August

Moneni ifishinka fibili ifyacindama ifyaba mwi lembo lili pa muulu: (1) Abalungama balakwata amafya. (2) Yehova alatupokololako ku mafya tukwata. Bushe Yehova atupokololako shani? Inshila imo iyo Yehova atupokolwelamo kulenga twaishiba ukuti te lyonse ifintu fyakulatwendela bwino, limo tukalakwata amafya muli cino calo. Nangu ca kuti Yehova alitulaya ukuti nga tulemubombela tukalaba ne nsansa tatweba ukuti tatwakulaba na mafya. (Esa. 66:14) Afwaya tuletontonkanya pa fikacitika ku ntanshi ilyo tukaba no bumi ubwabula amafya umuyayaya. (2 Kor. 4:​16-18) Lelo pali ino nshita alatwafwa ukutwalilila ukumubombela cila bushiku. (Inyimbo 3:​22-24) Finshi twingasambililako ku babomfi ba kwa Yehova abaliko ku kale e lyo na babako muno nshiku? Limo kuti twakwata amafya ukwabula ukwenekela. Nomba nga twashintilila pali Yehova lyonse akalatukosha.—Amalu. 55:22. w23.04 amabu. 14-15 amapara. 3-4

Kuti twapashanya ifyo Yosefe na Maria balecita abaleitemenwa ukumfwila ubuteko na lintu cisha-angwike. (Luka 2:​1-6.) Ilyo Maria ali ne fumo nalimo ilya myeshi 9, ena no mwina mwakwe Yosefe balibebele ukucita fimo ifya-afishe ukukonka. Augusti uwaleteka ubuteko bwa bena Roma, alifumishe ifunde ukuti abantu balingile ukuya ku mushi ku mwabo no kuyalembesha ku buteko. Yosefe na Maria bali no kwenda amakilomita 150 pa kuti bafike ku Betelehemu. Nomba pa kuti bafike kuli ili tauni bali no kupita na mu mpili. Taca-angwike ukuba pali ubu bulendo maka maka kuli Maria. Yosefe na Maria nalimo balisakamene sana pa fyo bali no kwenda filya Maria ali pa bukulu, elyo na pa mwana uwali mwi fumo. Bafwile balesakamana ukuti nalimo Maria ali no kupapila mu nshila. Nalimo balesakamana na pa fyo bali no kusunga umwana nga afyalilwa mu nshila, pantu ali ni Mesia uo balelolela pa myaka iingi. Bushe ifi fyali no kulenga bafilwa ukumfwila ubuteko? Yosefe na Maria tabalekele ifyo balesakamana fyalenga bafilwa ukumfwila ubuteko. Yehova alitemenwe ukuti balimumfwilile kabili balibasakamene sana. Maria alifikile fye bwino ku Betelehemu, kabili alifyele no mwana umusuma ne ci calengele afikilishe ubusesemo!—Mika 5:2. w23.10 ibu. 8 para. 9; ibu. 9 amapara. 11-12

Finshi mwingacita nga ca kuti mulomfwa umwenso wa kwasukapo ilyo mulelongana? Cimo icingamwafwa, kupekanya bwino. (Amapi. 21:5) Nga ca kuti mwaishiba bwino ifyo mukaya mu kusambililapo, tamwakaleumfwa umwenso wa kwasukapo. Na kabili, muleasuka ifyasuko ifipi. (Amapi. 15:23; 17:27) Tamwakaleumfwa umwenso nga ca kuti mupekenye ukuya-asuka icasuko icipi. Nga mwa-asuka icasuko icipi mu mashiwi yenu, mukalanga ukuti namupekanya bwino kabili namumfwikisha ne fyo mulesambililapo. Nomba kuti mwacita shani nga ca kuti mucili muleumfwa umwenso wa kwasukapo ukucila pa muku umo nangu ca kuti namucita ifi twalandapo? Muleibukisha ukuti Yehova alatasha pa fyo muleibikilishako ukwasukapo apapelele amaka yenu. (Luka 21:​1-4) Yehova tatweba ukucita ifyo tushingakumanisha. (Fil. 4:5) Ishibeni ifyo mwingakumanisha ukucita, esheni ukucita ifyo mwapanga, kabili pepeni ukuti mushipe. Nalimo ico mwingabalilapo ukupanga, kwasuka icasuko icipi. w23.04 ibu. 21 amapara. 6-8

Umutumwa Paulo atupashenye ku bashilika abalola kabili abaipekenye ukuya ku bulwi. Nga kwaba inkondo, abantu benekela umushilika ukuba uwaipekanya ukulwa inshita iili yonse. Na ifwe tufwile ukufwala ica kucinga icifuba ica citetekelo kabili ica kutemwa ne subilo nge ca kucinga umutwe. Ica kucinga icifuba calecingilila umutima wa mushilika. Icitetekelo e lyo no kutemwa na fyo filacingilila umutima wesu uwa mampalanya. Iyi mibele kuti yalenga twatwalilila ukubombela Lesa e lyo no kukonka Yesu. Icitetekelo cilalenga twacetekela ukuti nga tulebombela Yehova no mutima onse akatulambula. (Heb. 11:6) Icitetekelo cikalenga tukatwalilile ukuba ne cishinka kuli Yesu Intungulushi yesu, no kutwalilila ukushipikisha na lintu tuli na mafya. Kuti twakosha icitetekelo cesu no kulashipikisha amafya nga ca kuti tulesambilila ku baume na banakashi aba muno nshiku abatwalilila ne cishinka nangu ca kuti balabacusha nelyo bapiina. Nga ca kuti tulepashanya abaume na banakashi aba muno nshiku aba-angusha imikalile yabo pa kuti balebombesha mu mulimo wa kwa Lesa, te kuti tutemwishe ifyuma. w23.06 ibu. 10 amapara. 8-9

