Mwaiseni Ku Mabungano ya Citungu aya “Bakasenda ba Lubuuto”

UBUSHIKU bwa kubalilapo bwine ubwa nshiku sha kubumba bwamwene ukulengwa kwa lubuuto ukulosha kwi sonde. Tubelenga ukuti Yehova Lesa atile: “Napabe ulubuuto.” Kabili “e lyo pali ulubuuto.” (Ukutendeka 1:3) Ico cili mu kumfwana na cintu umutumwa Yohane alembele ukuti: “Lesa lubuuto, na muli wene tamwaba mfifi nakalya.”—1 Yohane 1:5.

Apantu Umwana wa kwa Lesa aba muli Wishi, tacili ca kupapusha ukuti Yesu inshita imo asosele ukuti: “Ndi lubuuto lwa calo.” (Yohane 9:5) Kuti twafuma mu mfifi no kwisa mu lubuuto pa kubika icitetekelo muli Yehova Lesa no Mwana wakwe. Yesu na kabili ashininkishe ukuti: “Ine naiso lubuuto pano isonde, ukuti onse uuntetekela eikala mu mfifi.” (Yohane 12:46) Mu kulungika, kanshi, Yesu Kristu asosele ulwa bakonshi bakwe aba cine ukuti: “Imwe muli lubuuto lwa pano isonde. . . . Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu mulu.”—Mateo 5:14, 16.

Fintu caba lipaalo ukukwata icine, ukumfwikisha kwa Cebo ca kwa Lesa nga fintu calengwa ukumfwika ku “musha wa cishinka kabili uwashilimuka”! (Mateo 24:45-47) Tatupelenganishiwa na kabili ku cisumino ca muli Bulesa Butatu; tatufulunganishiwa na kabili pa lwa mulandu Lesa wa maka yonse kabili uwa kutemwa asuminishisha ububifi no lukaakala; tatwaba na kabili mu kutwishika ukulosha ku mibele ya bafwa. Ulubuuto lwalitupeela isubilo, isubilo lya Bufumu. Lwalitusokolwela ifyo Lesa aba Kabumba wa kusungusha. Ulubuuto lwa cine lwalitupeela imifwaile mu bumi, ku kubombela imifwaile intu twabumbilwe mu kutendekelako, ku kukatamika Kalenga wesu, Yehova Lesa. Ici tulacita pa kuba bakasenda ba lubuuto. Ukuba bakasenda ba lubuuto caba mucinshi ukalamba ne shuko, lelo na kabili caba cishingamo cakatama. Ku kufikilisha ico cishingamo, tulekabila ukubomfya ukwaafwa konse uko Yehova apayanya. E co fintu cili icalinga ukuti amabungano yesu aya citungu aya 1992 yalingile ukwitwa Amabungano ya Citungu aya “Bakasenda ba Lubuuto”!

Pa kulundulula fyonse fibili ukulamuka kwesu no kutesekesha kwa lubali lwesu pamo nga bakasenda ba lubuuto, tukafwaya ukusangwa mu kucepako kuli limo ilya aya mabungano, ukubapo ku lwimbo lwa kwiswila no kutwalilila ukufikila ipepo lya kusondwelela. Kabili tukafwaya ukupeelako ukusakamana kuli fyonse ifilelandwa pa cisebele, nampo nga ni mu malyashi, ukwipusha, ifyakukumanya, nelyo icilangililo. Ukulembe fishinka takutupeela fye ifya kuloshako pa numa ku kubukulula ifibukisho fyesu lelo kulatwafwa apakalamba ukutontomesha pa cilelandwa. Ee, bonse mu kati ka programu ye bungano, tukafwaya ‘ukucenjela ku fyo tuumfwa.’—Luka 8:18.