Bakabilisha ba Bufumu Bacita Lipoti

‘Ukulobolola’ mu Venezuela

Pa kashita kamo Yesu apashenye umulimo wa kushimikila ku kulobolola kwa pa mwaka. (Mateo 9:36-38) Umwine wa kulobolola ni Yehova Lesa, kabili ukulobolola mu cine cine kukalamba ukushinguluke cibulungwa conse. Ici cisanshamo icifulo ca kubombelamo icishibombwamo libili libili mu Venezuela.

Iofesi lya musambo wa Venezuela ilya Watch Tower Society lyacita lipoti icacitike lintu ibumba lya Nte babombele mu cifulo ca kubombelamo ica Sabana Grande, mu citungu ca Guárico. Inte bashimika ukuti: “Iŋanda twali no kwikalamo yali cifulo icisuma ukukwatilamo ukulongana, e co ilyo line twatampile ukulaalika abantu ku kulongana kulya. Abantu tabaishibe pa lwa Nte sha kwa Yehova. Nangu cingati mwalimo amabumba ya ba evangeli yane mwi tauni, abantu balefwaisha ukusambilila ukufuma muli Baibolo.

“Twabombele pa maawala yatatu mu lucelo na maawala yatatu mu cungulo kasuba, ukutandala ukufuma ku ŋanda ne ŋanda no kulaalika abantu ku kulongana ubushiku bwakonkelepo. Tatwakwete mipando, e co twabalaalike ukuiletela imipando yabo. Lintu inshita yapaleme ku kulongana ukutendeka, abantu batampile ukwisa, umo umo nasenda umupando. Lintu ukulongana kwapwile, twabebele ifyo kuti twatemwa ukulemba amashina ya abo abalefwaya ukukwata isambililo lya Baibolo ilya mu ŋanda ilya pa fye. Bonse 29 abasangilweko balefwaya amashina yabo ukuba pa mutande.

“Ilyo twaleisala iciibi ku numa ya kuya kwa mutandashi wa kulekelesha, twamwene abaume batatu nabeminina mupepi ne cifutu ca ŋanda. Mupepi na 9 koloko, twali abaipekanya ukwikala pa nshi ku kulya lintu bakunkunshishe pa ciibi. Baipwishe ifipusho pamo nge fi: ‘Cinshi cili uku kushimikila mulecita muli lino itauni? Mulandu nshi mwacikwatila ukulongana muno ino nshita ya bushiku?’

“Twalipwishe nga ca kuti twalitobele ifunde ilili lyonse. Bayaswike ukuti iyo kabili basosele ukuti bali ni bashimapepo ba macalici yatatu aya evangeli aya mwi tauni. Balikalifiwe pa mulandu wa kuti amacalici yabo yali ayabulwamo abantu cilya cungulo bushiku. Twabalaalike ukwingila kabili twalondolwele umulimo wesu. Na kabili twashalike ifitabo fimo kuli bene kabili twabepwishe ukubwela pali Cine ubushiku bwakonkelepo.

“Pali Cine ubushiku bwakonkelepo bashimapepo balibwelele kabili mu kuba na bene abantu bambi 22 abalefwaya ukumfwa ico twali no kusosa. Bashimapepo batontonkenye ukuti, pa kuba abanakashi, tatwali no kulingana nabo mu kulanshanya. Nangu ni fyo, ukulongana kwalitungulwike ukufuma ku mimwene yesu. Pa mpela twalondolwele ukuti twalepanga umutande wa abo abalefwaya ukusambilila ifyafula ukufuma muli Baibolo. Impendwa ya banabo ba bashimapepo balefwaya amashina yabo ukulundwa ku mutande, kabili bamo basosele fye no kuti balefwaya ukuya na ifwe mu mulimo wa kushimikila!

“Twalilondolwele ukuti balekabila ukwishiba kwa Baibolo ukwalundwapo no kukansha pa ntanshi tabalailunda kuli ifwe mu mulimo wa kushimikila. Cila bushiku abantu baleisa ku ŋanda, ukutwipusha ukubalondolwela Baibolo. Limo limo, lintu twalandile ukufika mu kutantalila kwa bushiku, twali no kubepusha ukuya ku mwabo. Lintu mu kupelako twali no kusha ici cifulo ca kubombelamo, bali aba bulanda nga nshi kabili batwebele ukuti lintu tukabwela, baali no kuya na ifwe mu mulimo wa kushimikila. Balaile ukuti ukufika iyo nshita bakaba nabapanga ukulunduluka kukabilwa.”

Lintu Inte shashile cilya cifulo ca kubombelamo, kwaliko abantu 40 abalefwaya ukusambilila Baibolo. Amashina ya aba bantu ba kusekelela yapeelwe ku cilonganino cabela mupepi, icali mupepi na makilomita 50 akatalamukila. Mu kukonkapo, Inte shimo ukufuma ku musumba umbi shaliselela muli ili itauni, kabili ibumba lya bakabilisha bapimpa aba mbila nsuma lyalipangwa.