Ukuilama kuti kwalenga twakaana ukucita ifyabipa. Tulakabila ukuilama na pa kuti tufikilishe ifyo twapanga ukucita maka maka nga ca kuti ifyo twapanga ukucita nafikosa ukufifishapo nelyo tatulefwaya ukuficita. Ibukisheni ukuti ukuilama kwaba pa fisabo fya mupashi, kanshi mulelomba Yehova ukumupeela umupashi wa mushilo pa kuti muleba ne yi mibele yacindama. (Luka 11:13; Gal. 5:​22, 23) Mwilalolela ukuti ifintu fikabe bwino. Ifintu muli cino calo tafyakatale afibapo bwino, kanshi tatufwile ukulalolela ifintu ukuba bwino pa kuti tucite ifyo twapanga ukubomba mu mulimo wa kwa Lesa. Nga tulelolela ukuti ifintu fikabe bwino, te kuti tufikilishe ifyo tufwaya ukucita. Limo kuti twafilwa ukufikilisha ifyo twapanga pantu tulemona kwati nafikosa. Ifi nga e fimucitikila, nalimo kuti mwatendekelapo ukucita ifinono pa fyo mwapanga. Nga ca kuti mulafwaya ukuba ne mibele iisuma, nalimo kuti mwatendeka ukulalanga iyo mibele mu tuntu utunono. Nga ca kuti mufwaya ukulabelenga Baibo yonse, nalimo kuti mwatendeka ukulabelenga Baibo pa nshita iinono. w23.05 ibu. 29 amapara. 11-13

Muli shino nshiku sha kulekelesha, Yehova alabomfya icilonganino cakwe ukutupekanishisha ifya kulya fya ku mupashi ifitwafwa ukulaenda mu “Nshila ya Mushilo.” (Esa. 35:8; 48:17; 60:17) Kuti twatila umuntu nga asumina ukulasambilila Baibo ninshi akwata ishuko lya kutendeka ukwenda mu “Nshila ya Mushilo.” Bamo bendamo fye panono no kufumamo. E lyo bambi balafwaisha ukutwalilila ukwenda muli iyi nshila mpaka bakafike na ku mpela. Ni kwi uko uyu musebo utwala? Abakwata isubilo lya kwikala ku muulu, “Inshila ya Mushilo” itwala kwi “bala lya kwa Lesa” ku muulu. (Ukus. 2:7) E lyo abakwata isubilo lya kwikala pano isonde bena, “Inshila ya Mushilo” ikabatwala ku kupwililika ukukabako pa mpela ya myaka 1,000 iyo Kristu akateka. Nga mulenda muli iyi nshila, tamufwile ukubwelela inuma. Kabili mwikaleka ukwendamo mpaka mukafike mu calo cipya! w23.05 ibu. 17 para. 15; ibu. 19 amapara. 16-18

Nga mwatontonkanya pali fyonse ifyo Yehova amucitila, mukalafwaisha ukumutasha kabili mukafwaya ukuipeela kuli ena. (Amalu. 116:​12-14) Baibo yalilungika ifi ilanda ukuti Yehova e upeela “ica bupe conse icisuma no bupe bonse ubwapwililika.” (Yako. 1:17) Ubupe ubwacila pa fya bupe fyonse ifyo Lesa atupeela, lilambo lya Mwana wakwe Yesu. Tontonkanyeni pa fyo ubu bupe bwawama! Icilubula calilenga mwaba cibusa wa kwa Yehova. Kabili calilenga mwakwata ne shuko lya kwisaikala umuyayaya. (1 Yoh. 4:​9, 10) Ukuipeela kuli Yehova ni nshila imo iisuma sana iyo mwingalangilamo ukuti mulatasha pa fyo Yehova amutemwa na pali fyonse ifyo amupaala.—Amala. 16:17; 2 Kor. 5:15. w24.03 ibu. 5 para. 8

Nga twamona ifyabipa ifyo abantu balecita muli cino calo, tumfwa nge fyo Lote umulungami aumfwile. Ali no “bulanda nga nshi ku mibele ya kuilekelesha iya bampulamafunde,” pantu alishibe ukuti Shifwe wa ku muulu alipata imibele yabipa. (2 Pet. 2:​7, 8) Apo Lote aletiina Lesa kabili alimutemenwe sana, alipatile ifyabipa ifyo abantu balecita. Na muno nshiku mwine, abantu tabatiina Yehova kabili balacita ifyabipa. Na lyo line, kuti twatwalilila abasanguluka nga natutemwa Yehova kabili tulemutiina. Ifyo Yehova alemba mwi buuku lya Amapinda, filatwafwa ukutwalilila ukuba abasanguluka. Abena Kristu bonse fye, abaume na banakashi, abanono na bakalamba, kuti banonkelamo mu kusambilila ifyaba muli ili buuku. Nga tuletiina Yehova, tatuba ifibusa na bantu abacita ifyabipa. w23.06 ibu. 20 amapara. 1-2; ibu. 21 para. 5

