Ifipusho Ukufuma ku Babelenga

Bushe tulingile ukusondwelela ukufuma pali Mateo 11:11 ukuti Yesu alishibile kabela ukuti Yohane Kabatisha aali no kufwa pa ntanshi ya kwa Yesu?

Ee, Yesu mu kumonekesha alishibe ukuti Yohane tali no kutwalilila umumi ku kuba Umwina Kristu wasubwa, pantu Yesu alandilepo ukuti: “Ndemwebe cine cine, nati, mu bafyalwa ku banakashi tamwaimine uwacila pali Yohane Kabatisha; lelo uwacepesha mu bufumu bwa mu mulu mukalamba kuli wene.”—Mateo 11:11.

Lintu malaika Gabriele abilishe ukufyalwa kwaleisa ukwa kwa Yohane, asobele ukuti Yohane aali, “mu mupashi na maka ifya kwa Eliya . . . ku kupekanishisha [Yehova, NW] abantu abateyanishiwa.” Yohane aali no kuba uwa kutangilila, ukupekanishisha abantu kuli Mesia wa kwa Yehova. Lelo tapali icili conse muli kulya kubilisha kwa bulesa icalangilile ifyo Yohane umwine aali no kuba umusambi wa kwa Mesia waleisa, kabili takwaliko ukutubulula ukulola kuli iyo mpela mu kulumbulula kwa busesemo ukwacitilwe na wishi wa kwa Yohane, Sekaria.—Luka 1:17, 67-79.

Muli ifyo, pa numa ya kubatisha Yesu, Yohane atwalilile ukushimikila no kubatisha, ukukakatila ku mulimo wakwe ku kupekanya abantu. Yohane mu cipesha amano alishibe ukuti Yesu aali no kupayanya ulubatisho no mupashi wa mushilo, lelo Yohane tasosele ukuti wene umwine wine aali no kupokelela umupashi wa mushilo, ukuba Umwina Kristu wasubwa. (Mateo 3:11) Yohane na kabili alishibe ukuti aali no kutwalilila ukucepelako, ilintu Yesu aali no kutwalilila ukukulilako.—Yohane 3:22-30.

Lintu Yesu asosele cintu twacibelenga pali Mateo 11:11, Yohane aali kale kale nabikwa mu cifungo. Yesu acilengele ukwishibikilwa libela ukuti uyu kasesema wabikwa mu cifungo aali uwacepako ukucila pa wacepesha uyo ku nshita ya ku ntanshi ali no kubomba pamo nga shimapepo imfumu mu mulu. Nalyo line, Yesu na kabili amoneke kwati alishibe ukuti Yohane aali no kufwa mu kwangufyanya, ukufuma pa mulola we sonde pa ntanshi inshila “ipya” ku bumi bwa mu mulu tailaisulwa. (AbaHebere 10:19, 20) Ico capilibwile ukuti Yohane taali na kutwalilila ukufikila Pentekoste 33 C.E., lintu ukusuba kwa basambi ba kwa Yesu no mupashi kwatendeke. E co, ukulandapo kwa kwa Yesu pali Mateo 11:11 kuti kwaumfwikwa na kabili ukuba kulangilila ukuti alishibe ukuti Yohane taali no kuya ku mulu.