Ukubuuka mu Kati ka Myaka Ikana Limo

ICIPIMO capalamako nga nshi ica mpendwa ya bantu ababala ababako aba mweo pe sonde caba amabilioni 20. Abasambi abengi aba uyo mutwe wa lyashi bapenda ukuti te mupepi na bafulisha nge fyo ababako aba mweo. Te bonse aba aba bakapokelela ukubuuka, lelo nangu fye kutunga ukuti balibuushiwe, te kuti kubeko impika ukulosha ku ncende ya kwikalamo ne fya kulya kuli bene. Icibalabansa ca mpanga ice sonde pali nomba cili mupepi na masikweya kilomita 148,000,000, nelyo mupepi na mahekita 14,800,000,000. Nangu fye kuleka citika wa ico ciputulwa ukubikwa pa mbali ku mifwaile imbi, kuti kwabako ukucila pa ciputulwa cimo muli fitatu ica hekita ku muntu umo umo. Ukulosha ku kupayanya kwa fya kulya ukwenekelwa ukwe sonde, mupepi ne ciputulwa cimo muli fitatu ica hekita mu cituntulu cikapayanya ifyafulisha nga nshi ku muntu umo, ukucilisha, nga fintu Lesa alangisha mu mulandu wa luko lwa bena Israele, lintu kuliko ifya kulya fyapaka pamo nga ica kufumamo ce paalo lya kwa Lesa.—1 Ishamfumu 4:20; Esekiele 34:27.

Ukwisa ku cipusho ca maka ya kupayanya ifya kulya aye sonde, United Nations Food and Agriculture Organisation itunga ukuti, mu kuba no kulunduluka fye kunono mu nshila sha fya bulimi, nangu fye ni mu fyalo filelunduluka isonde mu kwanguka kuti lyapayanya ifya kulya ukufika ku miku pabula mu bwingi bwa bantu ubo basayantisiti bapima ku mwaka wa 2000.—Land, Food and People, Rome, 1984, amabula 16, 17.

Ni shani, lyene, fintu amakana ya mamilioni bengasakamanwa mu kukumanina, mu cilola ca cishinka ca kuti abengi aba bene mu nshita ya pa kale tabaishibe Lesa kabili bafwile ukusambilila ukumfwila amafunde yakwe kuli bene? Mu kubalilapo, Baibolo ilondolola ukuti ubufumu bwa pe sonde “bwaisabo bwa kwa Shikulwifwe, no bwa kwa Kristu wakwe, na o [ateka nge] Mfumu umuyayaya umuyayaya.” (Ukusokolola 11:15) Kabili icishinte ca Baibolo ca kuti “ilyo ifya bupingushi [fya kwa Yehova] fyaba pano isonde, e lyo abekashi ba pano nse basambililo bulungami.” (Esaya 26:9) Mu nshita yakwe iyalinga, lintu caba icafwaikwa ukucilengo kwishibikwa ku babomfi bakwe, Lesa akasokolola fintu afwaya ukusakamana uyu mulimo.—Amose 3:7.

Nangu ni fyo, icilangililo cisokolola icintu cayanguka, icibomba ico Yehova akwatila umutundu wa muntu mu muntontonkanya. Te kusesema, lelo ku mifwaile fye ya cilangililo, natutile abo abapanga “ibumba likalamba” ilya bantu balungama “abafuma mu Bucushi bukalamba” aba mweo muli ino micitile ya fintu (Ukusokolola 7:9, 14) bafika ku mpendwa ya 3,000,000 (mupepi na 1/1666 iya bwingi bwa bantu ubwa ndakai ubwe sonde). Lyene nga ca kuti, pa numa ya kusuminisha, tutile, imyaka 100 ukupooswa pa kukanshiwa kwabo na mu ‘kwisushe’ iciputulwa ce sonde (Ukutendeka 1:28), Lesa afwaya ukubuusha maperesenti yatatu ya iyi mpendwa, ici kuti capilibula ukuti umuntu umo umo uwabuushiwa kuti asakamanwa ku bantu bakanshiwa 33. Apantu ukwingilishiwako kwa cila mwaka ukwa maperesenti yatatu, ukubikwa pamo, kulefusha imiku ibili impendwa mupepi na cila myaka 24, abantu bonse amabilioni 20 kuti babuushiwa pa ntanshi imyaka 400 iya Kuteka kwa kwa Kristu ukwa Myaka Ikana Limo tailapwa, ukupeela inshita ikalamba ku kukansha no kupingula ababuushiwa ukwabula ukupumfyanya ukumfwana no muyano pe sonde. Muli ifyo Lesa, mu kuba na maka yakwe yonse na mano, kuti aleta imifwaile yakwe ku nsondwelelo ya kusungusha mu kukumanina mu kati na nkati ka cimpangilile ca mafunde no kutantika ifyo apangila umutundu wa muntu ukufuma ku kutendeka, mu kuba no kusenamina kwalundwako ukwa kubuuka.—Abena Roma 11:33-36.