Nalimo balupwa lwenu balamukaanya ukubombela Yehova, nelyo mwali-ipusula ifintu fimo pa kuti mulebika Ubufumu pa ntanshi. (Mat. 6:33) Nga ca kuti ifi e fyo caba, kuti mwacetekela ukuti Yehova alamona ifyo mumubombela. (Heb. 6:10) Mufwile mwali-imwena ukuti ifyo Yesu alandile fya cine. Alandile ati: “takwaba uwasha ing’anda nelyo bamunyina nangu inkashi nelyo wishi nangu nyina nelyo abana nangu amabala pa mulandu wandi na pa mulandu wa mbila nsuma uushakapokelele pali ino nshita imiku 100, amayanda, bamunyina, inkashi, banyina, abana, amabala e lyo no kumucusha pa mulandu wa ine. Kabili ku ntanshi akapokelela umweo wa muyayaya.” (Marko 10:​29, 30) Ifyo Lesa amupaala fyalicila pa fyo mwaipusula pa kuti mulemubombela.—Amalu. 37:4. w24.03 ibu. 9 para. 5

Ilyo Abena Kristu ba mu Yudea baponenwe ne cipowe, abali mu cilonganino ca mu Antioke balicitilepo fimo pa kuti bafwe aba bwananyina. “Umo na umo alefwaisha ukutuma ifya kwafwilisha aba bwananyina abaleikala mu Yudea ukulingana na po akwatile.” (Imil. 11:​27-30) Nangu ca kuti aba bwananyina abaponenwe ne cipowe baali ukutali sana, Abena Kristu abali mu Antioke balefwaisha nga nshi ukubafwa. (1 Yohane 3:​17, 18) Na ifwe bene muno nshiku kuti twalanga ukuti tulomfwila aba bwananyina uluse, nga tulebafwa ilyo twaishiba ukuti nabaponenwa no busanso ubukalamba. Tulafwaisha nga nshi ukubafwa. Nalimo kuti twacita ifi nga twaipusha baeluda nga kuti twa-afwilishako amakuule, ukusangwilako mu mulimo wa mwi sonde lyonse, nelyo ukupepelako aba bwananyina abaponenwe no busanso ubukalamba. Bamunyinefwe na bankashi bakalakabila ubwafwilisho pa kuti bakalekwata fyonse ifyo bakalakabila. Ilyo Imfumu yesu Kristu Yesu akesa mu kupingula abantu akatusange tulelanga uluse pa kuti akatwite no ‘kwingila mu Bufumu bwakwe.’—Mat. 25:​34-40. w23.07 ibu. 4 amapara. 9-10; ibu. 6 para. 12

Yesu na o alepashanya ifyo Yehova aba, uushipampamina fye pa cintu cimo. Atuminwe ku “mpaanga ishaluba isha mu ng’anda ya kwa Israele.” Lelo alilangile ukuti talepampamina fye pa cintu cimo ilyo alebomba umulimo bamupeele. Bushiku bumo umwanakashi uushali umwina Israele alimupaapeete ukuti ondape umwana wakwe “uwaiketwe icibi ku cibanda.” Yesu alyumfwilile uluse uyu mwanakashi, E ico alicitile ifyo amulombele no kuposha umwana wakwe. (Mat. 15:​21-28) Natulande pa ca kumwenako na cimbi. Ilyo atendeke umulimo wakwe, Yesu atile: “Onse uwankaana . . . , na ine nkamukaana.” (Mat. 10:33) Nomba bushe Yesu alikeene Petro uwamukeene imiku itatu? Awe. Yesu alimwene ukuti Petro nalapila icine cine kabili Petro ali ne citetekelo. Ilyo Yesu abuukile, alimoneke kuli Petro kabili afwile alimulangile ukuti alimubelele uluse kabili ali mutemenwe. (Luka 24:​33, 34) Yehova Lesa na Yesu Kristu tabapampamina fya pa cintu cimo. Inga ifwe? Yehova enekela ifwe ukukanaumina kumo. w23.07 ibu. 21 amapara. 6-7

Finshi twingebako abantu abatwishika ukuti Lesa akafikilisha ifyo atulaya, pa fyo twasambilila ukuti kukaba Paradaise? Ica kubalilapo, Yehova umwine e watulaya ukuti kukaba Paradaise. Ibuuku lya Ukusokolola litila: “Uwaikala pa cipuna ca Bufumu atile: ‘Mona! Ndelenga ifintu fyonse fibe ifipya.’” Alikwatisha amano, wa maka kabili alafwaisha no kufikilisha ifyo alaya. Icalenga bubili, Yehova alishiba ukuti ifyo alaya fikacitika kabili kuli ena fyalicitika na kale. E mulandu wine alandile ukuti: “Aya amashiwi ya cishinka kabili ya cine. . . . Fyonse naficitika kale!” Takuli icingalenga Yehova afilwa ukufikilisha ifyo alefwaya ukucita. E co alandile ukuti: “Nine Alifa kabili Omega.” (Ukus. 21:6) Yehova akashinina Satana ukuti wa bufi kabili te kuti alenge Yehova ukukanacita ifyo afwaya. Kanshi umuntu nga ayasuka ukuti amashiwi ayaba pa Ukusokolola 21:4 yasuma sana, te kuti yafikilishiwe ilyo mulelanshanya nankwe, Kuti mwabelenga no kulanshanya nankwe amashiwi ayaba mu cikomo 5 na 6. Lyena kuti mwamulanga ifyo Yehova alanda ifilenga twacetekela ifyo atulaya ifyaba kwati cifwati.—Esa. 65:16. w23.11 ibu. 7 amapara. 18-19

