Ubupingushi Bwa Kulekelesha
“LINTU wafwa umweo obe ukalungulushiwa weka; ico cikaba e helo kuli wene: lelo pa bushiku bwa bupingushi umubili obe ukailunda ku mweo obe, kabili lyene ukakwata ba helo babili, umweo obe ulepiba amatoni ya mulopa, no mubili obe ukufimbilikishiwa mu kukalipwa.”
IFI e fintu kashimikila C.H. Spurgeon uwa mu mwanda wa myaka uwalenga 19 alondolwele imimwene ya bashibutotelo iya bushiku bwa bupingushi no bucushi bwa batiipwa. Uwaishiba ukulenga umwina Italy Michelangelo akwete icisumino capalako icakulengo munsokwe, nga fintu cingamonwa mu cikope alengele “Ubupingushi bwa Kulekelesha” (ulubali lwa ciko ululangilwe pa mulu), pa cibumba ca kalicalici ka Sistine mu Rome. The New Encyclopædia Britannica isosa ulwa ici cikope ca kulenga ukuti: “Kristu mu Bupingushi ni lesa uutiinya ukucila ukuba kalubula wa Bwina Kristu, uwayangwa apakalamba no kutiipa umushobo wa buntunse ukucila ukupokelela abapaalwa mu mulu.”
Icifundisho ca Kristendomu
Mu myanda ya myaka iyapitapo, ubushiku bwa bupingushi no mulilo wa helo yali mitwe yatemwikwa ku malyashi. Ukufuma pa fisebele fyabo, kashimikila ukupala C. H. Spurgeon asosele mu kukosa mu kuba no kulangisha kwa fikope ukwa kulungulusha kwabipisha ukulolela ababembu. Muli shino nshiku, ulya musango wa kushimikila taumfwika ilingi line. Lelo umulilo wa helo no bupingushi bwa kulekelesha ficili fisambilisho fya mwi funde ku macalici ayengi.
Icinabwingi ca mabutotelo ya Kristendomu ilingi line balasuminishanya ne cisambilisho ca ciRoma Katolika ukuti amapingushi ya kwa Lesa yesa mu fiputulwa fibili. Ica kubalilapo, kwabako “ubupingushi bwaibela.” Lintu umuntu afwa, umweo wakwe uwatunganishiwa ukuba umunshifwa ulapingulwa ilyo line no kupeelwa ku kusakamana kwa ciyayaya ku helo nelyo ku mulu.a Lyena kwaisa ubupingushi bwa kulekelesha, nelyo ubwa cinkumbawile, pa mpela ya nshita lintu imibili ya bafwa ibuushiwa no kulundana cipya cipya ne myeo yabo imunshifwa.
Pali ubu bushiku bwa bupingushi, imyeo mu mulu itwalilila ukuba mulya kabili ilalundana cipya cipya ne mibili iyo yalengwa iishingabola. Abo abalecula mu helo na bo batwalilila ukuba mulya, kabili imyeo yabo nayo ine ilundana ne mibili yabuushiwa, iishingabola. Ukulingana na bamo, ici cilenga ukucula kwabo ukucilamo ukukosa. Abo abacili aba mweo nga bantunse tabafwa. Bapingulwa ilintu bacili aba mweo kabili baya, “umubili no mweo” nge fyo, mu kulungatika ku mulu nelyo ku helo.
Ukucitikako kwa kushipikisha ukulunguluka kushingalandwa mu mulilo wa helo kwalilenga ilyashi lyonse ilya bupingushi bwa kupelako mu maboko ya kwa Yesu Kristu icintu cimo ica kutiinya ukutontonkanyapo. Mu cilolwa ca ici, bushe kuti wapapa ukwishiba ukuti, mu cishinka, amapingushi ya kwa Lesa ilingi line yaba ca kulenga ukusekelela no kuti Ubushiku bwa Bupingushi bwakwe bukaba ni bumo ubwa nshita shacilapo insansa mu lyashi lya kale lyonse ilya buntunse? Ni shani fintu ici cingaba?
[Futunoti]
a BaRoma Katolika basumina na mu cingacitikako ica butatu: ukukandwa kwa pa kashita akepi mu mutwala pa ntanshi ya kwingila kwa kulekelesha mu mulu.
[Abatusuminishe Ukubomfya Icikope pe bula 3]
Random/Sipa Icono