbila nsuma. Nomba cilakosa ukulabila imbila nsuma nga ca kuti tatukwete indalama nelyo balitubinda ukubila imbila nsuma. Finshi twingacita pakuti tulebika amano ku kucita ifya kwa Lesa? Mulecetekela ukuti “Yehova wa mabumba” aba na ifwe. Akatwalilila ukulatutungilila nga tulebika ifya kwa Lesa intanshi. E ico tapali nangu cimo ico tufwile ukutiina. (Hag. 2:4) Yehova afwaya twabika amano ku mulimo wa kupususha, e kutila ukulenga abantu ukuba abasambi. Kasesema Hagai alyebele abantu ba kwa Yehova ukutendeka na kabili umulimo wa kukuula itempele. Kabili nga bacita ifyo kasesema abebele, Yehova abalaile ukuti “nakulamupaala.” (Hag. 2:​18, 19) Na ifwe bene kuti twacetekela ukuti Yehova akalatupaala nga twabika fye amano ku mulimo atweba ukubomba. w23.11 ibu. 16 para. 8; ibu. 17 para. 11

Muli kalata umutumwa Paulo alembeele abena Roma, alandile ukuti abantu bonse babembu. Nomba bushe Lesa kuti atumona shani ukuti tuli balungami nangu ca kuti tuli babembu? Pa kuti Abena Kristu ba cine beshibe icasuko kuli ici cipusho, Paulo alandile pali Abrahamu. Yehova alemona Abrahamu kuti mulungami ilyo aleikala mu calo ca bena Kanaani. Mulandu nshi Yehova alemwena Abrahamu ukuti mulungami? Bushe ni co Abrahamu alekonka Amafunde ya kwa Mose? Awe, tecalengele. (Rom. 4:13) Aya Mafunde ya kwa Mose yaishilebako pa numa ya myaka 400 ukutula apo Yehova aitile Abrahamu ukuti mulungami. Kanshi mulandu nshi uukalamba uo Lesa alemwena Abrahamu kuti mulungami? Pa mulandu ne cikuuku Yehova akwata, alemona Abrahamu ukuti ali mulungami pa mulandu ne citetekelo akwete.—Rom. 4:​2-4. w23.12 ibu. 3 amapara. 4-5

Pali bulya bwine bushiku kasesema Natani aebele Imfumu Davidi amashiwi yali pa muulu, Yehova aebele Natani ukuti Davidi te wali no kumukulila itempele. (1 Imila. 17:​3, 4, 11, 12) Finshi Davidi acitile ilyo bamwebele ifyo Yehova alandile? Atendeke ukulonganika icuma e lyo na fimbi ifyalefwaikwa pa kukuula, ifyo umwana wakwe Solomone ali no kubomfya. (1 Imila. 29:​1-5) Pa numa fye ya kweba Davidi ukuti te wali no kukuulila Yehova itempele, Yehova alipangene nankwe icipangano. Yehova aebele Davidi ukuti umwana uukafuma mu lupwa lwakwe akateka umuyayaya. (2 Sam. 7:16) Mu calo cipya ilyo Yesu akalateka, Davidi akatemwa sana ilyo akeshiba ukuti Yesu Imfumu afumine mu lupwa lwakwe. Ili lyashi litusambilisha ukuti nangu ca kuti te kuti tucite fyonse ifyo tufwaya ukucita mu mulimo wa kwa Yehova, Lesa wesu kuti atucitila ifintu fimo ifyo tushile-enekela no kwenekela. w23.04 ibu. 16 amapara. 8-10

Mukasanga ukuti ilyashi limo ilya mu Baibo kuti lya musansamusha nga muletiina. Ku ca kumwenako, nalimo amashiwi ayaba mwi buuku lya kwa Yobo, Amalumbo, Amapinda nelyo amashiwi Yesu alandile muli Mateo icipandwa 6, kuti yamukoselesha. Nga mulepepa kuli Yehova no kubelenga Icebo cakwe, mukomfwa ukuti alemusansamusha. Kuti twacetekela ukutila Yehova akulaba na ifwe mu nshita ya mafya. Takatulekeleshe. (Amalu. 23:4) Yehova alitulaya ukutucingilila, ukutwikasha, ukututungilila e lyo no kutusansamusha. Esaya 26:3 ilanda pali Yehova ukuti: “Mukacingilila abantu abashintilila pali imwe ne mitima yabo yonse; mukatwalilila ukubapeela umutende, pantu ni mwe bacetekela.” Kanshi mulecetekela Yehova kabili muleleka alemwafwa ilyo muli na mafya. Nga mulecita ifi mukaba na maka ilyo mukwete amafya. w24.01 ibu. 25 amapara. 16-17

Aya amashiwi ayafuma kuli Lesa ayali mwi lembo yalefikilishiwa muno nshiku. Kwaliba amashiwi na yambi ayatusansamusha ayalefikilishiwa muno nshiku. Amashiwi ya kuti: “Kabili abana bobe bonse, Yehova akabasambilisha, Kabili bakaba sana no mutende. Ukalimba imishila mu bulungami. . . . Tawakatiine nangu panono kabili takwakabe nangu cimo icikalakutiinya, Pantu fikataluka kuli iwe.” (Esa. 54:​13, 14) Nangu fye ni Satana, “lesa wa bwikashi buno,” te kuti aleshe abantu ba kwa Yehova ukubomba umulimo wa kusambilisha abantu pali Yehova. (2 Kor. 4:4) Abantu ba kwa Yehova balitendeke ukupepa Yehova ukulingana ne fyo afwaya, kabili tabakaleke ukumupepa ukulingana ne fyo afwaya. Bakatwalilila fye ukumupepa umuyayaya. Takuli icanso nangu cimo ico batupangila icikabomba! w24.02 ibu. 4 para. 10

Apo tuli Bena Kristu, twalicindika sana umulapo wesu uwa kuipeela kuli Yehova. Umulapo twalapa ulakuma sana ifyo tusalapo ukucita, e lyo ne fyo tucita mu ndupwa. Tulabombesha pa kuti tulepeela aba mu lupwa lwesu ifyo bakabila. Na lyo line, tatuleka ifyo aba mu lupwa lwesu bafwaya fyalenga twafilwa ukukonka ifyo Yehova afwaya. (Mat. 10:​35,36; 1 Tim. 5:8) Inshita shimo ukucita ifi kulalenga twaleka ukumfwana na balupwa lwesu pa kuti fye tulenge Yehova alesekelela. Yehova e watendeke ulupwa kabili afwaya ukuti indupwa shileba ne nsansa. (Efes. 3:​14, 15) Nga tulefwaya ukulaba ne nsansa sha cine cine, tufwile ukulacita ifyo Yehova afwaya. Mulecetekela ukuti Yehova alatemwa ifyo muipeelesha ukumubombela ilyo mulesakamana ulupwa lwenu, no kulabalanga ukuti mwalibatemwa kabili mwalibacindika.—Rom. 12:10. w24.02 ibu. 18 amapara. 11, 13