Yehova aebele Abrahamu aya amashiwi ilyo ali ne myaka 75 ninshi takwatapo umwana, Abrahamu alifwile ilyo fimo ifyo bamulaile tafilafikilishiwa. Ilyo Abrahamu ayabwike Umumana wa Yufrate kabili alolela ne myaka 25, alimwene uko umwana wakwe Isaki afyelwe. Na kabili alilolelele imyaka 60 pa kuti amone uko abeshikulu bakwe babili, Esau na Yakobo bafyelwe. (Heb. 6:15) Lelo Abrahamu tamweneko uko abana bakwe baishileba uluko ulukalamba kabili bapyana ne Calo ca Bulayo. Na lyo line, uyu mwaume wa cishinka ali ni cibusa sana na Kabumba wakwe. (Yako. 2:23) Kabili ilyo Abrahamu akabuuka, akatemwa sana ukwishiba ukuti filya ali ne citetekelo kabili uwatekanya, fyalilengele inko ishingi ukupaalwa. (Ukute. 22:18) Finshi tulesambililako? Nalimo te kuti tumoneko fyonse ifyo Yehova atulaya fyafikilishiwa. Na lyo line, nga tuli abatekanya nga filya Abrahamu ali, kuti twacetekela ukuti Yehova akatulambula pali ino nshita e lyo na mu calo cipya.—Marko 10:​29, 30. w23.08 ibu. 24 para. 14

Ilyo Usia ali umwaice, ali uwaicefya. Alisambilile “ukutiina Lesa wa cine.” Aikele imyaka 65 kabili lyonse ilyo aleba uwa cishinka kuli Yehova, alemupaala. (2 Imilandu 26:​1-4) Usia alicimfishe abalwani bakwe abengi kabili alishininkishe ukuti umusumba wa Yerusalemu wacingililwa. (2 Imila. 26:​6-15) Ukwabula no kutwishika, Usia alitemenwe sana fyonse ifyo Lesa amwafwilishe ukucita. (Luk. Mil. 3:​12, 13) Imfumu Usia yalibeleshe ukweba abantu ifya kucita. Nalimo ici e calengele iletontonkanya ukutila kuti yacita conse ico ilefwaya, ukwabula uwa kuikaanya. Bushiku bumo Usia alingile mwi tempele lya kwa Yehova kabili ali-ituntumbile, atuulile ifyanunkila pa ciipailo, umulimo uo imfumu shishasuminishiwe ukubomba. (2 Imila. 26:​16-18) Shimapepo Mukalamba Asaria alimukonkele no kumukaanya, lelo Usia alifulilwe. Ku ca bulanda Usia tatwalilile uwa cishinka kuli Yehova ne ci calengele amukande no kumulwalika ifibashi. (2 Imila. 26:​19-21) Ifi nga tafyacitike nga ca kuti Usia alitwalilile ukuba uwaicefya. w23.09 ibu. 10 amapara. 9-10

Na lintu umutumwa Petro ali Umwina Kristu wasubwa, talekele ukulufyanya. Mu 36 ninshi Yesu alibwelelamo ku muulu, Petro epo ali ilyo Umwina Fyalo Korneli asubilwe no mupashi wa mushilo. Ici calelangilila ukuti “Lesa taba na kapaatulula” no kuti Abena Fyalo kuti baba mu cilonganino ca Bena Kristu. (Imil. 10:​34, 44, 45) Pa numa ya ifi, Petro alitendeke ukuliila pamo na Bena Fyalo, ico ashabalile acita. Na lyo line, Abena Kristu abaYuda balemona ukuti abaYuda na Bena Fyalo tabalingile ukuliila pamo. Ilyo abalemona ukuti abaYuda na Bena Fyalo tabalingile ukuliila pamo baishile ku Antioke, Petro alilekele ukuliila pamo na ba bwananyina Abena Fyalo. Nalimo icalengele acite ifi, ni co aletiina ukukalifya Abena Kristu abaYuda. Umutumwa Paulo alimwene ifyo Petro alufyenye kabili alimulungike pa cintubwingi. (Gal. 2:​13, 14) Nangu ca kuti alilufyenye, alitwalilile ukubombela Lesa. w23.09 ibu. 22 para. 8

