Ulubatisho “mu Kati ke Shina Lya”

UKUFWAILISHA kwa makana ya fyalembwa fya pa kale ifya macinda ifya ku calo ifyasangilwe mu musensenga wa mu Egupti pa kutampa kwa uno mwanda wa myaka ilingi line fipeela ulubuuto lwa kusekesha pa Amalembo ya Bwina Kristu aya ciGreek. Shani? Pa kulanguluka inshila umo amashiwi yamo yabomfiwe, tulatungululwa ku kumfwikisha kwacilapo ukulungatika ukwa mashiwi yamo yene lintu yabomfiwa mu Malembo.

Ica kumwenako cimo caba kubomfya kwa kwa Yesu ukwa “mwi shina lya” lintu akambishe abasambi bakwe pa ntanshi talanina ku mulu: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo.” Cinshi cintu Yesu apilibwile?—Mateo 28:19.

Abasambilila basanga ukuti mu fyalembwa fya ku calo inumbwilo “mwi shina lya,” nelyo “mu kati ke shina lya” (Kingdom Interlinear), ibomfiwa mu kuba no kulosha ku malipilo “kuli akaunti ya uli onse.” Profesa wa fya butotelo Dr. G. Adolf Deissmann asumine ukuti mu cilolwa ca bushininkisho ukufuma ku macinda, “imfundo iilekomaila . . . pa numbwilo sha kubatisha mu kati ke shina lya kwa Shikulu, nelyo ukusumina mu kati ke shina lya Mwana wa kwa Lesa, yaba ya kuti ulubatisho nelyo icitetekelo cipanga ukuba uwa kwa Lesa nelyo uwa Mwana wa kwa Lesa.”—utulembo tunono utwa kwa Deissmann.

Ku ca kusekesha, inumbwilo imo ine yalibomfiwe na baYuda ba mu kasuba ka kwa Yesu, nga fintu calondololwa muli Theological Dictionary of the New Testament ukuti: “Ukusembululwa kwa nsangu kucitwa . . . ‘mwi shina lya nsangu,’ pa kumupokelela mu buYuda. Uku kusembululwa kucitwa . . . ‘mwi shina lya cipingo,’ pa kumupokelela mu cipingo.” Muli ifyo ukwampana kulemikwa kabili uushili muYuda esa mu kuba insangu pe samba lya bulashi bwa cipingo.

E ico ku Mwina Kristu, ulubatisho ukukonka pa kuipeela lwimika ukwampana kwapalamisha na Yehova Lesa, Umwana wakwe Yesu Kristu, no mupashi wa mushilo. Uwaalulwa eshiba ubulashi bwa umo umo mu nshila yakwe iipya iya bumi. Languluka fintu ici cili ica cine kuli cimo cimo ica fitatu ifilumbwilwe.

Pa kwishiba ubulashi bwa kwa Lesa, tulapalama kuli wene no kwingila mu kwampana na wene. (AbaHebere 12:9; Yakobo 4:7, 8) Twisa mu kuba icipe ca kwa Lesa nga basha bakwe, abashitwa no mutengo we lambo lya cilubula ilya kwa Yesu Kristu. (1 Abena Korinti 3:23; 6:20) Umutumwa Paulo na kabili aebele Abena Kristu ba mu mwanda wa myaka wa kubalilapo ukuti bali ba kwa Yesu Kristu, tabaali ba bantu abali bonse abo nakalimo abatwele icine kuli bene. (1 Abena Korinti 1:12, 13; 7:23; linganyeniko Mateo 16:24.) Ulubatisho mwi shina lya Mwana lutubulula ukwishiba ici cishinka, ukupokelela Yesu nge “nshila ne cine no mweo.”—Yohane 14:6.

Umupashi wa mushilo na o waliba uwakatama ku kwampana kwesu ukwalungama na Yehova na Yesu Kristu. Ulubatisho mwi shina lya mupashi wa mushilo lulangilila ukuti twalishiba ulubali lwa mupashi mu mibombele ya kwa Lesa na ifwe. Tufwaya ukukonka ubutungulushi bwa uko, te kuusaalula nelyo ukubomba mu kupusana na wene, ukucilikila ukubomba kwa uko muli ifwe. (Abena Efese 4:30; 1 Abena Tesalonika 5:19) Umusango ushili wa buntu uwa mupashi tauletako ubwafya ubuli bonse ukulosha ku mibomfeshe nelyo ubupilibulo, kwati fye fintu imibomfeshe “mwi shina lya cipingo” tayaletele ubwafya mu buYuda.

Pa nshita ya kuipeela no lubatisho, muli ifyo, tulakabila ukubelebesha mu kubamo ipepo pa cabimbwamo mu kwampana kwesu ukupya. Cifwaya ukuinashisha ku kufwaya kwa kwa Lesa, ukulangililwa mu ca kumwenako no kupayanya kwa cilubula ukwa kwa Yesu Kristu, ukucitwa ukupitila mu mupashi wa mushilo ilyo utungulula ababomfi ba kwa Lesa bonse mu kutemwa no kwikatana mu kusaalala kwa calo.