Nga mwatontonkanya sana pali ifi fipusho nalimo kuti mwamona umo mulingile ukwaluka, lelo mwifuupuka. “Shikulu wa cikuuku,” kabili akamwafwa ukwaluka. (1 Pet. 2:3) Umutumwa Petro atukoseleshe ukuti: “Lesa . . . umwine akapwisha ukumusambilisha, akamwikasha, akamukosha kabili akalenga mwikatelentenshiwa.” Petro pa kubala, talemona kwati alingile ukuba pamo na Yesu. (Luka 5:8) Nomba apo Yehova na Yesu balemwafwa, Petro alitwalilile ukuba umusambi wa kwa Kristu. Ne ci calengele Yehova ukusuminisha Petro “ukwingila mu bufumu bwa muyayaya ubwa kwa Shikulwifwe kabili Umupusushi Yesu Kristu.” (2 Pet. 1:11) Ici cali cilambu icisuma! Na imwe nga mwatwalilila ukubombela Yehova kabili mwaleka na Yehova apwisha ukumusambilisha, mukaba no mweo wa muyayaya. Kabili “mukapokelela icikafuma mu citetekelo cenu, e kutila ipusukilo lyenu.”—1 Pet. 1:9. w23.09 ibu. 31 amapara. 16-17

Icikuulwa ca mushilo calikwete ulubansa ulukalamba ulwakwete ne linga, umo bashimapepo balebombela imilimo yabo. Mu lubansa lwa cikuulwa ca mushilo mwali icipailo ca mukuba ica kutuulilapo amalambo, e lyo ne cakusambilamo ica mukuba ico bashimapepo balebomfya pa kuisangulula ilyo tabalatendeka ukubomba imilimo yabo. (Ukufu. 30:​17-20; 40:​6-8) Pali ino nshita abasubwa babomba pano isonde mu lubansa lwa mu kati ulwe tempele ilikalamba ilya mampalanya. Filya pa cikuulwa ca mushilo pali ica kusambilamo, cilebukisha Abena Kristu bonse ukutwalilila ukuba abasanguluka ilyo balepepa Lesa. Nomba ni kwi aba mwi “bumba likalamba” bapepela? Umutumwa Yohane abamwene “nabeminina pa ntanshi ya cipuna ca bufumu,” apemininako ulubansa lwa ku nse, kabili “balamubombela akasuba no bushiku mwi tempele lyakwe.” (Ukus. 7:​9, 13-15) Tulatasha sana ifi Yehova atupeela ishuko ilya kumupepela mwi tempele lya mampalanya ilikalamba! w23.10 ibu. 28 amapara. 15-16

Inshila imo iyo Yehova atupeelelamo amaka, kubomfya baeluda. (Esa. 32:​1, 2) Kanshi mule-ebako baeluda nga muli na mafya. Mwilakaana nga bafwaya ukumwafwa. Yehova kuti ababomfya ukumulenga mwaba na maka. Ifi Baibo yatulaya ukwikala umuyayaya mu paradaise pe sonde nelyo mu Bufumu bwa ku muulu kuti fyalenga twaba ne subilo na maka. (Rom. 4:​3, 18, 19) Isubilo twakwata lilalenga tuleba na maka ya kushipikisha amafya, tuletwalilila ukubila imbila nsuma, kabili tulebomba ne milimo iyalekanalekana iyo batupeela mu cilonganino. (1 Tes. 1:3) Ili subilo limo line e lyakoseshe no mutumwa Paulo. ‘Balimutitikishe,’ ‘alepelenganishiwa,’ kabili ‘balimupoosele pa nshi.’ Inshita shimo ubumi bwakwe bwaleba mu kapoosa mweo. (2 Kor. 4:​8-10) Icalengele Paulo abe na maka ni co aletontonkanya pe subilo akwete. (2 Kor. 4:​16-18) Paulo abikile sana amano kwi isubilo ilyo akwete ilya kwikala ku muulu. Paulo aletontonkanya pali lilya isubilo kabili ici calengele alelengwa ‘umupya cila bushiku. w23.10 amabu. 15-16 amapara. 14-17

Ilyo mulepepa mufwile ukumona nga kuti inshita naifika iya kuti Yehova asuke ipepo lyenu’. Nalimo kuti twalatontonkanya ukuti Yehova alingile ukwasuka ipepo lyesu apopene fye. Nomba Yehova aleshiba inshita yalinga ilyo tulefwaya ubwafwilisho. (Heb. 4:16) Nga ca kuti Yehova taswike ipepo lyesu pa nshita tule-enekela, nalimo kuti twatontonkanya ukuti Yehova takaasuke ipepo lyesu. Nomba nalimo Yehova aletweba fye ukuti ‘te nshita yalinga.’ Ku ca kumwenako, munyina umwaice alepepa ukuti Yehova aposhe ubulwele alwele. Lelo ubulwele bwakwe tabwapolele. Yehova aposha uyu munyina mu cisungusho, Satana nga atile icalengele uyu munyina alebombela Yehova, ni co alimuposeshe. (Yobo 1:​9-11; 2:4) Na kuba Yehova alibika inshita umwine ilyo akafumyapo amalwele yonse. (Esa. 33:24; Ukus. 21:​3, 4) Pali ino nshita tatwenekela Yehova ukutuposha mu cisungusho. Kanshi uyu munyina alingile ukupepa kuli Yehova ukuti amupeele amaka alekabila pa kuti ashipikishe ubu bulwele alwele. Na kabili alingile ukupepa ukuti amupeele mutende wa kulinda amatontonkanyo yakwe, pa kuti atwalilile ukubombela Yehova ne cishinka. w23.11 ibu. 24 para. 13

Samsone tasalilepo bwino ifya kucita, alilufyenye. Na lyo line, tanenwike. Alefwaya inshila iya kulwilamo na baPelishiti, umulimo uo Yehova amupeele. (Abapi. 16:​28-30) Samsone alombele Yehova ukuti: “Lekeni njilandwile pa baPelishiti.” Lesa wa cine alikutike ku fyo Samsone alombele kabili alimupeele amaka ya cipesha mano na kabili. Ici calengele ukuti Samsone epaye abaPelishiti abengi pali ubu bushiku ukucila abo aipeye kale. Nangu ca kuti Samsone alikwete amafya pa fyo asalilepo ukucita, talekele ukucita ifyo Yehova alefwaya ukuti acite. Na ifwe bene, nangu twalufyanya, batusalapula, nelyo batupoka ne milimo iyo tubomba mu cilonganino ca kwa Yehova, tatulingile ukuleka ukubombela Lesa. Muleibukisha ukuti Yehova ali-iteyanya ukutwelela. (Amalu. 103:​8, 9) Nangu twalufyanya, Yehova alatwalilila ukutumona ukuti twalicindama kuli ena nga filya fine alemona Samsone. w23.09 ibu. 6 amapara. 15-16

Ukushipikisha kwenu kulalenga Yehova alesekelela. Lelo ici tacilolele mu kuti Yehova asekelela pa mulandu wa kuti namukwata amafya. Awe! Icilenga Yehova alesekelela nimwe. Ukushipikisha kwenu e kulenga Yehova alesekelela. Cilatukoselesha sana ukwishiba ukuti ukushipikisha kwesu kulalenga Yehova alesekelela! (Amalu. 5:12) Ibukisheni ukuti Abrahamu alikwete amafya kabili ilyo ashipikishe, Yehova alisekelele. Yehova alemumona ukuti ni cibusa wakwe kabili ali umulungami. (Ukute. 15:6; Rom. 4:​13, 22) Na ifwe Yehova kuti alatumona ukuti tuli balungami kabili tuli fibusa fyakwe. Icilenga Yehova alesekelela te milimo iingi iyo tubomba nelyo uko tumubombela. Lelo icilenga ni co tulatwalilila ukushipikisha amafya ne cishinka. Kabili te mulandu no mushinku, ifyo ifintu fyaba, nelyo ifyo twingakumanisha ukucita, bonse fye kuti twatwalilila ukushipikisha. Bushe kuli ubwafya ubo muleshipikisha pali ino nshita? Nga ca kuti muleshipikisha, ninshi mulelenga Yehova ukusekelela. Ukwishiba ukuti tulelenga Yehova ukulasekelela kulalenga twacetekela ukuti ifyo atulaya fikacitika. w23.12 ibu. 11 amapara. 13-14

Umwaume Umwina Kristu afwile ukwishiba ifya kulanshanya bwino na bantu. Umwaume uwaishiba ifya kulanshanya bwino na bantu alakutika kabili aleshiba ne fyo abo alelandako baleumfwa nelyo ifyo baletontonkanya. (Amapi. 20:5) Kuti aishiba ifyo umuntu aleumfwa nga aumfwa ifyo ishiwi lyakwe lileumfwika, ifyo alecita pa menso, e lyo ne fyo alebomfya umubili. Te kuti musambilile ukucite fi nga ca kuti tamusangwa na bantu. Nga ca kuti tulabomfya sana meseji ya pa intaneti nelyo meseji ya pa foni pa kulanshanya na bantu, kuti calenga twalafilwa ukulasangwa nabo. Kanshi mulelanda sana na bantu ukucila ukubalembela fye meseji. (2 Yoh. 12) Umwaume umukalamba mu fya kwa Lesa afwile ukwishiba ifya kulaisunga e lyo no kusunga bwino ulupwa lwakwe. (1 Tim. 5:8) Mufwile ukusambilila imilimo iingalenga mwakwata incito ya kubomba. (Imil. 18:​2, 3; 20:34; Efes. 4:28) Mulebombesha kabili mulepwisha umulimo mwatendeka ukubomba. Nga mulecita ifi abantu bakulamona ukuti mulabombesha kabili mukasanga ne ncito iikalenga mukaleisunga. w23.12 ibu. 27 amapara. 12-13

Baibo nga yalanda pa “bushiku bwa kwa Yehova,” ninshi ilelanda pa nshita ilyo Yehova akonaula abalwani bakwe kabili ilyo akapususha abantu bakwe. Ku kale, Yehova inshita shimo alekanda inko. (Esa. 13:​1, 6; Esek. 13:5; Sefa. 1:8) Muno nshiku “ubushiku bwa kwa Yehova” buli no kutendeka ilyo Babiloni Mukalamba bakamusansa, kabili bukapwa pa nkondo ya Armagedone. Pa kuti tukapusuke ubu “bushiku,” tulingile ukuipekanya pali ino ine nshita. Yesu asambilishe ukuti tulingile ukuipekanya ku “bucushi bukalamba” no kutwalilila ‘ukuba abaiteyanya.’ (Mat. 24:21; Luka 12:40) Muli kalata ya kubalilapo iyo umutumwa Paulo alembeele abena Tesalonika, alilandile pa filangililo ifingi ifyalengele Abena Kristu ukulaipekanya ku bushiku bukalamba ubwa bupingushi ubwa kwa Yehova. Paulo alishibe ukuti ubushiku bukalamba ubwa kwa Yehova tabwali no kwisa pali ilya nshita alembele aya mashiwi. (2 Tes. 2:​1-3) Na lyo line, alyebele aba bwananyina ukulaipekanishisha kuli bulya bushiku kwati nalimo bwali no kwisa ubushiku bwakonkelepo. Kabili na ifwe bene kuti twasambililako ku fyo abebele. w23.06 ibu. 8 amapara. 1-2

Mu 1978, mu Tokyo ku Japan, balikuulile icikuulwa icitali sana, ica ntunti 60. Abantu bamo baletwishika nga ca kuti cilya cikuulwa cali no kutwalilila ukubako, pantu muli ulya musumba mwalecitika sana ifinkukuma. Finshi abalekuula cilya cikuulwa bacitile pa kuti tacibongolweke nga kwaba icinkukuma? Bainjiniya abalekuula ici cikuulwa, bacikulile mu musango wa kutila kuti catenkana lelo te kuti cibongoloke. Abena Kristu nabo baba kwati ni cilya cikuulwa. Baba shani nga cilya icikuulwa? Nangu ca kuti Umwina Kristu afwile ukuba uushitelententa, tafwile ukuumina kumo. Lyonse afwile ukuba uwakosa kabili uwashangila pa kuti aleumfwila amafunde ya kwa Yehova. Alaba “ne cumfwila” muli fyonse. Na lyo line, ‘tapampamina fye pa cintu cimo,’ lelo alaaluka nga nacilinga ukwaluka. (Yako. 3:17) Umwina Kristu uwasambilila ukucita ifi, takalepampamina fye cintu cimo nelyo ukutekelesha fimo. w23.07 ibu. 14 amapara. 1-2

Yesu alingile ukukaana Satana Kaseebanya uwalemutunka ukuti etwalilila ukuba uwa cishinka kuli Lesa. (Mat. 4:​1-11) Satana alefwaisha sana ukuti Yesu abembuke pa kuti ekalipila icilubula. Ilyo Yesu alebomba umulimo wakwe pano isonde kwali amafya na yambi ayo alingile ukushipikisha. Abalwani bakwe balemucusha kabili balefwaya ukumwipaya. (Luka 4:​28, 29; 13:31) Alingile ukushipikisha ukukanapwililika ukwa basambi bakwe. (Marko 9:​33, 34) Ilyo balemulubulwisha, balimumine kabili balemupumya. Lyena balimwipeye kwati cipondo kabili alyumfwile sana ubukali pa mulandu ne nshila bamwipailemo. (Heb. 12:​1-3) Alishipikishe ubwesho bwa kulekeleshako ukwabula ukuti Yehova amucingilile. (Mat. 27:46) Ukwabula no kutwishika, Yesu aliculile sana pa kuti atulubule. Nga twatontonkanya pa fyo Yesu aipeeleshe ukupeela icilubula pa mulandu wesu, tulamutemenwako. w24.01 amabu. 10-11 amapara. 7-9

Tulingile ukuba abatekanya pa kuti tube ifibusa na bantu. Ukutekanya kulalenga tulekutikisha ilyo bambi balelanda. (Yako. 1:19) Na kabili ukutekanya kulalenga twaba aba mutende na bantu. Nga tuli abatekanya tatwakula-angufyanya ukucita ifintu fimo nelyo ukulanda amashiwi ayabipa nga natusakamikwa. Kabili nga tuli abatekanya, tatwakulafulwa bwangu abantu nga batukalifya. Mu nshita ya kulabwesesha ububi pa bubi, tukatwalilila ‘ukulashipikishanya no kubelelana uluse.’ (Kol. 3:​12, 13) Ukuba abatekanya kuti kwatwafwa ukusalapo bwino ifya kucita. Mu nshita ya kula-angufyanya ukusalapo ifya kucita, tukalateka umutima no kufwailapo ifyebo. Lyena pa numa tukalasalapo bwino ifya kucita. Ku ca kumwenako, nga tulefwaya incito nalimo kuti twasumina fye ukubomba incito iili yonse. Nomba nga natutekanya, tukatontonkanya pa fyo ikakuma ulupwa lwesu na bucibusa twakwata na Yehova. Nga tuli abatekanya, tukalasala bwino ifya kucita. w23.08 ibu. 22 amapara. 8-9

Nga ca kuti mwafuupuka pa mulandu wa kuti mufwile ukulalwisha ulunkumbwa, ukutontonkanya pa fyo mwalaile Yehova ilyo mwaipeele kuli ena, kukalenga mukatwalilile ukulwisha amatunko. Mulandu nshi twalandila ifi? Nga mwaipeela kuli Yehova ninshi mwaikaana. Ici cipilibula ukuti namusalapo ukukaana ukucita ifintu ifyo mwingafwaya ukucita ne fintu fimbi ifingakalifya Yehova. (Mat. 16:24) E ico nga mwaeshiwa, tamwakapoose inshita ya kulatontonkanya pa fyo mufwile ukucita pantu ninshi mwalisalapo kale ica kucita, e kutila ukutwalilila ukuba aba cishinka kuli Yehova. Mukalafwaisha ukulenga Yehova alesekelela nangu ubwesho bukule shani. Na imwe mukaba nga Yobo. Nangu ca kuti Yobo alikwete amesho ayakalamba, alandile no mutima wakwe onse ati: “Nshakaleke icintu nangu cimo cikalenge nkaleke ukuba uwa kaele mpaka nkafwe!”—Yobo 27:5. w24.03 ibu. 9 amapara. 6-7

Yehova “Lesa wa kutemwa,” aba na ifwe. (2 Kor. 13:11) Alitubikako amano. Twalishininkisha ukuti “ukutemwa kwakwe ukushipwa kulatucingilila.” (Amalu. 32:10) Nga twatontonkanya sana pa fyo Yehova atutemwa, tulamona ifyo atusakamana kabili tulaba sana ifibusa nankwe. Kuti twapepa kuli ena inshita iili yonse no kumweba ifyo tufwaya ukuti tulafwaya ukuti atutemwe. Kuti twamweba fyonse ifitusakamike no kucetekela ukuti alatuumfwa, kabili alafwaisha ukutwafwa. (Amalu. 145:19) Nga filya fine tumfwa bwino nga twapalama ku mulilo ilyo kutalele, e fyo na ifwe tumfwa pa mulandu wa kuti Yehova alitutemwa. Nangu ca kuti Yehova alikwatisha amaka, wa cikuuku. Kanshi mulesekelela pantu Yehova alimutemwa. Kabili na ifwe apo Yehova alitutemwa, natulelanda amashiwi ya kuti: “Nalitemwa Yehova”!—Amalu. 116:1. w24.01 ibu. 31 amapara. 19-20

Yesu tapelelele fye pa kweba abantu ukuti ishina lya kwa Lesa ni Yehova. AbaYuda abo Yesu alesambilisha balishibe kale ishina lya kwa Lesa. Lelo Yesu e wali pa ntanshi mu kulondolola Yehova. (Yoh. 1:​17, 18) Ku ca kumwenako, Amalembo ya ciHebere yalanga ukuti Yehova wa luse kabili wa mutembo. (Ukufu. 34:​5-7) Yesu alilangile ukuti aya amashiwi ya cishinka ilyo alandile pa cilangililo ca mwana wapondweke e lyo na wishi. Nga twabelenga ifyo ulya wishi acitile ilyo amwene umwana wakwe ninshi “acili ukutali,” tuleshiba bwino bwino ifyo Yehova aba no luse e lyo no mutembo. (Luka 15:​11-32) Ilyo amumwene alimubutukile, alimukumbatile, kabili alimubelele uluse ukufuma pa nshi ya mutima. Yesu alilenga twaishiba bwino ifyo Wishi aba. w24.02 ibu. 10 amapara. 8-9

Yehova alatusansamusha nga tuli na macushi. Kuti twapashanya shani Yehova no kuba no luse ilyo tulesansamusha bambi? Inshila imo, kuba ne mibele iingalenga twalafwaya ukusansamusha aba bwananyina. Mibele nshi iyo yine tulingile ukukwata. Finshi fingalenga twatwalilila ukuba no kutemwa ukwingalenga tulesansamusha aba bwananyina cila bushiku? (1 Tes. 4:18) Tulingile ukuba ne mibele pamo nga ukulangulukilako bambi, ukutemwa aba bwananyina e lyo no kuba ne cikuuku. (Kol. 3:12; 1 Pet. 3:8) Bushe iyi mibele kuti yalenga shani twalalanga ukutemwa ku ba bwananyina? Nga tuleumfwila aba bwananyina uluse kabili natubabikako amano, tukalafwaisha sana ukubasansamusha nga bali na mafya. Yesu atile, “umuntu alanda ifyaisula mu mutima wakwe. Umuntu umusuma afumya ifisuma mu cipao cakwe icisuma.” (Mat. 12:​34, 35) Nga tulesansamusha aba bwananyina ilyo bali na mafya ninshi tulelanga ukuti twalibatemwa icine cine. w23.11 ibu. 10 amapara. 10-11

Tulingile ukulomba ukuti batwafwe pa kuti tumfwikishe amasesemo yaba mu Baibo. Natulandeko pa ca kumwenako. Elenganyeni ukuti mwaya ku cifulo cimo uko mushaishiba bwino. Nomba uo muli nankwe ena alishiba bwino iyo ncende. Naishiba bwino uko muli kabili naishiba no musebo mule-endamo uko waya. Ukwabula no kutwishika kuti mwatemwa ukuti cibusa wenu acisumina ukumushindika! Ifi fine e fyo na Yehova aba. Aba kwati ni ulya cibusa. Alishiba bwino inshita tulipo e lyo ne fikacitika ku ntanshi. Kanshi pa kuti tumfwikishe bwino amasesemo yaba mu Baibo, tulingile ukumulomba ukuti atwafwe. (Dan. 2:28; 2 Pet. 1:​19, 20) Nga filya fine abafyashi bafwaya abana babo ukwikala bwino, e fyo na Yehova na o afwaya ukuti abana bakwe bakekale bwino ku ntanshi. (Yer. 29:11) Nomba ukupusanako ku bafyashi abantunse, Yehova ena aleshiba ifili no kucitika ku ntanshi kabili ifyo atweba e ficitika. Yehova alisalile abaume ukulemba amasesemo mu Baibo pa kuti twishibe fimo ifyacindama ifili no kucitika ku ntanshi ilyo tafilacitika.—Esa. 46:10. w23.08 ibu. 8 amapara. 3-4